Wednesday, March 11, 2015

សម្តេច​តេជោ​​ណែនាំ​​ឲ្យ​​ពង្រឹ​ង​ការ​ផ្តល់​​សេវា​​សុខាភិ​បាល​​ជូន​​ប្រជា​​ពលរដ្ឋ​ និង​​គ្រប់​គ្រង​គ្រូ​ពេទ្យ​ឯកជន​​

ថ្លែង ​នៅ​ក្នុង​ពិធី​បិទ​សន្និបាតបូក​សរុប​ការងារ​សុខាភិបាលឆ្នាំ២០១៤ និង​លើក​ទិស​ដៅ​សម្រាប់​ឆ្នាំ​២០១៥ នា​ថ្ងៃទី​១០ ខែ​មីនា ឆ្នាំ​២០១៥ នៅ​ក្នុង​រាជធានី​ភ្នំពេញ សម្តេច​អគ្គ​មហា​សេនាបតី​តេជោ ហ៊ុន សែន នាយករដ្ឋមន្ត្រី​នៃ​ព្រះ​រាជាណាចក្រ​កម្ពុជា បាន​ចាត់​ទុក​ការ​ឆ្លង​ជំងឺអេដស៍ទៅ​លើ​ប្រជាពលដ្ឋ​នៅ​ភូមិរការ ស្រុក​សង្កែ ខេត្ត​បាត់ដំបង ជា​បទ​ពិសោធន៍​ដ៏​ធំ​សម្រាប់ក្រសួង​សុខាភិបាល​ សម្រាប់​ការគ្រប់​គ្រង​ក្រុម​គ្រូ​ពេទ្យ​ឯក​ជន ដែល​រ៉ាយប៉ាយ​នៅ​ទូទាំង​ប្រទេស។
សម្តេចតេជោ ​មាន​ប្រសាសន៍​ឲ្យ​ដឹងថា ដោយ​សារ​តែ​ប្រទេស​មាន​សុខ​ សន្តិភាព វិស័យ​សុខាភិបាល​មានការ​រីក​ចម្រើន​យ៉ាង​ឆាប់​រហ័ស ដែល​ក្នុង​នោះ​មានការ​ចូល​រួម​ពីវិស័យ​ឯកជន​ក្នុង​ការផ្តល់​សេវា​សុខាភិបាល​ តាម​រយៈ​នៃការបង្កើត​មន្ទីរ​ពេទ្យ​ធំៗ នៅ​ក្នុង​ព្រះ​រាជាណាចក្រកម្ពុជា ទន្ទឹម​នេះ​ឧបករណ៍​ពិនិត្យ​ព្យាបាល​ទំនើបៗ​ក៏​ត្រូវ​បាន​បំពាក់​ក្នុង​ មន្ទីរ​ពេទ្យ​រដ្ឋ​ផង​ដែរ។ សម្តេច​តេជោ​មាន​ប្រសាសន៍​បញ្ជាក់​ថា បច្ចុប្បន្ន​ការ​រីក​ដុះ​ដាល យ៉ាង​លឿន​នៃ​ផ្នែក​សេវា​សុខាភិ​បាលឯកជន ដែលមានអ្នកផ្តល់​សេវា​ច្រើន​ប្រភេទ និងនៅ​គ្រប់​ភូមិ​សាស្ត្រ ទាម​ទារ​ឱ្យ​ក្រសួង​សុខាភិបាល​ត្រូវ​បង្កើនសមត្ថ ភាព​និយ័ត​កម្ម​របស់​ខ្លួន​ឱ្យ​កាន់​តែ​រឹងមាំ​ថែម​ទៀត ដោយ​ត្រូវ​បង្កើន​នូវ​សមត្ថភាព​មន្ត្រី​ត្រួត​ពិនិត្យ និងមន្ត្រី​នគរ​បាល​យុត្តិធម៌​សុខា​ភិបាល និង​បង្កើន​កិច្ច​សហការ​ជាមួយ​ស្ថាប័ន​ពាក់​ព័ន្ធ​នានា និង​អាជ្ញាធរ​មាន​សមត្ថ​កិច្ចទាំង​នៅ​ថ្នាក់​ជាតិ និង​ថ្នាក់​ក្រោម​ជាតិ ដើម្បី​ធានា​ថា ផ្នែក​សុខាភិបាល​ឯកជន​ជា​ជម្រើស​ពិត​ប្រាកដមួយ ដែល​អាច​ទុក​ចិត្ត​បាន​សម្រាប់​ការ​ស្វែង​រក​ការថែទាំ​សុខភាព​របស់​ ប្រជាពលរដ្ឋ ពោល​គឺ​សេវា​សុខភាព ដែល​បាន​ផ្តល់​ដោយ​មាន​គុណភាព​តាម​ស្តង់ដារ​វេជ្ជសាស្ត្រ​ត្រឹមត្រូវ និង​មានគុណ​តម្លៃ​ពិត និង​សម​ស្រប​នោះ។
សម្តេច ​តេជោ​បាន​មាន​ប្រសាសន៍​បញ្ជាក់​ថា បញ្ហា​គ្រូពេទ្យ​ដែល​មិន​ច្បាស់លាស់ យើង​ត្រូវ​ពិនិត្យ​មើល​បញ្ហា​ហ្នឹង​ឡើងវិញ ដើម្បី​ធានាថា សេវាសុខភាព​ទាំង​រដ្ឋ ទាំង​ឯកជន របស់​យើង​ត្រូវបានធានា​ជូន​ប្រជា​ពល​រដ្ឋ​។
សម្ដេចតេជោ ​លើក​ឡើង​ថា ចំណុចនេះ​យើង​គប្បី​យក​ការពង្រឹង​ជា​មូលដ្ឋាន​នៅ​ក្នុង​វិស័យ​សុខាភិ​បាលនេះ ដែល​យើង​កំពុង​ដំណើរការ​ព្រមៗ​គ្នា ដោយ​ម្ខាង​គឺរដ្ឋ និងម្ខាង​ទៀត​គឺ​វិស័យឯកជន។
ជាមួយនឹង ​ការ​លើក​សរសើរ​ចំពោះ​មន្ត្រី​សុខាភិបាល ក៏​ដូចជាគ្រូពេទ្យ ដែល​បាន​រួម​ចំណែក​ក្នុង​ការ​ធ្វើ​ឲ្យ​វិស័យ​សុខាភិបាល​មាន​ការ​រីក​ចម្រើន​ នៅ​ក្នុង​ឆ្នាំ​២០១៤ កន្លង​មក​សម្តេចតេជោ​នាយករដ្ឋមន្រ្តី បាន​ផ្តល់​ការ​ណែនាំឲ្យ​មានពង្រឹង​ឥរិយាបថមន្ត្រី​សុខាភិ​បាល​ ក្នុង​ការ​ផ្តល់​សេវា​សុខាភិបាល​ជូន​ប្រជាពលរដ្ឋ​ឲ្យ​បានល្អ ​និង​មានគុណ​ភាព។ សម្តេច​តេជោ​មាន​ប្រសាសន៍​បញ្ជាក់​ថា គ្រប់​មន្ទីរពេទ្យ ទាំង​ពេទ្យ​បង្អែក និង​មណ្ឌល​សុខ​ភាព ចាំ​បាច់​ត្រូវ​មាន​គ្រូពេទ្យ​ប្រចាំ​ការ​នៅ​គ្រប់​ថ្ងៃ គ្រប់​ម៉ោង គ្រប់​ពេល​ទាំង​នៅ​ថ្ងៃ​ឈប់​សម្រាក និង​នៅ​ថ្ងៃ​បុណ្យជាតិ​នានា ដើម្បី​ធានា​ឲ្យ​មាន​ការផ្តល់​សេវា​ពិនិត្យ​ថែទាំ និង​ព្យាបាល​ជានិរន្ត ចំពោះ​អ្នក​ជំងឺ ហើយ​ត្រូវ​ជំរុញ​អនុវត្ត​ការងារ​នេះ ឲ្យបាន​ម៉ត់​ចត់​តាម​បទ​វិន័យ និង​ប្រកាន់​ខ្ជាប់​នូវ​ក្រមសីលធម៌​វិជ្ជាជីៈ​សុខាភិបាល។ សម្តេច​បន្ត​ថា បើ​មិន​មាន​អ្នក​ប្រចាំ​ទេ គឺ​គេ​មិន​ហៅថា មន្ទីរ​ពេទ្យទេ។ “គ្រូ​ពេទ្យ​ក៏​មិន​ខុសពីកងទ័ព​ប៉ុន្មាន​នោះ​ដែរ គឺ​នៅ​ពេល​មាន​បុណ្យជាតិ​ធំៗ គឺមិន​ដែល​បាន​នៅ​ជួប​ជុំ​គ្រួសារទេ  គឺ​ដោយ​សារ​តែ​ជាប់​ប្រចាំ​ការ ដើម្បី​ផ្តល់​សេវា​ផ្នែក​សុខភាព​ទៅ​ពលរដ្ឋ​នៅ​ពេលដែល​ពួក​គេ​មាន​ជំងឺ​នេះ គឺ​ជា​ការលះបង់​មួយ​យ៉ាង​ធំធេង”។
ទាក់ ​ទង​នឹង​ប្រជាពលរដ្ឋ​នៅ​ភូមិ​រកា​ដែល​ឆ្លង​ជំងឺអេដស៍ សម្តេចតេជោ​នាយករដ្ឋមន្ត្រី​បាន​មាន​ប្រសាសន៍​ថា រឿង​នៅភូមិ​រការ​នេះ យើង​ត្រូវ​ដោះ​ស្រាយ​មួយ​ជំនាន់មនុស្ស ព្រោះ​ដោយសារ​ឥឡូវ​នេះ ក្រុម​គ្រួសារខ្លះ​ដែល​មាន​សមាជិក​៦​នាក់ មាន ៤នាក់​ទៅ​ហើយ​ដែល​ផ្ទុក​ជំងឺ​អេដស៍ ហើយ​ក្នុង​ចំណោម ៤​នាក់នោះ មានខ្លះ​ទើប​តែ​មាន​អាយុ ២ឆ្នាំ​ប៉ុណ្ណោះ ដែល​យើងត្រូវដោះ​ស្រាយយ៉ាង​ម៉េច កុំឱ្យ​វារីក​រាល​ដាល​ចេញ​ពីភូមិ​រការ​ទៅ​កន្លែងផ្សេង។
សម្តេចតេជោ ​មាន​ប្រសាសន៍បន្ត​ថា ដើម​ឡើយ​ខ្ញុំ​អត់​ជឿថា ហេតុអ្វី​បាន​ជា​ជំងឺអេដស៍ ក្នុង​មួយ​ភូមិ​អាច​ចម្លង​មនុស្ស​ដល់​រាប់រយ​នាក់ ប៉ុន្តែ​ពេល​ដែល​ឆ្លង​កាត់​ការសិក្សា​ស្រាវ​ជ្រាវ​គ្រប់ជ្រុង​ជ្រោយ ខ្ញុំគិតថា​រឿងនេះ​ជារឿង​ធំ​ណាស់ ដែល​យើង​ត្រូវ​រៀបចំ​ផែន​ការ​ឱ្យ​បាន​ល្អិតល្អន់ សម្រាប់​តំបន់​ភូមិរការ​នេះ កុំឱ្យ​ជំងឺអេដស៍ដែល​បាន​ចម្លង​នៅ​ភូមិ​រការ ចម្លង​ទៅ​តំបន់​ដទៃ​ទៀត ឬ​ចម្លង​ក្នុង​ភូមិរការ​ខ្លួនឯង។
សម្តេចតេជោ ​មាន​ប្រសាសន៍​ថា បញ្ហា​នៅភូមិរការ​ជារឿង​គួរឱ្យ​សោកសៅ ហើយ​ស្តាយ​ណាស់ ដែល​ទាមទារ​ឱ្យ​យើង​ទាំងអស់​គ្នា​ត្រូវ​ធ្វើ​ការហ្មត់​ចត់ ដែលខ្ញុំសូម​អំពាវ​នាវ​ចំពោះ​ប្រជាពលរដ្ឋ សូម​ឱ្យជឿជាក់​ទៅ​លើផ្នែក​វេជ្ជសាស្ត្រ​របស់​អ្នកដែល​មាន​ជំនាញ​ត្រឹមត្រូវ​ ។
សម្តេចតេជោ ​នាយករដ្ឋមន្ត្រី​ថ្លែងថា យើង​បាន​ដាក់​បន្ថែម​នូវ​មធ្យោបាយ ដែល​យើង​ត្រូវ​រៀបចំ ហើយ​ការរៀបចំ​នេះ​ត្រូវ​រៀប​ចំឱ្យ​លម្អិត​តែម្តង មិន​គ្រាន់​តែ រៀបចំ​ជា​ក្រប​ខ័ណ្ឌ​ម៉ាក្រូ​ទេ ប៉ុន្តែ​ត្រូវរៀបចំ​ជាមីក្រូទៀត។ ​ ដូច្នេះដំណោះ​ស្រាយ​ចំពោះ​ពួកគាត់​ត្រូវ​ធ្វើ​យ៉ាង​ដូច​ម្តេច ដែល​រឿងនេះ​ត្រូវរៀបចំ​ដាច់​ដោយឡែក​មួយ ដើម្បី​ធានា​ថា ពួកគាត់​អាច​ទទួល​បាន​នូវជំនឿ​ជឿជាក់។
ដូច្នេះ ​ត្រូវ​រកវិធី​យ៉ាងណា​កុំឱ្យ​គេរើសអើង​ជាមួយ​គាត់ ហើយ​ឱ្យគាត់​ខ្លួន​ឯង​ទប់ស្មារតី​ឱ្យ​ជាប់​កុំទៅ​ចម្លង​អ្នកដទៃ។ បើទោះបី​ជាត្រូវ​បន្ថែម​នូវមធ្យោបាយ​អ្វីក៏​ដោយ គឺត្រូវ​តែ​បន្ថែម​ទៅ​កន្លែង​នោះ ដែល​តំបន់ដទៃ​ក៏អាច​ទៅ​រកសេវា​សុខាភិ​បាល​នៅ​តំបន់​នោះ​ផង​ដែរ។
ឯកឧត្ដម ម៉ម ប៊ុនហេង រដ្ឋមន្ត្រី​ក្រសួងសុខាភិបាល បាន​បង្ហាញ​នូវ​សមិទ្ធផល វិស័យ​សុខា​ភិបាល​ឆ្នាំ​២០១៤ ដែល​ក្នុង​នោះ​បានធ្វើ​ការកត់​សម្គាល់​ទៅ​លើ​សូចនាករ​សំ​ខាន់ៗ នៃ​កម្មវិធី​សុខភាព​បន្តពូជ មាតា ទារក និង​កុមារ ដែល​ជះឥទ្ធិពល​លើ​ការ​កាត់​បន្ថយ​មរណភាព​មាតា និង​មរណភាព​កុមារ នៅ​តែបន្ត​ស្ថិត​ក្នុងវឌ្ឍន​ភាព​គួរ​ឱ្យ​មោទនៈ។
សំរាប់ ​ទិសដៅ​ឆ្នាំ​២០១៥ វិស័យសុខាភិបាល​កម្ពុជា បន្ត​ផ្តោត​លើការ​បង្កើន​ការ​សម្រាល​កូនដោយ​ឆ្មប​ជំនាញ ពង្រីក​សេវា​សម្ភព​សង្គ្រោះ​បន្ទាន់ និង​សេវា​ថែទាំ​ទារក ពង្រីក​សេវា​ផ្តល់​មធ្យោបាយ​ពន្យារ​កំណើត បង្កើន​អត្រាគ្រប​ដណ្តប់​នៃការ​ផ្តល់ថ្នាំ​បង្ការ។ ពង្រឹង​វិធានការ​បង្ការ ពង្រីក​ការគ្រប់​ដណ្តប់ និង​ការកែ​លម្អគុណ​ភាព​សេវា​ថែទាំ​ព្យាបាល​ជំងឺឆ្លង និង​ជំងឺរ៉ាំរៃ ព្រមទាំង​បង្កើន​ប្រសិទ្ធិភាព​អន្តរាគមន៍​សុខ​ភាព​សាធា​រណៈ។ បន្ត​ពង្រីក និង​ពង្រឹង​ប្រព័ន្ធសុខាភិបាល ដូចជា​ពង្រីក​ហេដ្ឋា​រចនាសម្ពន្ធ័​មន្ទីរ​ពេទ្យ មណ្ឌល​សុខភាព ប៉ុស្តិ៍​សុខភាព បំពាក់​ឧបករណ៍​បរិក្ខារ​ពេទ្យ​បច្ចេកវិទ្យា​អភិ​វឌ្ឍ​ព័ត៌មាន​វិទ្យា ពង្រីក​មូល​និធិ​សមធម៌ ឧបត្ថម្ភ​ធន ពង្រីង​ការ​ត្រួតពិនិត្យ​វិស័យ​ឯកជន ក្រម​សីលធម៌ និង​បន្ត​ពង្រីក​កិច្ចសហការ​ល្អ​ជាមួយ​ស្ថាប័ន​ពាក់ព័ន្ធ និងដៃគូ​អភិវឌ្ឍន៍។
សម្តេច ​អគ្គមហាសេនា​បតី​តេជោ ហ៊ុន សែន ទទួល​ស្គាល់ថា ការ​រីក​ចម្រើន​នៅ​ក្នុង​វិស័យ​សុខាភិបាលនា​ពេល​បច្ចុប្បន្ន មិន​អាច​កាត់​ផ្តាច់​ពី​ការ​រួម​ចំណែក​ពី​ប្រទេស​ជា​មិត្ត ប្រទេស​ដៃគូ​អភិវឌ្ឍន៍ អង្គការ​មិនមែន​រដ្ឋាភិបាល​អន្តរជាតិ និង​ការ​ចូល​រួម​ពី​វិស័យឯក​ជន​បាន​ឡើយ។
សន្និបាត ​សុខាភិបាល​លើក​ទី៣៦ ដែល​មានរយៈ​ពេល​២ថ្ងៃ​នោះ ត្រូវបានចូល​រួមពី​សំណាក់​ថ្នាក់​ដឹកនាំ​ក្រសួង​សុខាភិបាល មន្ត្រីរាជការ​នៃ​អង្គភាព​ថ្នាក់​កណ្តាល មន្ទីរ​សុខាភិបាល​រាជធានី ខេត្តទូទាំង​ប្រទេស ការិយាល័យ​សុខាភិបាល ស្រុក​ប្រតិបត្តិ មន្ទីរ​ពេទ្យ​បង្អែក មណ្ឌល​សុខភាព អភិបាល​រាជធានី ខេត្តទាំង​២៥ តំណាង​ស្ថាប័ន និង​ក្រសួង​ពាក់ព័ន្ធ តំណាង​សមាគមន៍​វិជ្ជាជីវៈ វេជ្ជសាស្ត្រ ឱសថ​សាស្ត្រ ផ្នែក​ឯកជន អង្គការ​ក្រៅ​រដ្ឋាភិបាល​ជាតិ អន្តរ​ជាតិ និង​ដៃគូអភិវឌ្ឍន៍​សរុប​៤៩០​នាក់៕

ប្រធាន​​ធនាគារ​​អភិវឌ្ឍន៍​​អាស៊ី ADB វាយ​​តម្លៃ​​ខ្ពស់​​ចំពោះ​​វឌ្ឍនភាព​​របស់​​កម្ពុជា

ឯកឧត្តម តាកេហ៊ីកូ ណាកាអូ (Takehiko Nakao) ប្រធាន​ធនាគារ​អភិវឌ្ឍន៍​អាស៊ី (ADB) នា​ព្រឹក​ថ្ងៃ​ទី​១០ ខែ​មីនា ឆ្នាំ​២០១៥ បាន​វាយ​តម្លៃ​ខ្ពស់​ចំពោះ​វឌ្ឍនភាព​ផ្លាស់​ប្តូរ​របស់​កម្ពុជា​នៅ​ក្នុង​ រយៈពេល​ជាង​មួយ​ទសវត្សរ៍​កន្លង​មក​នេះ។

ឯកឧត្តម អ៊ាង សុផល្លែត ជំនួយការ​សម្តេចតេជោ​នាយករដ្ឋមន្ត្រី​បាន​មាន​ប្រសាសន៍​ឲ្យ​ដឹង​ថា ក្នុង​ជំនួប​សម្តែង​ការ​គួរសម និង​ពិភាក្សា​ការងារ​ជាមួយ​សម្តេច​អគ្គមហា​សេនាបតី​តេជោ ហ៊ុន សែន នៅ​វិមាន​សន្តិភាព ឯកឧត្តមតា កេហ៊ីកូ ណាកាអូ (Takehiko Nakao) ប្រធាន​ធនាគារ​អភិវឌ្ឍន៍​អាស៊ី (ADB) មាន​ប្រសាសន៍​ថា ឯកឧត្តម​ធ្លាប់​មក​កាន់​ប្រទេស​កម្ពុជា​កាល​ពី​ឆ្នាំ​២០០១ ហើយ​នៅ​ពេល​នេះ ឯកឧត្តម​បាន​ឃើញ​ពី​ការ​ផ្លាស់ប្តូរ​យ៉ាង​ច្រើន។ ការ​ផ្លាស់ប្តូរ​នោះ គឺពោរពេញ​ទៅ​ដោយ​ការវិវត្ត​ដ៏គួរ​ឱ្យ​កត់​សម្គាល់​បំផុត ពោល​គឺ​កម្ពុជា​មាន​កំណើន​សេដ្ឋកិច្ច កម្ពុជា​មាន​ស្ថិរភាព​នយោបាយ គ្រប់​គ្រង​អតិផរណា​បាន​ល្អ កាត់​បន្ថយ​ភាព​ក្រីក្រ​ពី​ប្រមាណ​៤៥% មក​ត្រឹម​ប្រមាណ ១៩% មាន​ប្រព័ន្ធ​អប់រំ​ល្អ និង​មាន​បរិយាកាស​វិនិយោគ​ល្អ​ជាដើម។

ឯកឧត្តម​ប្រធាន​ធនាគារ​អភិវឌ្ឍន៍​អាស៊ី (ADB) មាន​ប្រសាសន៍​បញ្ជាក់​ថា ឯកឧត្តម​មាន​ទស្សនៈវិជ្ជមាន​ចំពោះ​កម្ពុជា កម្ពុជាគឺ​ជាសង្គម​មួយ​ដ៏សមរម្យ​។ ឯកឧត្តម តាកេហ៊ីកូ ណាកាអូ (Takehiko Nakao) មាន​ប្រសាសន៍​ថា ធនាគារ​អភិវឌ្ឍន៍​អាស៊ី (ADB) មាន​មោទន​ភាព​យ៉ាងខ្លាំង​ចំពោះ​ភាពជា​ដៃគូ​ជាមួយ​កម្ពុជា និង​បាន​ផ្តល់​នូវ​សេចក្តី​សង្ឃឹម​ថា នឹង​បន្ត​ធ្វើ​ការជា​មួយ​កម្ពុជា នៅ​លើ​វិស័យ​ផ្សេងៗ​ទៀត រួម​ទាំង​វិស័យ​កំណែ​ទម្រង់​សាធារណៈ អភិវឌ្ឍន៍​ជនបទ និង​សមាហរណកម្ម​តំបន់​ជាដើម។

សម្តេចតេជោ​នាយករដ្ឋមន្រ្តី​មាន​ប្រសាសន៍​ថ្លែង​នូវ​អំណរ​គុណ ចំពោះ​ការវាយ​តម្លៃ​របស់ ADB ចំពោះ ​វឌ្ឍនភាព​ដែល​កម្ពុជា​សម្រេច​បាន។ សម្តេចអគ្គមហា​សេនាបតី​តេជោ ហ៊ុន សែន មាន​ប្រសាសន៍​ថា ជាការពិត​ណាស់​ចាប់​តាំង​ពី​ឆ្នាំ​២០០១​មក កម្ពុជា​មាន​ការផ្លាស់​ប្តូរ​យ៉ាង​ច្រើន ពោល​គឺ​កាល​ពី​ឆ្នាំ​២០០១ ភាព​ក្រីក្រ​មាន​ប្រមាណ​៥០% ប៉ុន្តែ​រហូត​មកដល់​ពេលនេះ ភាពក្រីក្រ​ត្រូវ​បាន​កាត់​បន្ថយ​គួរឱ្យ​កត់​សម្គាល់​បំផុត។ សម្តេច​តេជោ​មាន​ប្រសាសន៍​ថា ការ​កាត់​បន្ថយ​ភាព​ក្រីក្រ និង​វឌ្ឍនភាព​ដែល​កម្ពុជា​សម្រេច​បាន​នេះ គឺ​ពិត​ជាមិន​អាច​កាត់ផ្តាច់​បាន​ពីជំនួយ និង​ភាព​ជាដៃគូ​ជាមួយ និង ADB បាន​ឡើយ។

សម្តេច ​តេជោនាយករដ្ឋមន្រ្តី​បានមាន​ប្រសាសន៍​ឲ្យដឹង​ពី​គោល​ដៅ​របស់​រាជរដ្ឋាភិបាល ​ក្រោម​ការ​ដឹកនាំ​របស់​សម្តេច ក្នុង​ការ​ប្រកាស​ដាក់​ចេញ នោះ​គឺ​ជំរុញកំណើន​សេដ្ឋ​កិច្ច​ឱ្យ​បាន​៧% សម្រាប់​រយៈពេល​វែង និង​រយៈពេល​ខ្លី ពិសេស​កាត់​បន្ថយ​ភាពក្រីក្រ​ឱ្យ​បាន​ ១%​ក្នុង​១ឆ្នាំ និង​រក្សា​អតិផរណា​ឱ្យ​បាន​ក្រោម​៥%៕

សម្តេច​​តេជោ៖ មន្ត្រី ​គឺជា​​ខ្ញុំ​បម្រើ​​ដ៏​ស្មោះ​ត្រង់​​របស់​​ប្រជាជន មិន​មែន​​ជា​ចៅ​ហ្វាយ​​របស់​ប្រជាជន​​ទេ

នៅក្នុង​ពិធី​ប្រគល់​វិញ្ញាបនបត្រ​នៅ​វិទ្យាស្ថាន​ជាតិ​អប់រំ នា​ព្រឹក​ថ្ងៃទី​១០ ខែមីនា ឆ្នាំ​២០១៥​ជូន​ដល់​កម្មសិក្សាការី​មន្ត្រីជាន់ខ្ពស់ មន្ត្រី​មធ្យម​ឆ្នាំ​២០១៤ ​សិក្ខាកាម​មន្ត្រី​មធ្យម​វគ្គ​បណ្តុះ​បណ្តាល​ខ្លីនៃ​ក្រសួងបរិស្ថាន និង​បើក​វគ្គ​បណ្តុះបណ្តាល​សិស្ស​មន្ត្រី​ក្រមការ​ជំនាន់​ទី៦ និង​វគ្គ​វិក្រិត្យការ​ឆ្នាំ​២០១៥ របស់​សាលាភូមិន្ទ​រដ្ឋបាល សម្តេច​អគ្គមហាសេនាបតី​តេជោ ហ៊ុន សែន នាយករដ្ឋមន្ត្រី​នៃព្រះរាជាណា​ចក្រ​កម្ពុជា បាន​ផ្តល់នូវ​ដំបូន្មាន​សំខាន់ៗ ស្តីពី​ការ​កែ​ប្រែ​ឥរិយាបថ​របស់​មន្ត្រីរាជការ​ឲ្យ​ក្លាយ​ជាអ្នក​ផ្តល់ និង​បំរើ​សេវា​ល្អ​ជូន​ប្រជាពលរដ្ឋ។

សម្តេច​តេ​ជោ​នាយករដ្ឋមន្ត្រី​មាន​ប្រសាសន៍​ថា អ្វីដែល​ខ្ញុំ​ចង់​និយាយ​ចង់​ផ្តាំ ផ្ញើ​ដំបូង​គេ​នេះ គឺ​ការ​ធ្វើជា​មន្ត្រី​។ មន្ត្រី​គឺជា​ខ្ញុំបម្រើ​ដ៏​ស្មោះត្រង់​របស់​ប្រជាជន មិនមែន​ជា​ចៅហ្វាយ​របស់​ប្រជាជន​ទេ។ ត្រង់​ចំណុច​នេះ ត្រូវ​យល់​សារជាតិ​ពិតប្រាកដ បើ​មិន​ដូច្នោះ​ទេ​មន្ត្រី​យើង​នឹង​ពើង​ទ្រូង​ដាក់​ប្រជាជន ហើយ​តាំងខ្លួន​ជាចៅហ្វាយ​ប្រជាជន ហើយ​ត្រូវ​រំឭក​ដាស់តឿន​ខ្លួន​ឯង​ជាប់​ជានិច្ច។ ទង្វើ​ខុស​ឆ្គ​ងណាមួយ ដែល​តាំងខ្លួន​ជា​ចៅហ្វាយ​របស់​ប្រជាពលរដ្ឋ ហើយ​មិនមែនជា​ខ្ញុំបម្រើ ដ៏​ស្មោះត្រង់​របស់​ប្រជាពលរដ្ឋ គឺ​សុទ្ធតែជា​ទម្លាប់​ខុសឆ្គង​ជាមួយ​កិច្ចការ ដែលត្រូវ​បម្រើ​ដល់​ប្រជាជន​។​ សម្តេច​តេ​ជោក៏បាន​ដាស់តឿន​ទៀតថា ធ្វើ​មន្ត្រី​ត្រូវ​ចេះ​ឱន​លំទោន ព្រោះ​ការ​ឱនលំទោន​មិនមែន​ជាការ​ចុះ​ចាញ់​ឡើយ ដូច​ពាក្យចាស់​ពោល​ថា«​ងើយ​ស្កក ឱនដាក់គ្រាប់»​។ សម្តេចនាយក​រដ្ឋ​ម​មន្ត្រី​ក៏​ជំ​រុញឱ្យ​មន្ត្រី​ជម្រុះ​ចោល​នូវ​ទម្លាប់​អាក្រក់ ដែល​ឱនលំទោន​នៅមុខ​មន្ត្រី​អ្នកធំ តែ​ចំពោះមុខ​ប្រជាជន និង​អ្នក​នៅក្រោម​ខ្លួន​ដើរ​ពើង​ទ្រូង​នោះ។

សម្តេច​តេ​ជោ​មានប្រសាសន៍ថា ធ្វើជា​មន្ត្រី​មិនត្រូវ​ធ្វើជា​មន្ត្រី​ជើង​ ១០​នោះទេ (​ជើង​តុ​៤ កៅ​អី៤ និងជើង​មន្ត្រី​២)ត្រូវតែរ​ត់រក​ការងារមិនត្រូវ​រង់ចាំ​ការងារ​រត់​រក​ឡើយ ហើយ​មន្ត្រី​ជើង​១០ ​ជា​មន្ត្រី​គ្មាន​អនាគត​ល្អ​ទេ។​ មន្ត្រី​រាជរដ្ឋាភិបាល​ត្រូវតែ​ធ្វើជា​មន្ត្រី ដែល​ចេះ​ទទួល​ទាំង​ខុស និង​ត្រូវ មិនត្រូវទទួល​តែ​ត្រូវ ហើយ​ខុស​ទម្លាក់​ឱ្យគេ​នោះទេ។ សម្តេច​បាន​បញ្ជាក់ថា ​មន្ត្រីដែល​ទទួល​តែ​ត្រូវ មិន​ទទួល​ខុស ​គឺជា​មន្ត្រី​អត់​ប្រយោជន៍​។​ មន្ត្រី​មិនត្រូវ​មាន​ជំងឺ​តួឯក​នោះឡើយ ព្រោះ​ជំងឺ​តួឯក​នេះ​មិន​ថា ​មន្ត្រី​ស្ថាប័នរដ្ឋ ឬ​ឯកជន​នោះទេ គឺ​គ្រោះ​ថ្នាក់​បំផុត។ ជាមួយនឹងការទូន្មាននេះ​ សម្តេច​តេ​ជោ​បាន​វាយតម្លៃ​ថា មន្ត្រី​យើង​ភាគ​ច្រើន​ជាម​ន្ត្រី​ល្អ គឺ​មានតែ​មន្ត្រី​មួយ​ភាគ​តូច​ប៉ុណ្ណោះ​ដែលជា​មន្ត្រី​ខិលខូច​នោះ​។

សម្តេច​តេ​ជោ​នាយករដ្ឋមន្ត្រីបាន​លើកសរសើរ​ពី​គំរូ​វីរភាព​របស់​កម្លាំង​ប្រដាប់​អាវុធ ទាំង​យោធា នគរបាល និង​កងរាជ​អាវុធហត្ថ ដោយបាន​មានប្រសាសន៍​ថា នៅ​ពេល​ដែល​ប្រជា​ពល​រដ្ឋ​កំពុង​សម្រាន្ត​លង់លក់ កងកម្លាំង​ប្រដាប់អាវុធ​កំពុង​ដើរល្បាត ដើរ​ការពារ​សន្តិសុខ សុវត្ថិភាព​ជូន​ប្រជាពលរដ្ឋ ទាំង​ក្រោម​ដំណក់ភ្លៀង​ដ៏​ខ្លាំង។ រាល់ពេល​មានការ​ទទួល​ទេវតា​ឆ្នាំ​ថ្មី កងកម្លាំងប្រដាប់អាវុធកម្រ​បាន​នៅ​ជួបជុំ​គ្រួសារ ដើម្បី​ធ្វើ​ពិធី​ទទួល​ទេវតា​ឆ្នាំ​ថ្មី​ណាស់ ។ សម្តេច​តេជោ​បាន​បញ្ជាក់ថា​ ការងារ​ទាំងអស់នេះ​ (ការងារ​ជា​កងកម្លាំង​ប្រដាប់​អាវុធ) គឺជា​គំរូ​វីរភាព និង​ជា​ឧ​ទារ​ហណ៍ ដែល​មន្ត្រីរាជការ​ស៊ីវិល​ត្រូវយក​គំរូ​តាម​។

ទាក់ទង​ដល់​ការគ្រប់គ្រង​សេដ្ឋកិច្ច ​សម្តេច​តេ​ជោនាយករដ្ឋមន្ត្រី​មាន​ប្រសាសន៍​ក្រើន​រំលឹក​ថា ត្រូវធ្វើ​យ៉ាងណា​គ្រប់គ្រង​ប្រទេស​កុំឱ្យ​ដូច​ប្រទេស​ក្រិច ដែល​ផលិតផល​ក្នុងស្រុក​សរុប (​ផសស​) មាន​រហូត​ទៅ ១៧៥​ភាគរយ ​គឺជា​បំណុល​នោះ។ យើង​ទើប​តែមាន​២៣ ភាគរយ នៃ ផសស ប៉ុណ្ណោះ ហើយ​ពិ​ដាន​សម្រាប់​ការខ្ចី​គឺ​៤០​ភាគរយ។
សម្តេចតេជោ​មាន​ប្រសាសន៍​បញ្ជាក់​ថា យើង​ចង់ឱ្យ​ប្រទេស​យើង ឈាន​ពី​ចំណូល​មធ្យម​ទៅកាន់​ចំណូលប្រទេស​កម្រិត​ខ្ពស់ ហើយ​ឱ្យ​ក្លាយជា​ប្រទេស​អភិវឌ្ឍន៍​ដូច​ប្រទេស​មួយចំនួន ក្នុង​ពិភព​កលោក​។​ យើង​ត្រូវ​ជំរុញនូវ​កំណើន​ចំណូល​ក្នុងស្រុក កាត់បន្ថយ​ការពាក់ព័ន្ធ​ពី​ក្រៅ​ប្រទេស ត្រូវ​ប្រឹង​ខ្លួនយើងដោយ​មិន​ចង់​ស្ថិតនៅក្នុង​អន្ទាក់​របស់​ប្រទេស​ដែលមាន​ចំណូល​មធ្យមនោះទេ។

សម្តេចតេជោ​មាន​ប្រសាសន៍ឲ្យ​ដឹង​ថា ការ​កែ​ទម្រង់​រដ្ឋបាល​ស៊ីវិល​កំពុង​ដំណើ​រការ​ទៅមុខ ហើយ​ប្រព័ន្ធ​បៀវត្ស​មួយ​ក៏ត្រូវ​បានរៀបចំ​ឡើងដែរ។ នៅ​ប៉ុន្មាន​ថ្ងៃខាងមុខនេះ​ នឹង​ឆ្លង​ចូល​ខែមេសា ពេលនោះ​បៀវត្ស​មន្ត្រីរាជការ កងកម្លាំង​ប្រ ដាប់​អាវុធ​របស់​យើង​នឹង​ឡើង ប៉ុន្តែ​ឡើង​តាម​កាំជណ្តើរ​ទេ។ យើង​បាន​ប្រើថវិកា​របស់​យើង​ជាង ​៤៩​ភាគរយ​នៃ​ចំណាយ​ចរន្ត ហើយនឹង​ជាង​៥​ភាគរយនៃ ផសស។

ដោយ​ឡែក​ទាក់ទង​នឹង​វគ្គ​បណ្តុះបណ្តាលនៅ​សាលា​ភូមិន្ទរដ្ឋបាលនេះ សម្តេច​តេ​ជោ​បាន​ជំរុញ​ឱ្យ​មាន​វគ្គ​បណ្តុះបណ្តាល​ពិសេស​សម្រាប់​ស្ត្រី ដែល​ត្រូវបានតែងតាំង​ជា​អនុ​រដ្ឋលេខា​ធិការ និង​ថ្នាក់​ដឹកនាំ​នានា ដោយ​បាន​ស្នើឱ្យ​ឯកឧត្តម ស ខេង ឧបនាយក​រដ្ឋមន្ត្រី រដ្ឋមន្ត្រី​ក្រសួង​មហាផ្ទៃ​រៀបចំ​វគ្គ​នេះ។

ឯកឧត្តម ពេជ្រ ប៊ុនធិន រដ្ឋមន្ត្រីក្រសួង​មុខងារ​សាធារណៈ​បានឱ្យដឹងថា សកម្មភាព​បណ្តុះ​បណ្តាល​នៅ​សាលា​ភូមិន្ទ​រដ្ឋបាល ត្រូវបាន​ពង្រឹង​បន្ថែម ដោយបាន​ចាប់ផ្តើម​បង្កើតឱ្យមាន​វគ្គ​បណ្តុះបណ្តាល​ខ្លីៗ​ក្រោម​ទម្រង់​នៃ​កិច្ច​សហប្រតិបត្តិការ​ជាតិ និង​អន្តរជាតិ។ ឯកឧត្តម​បន្តថា សម្រាប់​រយៈពេល​កន្លងមក សាលា​បាន​បណ្តុះបណ្តាល​សិស្ស​មន្ត្រីជាន់ខ្ពស់​បាន ៧​ជំនាន់​មាន​ចំនួន​២៨៥​នាក់។ បច្ចុប្បន្ន​សាលា​កំពុង​បន្ត​បណ្តុះបណ្តាល​សិស្ស មន្ត្រីជាន់ខ្ពស់​ជំនា​ន់ទី​៨​ចំនួន​៦០​នាក់ និង​សិស្ស​មន្ត្រី​ក្រមការ​ជំនា​ន់ទី​៦​ចំនួន​៥៥​នាក់ ទៅតាម​លទ្ធផល​នៃ​ការ​ប្រកួត​ប្រជែង និង​តាម​សេចក្តីសម្រេច​របស់​ក្រសួង​មុខងារសាធារណៈ​។

សម្រាប់​វគ្គ​វិ​ក្រិ​ត្យ​ការ​មន្ត្រីជាន់ខ្ពស់ និង​មន្ត្រី​ឆ្នាំ​២០១៥ មាន​កម្មសិក្សាការី ចំនួន​២០០ នាក់​មកពី​ស្ថាប័ន មន្ទីរ ខេត្ត ក្រុង ស្រុក ខណ្ឌ ទូទាំងប្រទេស​ដែល​ត្រូវ​បើក​វគ្គ​នា​ថ្ងៃនេះ។ បន្ថែម​លើ​សកម្មភាព​បណ្តុះបណ្តាល​ខាងលើ សាលា​បានបញ្ចប់ និង​បន្ត​វគ្គ​បណ្តុះបណ្តាល​រយៈ​ខ្លី​៣​ខែ ដល់​មន្ត្រី​មធ្យម​រដ្ឋបាល កណ្តាល និង​មន្ត្រី​មធ្យម​ថ្នាក់ក្រោម​ជាតិ​របស់​ក្រសួងបរិស្ថាន​ផងដែរ​៕

ពិធី​​បិទ​​សន្និ​បាត​​​សុខា​​ភិបាល​​​លើក​​ទី​៣៦ របស់​​ក្រសួង​​សុខា​​ភិបាល ក្រោម​​អធិ​​បតិ​ភាព​​ដ៏​ខ្ពង់​​​ខ្ពស់​​សម្តេច​​អគ្គ​មហា​សេនា​បតី​តេជោ ហ៊ុន សែន នាយក​រដ្ឋមន្រ្តី នៃ​ព្រះ​រាជាណា​ចក្រ​កម្ពុជា






បទ​យក​ការណ៍​ស្តីពី ឱកាស​ការ​ងារ និង​​កម្ម​សិក្សា​​ការ​ងារ​​នៅ​មជ្ឈ​មណ្ឌល​ការងារ​​រាជ​ធា​នី​ភ្នំពេញ (វគ្គទី​១២៧)