Thursday, March 19, 2015
សម្តេចតេជោនាយករដ្ឋមន្ត្រី ហ៊ុន សែន បង្ហើបឲ្យដឹងថា លោក កឹម សុខា មានសំណុំរឿងធំៗចំនួន៨ប្រឈមនឹងផ្លូវច្បាប់
សម្តេចតេជោនាយករដ្ឋមន្ត្រី ហ៊ុន សែន នៅថ្ងៃទី១៨ ខែមីនា ឆ្នាំ២០១៥នេះ បានបង្ហើបឲ្យដឹងថា លោក កឹម សុខា អនុប្រធានគណបក្សសង្គ្រោះជាតិ មានសំណុំរឿងធំៗចំនួន៨ប្រឈមនឹងផ្លូវច្បាប់ ប៉ុន្តែសម្តេច ថា លោកនឹងមិនឆ្លើយឆ្លងជាមួយអ្នកនាំពាក្យគណបក្សប្រឆាំងទេ ក្នុងការចេញមកបកស្រាយការពារ លោក កឹម សុខា បន្ទាប់ពីសម្តេចព្រមានចាត់វិធានការច្បាប់ទៅលើលោក កឹម សុខា បន្ទាប់ពីលោក កឹម សុខា ចេញមកសារភាពថា ខ្លួនបរាជ័យក្នុងការផ្តួលរំលំរាជរដ្ឋាភិបាល ដោយក្នុងរឿងនេះ សម្តេចតេជោ បញ្ជាក់ថា « ខ្ញុំទុកលទ្ធភាពឲ្យតុលាការជាអ្នកចាត់ការ»។
សម្តេចតេជោ បានបន្ថែមថា « លោក (កឹម សុខា)មិនមែនចង់ប្រែប្រួលដោយសារការបោះឆ្នោតទេណា គឺលោកធ្វើបាតុកម្មក្រោយការបោះឆ្នោត លោកត្រូវចាំអោយច្បាស់ សុំណុំរឿងលោកមាន ៨ចំណុច ខ្ញុំបានសួររដ្ឋមន្ត្រីក្រសួងយុត្តិធម៌លោកថា ៨ចំណុចនៃសំនុំរឿងរបស់គាត់ កុំអីមានការចាប់ខ្លួនលោក កឹម សុខា តាំងពីរល្ងាចថ្ងៃទី១៥ ខែកក្កដា ឯណោះ» ។ ប៉ុន្តែ សម្តេចបានបញ្ជាថា ប្រតិបត្តិការរបស់យើង គឺធ្វើទៅលើអ្នកនៅសមរភូមិជាក់ស្តែង សំដៅទៅលើអ្នកប្រើហិង្សាផ្ទាល់លើសមត្ថកិច្ច នៅកន្លែងកើតហេតុប៉ុណ្ណោះ តែសម្តេចថា ឯកឧត្តម កឹម សុខា មិនមែននៅលើសមរភូមិទេ អញ្ចឹងទុកករណី កឹម សុខា មិនចាប់ខ្លួនទេ គឺទុកអោយតុលាការគេហៅទៅសួរព្រោះជាឋានៈជាប្រធានស្តីទីនៅពេលនោះគាត់បានដឹងរឿងនេះឬអត់ មិនមែនជាបញ្ហាចៃដន្យទេ។ សម្តេច បានចោទសួរថា អស់លោកថាប្រែតាមប្រជាធិបតេយ្យនៃការបោះឆ្នោតតែអស់លោកនៅចាំសម្តីទេ? ហ៊ុន សែន អើយចុះចេញទៅៗៗ លោកចង់និយាយពីការផ្លាស់ប្តូរ ក៏ប៉ុន្តែពាក្យផ្លាស់ប្តូររបស់លោកគឺជាការផ្តួលរំលំទុកអោយតុលាការវិនិច្ឆ័យចុះ ខ្ញុំមិនចង់ឆ្លងឆ្លើយជាមួយអ្នកនាំពាក្យទេ តែសម្តេចរំលឹកថា តើហេតុការណ៍ដែលបានកើតឡើងកន្លងមក មានមនុស្សស្លាប់ប៉ុន្មាន? របួសមនុស្សប៉ុន្មាន? ខូចទ្រព្យសម្បត្តិប៉ុន្មាន? ក្រោយការបោះឆ្នោត ដែលបង្កឡើងដោយបក្សប្រឆាំង?។
សម្ដេចនាយករដ្ឋមន្ដ្រី ហ៊ុន សែន ក៏បានថ្លែងផងដែរថា ករណីលោក មាជ សុវណ្ណារ៉ា ដែលកំពុងជាប់ឃុំ គឺគ្មានការចរចាទេ វាជាសិទ្ធិរបស់តុលាការ។
សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រតិកម្មបញ្ជាក់ត្រឡប់ទៅឯកឧត្តម កឹម សុខា ថាគ្មានការចរចាទេ ហើយជាសិទ្ធិរបស់តុលាការ ។ ការឆ្លើយតបនេះព្រោះ ឯកឧត្តម កឹម សុខា បានលើកឡើងចង់ឱ្យឯកឧត្តម សម រង្ស៊ី ក្រោយពិធីបុណ្យចូលឆ្នាំ ជួបនិយាយ ជាមួយសម្ដេចនាយករដ្ឋមន្ដ្រី ហ៊ុន សែន ដើម្បីបើកផ្លូវចង់ឱ្យមានការដោះលែងកូនចៅរបស់ខ្លួន គឺលោក មាជ សុវណ្ណរ៉ា ចេញពីពន្ធនាគារ។
សម្ដេចតេជោនាយករដ្ឋមន្ដ្រី ហ៊ុន សែន បានប្រាប់ទៅ ឯកឧត្តម កឹម សុខា ថា បានត្រៀមខ្នោះរួចជាស្រេច ដើម្បីចាប់ខ្លួនរូបលោក ក្នុងករណីដែលហ៊ានដឹកនាំបាតុកម្ម ចង់ទាមទារឬរំដោះលោកមាជ សុវណ្ណរ៉ា ចេញពីពន្ធនាគារនោះ ។ សម្តេចបញ្ជាក់សំដីឯកឧត្តម កឹម សុខា ថា ចូលឆ្នាំត្រូវសប្បាយទាំងអស់គ្នា មិនមែនសប្បាយតែមេ ទុកឱ្យកូនជាប់គុក ។ សម្តេចមិនអាចទទួលយកបានទេ សម្តេចក៏បានសួរទៅវិញថា បើលោកមាជ សុវណ្ណរ៉ា មិនអាចចេញពីគុក ក្រោយចូលឆ្នាំ តើលោកនឹងធ្វើអី លោកនឹងដឹកនាំមនុស្សតាមចិញ្ចើមថ្នល់ទៀតឬអី? ធាតុផ្សំកំពុងរង់ចាំលោកហើយ អាវុធហត្ថ នគរបាលត្រៀមខ្លួន ខ្នោះត្រូវលាបពណ៌ឲ្យស្អាតបន្ដិច ព្រោះលោកឯង ស្ថិតនៅក្នុងពិរុទ្ធភាពជាមេដឹកនាំនៃការផ្ដួលរំលំរដ្ឋាភិបាលស្របច្បាប់៕
សម្តេចតេជោចង់ឱ្យចាត់វិធានការតាមផ្លូវច្បាប់ចំពោះមេខ្លោង ដែលប៉ុនប៉ងផ្តួលរំលំរាជរដ្ឋាភិបាលស្របច្បាប់
ថ្លែងពីក្រុងប៉ោយប៉ែត ន្លែងបើកការដ្ឋានស្ថាបនាផ្លូវជាតិលេខ៥៨ នាព្រឹកថ្ងៃទី១៨ ខែមីនា ឆ្នាំ២០១៥ សម្តេចអគ្គមហាសេនាបតីតេជោ ហ៊ុន សែន បានស្នើឱ្យមានការចាត់វិធានការតាមផ្លូវច្បាប់ចំពោះមេខ្លោង ដែលបានសារភាពអំពីបរាជ័យរបស់ខ្លួន ក្នុងការប៉ុនប៉ងផ្តួលរំលំរាជរដ្ឋាភិបាលស្របច្បាប់នោះ។
សម្តេចតេជោនាយករដ្ឋមន្ត្រីមានប្រសាសន៍ថា ខ្ញុំបាននិយាយហើយថា ការប៉ុនប៉ងផ្តួលរំលំរាជរដ្ឋាភិបាលស្របច្បាប់បន្ទាប់ពីការបោះឆ្នោត ឥឡូវបែរជាមានអ្នកចេញមកសារភាពថា គេបានប្រឹងប្រែងផ្តួលរាជរដ្ឋាភិបាល ផ្តួលគណបក្សប្រជាជនកម្ពុជា ប៉ុន្តែមិនបានណា? បើមេចោរសារភាពហើយនោះ តើចាត់ការផ្លូវច្បាប់យ៉ាងណា?។ អ្នកខូចខាតទ្រព្យសម្បត្តិទាំងប៉ុន្មានសូមតាមរកម្នាក់ហ្នឹងទៅ ចាប់យកមកទារលុយទៅ វាត្រឹមត្រូវហើយអត់មានអ្វីខុសទេ។
សម្តេចតេជោមានប្រសាសន៍ថា បាតដៃទីបីក៏មាន បាតដៃទីពីរផ្ទាល់ហ្នឹងបានសារភាពនៅឯឡុងប៊ិច។ ឥឡូវគេបរាជ័យសុំទោសប្រជាពលរដ្ឋនៅអាម៉េរិក។ អញ្ចឹងតើយើងចាត់ការតាមផ្លូវច្បាប់បែបណាគិតយ៉ាងម៉េច ការខូតខាតប៉ុន្មាន ស្លាប់មនុស្សមេក្លោងនៅកន្លែងហ្នឹងទេ។ គេបានសារភាពខ្លួនគេមិនចាំបាច់អ្នកណាទេ ហើយកុំស្មានថា ទៅនិយាយនៅអាម៉េរិក លាក់អ្នកនៅទីនេះបាននោះ។ គេបានបង្ហោះក្នុង Facebook ពេញទាំងអស់ទៅហើយ។ ឥឡូវចោរ ចាប់ចេញមុខហើយ មេខ្លោងផ្តួលរំលំរាជរដ្ឋាភិបាលឱ្យបានឆាប់គឺចេញមុខមក ហើយសារភាពខ្លួនឯងទៅហើយ។ ដូច្នេះវិធានការតាមផ្លូវច្បាប់សំណុំរឿង ដែលជាប់នៅតុលាការត្រូវបំពេញបន្ថែម ហើយខ្ញុំសង្ឃឹមថា តុលាការនឹងកត់ត្រា ពាក្យសម្តីហ្នឹងព្រោះតុលាការក៏ត្រូវកោះហៅទៅសួរដែរ។
ទាក់ទងនិងទិដ្ឋភាពច្បាប់សម្រាប់ការដកអភ័យឯកសិទ្ធិអ្នកតំណាងរាស្ត្រ ពេលមានទោសវិញសម្តេចតេជោបានមានប្រសាសន៍ក្នុងភាពអនាមិកសំដៅទៅលោកជំទាវម្នាក់ថា សូមលោកជំទាវម្នាក់នោះ បើមើលមាត្រា៨០ ត្រូវមើលពីលើដល់ក្រោម កុំមើលពាក់កណ្តាលកុំមើលមួយកំណាត់ហើយចោលផ្នែកខាងក្រោម។ លោកជំទាវរូបនោះបាននិយាយថា មាត្រា៨០ ត្រូវប្រើពីរភាគបី ហើយគណបក្សប្រជាជនកម្ពុជា អត់មានពីរភាគបីទេ។ សម្តេចតេជោមានប្រសាសន៍ថា បានខ្ញុំស្គាល់ណាស់ ប៉ុន្តែសូមមើលបន្តទៅខាងក្រោម «ដើម្បីទុកដំណើរការក្តីត្រូវការសំឡេងបីភាគបួន» ដូច្នេះបញ្ហានេះត្រូវឱ្យយល់ខ្ញុំចង់បញ្ជាក់។
សម្ដេចតេជោបានមានប្រសាសន៍ផងដែរអំពីករណីលោក មៀច សុវណ្ណរា មន្ត្រីជាន់ខ្ពស់គណបក្សសង្គ្រោះជាតិដែលកំពុងឃុំខ្លួនដោយសារពាក់ពន្ធ័ការប្រព្រឹត្តអំពើរហឹង្សា នៅទីលានប្រជាធិបតេយ្យថា ម្សិលមិញថាឱ្យលោកសម រង្ស៊ី លើកយកបញ្ហានេះនិយាយជាមួយខ្ញុំក្រោយពេលបោះឆ្នោត។ ខ្ញុំថាអត់ទេ រឿងតុលាការ ទុកឱ្យតុលាការ រឿងខ្ញុំ គឺខ្ញុំ អ្នកណាជាប់ពន្ធនាគារនៅជាប់បន្ដទៅ ខ្ញុំអត់ធានាជូនទេ។ រឿងនោះគឺរឿងតុលាការ។
សម្ដេចតេជោនាយករដ្ឋមន្ដ្រីក៏បាន បន្ដផងដែរអំពីបញ្ហាច្បាប់បោះឆ្នោត ដោយបានលើកឡើងថា ថ្ងៃទី១៩ ខែមីនា ឆ្នាំ២០១៥ ជាថ្ងៃប្រជុំរដ្ឋសភាអនុម័តច្បាប់២, គណបក្សទាំង២ស្រុះស្រួលគ្នា, លោក សម រង្ស៊ី គាត់ថាគាត់ពេញចិត្ដ ដល់អនុប្រធានរបស់គាត់នៅអាមេរិក គាត់ថាអត់ពេញចិត្ដទេ ហើយឥឡូវតើ ដោះស្រាយដូម្ដេច?
សម្ដេចមានប្រសាសន៍បញ្ជាក់ថា រឿងពេញចិត្ដ ឬមិនពេញចិត្ដជារឿងរបស់គាត់ទេ ខ្ញុំអត់ដឹង, ជារឿងផ្ទៃក្នុងរបស់គាត់យ៉ាងម៉េចទេ។ គាត់ (កឹម សុខា) ថា កិច្ចព្រមព្រៀង ថ្ងៃទី២២ ខែកក្កដា ឆ្នាំ២០១៤ គាត់អត់ពេញចិត្ដទេ លុះយកកំណត់ហេតុមក ពិនិត្យគាត់នោះឯងពេញចិត្ដខ្លាំងណាស់។ សម្ដេចបានបន្ដថា ដរាបណាច្បាប់ថ្មីមិនទាន់ចេញច្បាប់ចាស់នៅបន្ដ។ ដរាបណាយន្ដការថ្មីមិនទាន់ចេញយន្ដការចាស់នៅបន្ដ។
ដូច្នេះបានជាខ្ញុំនិយាយថា បើធ្វើមិនចេញទេ អាចាស់បន្ដទៀតទៅ។ តែទោះយ៉ាងណាស្អែកហ្នឹង (ថ្ងៃនេះ) ចេញហើយ។ ទោះបីជាបុគ្គលគាត់មិនពេញចិត្ដយ៉ាងណាសមាជិកគាត់ពេញចិត្ដប្រជុំទាល់តែចប់៕
សម្តេចតេជោ៖គោលនយោបាយការបរទេសរបស់រាជរដ្ឋាភិបាលដឹកនាំដោយគណបក្សប្រជាជនកម្ពុជា គឺប្រែក្លាយតំបន់ប្រយុទ្ធគ្នាតាមព្រុំដែន ឲ្យក្លាយទៅជាតំបន់អភិវឌ្ឍន៍
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងនាព្រឹកថ្ងៃទី១៨ ខែមីនា ឆ្នាំ២០១៥ ដែលត្រូវចំនិងថ្ងៃខួបទី៤៥ឆ្នាំ នៃការចាប់ផ្តើមមានសង្គ្រាមរ៉ាំរ៉ៃ ក្នុងប្រទេសដោយសារតែការធ្វើរដ្ឋប្រហារទម្លាក់សម្តេចព្រះនរោត្តម សីហនុ ព្រះបរមរតនៈកោដិថា ក្រោមការដឹកនាំរបស់គណបក្សប្រជាជនកម្ពុជា (CPP) សម្តេចបាននិងបន្តប្រែក្លាយតំបន់ ដែលធ្លាប់ប្រយុទ្ធគ្នានៅតាមបណ្តោយព្រំដែនកម្ពុជា-ថៃ ឲ្យក្លាយទៅជាតំបន់អភិវឌ្ឍទាំងអស់។
នៅក្នុងឱកាសអញ្ជើញទៅបើកការដ្ឋានស្ថាបនាផ្លូវជាតិលេខ ៥៨ ចាប់ពីទីក្រុងប៉ោយប៉ែត ខេត្តបន្ទាយមានជ័យ ដល់ខេត្តឧត្តរមានជ័យ ក្រោមជំនួយរបស់ចិនដោយមានវត្តមានលោកជំទាវពូ ជៀនគ័រ ឯកអគ្គរដ្ឋទូតនៃសាធារណៈរដ្ឋប្រជាមានិតចិនប្រចាំកម្ពុជានិងថ្នាក់ដឹកនាំស្ថាប័នពាក់ព័ន្ធនានារបស់កម្ពុជា ព្រមទាំងមន្ត្រីមកពីខេត្ដស្រះកែវរបស់ ថៃចូលរួមផងនោះ សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ថា “ប្រែក្លាយអតីតតំបន់សមរភូមិ ឲ្យទៅជាតំបន់អភិវឌ្ឍ អីចឹងចាប់ពីជួរព្រំដែន ចាប់ពីព្រះវិហារ រហូតធ្លាក់ដល់ប៉ៃលិន និយាយរួមកន្លែងធ្លាប់ជាកន្លែងប្រយុទ្ធ កន្លែងទាំងអស់នោះធ្វើឲ្យទៅជាតំបន់អភិវឌ្ឍទាំងអស់”។
សម្តេចតេជោបានបន្ថែមថា “អីចឹងហើយរាជរដ្ឋាភិបាលកម្ពុជា បានជំរុញឲ្យមានផ្លូវ ទឹក ភ្លើង សាលារៀន មន្ទីរពេទ្យ ឲ្យមាននៅតាមតំបន់ទាំងអស់ហ្នឹង”។ មិនត្រឹមតែប៉ុណ្ណោះ តាមគោលនយោបាយកិច្ចការបរទេសរបស់រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា នឹងប្រែក្លាយតំបន់ព្រំដែនទាំងអស់ ឲ្យក្លាយទៅជាព្រំដែន មានសុខសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ។
ជាមួយនិងការរម្លឹកដល់ថ្ងៃទី១៨មិនាត្រូវនិងខួប៤៥ឆ្នាំនៃការធ្វើរដ្ឋប្រហារ ទម្លាក់សម្ដេចព្រះ នរោត្ដម សីហនុនា ថ្ងៃ ទី១៨មីនា ឆ្នាំ១៩៧០ ដែលនាំឲ្យប្រទេសកើតមានសង្គ្រាម។ សម្ដេចតេជោ បានមានប្រសាសន៍លើកឡើងថា ប្រវត្ដិលើទឹកដីខ្មែរ តំបន់ទាំងអស់នេះទី១មិនដែលមានផ្លូវ ចាក់កៅស៊ូទេចំណុចទី២ដោយសារ តំបន់នេះវាស្ថិតនៅតំបន់ព្រំដែននិង ស្ថិតក្នុងគោលនយោបាយការបរទេស របស់សម្ដេចផងនោះក៏ដូចជាគណបក្សប្រជាជនកម្ពុជា គឺប្រែក្លាយតំបន់ព្រំដែនទាំងអស់ឱ្យទៅជាតំបន់មិត្ដភាពសហប្រតិបត្ដិការ និងការអភិវឌ្ឍ ហើយសម្ដេចរីករាយដែលអស់លោកខាង ភាគីថៃអញ្ជើញមកចូលរួមក្នុងពិធីនេះផងដែរ។
សម្រាប់ការស្ថាបនាផ្លូវជាតិលេខ៥៨ នេះម្ដេចតេជោនាយករដ្ឋមន្ដ្រី បានថ្លែងអំណរគុណយ៉ាងជ្រាល ជ្រៅជាថ្មីម្ដងទៀតដល់រដ្ឋាភិបាលនិង ប្រជាជនចិនដែលជានិច្ចកាលតែងតែគាំទ្រ និងសហការផ្ដល់ឥណទាននិងជំនួយបច្ចេកទេសជាបន្ដបន្ទាប់សម្រាប់ការ សាងសង់ ស្ដារ និងអភិវឌ្ឍន៍ហេដ្ឋារចនា សម្ព័ន្ធដឹកជញ្ជូននៅព្រះរាជាណាចក្រ កម្ពុជាបន្ទាប់ពីប្រទេសនេះបានបំផ្លិច បំផ្លាញខ្ទេចខ្ទាំជាមួយគ្នានឹងការពង្រឹង ការតភ្ជាប់ផ្ទៃក្នុងប្រទេស។
សម្ដេចតេជោ មានប្រសាសន៍ឲ្យដឹងថា ផ្លូវរបស់មិត្ដចិន ដែលបានធ្វើរួចហើយបានបើកឱ្យប្រើ ប្រាស់មាន១.៤៣៧គីឡូម៉ែត្រ និងកំពុង ធ្វើមាន៨២១គីឡូម៉ែត្រនិងត្រៀមបើកការដ្ឋាន៤១១គីឡូម៉ែត្រសរុប២.៦៦៩ គីឡូម៉ែត្រ ។ ប៉ុន្ដែនៅមានផ្លូវជាច្រើនខ្សែ ប្រហែល៥ពាន់គីឡូម៉ែត្រទៀតដែល កម្ពុជាត្រូវការសាងសង់ដោយនឹងត្រូវឱ្យរាជរដ្ឋាភិបាលកម្ពុជាកៀរគរហិរញ្ញ ប្បទានពីប្រទេសចិននិងពីប្រភពផ្សេងៗទៀតដូចជា ថៃ វៀតណាម និងធនាគារ អភិវឌ្ឍន៍អាស៊ីADBបន្ថែមទៀត។
សម្ដេចតេជោក៏បានថ្លែងឲ្យដឹង ពីដំណើការនៃការបង្កើតធនាគារវិនិយោគហេដ្ឋារចនា សម្ព័ន្ធអាស៊ីនិងមូលនិធិផ្លូវសូត្ររបស់ចិនផងដែរថា ក្រៅពីចក្រភពអង់គ្លេសដែលប្រកាសចូលរួមជា មួយធនាគារនេះកាលពីប៉ុន្មានថ្ងៃមុន ឥឡូវនេះខាងអឺរ៉ុបដែលមាន បារាំង អ៊ីតាលី និងអាល្លឺម៉ង់ក៏បានចាប់អារម្មណ៍ ចូលរួមក្នុងធនាគារនេះដែរហើយគំនិតផ្ដួចផ្ដើមរបស់មិត្ដចិនស្ដីអំពីការបង្កើតធនាគារវិនិយោគលើហេដ្ឋារចនាសម្ព័ន្ធ អាស៊ីនេះនឹងមានការទាក់ទាញយ៉ាងច្រើន សម្រាប់ការចូលរួម ហើយការបង្កើត ធនាគារនេះវានឹងជួយបំពេញបន្ថែមឱ្យធនាគារអភិវឌ្ឍន៍អាស៊ីឬធនាគារពិភពលោក។
សម្ដេចតេជោមានប្រសាសន៍ថា កម្ពុជាជាសហស្ថាបនិកមួយនៃធនាគារវិនិយោគហេ ដ្ឋារចនាសម្ព័ន្ធអាស៊ី, សង្ឃឹមថា ការបង្កើតធនាគារនេះនឹងជួយបំពេញ បន្ថែមឱ្យធនាគារអភិវឌ្ឍអាស៊ីនិងធនាគារពិភពលោកផងដែរដោយវាមិនមែន ជាការប្រកួតប្រជែងដណ្ដើមតួនាទីនោះទេ។
ឯកឧត្តម ត្រាំ អ៊ីវតឹក រដ្ឋមន្ដ្រីក្រសួង សាធារណរការនិងដឹកជញ្ជូនថ្លែងឱ្យដឹងថា គម្រោងផ្លូវជាតិលេខ៥៨ដែលបាន បើកការដ្ឋានសាងសង់នាព្រឹកថ្ងៃទី១៨ ខែមីនា ឆ្នាំ២០១៥មានប្រវែងសរុប ១៧៤,១៦៦គីឡូម៉ែត្រចាប់ពីក្រុងប៉ោយប៉ែត ខេត្ដបន្ទាយមានជ័យ ដល់ភូមិផ្អុង សង្កាត់កូនក្រៀល ក្រុងសំរោង ខេត្ដឧត្ដរមានជ័យ (ក្នុងនោះមានផ្លូវខ្នែង៤កំណាត់ ប្រវែង៨,៩៨គីឡូម៉ែត្របំបែកពីផ្លូវ ជាតិលេខ៥៨នេះទៅច្រកទ្វារព្រំដែនអូរបីជាន់ បឹងត្រកួន ជប់គគីរ និងថ្មដូន) សាងសង់ឡើងស្របទៅតាមស្ដង់ដារផ្លូវថ្នល់កម្រិតទី៣នៃគំរូរចនាប័ទ្មប្លង់សំណង់ របស់សាធារណរដ្ឋប្រជាមានិតចិន។ ផ្លូវនេះមានទទឹង១២ម៉ែត្រផ្ទៃនៃទ្រូងផ្លូវជាប្រភេទកម្រាលថ្មស្រោចកៅស៊ូស្ដើងពីរស្រទាប់DBST មានទទឹង១០ម៉ែត្រ មានគន្លងផ្លូវ២ សម្រាប់រថយន្ដគន្លង នីមួយៗមានទទឹង៣,៥០ម៉ែត្រ គន្លង២ សម្រាប់ទោចក្រយានយន្ដ គន្លងនីមួយៗ មានទទឹង១,៥០ម៉ែត្រនិងចិញ្ចើមដីក្រហម សងខាងទទឹង១ម៉ែត្រ។
តាមបណ្ដោយផ្លូវនេះ មានសាងសង់ស្ពាន ៤៧កន្លែងប្រវែងសរុប ១៥៧៤ម៉ែត្រ និងលូគ្រប់ប្រភេទ ៣៣០កន្លែង ចំណាយថវិកាប្រមាណ ១២២,៩៨លានដុល្លារ ជាហិរញ្ញប្បទានពីរដ្ឋាភិបាលសាធារណ រដ្ឋប្រជាមានិតចិនត្រូវបានគ្រោងចំណាយលើការសាងសង់ផ្លូវជាតិលេខ៥៨នេះ រួមជាមួយថវិកាបដិភាគមួយចំនួនរបស់រាជរដ្ឋាភិបាលកម្ពុជា សម្រាប់ដោះ ស្រាយផលប៉ះពាល់។ ផ្លូវជាតិលេខ៥៨ អនុវត្ដការសាងសង់ដោយក្រុមហ៊ុនសំណង់សៀងហៃគ្រុបនិងពិនិត្យបច្ចេក ទេសដោយក្រុមហ៊ុនសំណង់ក្វាងចូវវ៉ានអានរបស់ចិន។ រយៈពេលសាងសង់៤២ ខែដោយគ្រោងបញ្ចប់នៅខែសីហា ឆ្នាំ២០១៨៕
Subscribe to:
Posts (Atom)