Monday, March 23, 2015
លោកជំទាវ មីស៊្ហែល អូបាម៉ា លើកទឹកចិត្តកុមារីកម្ពុជា ឱ្យបន្តការខិតខំសិក្សារៀនសូត្រ
ថ្ងៃទី២១ ខែមីនា ឆ្នាំ២០១៥–អមដំណើរដោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន លោកជំទាវ មីស៊្ហែល អូបាម៉ា (Michelle Obama) ស្ត្រីទី១សហរដ្ឋអាមេរិក ភរិយា ឯកឧត្តម បារ៉ាក់ អូបាម៉ា (Barack Obama) ប្រធានាធិបតីសហរដ្ឋអាមេរិក កាលពីព្រឹកថ្ងៃទី២១ ខែមីនា ឆ្នាំ២០១៥ បានអញ្ជើញទៅកាន់វិទ្យាល័យ ហ៊ុន សែន ប្រាសាទបាគង ស្ថិតក្នុងឃុំបាគង ស្រុកប្រាសាទបាគងខេត្តសៀមរាប ជាទីដែលលោកជំទាវបានជួប សំណេះសំណាល ជាមួយសិស្សនារីចំនួន១០នាក់នៅទីនោះ។
វិទ្យាល័យ ហ៊ុន សែន ប្រាសាទបាគងបានបង្កើតឡើងក្នុងឆ្នាំ១៩៨៤លោកគ្រូ អ្នកគ្រូចំនួន៩៥នាក់ក្នុងនោះស្រី៥១នាក់មានអគារសិក្សាចំនួន៩ខ្នង ស្មើនឹង៤៦បន្ទប់។ បច្ចុប្បន្ននេះមានសិស្សានុសិស្សសរុប១.៥៣៥នាក់ ស្រី៨៦៦នាក់ ស្មើនឹង៥៦% មានថ្នាក់រៀនចាប់ពីថ្នាក់ទី៧ដល់ថ្នាក់ទី១២ ដោយបែងចែកជា៣៣ថ្នាក់ពីវេនព្រឹកនិងថ្ងៃ។ នៅឆ្នាំ២០០៩ សាលាបានសហការអនុវត្តន៍គម្រោងឈ្មោះថា បង្កើនការអប់រំមូលដ្ឋាននៅក្នុងប្រទេសកម្ពុជា (IBEC) ជាមួយជំនួយសហរដ្ឋអាមេរិក (USAID) ដែលមានក្រុមស្ម័គ្រចិត្តសន្តិភាព (PEACE CORPS) ជាអ្នកអនុវត្តnគម្រោងផ្ទាល់ ប៉ុន្តែគម្រោងនេះត្រូវបានបញ្ចប់ក្នុងខែកញ្ញា ឆ្នាំ២០១៤ ។
លោកជំទាវ មីស៊្ហែល អូបាម៉ា និងសម្តេចកិត្តិព្រឹទ្ធបណ្ឌិត បានស្តាប់ការរៀបរាប់របស់ក្មួយៗអំពីការលំបាក និងការតស៊ូក្នុងរយៈពេលកន្លងមករហូត ក្មួយៗទទួលបានជោគជ័យក្នុងការសិក្សាថ្នាក់វិទ្យាល័យដោយមានការ ឧបត្ថម្ភពីអង្គការ Room to read ដែលកម្មវិធីអប់រំសម្រាប់កុមារីរបស់អង្គការនេះ គឺធ្វើ ឡើងដើម្បីបំបាត់វិសមភាពទាក់ទង និងយេនឌ័រ នៅក្នុងការអប់រំនៅទូទាំងទ្វីបអាស៊ី និងអាហ្វ្រិក។
សម្តេចកិត្តិព្រឹទ្ធបណ្ឌិតបានបញ្ជាក់ទៅកាន់ក្មួយទាំង១០នាក់ថា ទោះបីកម្មវិធីនេះបានមកដល់កម្ពុជាក៏ពិតមែន តែបើក្មួយៗគ្មានកាតស៊ូក្នុងការសិក្សានោះ យើងមិនអាចសម្រេចនូវបំណងប្រាថ្នារបស់យើងបានដែរ។ សម្តេចកិត្តិព្រឹទ្ធបណ្ឌិតបានជម្រាបជូនលោកជំទាវ មីស៊្ហែល អូបាម៉ា ថា ជាមួយនឹងការផ្តួចផ្តើមរបស់សហរដ្ឋអាមេរិក ក្នុងកម្មវិធីឱ្យកុមារីបានរៀនសូត្រនេះ រាជរដ្ឋាភិបាលកម្ពុជាក៏បានយកចិត្តទុកដាក់លើកកម្ពស់ការសិក្សារៀនសូត្រ របស់កុមារី និងយុវនារីកម្ពុជា ពោលគឺសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាក៏បានដាក់ចេញនូវគោលនយោបាយជាយុទ្ធសាស្ត្រ ដើម្បីផ្តល់ឱ្យកុមារី និងយុវនារីខ្មែរគ្រប់រូបមានឱកាសបានសិក្សារៀន សូត្រយ៉ាងហោចណាស់បានបញ្ចប់ត្រឹមថ្នាក់អនុវិទ្យាល័យ ដោយបានសាងសង់អគារសិក្សារាប់ពាន់ខ្នង និងបានបង្ខិតសាលារៀនឱ្យកាន់តែទៅជិតផ្ទះសិស្សានុសិស្ស ពោលគឺក្នុង១ឃុំត្រូវមានអនុវិទ្យាល័យមួយយ៉ាងតិច និងបានកសាងជា អន្តេវាសិកដ្ឋានជាច្រើនឱ្យសិស្សជានារីបានស្នាក់ នៅក្នុងគោលបំណងឱ្យ សិស្សានុសិស្សងាយស្រួលក្នុងការសិក្សា ជាពិសេសផ្តល់នូវឱកាសពេញលេញដល់កុមារី និងយុវនារីកម្ពុជាបានសិក្សារៀនសូត្របានចប់ចុងចប់ដើម ។
លោកជំទាវ មីស៊្ហែល អូបាម៉ា បានថ្លែងអំណរគុណ និងវាយតម្លៃខ្ពស់ចំពោះសម្តេចកិត្តិព្រឹទ្ធបណ្ឌិត និងស្ថាប័នពាក់ព័ន្ធនានា ដែលបានទទួលស្វា គមន៍យ៉ាងកក់ក្តៅបំផុត ចំពោះដំណើរទស្សនកិច្ចជាប្រវត្តិសាស្ត្ររបស់លោកជំទាវនៅលើទឹកដីនៃ ព្រះរាជាណាចក្រកម្ពុជា និងបានថ្លែងការកោតសរសើរ ចំពោះរាជរដ្ឋាភិបាលកម្ពុជា និងស្ថាប័នពាក់ពន្ធដែលបានសហការជាមួយអង្គការ Room to Read ដែលបានជំរុញឱ្យកម្មវិធីអប់រំសម្រាប់កុមារីដែលជាផ្នែកមួយនៃ កម្មវិធី Let Girls Learn ដែលជាការផ្តួចផ្តើមរបស់សហរដ្ឋអាមេរិកដំណើរ ការប្រកបដោយផ្លែផ្កានៅកម្ពុជា។
លោកជំទាវ មីស៊្ហែល អូបាម៉ា បានបញ្ជាក់ថា ឯកឧត្តមប្រធានាធិបតីសហរដ្ឋអាមេរិកបានចាត់ទុកថាកម្មវិធី Let Girls Learn មិនមែនត្រឹមតែជាសកម្មភាពមនុស្សធម៌ប៉ុណ្ណោះទេ តែវាជាបញ្ហាសន្តិសុខ និងនយោបាយផងដែរ ដូច្នេះវាចាំបាច់គឺជាអាទិភាពនៃនយោបាយបរទេសមួយ។ លោកជំទាវ មីស៊្ហែល អូបាម៉ា បានកោតសរសើរចំពោះក្មួយជាសិស្សនារីទាំង១០នាក់ដែលមាន សេចក្តីក្លាហាន និងបានពុះពារគ្រប់ឧបសគ្គក្នុងការរៀនសូត្ររហូតទទួលបានលទ្ធផលល្អ ព្រមទាំងបានបញ្ជាក់ថា ក្មួយទាំងអស់គឺជាភ័ស្តុតាងបង្ហាញពីមោទន ភាពរបស់ប្រទេសកម្ពុជា ហើយក៏ជាមោទនភាពមួយសម្រាប់សហរដ្ឋអាមេរិកផងដែរ ព្រោះថាក្នុងពេលអនាគតក្មួយៗនឹងក្លាយជាធនធានដ៏មានតម្លៃសម្រាប់ ក្រុមគ្រួសារ និងសង្គមជាតិ ។ មិនតែប៉ុណ្ណោះក្មួយៗនឹងក្លាយជាអ្នកបង្ហាញផ្លូវដល់កុមារីជំនាន់ ក្រោយឱ្យយកគំរូតាម ក្នុងការរៀនសូត្រហើយពួកគេទាំងនោះនិងស្តាប់តាមដំបូន្មានរបស់ក្មួយ ព្រោះថា អ្នកទាំងអស់គ្នាជាភ័ស្តុតាងពិតប្រាកដ សម្រាប់ពួកគេទៅថ្ងៃអានាគត ។
ដោយឡែកចំពោះបំណងប្រាថ្នារបស់ក្មួយៗ ទាំងអស់ចង់ក្លាយទៅជាវេជ្ជ បណ្ឌិត ជាគ្រូបង្រៀន ដើម្បីបានជួយដល់សហគមន៍របស់ខ្លួននោះ លោកជំទាវ មីស៊្ហែល អូបាម៉ា បានបញ្ជាក់ថា ក្មួយៗត្រូវតែខិតខំរៀនបន្ថែមទៀតជា ឧទាហរណ៍ កាលនៅវ័យកុមារគឺលោកជំទាវផ្ទាល់ពុំទទួលបានការលើកទឹកចិត្តឱ្យ រៀនសូត្រនោះទេតែ ដោយការខិតខំតស៊ូរបស់លោកជំទាវផ្ទាល់ទើបលោកជំ ទាវទទួលបានលទ្ធផលល្អដូចសព្វថ្ងៃនេះ៕
ដោយ ជ័យ ភូមិពល
ឯកឧត្តម ឧបនាយករដ្ឋមន្ត្រី សុខ អាន អញ្ជើញចូលរួមបុណ្យចំរើនព្រះជន្ម ព្រះឃោសាវិសុទ្ធិ ស៊ឹម សយ៉ុង ព្រះចៅអធិការទី១៥ វត្តសារាវ័នតេជោ
ព្រះពុទ្ធសាសនាបានចាក់ឫសយ៉ាងជ្រៅក្នុងវប្បធ៍ម អរិយធ៍មខ្មែរ នេះជាប្រសាសន៍របស់ឯកឧត្តម ឧបនាយករដ្ឋមន្រ្តី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីក្នុងឱកាសអញ្ជើញចូលរួមក្នុងពីធីបុណ្យចំរើនព្រះជន្ម ព្រះឃោសាវិសុទ្ធិ ស៊ឹម សយ៉ុង ព្រះចៅអធិការទី១៥ វត្តសារាវ័នតេជោ ស្ថិតក្នុងខណ្ឌដូនពេញ រាជធានីភ្នំពេញនាល្ងាចថ្ងៃទី២១ ខែមីនានេះ និងមានការនិមន្តចូលរួមជាកិត្តិយសដោយសម្តេចព្រះមហាសង្ឃរាជ នៃព្រះរាជាណាចក្រកម្ពុជា និងសម្តេចព្រះសង្ឃ សម្តេចព្រះសង្ឃនាយក និងពុទ្ធបរិស័ទជាច្រើនរូប។
ឯកឧត្តម បានមានប្រសាសន៍ថា ជាការពិត ព្រះពុទ្ធសាសនា បានចាក់ឬសយ៉ាងជ្រៅក្នុងវប្បធម៌ អរិយធម៌ខ្មែរ តាំងពីយូរលង់ណាស់មកហើយ ដូចជាតាមរយៈសិល្បៈ ចម្លាក់ និងអក្សរសាស្ត្រជាដើម។ ជាក់ស្តែង វាក្យសព្ទរបស់ព្រះពុទ្ធសាសនា ដែលមានប្រភពចេញពីបាលី សំស្ក្រឹតបានជះឥទ្ធិពលលើវិស័យអក្សរសាស្រ្តខ្មែរ ទាំងការប្រើប្រាស់ជាផ្លូវការ និងទំនាក់ទំនងប្រចាំថ្ងៃ។ គ្រប់ជួរបន្ទាត់នៃសំណេរក្នុងអក្សរសិល្ប៍ខ្មែរ បើពិនិត្យឲ្យស៊ីជម្រៅ យើងនឹងឃើញថា ភាសាបាលី សំស្ក្រឹតតែងមានជាប្រចាំក្នុងសំណេរទាំងនោះ គ្រាន់តែពាក្យខ្លះយើងបានប្រើប្រាស់រហូតថ្នឹកមាត់ ហើយមិនដឹងថា វាមានប្រភពចេញពីបាលី ឬសំស្ក្រឹតប៉ុណ្ណោះ។ នេះសរបញ្ជាក់ពីតួនាទីយ៉ាងសំខាន់របស់ព្រះពុទ្ធសាសនា ក្នុងសង្គមខ្មែរ។
ទន្ទឹមនឹងកិច្ចខិតខំប្រឹងប្រែងក្នុងការអភិវឌ្ឍសេដ្ឋកិច្ច សង្គម តាមរយៈការដាក់ចេញនូវផែនការ និងយុទ្ធសាស្រ្តសំខាន់ៗនានា សំដៅលើកកម្ពស់ជីវភាពរស់នៅនិងកាត់បន្ថយភាពក្រីក្ររបស់ប្រជាជន ព្រមទាំងបន្តធានាឱ្យបាននូវស្ថេរភាពនយោបាយ និងសុខសន្តិភាពពេញផ្ទៃប្រទេស ដែលជាមូលដ្ឋានគ្រឹះដ៏ចាំបាច់សម្រាប់ការអភិវឌ្ឍលើគ្រប់វិស័យដូចសព្វថ្ងៃនេះ រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ថែមទាំងយកចិត្តទុកដាក់ជាប្រចាំដល់ការលើកស្ទួយព្រះពុទ្ធសាសនាផងដែរ។ ជាក់ស្តែង វត្តអារ៉ាមជាច្រើនត្រូវបានកសាងឡើងនៅទូទាំងផ្ទៃប្រទេស ទាំងនៅទីក្រុង និងជនបទដាច់ស្រយាល ដើម្បីឆ្លើយតបទៅនឹងសិទ្ធិផ្នែកជំនឿ និងប្រណិប័តន៍សាសនារបស់ប្រជាពលរដ្ឋ។
ទន្ទឹមនឹងនេះ គម្ពីរក្បួនច្បាប់ផ្នែកព្រះពុទ្ធសាសនាត្រូវបានផ្សព្វផ្សាយយ៉ាងទូលំទូលាយ ហើយគ្រឹះស្ថានអប់រំផ្នែកព្រះពុទ្ធសាសនា ត្រូវបានស្តារនិងអភិវឌ្ឍឱ្យមានការរីកចម្រើនគួរឲ្យកត់សម្គាល់។
សូមរំលឹកថា ព្រះឃោសាវិសុទ្ធិ ស៊ឹម សយ៉ុង ព្រះអង្គជាព្រះចៅអធិការទី១៥នៃវត្តសារាវ័នតេជោ ជាព្រះរាជាគណៈថ្នាក់កិត្តិយស ព្រះសមុអនុគណខណ្ឌដូនពេញ ទីប្រឹក្សាសម្តេចព្រះសង្ឃរាជ ទេព វង្ស ផងដែរ ។
ព្រះឃោសាវិសុទ្ធិ ស៊ឹម សយ៉ុង ព្រះអង្គបានបួសក្នុងសំណាក់ព្រះព្រះពុទ្ធសាសនាតាំងពីឆ្នាំ១៩៧មកម៉្លេះរហូតមកដល់ពេលនេះមានរយៈពេល៣៦ឆ្នាំហើយ ដែលព្រះអង្គគង់នៅជាបុព្វជិត ទ្រទ្រង់ព្រះពុទ្ធសាសនា ផ្សព្វផ្សាយព្រះធម៌ ព្រះវិន័យដល់សិស្សគុណ និងការគ្រប់គ្រងវត្តអារ៉ាមប្រកបដោយការគោរពស្រឡាញ់ពេញចិត្តពីព្រះសង្ឃ និងពុទ្ធបរិស័ទជាខ្លាំង។
កន្លងមកនេះព្រះអង្គបានចូលរួមយ៉ាងច្រើនក្នុងសកម្មភាពសង្គម និងព្រះពុទ្ធសាសនា ដោយចូលរួមកសាងសមិទ្ធផលនានានៅខេត្តកំពង់ចាម និងជាពិសេសនៅក្នុងទីអារាមវត្តសារាវ័នតេជោនេះតែម្តង ដោយក្នុងនោះ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី ក៏បានរួមចំណែកយ៉ាងច្រើនម៉ឺនដុល្លារអាមេរិកផងដែរនាពេលកន្លងមក ក្នុងការកសាងសមិទ្ធផលក្នុងវត្តសារាវ័នតេជោនេះ ៕
Subscribe to:
Posts (Atom)