សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងគណៈប្រតិភូជាន់ ខ្ពស់រាជរដ្ឋាភិបាលកម្ពុជា បានអញ្ជើញទៅដល់ទីក្រុងណាននីង ខេត្តក្វាងស៊ី សាធារណរដ្ឋប្រជាមានិតចិន ប្រកប ដោយសុវត្តិភាពហើយ កាលពីវេលាម៉ោង១០និង៤០នាទីម៉ោងនៅប្រទេសចិន ត្រូវនឹងម៉ោង៩ និង៤០នាទី ម៉ោងក្នុងប្រទេសកម្ពុជា។ យន្តហោះពិសេសរបស់ព្រះរាជាណាចក្រកម្ពុជា បានធ្វើការចុះចតប្រកបដោយសុវត្តិភាព នៅអាកាសយានដ្ឋានអន្តរជាតិវូស៊ូ ទីក្រុងណាននីង ក្រោមវត្តមាននៃការទទួលបដិសណ្ឋារកិច្ចស្វាគមន៍យ៉ាងស្និតស្នាល រ៉ាក់ទាក់បំផុត ពីសំណាក់ថ្នាក់ដឹកនាំខេត្តក្វាងស៊ី និងឥស្សរជនការទូតរបស់ព្រះរាជាណាចក្រកម្ពុជា ប្រចាំសាធារណ រដ្ឋប្រជាមានិតចិនជាច្រើនរូប ពិសេសការស្វាគមន៍ពីក្រុមរបាំប្រពៃណីខេត្តក្វាងស៊ី។
សម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់រាជរដ្ឋាភិបាលកម្ពុជា និងស្នាក់នៅទីក្រុងក្វាងស៊ី ប្រទេសចិន រយៈពេល២យប់៣ថ្ងៃ ដើម្បីចូលរួមពិព័រណ៌ចិន-អាស៊ាន លើកទី១៣ និងវេទិកាស្តីពីពាណិជ្ជកម្ម និងវិនិយោគកម្ពុជា-ចិន លើកទី១។ ក្រៅពីការអញ្ជើញចូលរួមវេទិកាដ៏មានសារៈសំខាន់ទាំងពីរនោះ សម្តេចតេជោនាយករដ្ឋមន្រ្តី និងជួបពិភាក្សាទ្វេភាគីជាមួយឯកឧត្តមឧបនាយករដ្ឋមន្រ្តីចិន មន្រ្តីជាន់ខេត្តក្វាងស៊ី រួមទាំងការធ្វើដំណើរទស្សនកិច្ចក្នុងតំបន់មួយចំនួន របស់ខេត្តក្វាងស៊ី។
