ការប្រកាសធ្វើពហិការមិនចូលរួមប្រជុំអនុម័តលើគម្រោងកញ្ចប់ថវិការជាតិសម្រាប់ឆ្នាំ
២០១២ នៅរដ្ឋសភា របស់អ្នកតំណាងរាស្ត្រទាំង២៦រូបនៃគណបក្សសម រង្ស៊ី គឺជាសារមួយដ៏ជាក់លាក់បង្ហាញប្រាប់ដល់ប្រជាពលរដ្ឋទាំងក្នុង
និងក្រៅប្រទេសថា គណបក្សប្រឆាំងមួយនេះ បាន
និងកំពុងដើរចេញពីការទទួលខុសត្រូវក្នុងឋានៈខ្លួនជាអ្នកតំណាងរាស្ត្រ
ឬមានតម្លៃស្មើនឹងការប្រកាសខ្លួនបំផ្លាញផលប្រយោជន៍ជាតិទាំងមូល។
មិនខុសអ្វីពីពាក្យចាស់បូរាណបានពោលទុកមកថា
« មិនជួយចូកជួយចែវ
យកជើងរាទឹក»។
ទស្សនៈនេះត្រូវបានគណបក្សប្រឆាំងសម រង្ស៊ី យកមកអនុវត្ត
ដើម្បីអ្វីមួយជាការដើរផ្ទុយពីលទ្ធិប្រជាធិបតេយ្យ ដែលត្រូវគោរព
និងបំរើផលប្រយោជន៍ប្រជារាស្ត្រជាធំ
ក្នុងការរស់នៅក្នុងសង្គមកម្ពុជាបច្ចុប្បន្ន។
ការធ្វើពហិការមិនចូលរួមប្រជុំបែបនេះ
សមដូចប្រសាសន៍អះអាងបញ្ជាក់របស់សម្តេចអគ្គមហាសេនាបតីតេជោ ហ៊ុន
សែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា
គឺជាចេតនាបំផ្លាញជាតិ មិនចង់ឱ្យមានការអភិវឌ្ឍន៍ប្រទេស
ដែលនោះគ្រាន់តែជាផែនការឥតប្រយោជន៍។
នៅពីក្រោយកលល្បិចនៃការប៉ុនប៉ងអនុវត្តគម្រោងការឱ្យអ្នកតំណាងរាស្ត្រ៤រូបលាលែងពីតួនាទី
និងឈានដល់ការប្រកាសជាចំហរថានឹងធ្វើពហិការមិនចូលប្រជុំទាំង២៦រូបនៃអ្នកតំណាងរាស្ត្រដោយ
លោក សម រង្ស៊ី ដើម្បីបង្កឱ្យមានអធម្មនុញ្ញភាពក្នុងស្ថាប័នកំពូលមួយនេះ
គឺអាចចាត់ទុកថាជាប្រថ្នូរអាក្រក់ថ្មីមួយទៀតសម្រាប់គណបក្ស សម
រង្ស៊ី ដែលនឹងឈានទៅរកវិថីដ៏គ្រោះថ្នាក់ ដូចគ្នានឹងបទវិភាគរបស់វិទ្យុអន្តរជាតិមួយនិយាយភាសាខ្មែរ
ដែលបានផ្សាយកាលពីពេលថ្មីៗនេះ ថា « សកម្មជនបក្សប្រឆាំងប្រឈមនឹងស្ថានភាពខ្សោះខ្យល់»។
មិនត្រឹមតែប៉ុណ្ណោះ
គម្រោងការទុចរិតនេះ វាគ្រាន់តែជាផែនការរារាំង ជំទាស់នឹងដំណើរការអភិវឌ្ឍប្រទេស
ដើម្បីគ្រាន់តែជាការប្រឆាំង ដោយមិនបានរួមចំណែកការកសាង
និងការរក្សានូវស្ថេរភាពនយោបាយ និងការបង្រួមបង្រួមជាតិនោះឡើយ
គឺវាជាការបើកយុទ្ធនាការក្តៅដើម្បីផ្តួលរំលំរាជរដ្ឋាភិបាលកម្ពុជា ឬវាគ្រាន់តែជាការបំពក់ភ្លើង
ដែលនឹងនាំឱ្យមាននូវភាពចលាចល វឹកវរ
ក្រោមឥទ្ធិពលនៃជំហានបដិវត្តន៍ផ្កាម្លឹះ
ដែលត្រូវបានវាយបំបែកដោយកណ្តាប់ដៃដែកថែបរបស់សម្តេចតេជោនាពេលថ្មីៗ។
បើនិយាយឱ្យចំបញ្ហា វាគ្រាន់តែជាការបង្កើតរឿងថ្មីដើម្បីយកមករំងាប់បញ្ហាផ្ទៃក្នុងគណបក្សរបស់ខ្លួនដែលកំពុងតែបែកខ្ទេចខ្ទាំ
ជាច្រើនចំណែកហើយនោះ ដែលវិបត្តិដ៏ជ្រាលជ្រៅនេះ
មិនអាចប្រែមកជាល្អប្រសើរវិញបានឡើយ។
ការចាប់ផ្តើមដួលរលំ មុនពេលអនុវត្តផែនការ
វាបានក្លាយទៅជាទម្លាប់របស់គណបក្សសម រង្ស៊ី ទៅហើយ ហើយគណបក្សមួយនេះ
ក៍បានទទួលនូវមេរៀនជាបន្តបន្ទាប់ផងដែរពីសម្តេចតេជោ
ក្រោយពីថ្នាក់ដឹកនាំជាន់ខ្ពស់នៃបក្សប្រឆាំងមួយធ្វើការប្រៀបធៀបការដឹកនាំរបស់សម្តេច
ទៅនឹងរបបរបស់លោក កាដាហ្វី ដែលត្រូវបានសម្លាប់នាពេលថ្មីៗ។ សម្តេចតេជោ
បានព្រមានចាត់វិធានការតាមផ្លូវច្បាប់ ប្រសិនបើនៅតែបន្តរិះគន់ដោយគ្មានមូលដ្ឋានមកលើសម្តេច
បែបនេះ ដែលសម្តេចបានចាត់ទុកថា ជាការប្រមាថដល់អាយុជីវិតរបស់លោក ជាមួយនឹងការបញ្ជាក់ថា
រាជរដ្ឋាភិបាលមានការចាំបាច់ដើម្បីការពាររដ្ឋធម្មនុញ្ញ ការពារឯកភាពជាតិ និងស្ថេរភាពនយោបាយ
ដោយមិនអនុញ្ញាតឱ្យបក្សប្រឆាំងបានសម្រេចនូវសកម្មភាពនោះឡើយ។
វាជារឿងដ៏ចម្លែកបំផុត
ដែលអ្នកតំណាងរាស្ត្រ ជាប់ឆ្នោតដោយសម្លេងគាំទ្រពីប្រជាពលរដ្ឋ
តែពួកគេក្បត់ នឹងឆន្ទៈរាស្ត្រ ហើយគិតតែពីប្រយោជន៍បក្សពួក
ក្រុមនយោបាយរបស់ខ្លួន។ ពីព្រោះថា
ការខិតខំកៀងគររកជំនួយដើម្បីការអភិវឌ្ឍ
គឺជាករណីកិច្ចដ៏ចាំបាច់របស់រាជរដ្ឋាភិបាល ។ ដោយឡែកការអនុម័តកញ្ចប់ថវិកាដើម្បីបការអភិវឌ្ឍប្រទេស
គឺចាំបាច់ត្រូវតែមានការចូលរួមផ្តល់សេចក្តីគាំទ្រពីអ្នកតំណាងរាស្ត្រ។ដូច្នេះការចូលរួមសម្រេចគាំទ្រកញ្ចប់ថវិការមានន័យថាគឺជាការចូលរួមជួយកសាងផលប្រយោជន៍ដល់ប្រជាពលរដ្ឋកម្ពុជា
ដូចជាថវិការសំរាប់កសាងហេចដ្ឋារចនាសម្ព័ន្ធនានា រួមមានសាងសង់ផ្លូវ ថ្នល់
ស្ពាន ប្រឡាយទឹក មន្ទីរពេទ្យ សាលារៀន ។ល។និង។ល។
ត្រង់នេះសបញ្ជាក់ឲ្យឃើញថាតំណាងរាស្រ្តគណបក្សប្រឆាំងទាំង២៦រូប បើមិនចូលរួម ក្នុងការសម្រេចគាំទ្រកញ្ចប់ថវិការជាតិមែននោះ វាស្តែងឲ្យឃើញថា ក្រុមតំណាងរាស្រ្តទាំងនោះ
ស្មើនឹងបំផ្លាញជាតិពេញទី គឺការមិនចង់ឲ្យប្រជាពលរដ្ឋមាន៖ ផ្លូវ ថ្នល់ ស្ពាន
សាលារៀន មន្ទីរទេព្យ និងការអភិវឌ្ឍន៍ផ្សេងៗជាច្រើនទៀត។ ការធ្វើពហិការ
មិនចូលប្រជុំ និងរហូតដល់គំរាមថា លាឈប់ពីតំណែងតំណាងរាស្រ្ត នេះគឺជាការធ្វើវិទ្ធង្សនា
នឹងបង្អាក់ដំណើរការក្នុងការអភិវឌ្ឍន៍ប្រទេសកម្ពុជា។
វារិតតែបង្ហាញកាន់តែច្បាស់ថែមទៀតថា
ការពុំបានចូលរួមជួយកសាងជាតិរបស់គណបក្សប្រឆាំង
គឺជាការកាត់បន្ថយនូវអ្នកគាំទ្រកំរិតអប្បរិមា ឬនិងអាចឈានទៅរកការរលំរលាយទាំងស្រុងនៃបក្សប្រឆាំងមួយនេះ
ហើយផ្ទុយទៅវិញ
ប្រជាពលរដ្ឋនិងរិតតែមានជំនឿជឿជាក់កាន់តែខ្លាំងមកលើរាជរដ្ឋាភិបាល
ជាពិសេសគណបក្សប្រជាជនកម្ពុជា ដែលបានខិតខំកសាង និងអភិវឌ្ឍប្រទេស ពីមួយថ្ងៃទៅមួយថ្ងៃ ដែលមានការរីកចំរើនស្ទើរគ្រប់វិស័យ ដែលគណបក្សប្រឆាំងពិបាកនឹងយកប្រៀបឈ្នះបាន។
បន្ថែមពីលើនេះ សម្ដេចតេជោ ក៏បានរិះគន់
ទៅកាន់អ្នកនយោបាយ មួយរូបដែលលើកឡើងមួយឃ្លាថា
រដ្ឋាភិបាលយកការអភិវឌ្ឍន៍មកបិទបាំងអំពើផ្ដាច់ការរបស់ខ្លួន។ ត្រង់ចំណុចនេះ
សម្ដេចក៏បានសួរ ត្រឡប់ទៅវិញថា តើបិទបាំងអំពើផ្ដាច់ការ ត្រង់ណា ? អត់លទ្ធិប្រជាធិបតេយ្យ អត់មានសិទ្ធិបញ្ចេញមតិឬមួយយ៉ាងណា
? សម្ដេច តេជោ បានលើក
ឡើងទៀតថា សិទ្ធិទាំងអស់ នេះ គឺផ្ដើមចេញពីសិទ្ធិរស់រានមានជីវិត សិទ្ធិ ទទួលចំណីអាហារ សិទ្ធិទទួលបានការព្យា
បាល និងសិទ្ធិទទួលបានការអប់រំ ដូច្នេះតើ មេបក្សប្រឆាំងរូបនេះ មានសិទ្ធិមូលដ្ឋានទាំង៤ដែរឬអត់
?
វាជាការពិតមុននឹងនិយាយអំពីសិទិ្ធបញ្ចេញមតិត្រូវចាប់ផ្តើមគិតពីសិទិ្ធរស់រានមានជីវិតមុនគេសិន
បើគ្មានជីវិតផងតើមានសិទិ្ធបញ្ចេញមតិមកពីណា?ប្រជាពលរដ្ឋកម្ពុជាគ្រប់រូបបានដឹងថា
គណបក្សប្រជាជនកម្ពុជា បានជួយសង្រ្គោះជីវិតប្រជាពលរដ្ឋកម្ពុជាឲ្យរួចផុតជីវិតពីការកាប់សម្លាប់នៃរបបប្រល័យពូជសាសន៍
ប៉ុលពត ទាន់ពេលវេលានៅថ្ងៃទី៧ ខែមករា ឆ្នាំ១៩៧៩
បានធ្វើឲ្យប្រជាពលរដ្ឋកម្ពុជាមានជីវិតឡើងវិញ បានន័យថា មានជីវិតទើបមានសិទ្ធិបញ្ចេញមតិ
កម្ពុជាបានផ្តើមចេញពីចំណុចសូន្យ រហូតមានការរីកចំរើនដូចសព្វថ្ងៃនេះ គឺវាឆ្លងកាត់បញ្ហាជាច្រើនទម្រាំឲ្យអន្តរជាតិទទួលស្គាល់ជាប្រទេសកម្ពុជាជាប្រទេសអច្ឆរិយៈ ល្បីល្បាញពាសពេញពិភពលោក គឺកើតឡើងដោយក្រោមការដឹកនាំរបស់រាជរដ្ឋាភិបាលកម្ពុជា
នៃគណបក្សប្រជាជនកម្ពុជា។ ប្រទេសកម្ពុជាក្រោយឆ្នាំ១៩៩៣ រហូតមកដល់សព្វថ្ងៃ
បានប្រកាន់នូវប្រទេសដែលមាន ព្រះមហាក្សត្រ ទ្រង់ប្រតិបត្តិតាមរដ្ឋធម្មនុញ្ញ
និងតាមលទ្ធិប្រជាធិបតេយ្យ សេរីពហុបក្យ មានការបោះឆ្នោត ៥ឆ្នាំម្តងៗ យ៉ាងទៀងទាត់
ហើយគណបក្សនយោបាយមានសិទ្ធិរិះគន់យ៉ាងទូលំទូលាយមកលើរាជ រដ្ឋាភិបាល។
ជារួម គណបក្សប្រឆាំងគ្មានគោលការណ៍ណាមួយច្បាស់លាស់ក្នុង
ការបំរើផលប្រយោជន៍ដល់ ប្រជាពលរដ្ឋកម្ពុជានោះទេ គឺមានតែយុទ្ធនាការប្រឆាំង ដោយគ្មានការចូលរួម ក្នុងន័យថា«មិនជួយចូកមិនជួយចែវថែមទាំងយកជើងរាទឹក» ឬអាចនិយាយបានថា គណបក្សប្រឆាំងសម រង្ស៊ី បាន
និងកំពុងប្រកាស ខ្លួនបំផ្លាញផលប្រយោជន៍ជាតិទាំងមូល៕
រួម ជាតិ