មតិជាតិ-អន្តរជាតិភាគច្រើនមានការខ្មាសអៀនជំនួសគណបក្សនយោបាយប្រឆាំង
និងអង្គការមិនមែនរដ្ឋាភិបាលមួយចំនួនតូច ដែលបានដណ្តើមគ្នាចង់ជួបដើម្បី យកចិត្ត គាប់គួរដល់អ្នកតំណាងអង្គការបរទេស ជាពិសេសក្នុងខណៈពេលដែល លោក សុរិយា ស៊ូប៊េឌី
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទិ្ធមនុស្សមកស្នាក់នៅក្នុងប្រទេសកម្ពុជាចំនួនមួយសប្តាហ៍។
ក្រុមគណបក្សប្រឆាំង និងតំណាងអង្គការមិនមែនរដ្ឋាភិបាលទាំងនោះ
បាន និងកំពុងតែត្រៀមឯកសារដែលអវិជ្ជមានមួយចំនួន ដែលរាជរដ្ឋាភិបាលខ្វះចន្លោះយកមករាយការណ៍ ដោយក្រុមគេទាំងនោះបានយល់ថា លោក សុរិយា ស៊ូប៊េឌី
ជាអ្នកអាចជួយពួកក្រុមទាំងនោះដោយសុឆន្ទៈដើម្បីធ្វើរបាយការណ៍ទៅទីក្រុងហ្សឺណែវប្រទេសស្វីសនៅខែកញ្ញា ឆ្នាំ២០១២ ខាងមុខ ប៉ុន្តែពួកក្រុមគណបក្សប្រឆាំង និងតំណាងអង្គការដែលមាននិន្នាការប្រឆាំងរាជរដ្ឋាភិបាលមួយក្រុមនោះ
បានភ្លេចខ្លួនថាខ្លួនជាខ្មែរ គឺមានតែខ្មែរទេដែលស្គាល់ចិត្តខ្មែរ
មានតែខ្មែរទេដែលចេះជួយខ្មែរ គ្មានបរទេសណាស្រលាញ់ប្រទេសខ្មែរ
ជាងខ្មែរស្រលាញ់ប្រទេសខ្មែរនោះឡើយ។
តាមការពិតលោកសូរិយ៉ា ស៊ូប៊េឌី
មកទស្សនកិច្ចនៅកម្ពុជាគ្រាន់តែមកស្នាក់នៅសណ្ឋាគារលំដាប់
ថ្នាក់ផ្កាយប្រាំ ហើយពិសារអារហាតម្លៃមិនធម្មតាដូចជាថ្លើមក្ងាន
ពិសាស្រាតម្លៃមិនធម្មតា ដូចជាស្រាក្រហមប៉េត្រូស មកកម្ពុជាដើម្បីឱ្យបង្គ្រប់កិច្ចតែប៉ុណ្ណោះ ។
កាលពីថ្ងៃទី៦ខែ ធ្នូ ឆ្នាំ ២០១១ តាមរយៈវិទ្យុបរទេសនិយាយខេមរៈភាសារ លោក កឹម
សុខា បាននិយាយថា« លោក សុរិយា ស៊ូប៊ែឌី ក៏បានសន្យានឹងជម្រាបទៅមន្ត្រីរដ្ឋាភិបាលអំពីការរំលោភសិទ្ធិនយោបាយរបស់សកម្មជនសិទ្ធិមនុស្ស
និងលោក កឹម សុខា បានត្អូញត្អែរអំពីសុវត្ថិភាពផ្ទាល់ខ្លួនគាត់តែប៉ុណ្ណោះ» ហើយវិទ្យុដដែលនោះបានផ្សាយបន្ថែមថា លោក សុរិយា
ស៊ូប៊េឌី មកបំពេញទស្សនកិច្ចផ្លូវការនៅកម្ពុជា ចាប់ពីថ្ងៃទី៥ ដល់ថ្ងៃទី១១ ខែធ្នូ ដើម្បីសិក្សាលើប្រព័ន្ធបោះឆ្នោត
និងស្ថានភាពសិទ្ធិមនុស្ស។លោកក៏គ្រោង នឹងជួបពិភាក្សាការងារជាមួយអាជ្ញាធររដ្ឋាភិបាល អង្គការសង្គមស៊ីវិល គណៈកម្មាធិការជាតិ
រៀបចំការបោះឆ្នោត និងក្រុមប្រឹក្សាធម្មនុញ្ញ។
ក្រុមអ្នកវិភាគឯករាជ្យមួយចំនួនបានមើលឃើញថា សកម្មភាពគណបក្សប្រឆាំង និង អង្គការដែលមាននិន្នាការប្រឆាំងទាំងនោះ
មើលទៅវាទាស់ភ្នែកណាស់ រកអ្វីមកថ្លែងពុំដូចឡើយ
ហើយស្រគៀត្រចៀកខ្លាំងណាស់
ពីព្រោះសម័យនេះទៅហើយបែជានៅសល់មនុស្សអគតិច្រើនអីយ៉ាងនេះ?ដើម្បីឲ្យខ្លួននិងក្រុមខ្លួនរស់មិនគិតគូរពិចារណាដល់អ្នកដ៏ទៃ
ដោយបង្កើតជំនួញនយោបាយអសិលធម៌បែបនេះ។ សួរតាមត្រង់ចុះ
បើក្រុមលោកជាអ្នកដឹកនាំប្រទេសវិញ នៅពេលដែលខិតខំធ្វើការអភិវឌ្ឍន៍គ្រប់កន្លែង
គ្មានពេលទំនេរ ខិតខំរកជំនួយមកកសាងប្រទេសទប់ទល់ដោយជោគជ័យ
និងប្រកបដោយមោទនភាពជាតិខ្ពស់ប្រឆាំងនឹងការឈ្លានពាន
និងការវាយប្រហារដោយយោធាពីសំណាក់រដ្ឋាភិបាល អាប់ភីស៊ីត និងជួយប្រជាពលរដ្ឋក្នុងគ្រាទឹកជំនន់ប៉ុណ្ណឹង ហើយនៅតែមិនសរសើរ ថែមទាំងគេតិះដៀលនិងជេរប្រមាថដល់អាយុជីវិតម្រមុខរាជរដ្ឋាភិបាលទៅទៀត
តើអស់លោកមានអារម្មណ៍យ៉ាងម៉េចដែរ?អស់លោកយល់ថា អស់លោកជាមនុស្សអសិលធម៌ឬទេ? ។ ដូចពាក្យចាស់បុរាណណាចារ្យបានពោលទុកមកថា « ពិបាកពន្យល់មនុស្សចេះហើយ ធ្វើមិនចេះដឹងខុសហើយមិនទទួលថាខុស
សូម្បីតែព្រះសម្មាសម្ពុទ្ធក៏ព្រះអង្គប្រោសមិនបានដែរ។
ដោយសារមហិច្ឆិតាលោភលន់ចង់បានអំណាចខ្លាំងពេកលោក កឹម សុខា
បានប្រឌិតរឿងថា ឲ្យលោក សុរិយា ស៊ូប៊េឌី ជួយការពារអំពីសុវត្ថិភាពផ្ទាល់ខ្លួន
ត្រង់ចំណុចនេះសួរថា តើលោក កឹម សុខា បានដើរឃោសនាខុសរដូវដោយមិនគិតពីរដូវបោះឆ្នោត ឬក៏មិនបោះឆ្នោត ក៏លោក
កឹម សុខា មិនបានឈប់សំរាកផងពីព្រោះតាមតែយើងដឹងគឺលោកមានជំងឺលើសឈាមប្រចាំកាយ
និងជំងឺល្អក់ខួរក្បាល
ម្លោះហើយត្រូវតែចុះទៅជួបប្រជាពលរដ្ឋដើម្បីបន្ធូរអារម្មណ៍ ពីព្រោះមានប្រជាពលរដ្ឋមួយចំនួនតូចចេះបញ្ជោរ ចេះសរសើរ វាប្រសើរជាងអង្គុយនៅផ្ទះធ្វើឲ្យជំងឺរួមរឹត។ម៉្យាងវិញទៀត លោក កឹម សុខា
ក៏កំពុងរងនូវពាក្យចរចាមអារាមថា
លោកមានការតប់ប្រមល់យ៉ាងខ្លាំងដោយសារជ្រុលជ្រួសលួចមានប្រពន្ធចុងនៅឯមូលដ្ឋាន
ហើយថែមទាំងមានកូនស្រីម្នាក់ទៀត ហើយអំពើរផិតក្បត់ប្រពន្ធដើមនោះត្រូវបែកការ
គេដឹងល្បីសុះសាយ ដែលបណ្តាលឱ្យលោកកឹម សុខា ពិបាកចិត្តយ៉ាងខ្លាំង។
រាជរដ្ឋាភិបាលកម្ពុជាបានប្រកាន់យកនូវគោលការណ៏ប្រជាធិបតេយ្យអាស្រ័យធម្មនុញ្ញ ដែលឈរលើមូលដ្ឋានពហុបក្ស ធ្វើនយោបាយដោយសេរី និងគាំទ្រដល់សមាគម អង្គការសង្គមស៊ីវិល
ដូចជាកាលពីថ្ងៃទី៥
ខែធ្នូ ឆ្នាំ២០១១នេះ សម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្រ្តីនៃព្រះរាជាណាចក្រកម្ពុជា
បានលើកសរសើរដល់អង្គការសង្គមស៊ីវិលមួយចំនួនដូចជា អង្គការសេដាក អង្គការ Caritas និងអង្គការមួយចំនួនទៀត ថាពួកគេអត់ខ្វល់ពីអ្វីទេ ដឹងតែចុះទៅចែកជូនប្រជាពលរដ្ឋជាមួយអាជ្ញាធរនិងកាកបាតក្រហមតាមមូលដ្ឋានផ្ទាល់ដោយមិនខ្វាយខ្វល់ពីការអំពាវនាវរកជំនួយពីបរទេសនោះទេ
ហើយសម្តេចតេជោសែន
ក៏បានមានប្រសាសន៍បន្ថែមទៀតថា អង្គការទាំងនោះទើបជាអ្នកអនុវត្តសិទ្ធិប្រជាធិបតេយ្យពិតប្រាកដ ពីព្រោះពេលដែលជួយប្រជាពលរដ្ឋទាន់ពេលវេលានោះហើយ
គឺជាការបានអនុវត្តនូវសិទិ្ធរស់រានមានជីវិត។
ផ្ទុយទៅវិញមន្រ្តីអង្គការមួយចំនួនដែលជាប់សាច់ញាតិ ជាបងប្អូនរបស់តំណាងរាស្រ្តខេត្តកណ្តាលនៃគណបក្សសិទ្ធិមនុស្ស ខិតខំធ្វើវេទិកាដើម្បីជួយឃោសនានៅពីក្រោយខ្នងគណបក្សសិទ្ធិមនុស្សដើម្បីជួយបងប្រុសរបស់ខ្លួនឯង ហើយម្យ៉ាងទៀតក្រុមនេះដើរតួជាអង្គការ ប៉ុន្តែពីមួយថ្ងៃទៅមួយថ្ងៃ ខិតខំបំភ្លៃ
ព័ត៌មានដោយញ៉ុះញង់ ដុតបញ្ឆេះកំហឹងប្រជាពលរដ្ឋដើម្បីទាញយកតែប្រាក់ជំនួយពីបរទេសតែប៉ុណ្ណោះ។
សរុបសេចក្តីមក គណបក្សនយោបាយ និងអង្គការដែលមាននិន្នាការប្រឆាំងមួយចំនួនបាន និងកំពុងខំប្រឹងដើរប៉្រូដើម្បីតែការធ្វើជំនួញដូរបាយ
ចិញ្ចឹមក្រុម និងបក្ខពួករបស់ខ្លួន ដើម្បីតែប្រយោជន៍ឆ្នាំងតែប៉ុណ្ណោះ គឺពុំបានចូលរួមសកម្មភាពណាមួយជួយអភិវឌ្ឍប្រទេសជាតិជាមួយរាជរដ្ឋាភិបាលបន្តិចសោះឡើយ៕
ថ្ងៃទី០៨ ខែធ្នូ ឆ្នាំ២០១១
ដោយៈលោកស្រី
សិលា
អ្នកស្រាវជ្រាវប្រវត្តិសាស្រ្ត