សៀមរាប ៖ ប្រជាពលរដ្ឋចំនួន២៧៨គ្រួសារ
នៅក្នុងឃុំចំនួនពីរគឺឃុំកណ្តែកនិងឃុំរលួស
នៃស្រុកប្រាសាទបាគង
ដែលជួបរងគ្រោះដោយជំនន់ទឹកភ្លៀងទទួលបានអំណោយឧបត្ថម្ភជាអង្ករ និង
គ្រឿងឧបភោគបរិភោគជាច្រើនមុខទៀត ពីអង្គការការីតាសកម្ពុជា។
អំណោយទាំងនេះត្រូវបានប្រគល់និងចែកជូនប្រជាពលរដ្ឋ
កាលពីព្រឹកថ្ងៃទី១០ ខែតុលា ឆ្នាំ ២០១១ នៅបរិវេណសាលាស្រុកប្រាសាទបាគង
ក្រោមអធិបតីភាពលោក ស៊ូ ភិរិន្ទ ទីប្រឹក្សាផ្ទាល់សម្តេច
អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
និងជាអភិបាលនៃគណៈអភិបាលខេត្តសៀមរាប និងលោកស្រី បែកណា បែកគ្លីស
អ្នកសម្របសម្រួលអង្គការការីតាសកម្ពុជា ។
អភិបាលស្រុកប្រាសាទបាគងលោក ភូ សំអាត បានអោយដឹងថា
ប្រជាពលរដ្ឋនៅស្រុកប្រា សាទបាគងដែលរងគ្រោះដោយទឹកជំនន់
ទទួលបានអំណោយចំនួនបីលើកហើយដែលលើកទីមួយក្រុមការ
ងារគណៈបក្សប្រជាជនកម្ពុជាចុះជួយស្រុកប្រាសាទបាគង
បាននាំយកទៅផ្តល់ជូនប្រជាពលរដ្ឋនៅ ឃុំកំពង់ភ្លុក ចំនួន៦០គ្រួសារ។
លើកទីពីរទទួលបានពីសប្បុរសជនដែលជាជនជាតិស្វីសលោក អ៊ីនរីកូរ
ចែកជូនប្រជាពលរដ្ឋចំនួន៤០០គ្រួសារក្នុងឃុំចំនួន៣គឺឃុំរលួស២០០គ្រួសារ
ឃុំមានជ័យ១០០គ្រួសារឃុំត្រពាំងធំ១០០គ្រួសារ
និងលើកទីបីគឺផ្តល់ជូននៅពេលនេះផ្ទាល់តែម្តង ។
លោកអភិបាលស្រុកបានបន្តថាចំពោះការខូចខាតហេដ្ឋារចនាសម្ព័ន្ធផ្លូវលំ
ដីក្រហម ដីសរ ចំនួន១៣ខ្សែស្មើ១៥កន្លែងប្រវែង៣១០ម៉ែត្រនៅក្នុង
ឃុំចំនួន៥គឺឃុំកណ្តែក បាល័ង្ល រលួស បាគង មានជ័យ
និស្រូវខូចទូទាំងស្រុក១៤៧៨ហិកតា និងដំណាំហូបផ្លែ
និងដំណាំផ្សេង១៣២ហិកតា ។
លោកស្រី បែកណា បែកគ្លីស បានអោយដឹងថា
អង្គការរបស់លោកស្រីតែងតែធ្វើសកម្មភាព
មនុស្សធម៌ជាពិសេសលើប្រជាពលរដ្ឋក្រីក្រ និងរងគ្រោះដោយធម្មជាតិ
ព្រមទាំងអនុវត្តិលើការងារកុមារ ស្ត្រី ជាពិសេសអ្នកផ្ទុកមេរោគអេដស៍ ។
លោកស្រីបានបន្តថា
អង្គការការីតាសកម្ពុជានិងបន្តការសហការជាមួយអាជ្ញាធរដែនដី
គ្រប់លំដាប់ថ្នាក់
ដើម្បីអនុវត្តទៅលើគម្រោងទាំងអស់នេះអោយបានសម្រេចជោគជ័យ ។
លោកស្រីបានបញ្ជាក់ថា
លោកស្រីនិងក្រុមការងារនឹងបន្តកិច្ចការទាំងនេះបន្តទៀតនៅខេត្តសៀមរាប
ជាពិសេសតាមបណ្តាស្រុកមួយចំនួនដែលនៅដាច់ស្រយាលពីទីរួមខេត្ត ។
អំណោយដែលត្រូវផ្តល់ជូននាពេលនេះក្នុងមួយួគ្រួសារទទួលបាន
អង្ករ២៥គីឡូក្រាម ត្រីខ មួយយួរ ទឹកស៊ីអ៊ីវ ទឹកត្រី អំបិល ស្ករស សាប៊ូដុំ
សាប៊ូម្សៅ ថ្នាំក្លរ៉ាមីន និងថវិការ១ម៉ឺនរៀលផងដែរ ។
ចំណែកអភិបាលខេត្តសៀមរាបលោក ស៊ូ ភិរិន្ទ បានមានប្រសាសន៍លើកឡើងថា
ក្នុងនាម អាជ្ញាធរខេត្តសូមថ្លែងអំណរគុណចំពោះអង្គការការីតាសកម្ពុជា
ដែលបាននាំនូវអំណោយទាំងអស់នេះ
ផ្តល់ជូនដល់ប្រជាពលរដ្ឋដែលរងគ្រោះដោយជំនន់ទឹកភ្លៀងនេះ ។
លោកអភិបាលខេត្តបានបន្តថា
ប្រជាពលរដ្ឋដែលរងគ្រោះដោយជំនន់ទឹកភ្លៀងនិងទឹកទន្លេសាប
នៅខេត្តសៀមរាបមានចំនួន១២០០០គ្រួសារ
ហើយបញ្ហានេះត្រូវបានប្រមុខរាជរដ្ឋាភិបាលកម្ពុជាសម្តេច
អគ្គមហាសេនាបតីតេជោ ហ៊ុន សែន និងលោកជំទាវគតិព្រឹទ្ធបណ្ឌិត ប៊ុនរ៉ានី
ហ៊ុនសែន ផ្តល់ជាអង្ករនិងថវិការយ៉ាងច្រើនសម្រាប់ផ្តល់ជូនប្រជាពលរដ្ឋ
ដោយក្នុងនោះមួយចំនួនត្រូវបានប្រគល់ជូនរួចហើយ
និងមួយចំនួនទៀតគ្រោងនឹងបន្តផ្តល់ជូននាពេលខាងមុខនេះ។ លោក ស៊ូ ភិរិន្ទ
បានបញ្ជាក់ថា ចំពោះប្រជាពលរដ្ឋដែលខូចខាតស្រូវ សន្ទូងនោះខាងខេត្ត
បានត្រៀមរួចហើយក្នុងនោះត្រៀមស្រូវពូជចំនួន១៥០តោន
ដើម្បីផ្តល់ជូនដល់ប្រជាពលរដ្ឋ៕
ហម សំបូរ
