Sunday, August 10, 2014
សម្តេចតេជោពេញចិត្តចំពោះការផ្តន្ទាទោស នួន ជា និង ខៀវ សំផន ដោយតុលាការក្រោយរង់ចាំយុត្តិធម៌ជាង ៣៥ឆ្នាំ
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងអំពីការពេញចិត្តជាខ្លាំង និងគាំទ្រទាំងស្រុងនូវការសម្រេចផ្តន្ទាទោសលើមេដឹកនាំខ្មែរក្រហមទាំងពីរ គឺលោក នួន ជា និងលោក ខៀវ សំផន ដោយអង្គជំនុំជម្រះវិសាមញ្ញនៃតុលាការកម្ពុជា (អវតក) ខណៈដែលសម្តេច និងសម្តេចកិត្តិព្រឹទ្ធបណ្ឌិត ជាភរិយា ទន្ទឹងរង់ចាំនូវយុត្តិធម៌នេះ អស់រយៈពេលជាង ៣៥ឆ្នាំមកហើយ។
បន្ទាប់ពីបញ្ចប់កិច្ចប្រជុំរដ្ឋសភា ដែលមានតំណាងរាស្ត្រគណបក្សសង្ក្រោះជាតិទាំង ៥៥នាក់ចូលរួមជាលើកដំបូង នៅព្រឹកថ្ងៃទី៨ ខែសីហា ឆ្នាំ២០១៤ សម្តេចតេជោ បានថ្លែងប្រាប់ក្រុមអ្នកសារព័ត៌មាននាវិមានរដ្ឋសភាថា "ខ្ញុំបានតាមដានដោយយកចិត្តទុកដាក់។ ម្សិលមិញនេះ ជាភព្វសំណាង ដែលខ្ញុំបានបើកមើលដោយផ្ទាល់ ហើយខ្ញុំមានការពេញចិត្តយ៉ាងខ្លាំងជាមួយនឹងសាលក្រមនៃតុលាការកូនកាត់មួយនេះ។ យើងបានប្រឹងប្រែងដំណើរការរឿងនេះ។ ហើយម្សិលមិញ បន្ទាប់ពីកាត់ក្តីហើយ នៅពេលបាយ ខ្ញុំបាននិយាយជាមួយភរិយារបស់ខ្ញុំថា យើងរង់ចាំអស់ ៣៥ឆ្នាំ និង ៨ខែគត់។ មានន័យថាម៉េច? យើងបានផ្តួលរំលំរបបប្រល័យពូជសាសន៍ប៉ុលពត នៅថ្ងៃ៧មករា ឆ្នាំ១៩៧៩ ប៉ុន្តែគេមិនដែលទទួលស្គាល់ ពេលនោះគេដាក់កំហុសយើងខ្ញុំ មកដល់គណបក្សប្រជាជនថា វ៉ៃគេនឹងខុសរហូតដល់គេនិយាយថា ឆ្អឹងអីៗ សុទ្ធតែសិប្បនិម្មិត្តទេ"។
សម្តេចតេជោមានប្រសាសន៍ឲ្យដឹងថា "ខ្លួនខ្ញុំផ្ទាល់ទៅចរចា ខ្ញុំបាននិយាយច្បាស់ថា កន្លែងសមរម្យរបស់ពួកខ្មែរក្រហម គឺតុលាការកាត់ទោស មិនមែននៅក្នុង SNC (ក្រុមប្រឹក្សាបង្រួបបង្រួមជាតិជាន់ខ្ពស់)។ ក៏ប៉ុន្តែពេលនោះ គ្មាននរណាយកចិត្តទុកដាក់ចំពោះយើងទេ។ យើងបានស្នើដាក់ក្នុងកិច្ចព្រមព្រៀងទីក្រុងប៉ារីសថា ទប់ស្កាត់ការវិលត្រលប់នៃរបបប្រល័យពូជសាសន៍ ក៏ប៉ុន្តែគេមិនបានព្រមទៅនឹងអ្វីរបស់យើងទេ គេបែរជាមិនហ៊ានដាក់នូវពាក្យនេះ ប៉ុន្តែបានត្រឹមដាក់ពាក្យថា ទប់ស្កាត់ការវិលត្រលប់នៃអតីតកាលៗថ្មីៗ"។
សម្តេចតេជោនាយករដ្ឋមន្ត្រី បានមានប្រសាសន៍រំលឹកថា "នៅឆ្នាំ១៩៧៩ ពេលនោះ អតីតសាធារណរដ្ឋប្រជាមានិតកម្ពុជា បានកាត់ទោសខ្មែរក្រហម ប៉ុន្តែគេអត់ទទួលស្គាល់ គេជួយខ្មែរក្រហម ឲ្យវ៉ៃប្រជាជនកម្ពុជាពន្លិចថែមទៀត។ ប៉ុន្តែម្សិលមិញនេះ (៧សីហា២០១៤) គឺយុត្តិធម៌បានផ្តល់មកដល់ជនរងគ្រោះហើយ។ អ្វីដែលយើងបានធ្វើកាលពី ៣៥ ឆ្នាំមុន គឺត្រឹមត្រូវ។ បានន័យថា យើងរង់ចាំនូវយុត្តិធម៌នេះ អស់រយៈពេល ៣៥ឆ្នាំ និង ៨ ខែ ព្រោះម្សិលមិញ ថ្ងៃទី៧ អីចឹង ៣៥ឆ្នាំ ៨ខែនេះ ទម្រាំតែរង់ចាំនូវយុត្តិធម៌មួយនេះ វាលំបាក វាឈឺចាប់ ប៉ុន្តែម្សិលមិញ យើងមានការធូរអារម្មណ៍ថា យុត្តិធម៌ត្រូវបានផ្តល់ពិតមែនតែអ្នកនេះ គឺរស់មិនបានយូរប៉ុន្មាន ប៉ុន្តែទោសមួយជីវិតនេះ ល្មមគ្រប់គ្រាន់ ដើម្បីនឹងប្រជាជនសាទរហើយ"។
សូមបញ្ជាក់ថា មេដឹកនាំជាន់ខ្ពស់នៃរបបប្រល័យពូជសាសន៍ នួន ជា និង ខៀវ សំផន កាលពីថ្ងៃទី០៧ ខែសីហា ឆ្នាំ២០១៤ ត្រូវបានអង្គជំនុំជម្រះវិសាមញ្ញនៃតុលាការកម្ពុជា(អវតក) សម្រេចផ្តន្ទាទោសដាក់ពន្ធនាគារអស់មួយជីវិត ពីបទឧក្រិដ្ឋកម្មប្រឆាំងមនុស្សជាតិ។
សាលក្រមរបស់ (អវតក) ធ្វើឡើងក្នុងសំណុំរឿង០០២/០១ នេះទទួលបានការអបអរសាទរជាខ្លាំងពីសំណាក់ប្រជាពលរដ្ឋខ្មែរ ក៏ដូចជាអង្គការសហប្រជាជាតិសហរដ្ឋអាមេរិកសហគមន៍អឺរ៉ុប និងបណ្តាប្រទេសដែលជាម្ចាស់ជំនួយចំពោះតុលាការកាត់ទោសមេដឹកនាំជាន់ខ្ពស់ខ្មែរក្រហមនេះ៕
Subscribe to:
Posts (Atom)