ដោយ ៖ ម៉ែវ សាធី ថ្ងៃទី 15 សីហា 2012ម៉ោង 13:46:24
ភាពតានតឹងនៅក្នុងទំនាក់ទំនងរវាង សម្ពន្ធមិត្ដដ៏ជិតស្និទ្ធបំផុតរបស់អាមេរិក នៅតំបន់អាស៊ី គឺជប៉ុន និងកូរ៉េខាងត្បូង បានធ្វើឱ្យរដ្ឋាភិបាលទីក្រុងវ៉ាស៊ីនតោន មានការព្រួយបារម្ភយ៉ាងខ្លាំង ។
ភាពតានតឹងរវាងកូរ៉េខាងត្បូងនឹងជប៉ុនបានធ្វើឱ្យអាមេរិកត្រូវរាំងស្ទះ នៅពេលដែលទីក្រុងវ៉ាស៊ីនតោនព្យាយាម បង្កើនកិច្ចសហប្រតិបត្ដិការមួយ បណ្ដាសម្ពន្ធមិត្ដជាផ្នែកមួយនៃគោលនយោបាយឆ្ពោះមកកាន់តំបន់អាស៊ី ប៉ាស៊ីហ្វីករបស់ខ្លួន ។
ប្រធានាធិបតីលី ម្យ៉ុងបាក់ កាលពីពេលកន្លងមកបានទស្សនកិច្ចទៅកាន់ ប្រជុំកោះជាប្រវត្ដិសាស្ដ្រដែលសម្បូរ ទៅដោយធនធានធម្មជាតិ ទាំងរដ្ឋាភិ បាលទីក្រុងសេអ៊ូល និងទីក្រុងតូក្យូ សុទ្ធសឹងតែអះអាងថា ជាអធិបតេយ្យភាព របស់រៀងៗខ្លួននៅប្រជុំកោះដុកឌូ ដែល ជប៉ុនហៅថា កោះ តាកែស៊ីម៉ា ។
អាមេរិកបានស្នើឱ្យសម្ពន្ធមិត្ដទាំង២ ត្រូវតែបង្កើនទំនាក់ទំនងឱ្យល្អប្រសើរនឹងគ្នាវិញ ។ អ្នកនាំពាក្យក្រសួងការបរទេស អាមេរិកលោកស្រី វីចថើរៀ ណូឡែន បញ្ជាក់ថា “យើងគ្មានវិវាទអធិបតេយ្យ ភាពនៅទីនេះ យើងចង់មើលឃើញ សម្ពន្ធមិត្ដដ៏ជិតស្និទ្ធទាំងពីររបស់ខ្លួននៅ ប៉ាស៊ីហ្វីកសហការណ៍គ្នាដោះស្រាយ រាល់វិវាទដោយសន្ដិវិធី” ។
ប្រធានាធិបតីអាមេរិក លោកបារ៉ាក់ អូបាម៉ា បានលើកឡើងពីគោលនយោ បាយឆ្ពោះមកកាន់តំបន់អាស៊ីប៉ាស៊ីហ្វីក ជាតំបន់ដែលមានសេដ្ឋកិច្ចកំពុង អភិវឌ្ឍន៍យ៉ាងខ្លាំង ។ បច្ចុប្បន្ន អាមេរិក មានកម្លាំងទាហាន៧៥ពាន់នាក់ឈរជើង នៅជប៉ុននិងកូរ៉េខាងត្បូងជាផ្នែកមួយ ក្នុងការពង្រឹងកម្លាំងយោធានៃដំណើរ ឆ្ពោះមកកាន់អាស៊ីរបស់អាមេរិក ។
ក្នុងចំណោមមេដឹកនាំដែលមាន ឥទ្ធិពលនៅទ្វីបអាស៊ី ប្រធានាធិបតីកូរ៉េ ខាងត្បូងលី ម្យ៉ុងបាក់ ជាបុគ្គលមាន ទំនាក់ទំនងជិតស្និទ្ធបំផុតជាមួយប្រធា នាធិបតីអូបាម៉ា ។ បណ្ដាមន្ដ្រីជាន់ខ្ពស់ អាមេរិកបានស្ងើចសរសើរដល់ប្រធានា ធិបតីលី ម្យ៉ុងបាក់ ដែលមានការសំឡឹង មើលវែងឆ្ងាយទៅលើចំណុចសំខាន់ៗ នៅលើពិភពលោក ។
កាលពីខែមិថុនា រដ្ឋាភិបាលរបស់ ប្រធានាធិបតី លី ម្យ៉ុងបាក់ មានគម្រោងចុះហត្ថលេខាចែករំលែកព័ត៌មានចារ កម្មយោធារវាងកូរ៉េខាងត្បូង នឹងជប៉ុន ជាលើកដំបូងក្នុងប្រវត្ដិសាស្ដ្រក្រោយពីឆ្នាំ១៩៤៥ ។
លោក Bruce Klingner អ្នកឯកទេសស្រាវជ្រាវមកពីមជ្ឈមណ្ឌល Heritage Foundation អាមេរិកបាន បញ្ជាក់ថា “ភាពតានតឹងរវាងទីក្រុង សេអ៊ូលនឹងតូក្យូបានជះឥទ្ធិពលយ៉ាងធំ ធេងដល់សន្ដិសុខរបស់ប្រទេសទាំងពីរ ក៏ដូចជារារាំងដល់គោលដៅដល់សន្ដិ សុខរបស់អាមេរិកនៅតំបន់អាស៊ីប៉ាស៊ី ហ្វីកផងដែរ” ៕