Friday, March 22, 2013
សម្តេចតេជោ៖ ជីវិត និងអនាគតខ្ញុំស្ថិតក្នុងដៃព្រះសង្ឃនិងប្រជាជនកម្ពុជា
ថ្លែងនៅក្នុងពិធីបុណ្យបញ្ចុះខណ្ឌសីមាពុទ្ធាភិសេក
និងសម្ពោធឆ្លងសមិទ្ធផលនានា ក្នុងមជ្ឈមណ្ឌលសាសនា វប្បធម៌ ទេសចរណ៍ ព្រះវិហារសំពៅត្រៃលោក ត្រៃលក្ខណ៍ ក្នុងស្រុកសន្ទុកខេត្តកំពង់ធំ នាថ្ងៃទី២១
ខែមីនា ឆ្នាំ២០១៣ សម្តេចអគ្គមហាសេនាបតីតេជោ
ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសដាក់ខ្លួនរបស់សម្តេចជូនព្រះសង្ឃ
និងប្រជាជនកម្ពុជាក្នុងការសម្រេចអំពីជោគរវាសនារបស់សម្តេចសម្រាប់ការបោះឆ្នោតសកលនាពេលខាងមុខនេះ។
សម្តេចតេជោនាយករដ្ឋមន្ត្រីបានមានប្រសាសន៍ថា
បញ្ហានៅទីនេះ ជីវិតរបស់ខ្ញុំ អនាគតរបស់ខ្ញុំ
កំពុងតែស្ថិតនៅក្នុងដៃរបស់ព្រះសង្ឃ
និងបងប្អូនប្រជាពលរដ្ឋទាំងអស់ហើយ។
ខ្ញុំកាន់តំណែងក្នុងកិត្តិយស ដោយការបោះជឿទុកចិត្តរបស់ប្រជាជន
ព្រោះដំណាក់កាលប្រជាធិបតេយ្យសេរីពហុបក្ស មានបក្សច្រើនចូលរួមធ្វើការប្រកួតប្រជែង ដូច្នេះដើម្បីបន្តឲ្យខ្ញុំធ្វើនាយករដ្ឋមន្ត្រីបាន ខ្ញុំសុំពឹងពាក់វិញ។ ខ្ញុំបានបំពេញករណីយកិច្ចក្នុងឋានៈជាពលរដ្ឋ ក្នុងឋានៈជានាយករដ្ឋមន្ត្រីដែលមានការទទួលខុសត្រូវ
ដែលនាំមកនូវសន្តិភាព នយោបាយឈ្នះ-ឈ្នះ ជានយោបាយរបស់ខ្ញុំ
ដែលបានការគាំទ្រពីគណបក្សប្រជាជនកម្ពុជា និងបានធ្វើការអភិវឌ្ឍន៍គ្រប់ទីកន្លែង។
សម្តេចតេជោថ្លែងថា ខ្ញុំផ្ញើសារចំពោះប្រជាជននៅទីនេះ
និងប្រជាជននៅទូទាំងប្រទេស ជោគវាសនារបស់ខ្ញុំនៅពេលខាងមុខស្ថិតនៅលើដៃរបស់ប្រជាជន។
សម្តេចតេជោបានរំលឹកឡើងវិញថា
កាលថ្ងៃសៅរ៍ និងថ្ងៃអាទិត្យ
(១៦-១៧
ខែមីនា)កន្លងទៅ នៅក្នុងមហាសន្និបាតវិសាមញ្ញតំណាងទូទាំងប្រទេស គណបក្សប្រជាជនកម្ពុជាបានអនុម័តជាផ្លូវការ បេក្ខភាពខ្ញុំ សម្រាប់បន្តមុខតំណែងជានាយករដ្ឋមន្ត្រីសម្រាប់អាណត្តិ
២០១៣-២០១៨ ដូច្នេះអ្វីដែលខ្ញុំបានធ្វើសម្រាប់ព្រះសង្ឃ និងប្រជាពលរដ្ឋក្នុងរយៈពេលជាង ៣៤ឆ្នាំ កន្លងមកនេះ បងប្អូនប្រជាពលរដ្ឋបានឃើញហើយនូវសមិទ្ធផលដែល
ហ៊ុន សែន ដឹកនាំនោះ
គឺសមិទ្ធផលសន្តិភាព ដែលរកមិនបានរាប់រយឆ្នាំមកហើយ ដែលប្រទេសបែកបាក់ជាចំរៀកៗ។ គ្មានបក្សប្រឆាំងបក្សបញ្ឆោតណាបានធ្វើទេ។
ដោយធ្វើការប្រៀបធៀបរវាងអ្នកដឹកនាំប្រទេសដូចជាអ្នកកាន់ចង្កូតរថយន្ត
សម្តេចតេជោនាយករដ្ឋមន្ត្រីថ្លែងថា បើនិយាយពីរថយន្តវាអត់ខុសគ្នាជាមួយនឹងនយោបាយប្រទេសជាតិទេ
បានសេចក្តីថា ជីវិតមនុស្សលើរថយន្តពឹងផ្អែកលើអ្នកបើកបរនេះឯង។ មនុស្សមួយឡានត្រូវផ្អែកទៅលើមនុស្សម្នាក់នោះ អញ្ចឹងបានជាគេត្រូវជ្រើសរើសឲ្យបានត្រឹមត្រូវណាស់សម្រាប់តួនាទីរបស់នាយករដ្ឋមន្ត្រី។
ប្រទេសមួយរក្សាស្ថិរភាពបាន ឬមិនបាន
អភិវឌ្ឍន៍បានឬមិនបានក៏វាចំណុះលើអ្នកបើកបរដែរ។
អ្នកបើកបរ លន់ នល់ អ្នកបើកបរ
ប៉ុល ពត ក៏បានធ្វើឲ្យប្រទេសនេះខ្ទេចខ្ទាំ ហើយៗអ្នកបើកបរ ហ៊ុន សែន បានចេញដំណើរតាំងពីឆ្នាំ១៩៧៩ រហូតមកដល់ពេលនេះ។
សម្តេចតេជោមានប្រសាសន៍ថា ជួសមុខឲ្យសម្តេច ជា ស៊ីម សម្តេច ហេង សំរិន ខ្ញុំត្រូវតែទទួលខុសត្រូវចំពោះមុខបញ្ហានេះ ហើយឥឡូវអាចឲ្យខ្ញុំសុំបានវិញទេ សុំសន្លឹកឆ្នោតពីព្រះសង្ឃ និងប្រជាពលរដ្ឋម្នាក់ ១សន្លឹកបានទេ នៅថ្ងៃទី២៨
ខែកក្កដា ឆ្នាំ២០១៣ ខាងមុខនេះ។
សម្តេចតេជោនាយករដ្ឋមន្ត្រីក៏បានគូសបញ្ជាក់ដែរថា
អ្នកដទៃក៏និយាយអញ្ចឹងដែរថា សូមបោះឆ្នោតឲ្យគេៗ
ខ្ញុំនិយាយដូចជាមិនខុសទេ ព្រោះគេមានសិទ្ធិនិយាយ
ហើយគណៈកម្មាធិការជាតិរៀបចំការបោះឆ្នោតអត់មានហាមឃាត់អីផង។
នេះជាសិទ្ធិនយោបាយដែលត្រូវនិយាយ។
បើនាយករដ្ឋមន្ត្រីអត់មានសិទ្ធិនិយាយទេចប់ហើយ។ សម្តេចតេជោបានប្រសាសន៍បញ្ជាក់ជាថ្មីទៀតថា បើសិនជាស្រឡាញ់ អាណិត ពេញចិត្ត និងជឿទុកចិត្តលើ
ហ៊ុន សែន សូមបោះឆ្នោតជូនគណបក្សប្រជាជនកម្ពុជា។
ប្រជាជនបានឃើញហើយនូវសមិទ្ធផលក្រោមការដឹកនាំរបស់ ហ៊ុន សែន។ ឥឡូវដល់ពេលដែលខ្ញុំពឹងពាក់ហើយ។
រឿងនេះសម្រេចជោគវាសនារបស់នាយករដ្ឋមន្ត្រី។ អ្នកដែលគេចង់ដណ្តើមកន្លែងគឺកន្លែងនាយករដ្ឋមន្ត្រីនេះតែម្តង អញ្ចឹងបើគណបក្សប្រជាជនមានសម្លេងភាគតិចពីក្នុងសភាបានសេចក្តីថា ខ្ញុំក្លាយទៅជាអ្នកមិនមែនជានាយករដ្ឋមន្ត្រីទៀតទេ។
គួរបញ្ជាក់ថា សមិទ្ធផលនានាក្នុងមជ្ឈមណ្ឌលសាសនា
វប្បធម៌ ទេសចរណ៍ព្រះវិហារសំពៅត្រៃលោក
ត្រៃលក្ខណ៍ ដែលស្ថិតនៅក្នុងស្រុកសន្ទុក ខេត្តកំពង់ធំ ដែលត្រូវបានដាក់សម្ពោធឲ្យប្រើប្រាស់ក្រោមអធិបតីភាពរបស់សម្តេចអគ្គមហាសេនាបតីតេជោ
ហ៊ុន សែន
និងលោកជំទាវកិត្តិព្រឹទ្ធបណ្ឌិត ប៊ុន រ៉ានី បានដំណើរការសាងសង់រួចរាល់ជាស្ថាពរក្រោមកម្លាំងមហាសាមគ្គីពីសំណាក់ព្រះសង្ឃ
ពុទ្ធបរិស័ទ និងប្រជាពលរដ្ឋមកពីគ្រប់ទិសទី ទាំងក្នុង និងក្រៅប្រទេស ជាពិសេសក្រុមការងារគណបក្សប្រជាជនកម្ពុជា
ដោយចំណាយថវិកាសរុបចំនួន ១ ២៦២ ៤៤៨
ដុល្លារអាមេរិក៕
អត្ថបទៈ
អង្គភាពព័ត៌មាន និងប្រតិកម្មរហ័ស
Subscribe to:
Posts (Atom)