ចេញផ្សាយថ្ងៃ: ( ២០ - វិច្ឆិកា - ២០១២ )
ឯកឧត្ដមបារ៉ាក់ អូបាម៉ា ប្រធានាធិបតីសហរដ្ឋអាមេរិក បានមានប្រសាសន៍ឲ្យដឹងនាល្ងាចថ្ងៃទី១៩ ខែវិច្ឆិកា ឆ្នាំ២០១២ថាឯកឧត្ដមនឹងចាត់ឲ្យក្រុមសម្របសម្រួលធ្វើការជាមួយក្រុម ជំនាញរបស់កម្ពុជាដើម្បីដោះស្រាយបញ្ហាបំណុល និងបង្កើនទំនាក់ទំនងប្រទេសទំាងពីរឲ្យកាន់តែល្អប្រសើរ។
ឯកឧត្ដមបារ៉ាក់ អូបាម៉ា ប្រធានាធិបតីសហរដ្ឋអាមេរិក បានអញ្ជើញមកដល់ព្រះរាជាណាចក្រកម្ពុជា នៅល្ងាចថ្ងៃទី១៩ ខែវិច្ឆិកា ឆ្នាំ២០១២ ដើម្បីចូលរួមក្នុងកិច្ចប្រជុំកំពូលអាស៊ាន-អាមេរិក លើកទី៤ និងកិច្ចប្រជុំអាស៊ីបូព៌ា នៅក្នុងរាជធានីភ្នំពេញ ដែលក្នុងដំណើរទស្សនកិច្ចនេះ ឯកឧត្ដមប្រធានាធិបតីសហរដ្ឋអាមេរិកបានជួបពិភាក្សាទ្វេភាគីជាមួយសម្តេចអគ្គមហាសេនាបតីតេជាហ៊ុន សែននៅវិមានសន្តិភាពមុននឹងចូលរួមកិច្ចប្រជុំអាស៊ានអាមេរិកលើកទី៤។
ឯកឧត្ដមប្រាក់ សុខុន រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការទីស្ដីការគណៈរដ្ឋមន្រ្តី បានឲ្យអ្នកសារព័ត៌មានដឹងនៅក្រោយជំនួបនោះថា សម្ដេចតេជោ បានសម្ដែងនូវការស្វាគមន៍យ៉ាងកក់ក្ដៅបំផុតចំពោះវត្តមាន ឯកឧត្ដមប្រធានាធិបតីអូបាម៉ា នៅក្នុងព្រះរាជាណាចក្រកម្ពុជា។ សម្ដេចតេជោ ក៏បានថ្លែងនូវការកោតសរសើរដោយស្មោះចំពោះ ឯកឧត្តមបារ៉ាក់ អូបាម៉ា ដែលបានជាប់ឆ្នោតសារជាថ្មី ជាប្រធានាធិបតីសហរដ្ឋអាមេរិកសម្រាប់អាណត្តិបន្ត។
សម្ដេចតេជោនាយករដ្ឋមន្រ្តីក៏បានវាយតម្លៃចំពោះដំណើរទស្សនៈកិច្ចរបស់ឯកឧត្តមបារ៉ាក់ អូបាម៉ា ជាប្រធានាធិបតីសហរដ្ឋអាមេរិកកាន់អំណាចទី១ដែលមកកាន់ប្រទេស កម្ពុជាថាជាទស្សនកិច្ចជាប្រវត្តិសាស្រ្ត ។ សម្ដេចតេជោក៏បានសម្ដែងនូវការពេញចិត្ត និងលើកទឹកចិត្តចំពោះការចូលរួមដ៏សកម្មរបស់ឯកឧត្តមប្រធានាធិបតី អូបាម៉ា នៅក្នុងគ្រប់កិច្ចប្រជុំកំពូលអាស៊ីបូព៌ានាពេល កន្លងទៅក្នុងអាណត្តិដែលឯកឧត្ដមអូបាម៉ា ជាប្រធានាធិបតីកាន់អំណាច ។
ឯកឧត្តម ប្រាក់ សុខុន មានប្រសាសន៍ឲ្យដឹងថា នៅក្នុងជំនួបនោះ ឯកឧត្តមប្រធានាធិបតីអូបាម៉ា បានថ្លែងអំណរគុណ ចំពោះបដិសណ្ឋារកិច្ចដ៏ល្អប្រសើរដែលរាជរដ្ឋាភិបាលកម្ពុជាបានរៀប ចំជូន រូបលោកហើយក៏សម្ដែងនូវការរីករាយនៅក្នុងការចូលរួមកិច្ចប្រជុំ កំពូលអាស៊ាន សហរដ្ឋអាមេរិក, កិច្ច ប្រជុំកំពូលអាស៊ីបូព៌ា និងកិច្ចប្រជុំផ្សេងទៀត ។ ឯកឧត្តមប្រធានាធិបតីសហរដ្ឋអាមេរិកក៏បានថ្លែងនូវការរំលែកទុក្ខចំពោះការ យាងចូលព្រះទិវង្គត របស់អតីតព្រះមហាវីរក្សត្រនរោត្តមសីហនុ។
ឯកឧត្តមប្រធានាធិបតីសហរដ្ឋអាមេរិកបានជម្រាបជូនសម្ដេចតេជោថា ឯកឧត្តមទើបតែមកពីធ្វើទស្សនកិច្ចនៅប្រទេសមីយ៉ាន់ម៉ា ដែលនៅទីនោះគឺជាដំណើរទស្សនកិច្ច លើកទី១របស់ប្រធានាធិបតីអាមេរិក កាន់អំណាចទៅកាន់ប្រទេសនោះដែរ ដែលនៅទីនោះឯកឧត្តមបានកត់សម្គាល់ឃើញថា មានជំហានសំខាន់ៗឆ្ពោះទៅកាន់លទ្ធិប្រជាធិបតេយ្យ មានការកែទម្រង់ ដ៏សំខាន់ៗ ទាំងក្នុងវិស័យសេដ្ឋកិច្ចទាំងក្នុងវិស័យនយោបាយ។ ឯកឧត្តមប្រធានាធិបតីមានប្រសាសន៍ថា ការដែល ឯកឧត្តមបំពេញទស្សនកិច្ចមកកាន់តំបន់នេះ គឺ ឯកឧត្តមចង់បញ្ជូនសារមួយ ថាសហរដ្ឋអាមេរិកចង់ធ្វើការ ជាមួយប្រទេសទាំងឡាយណា ដែលធ្វើការដើម្បីលើកស្ទួយលទ្ធិប្រជាធិបតេយ្យ និងសិទ្ធិមនុស្ស ហើយ ឯកឧត្តមបានចាត់ទុកថា តំបន់អាស៊ីអាគ្នេយ៍យើងនេះ គឺជាតំបន់ដែលមានអនាគតដ៏ល្អប្រសើរមួយ។
ឯកឧត្តម ប្រាក់ សុខុន មានប្រសាសន៍ថា សម្ដេចតេជោនាយករដ្ឋមន្រ្តីបានសម្ដែងនូវការពេញចិត្តចំពោះទំនាក់ ទំនងទ្វេភាគីកម្ពុជាអាមេរិក នៅក្នុងរយៈពេលប៉ុន្មានឆ្នាំចុងក្រោយនេះ ដោយសម្តេចបានបញ្ជាក់ថា ការស្ថាបនាឡើងនូវស្ថានទូតសហរដ្ឋអាមេរិកនៅទីក្រុងភ្នំពេញ ក៏ជាសារមួយដែលបញ្ជាក់ថាអាមេរិកបានយកចិត្តទុកដាក់ចំពោះតំបន់ និងកម្ពុជាផ្ទាល់។ សម្ដេចតេជោមានប្រសាសន៍ថា រាជរដ្ឋាភិបាលកម្ពុជាបច្ចុប្បន្នធ្វើការយ៉ាងសកម្មដើម្បីលើកកម្ពស់ នីតិរដ្ឋ លើកកំពស់សិទ្ធិមនុស្ស ក៏ដូចជាលើកកំពស់ជីវភាពរស់នៅរបស់ប្រជាជន។
ឯកឧត្តម ប្រាក់ សុខុន មានប្រសាសន៍ឲ្យដឹងទៀតថា នៅក្នុងជំនួបជាមួយ ឯកឧត្តមប្រធានាធិបតីសហរដ្ឋអាមេរិកនេះ សម្ដេចតេជោក៏បានលើកឡើង អំពីបញ្ហាដែលនៅសេសសល់ និងទំនាក់ទំនងទ្វេភាគី នោះគឺជាបញ្ហាបំណុលរបស់កម្ពុជាចំពោះសហរដ្ឋអាមេរិក ដែលបញ្ហាបំណុលនេះ ជាបំណុលនៃថវិកាដែលបានប្រើប្រាស់ទៅលើអ្វីក៏ដោយ ក៏កម្ពុជាក្នុងឋានៈជារដ្ឋមួយបានទទួលស្គាល់នូវកេរមរតករបស់ខ្លួន ហើយទទួលស្គាល់នូវកាតព្វកិច្ចក្នុងការសងបំណុលនេះ។ កន្លងទៅនេះភាគីទាំងពីរមានការឯកភាពគ្នា ក្នុងគោលការណ៍កំណត់ទំហំបំណុលនេះដែលត្រូវសង។ ប៉ុន្តែអ្វីដែលនៅសេសសល់មិនទាន់ចរចាគ្នាដាច់ស្រេចមិនទាន់ដោះ ស្រាយបាន គឺពាក់ព័ន្ធទៅនឹងលក្ខខណ្ឌនៃការសងបំណុលនេះ។
ឯកឧត្តម ប្រាក់ សុខុន មានប្រសាសន៍ឲ្យដឹងថា សម្ដេចតេជោនាយករដ្ឋមន្រ្តីបានស្នើទៅសហរដ្ឋអាមេរិកថា កម្ពុជាចង់ដោះស្រាយបញ្ហាបំណុលជាមួយសហរដ្ឋអាមេរិកទៅតាមសំណើដែល ខ្លួនបានធ្វើចុងក្រោយ កាលពីភាគីទាំង២ជួបគ្នាកាលពីឆ្នាំមុន គឺប្រើប្រាស់យន្តការទ្វេភាគីដោយមិនប្រើប្រាស់យន្តការក្លឹបឌឺ ប៉ារីស ហើយចំណុចនានាសំខាន់ៗនៅក្នុងដំណោះស្រាយនោះគឺ- -ចំណុចទី១ គឺស្នើសុំឲ្យភាគីទាំង២រៀបចំកម្មវិធីសងបំណុលនោះឡើងវិញ ដោយសងបន្តិចម្ដងៗតាមដំណាក់ៗ។
- ចំណុចទី២ ការសងនោះគឺធ្វើឡើងតាមអត្រាការប្រាក់១ភាគរយ ដោយសារតែប្រទេសកម្ពុជាជាប្រទេសនៅក្រីក្រនៅឡើយ ហើយកំចីដែលកម្ពុជាកំពុងធ្វើសព្វថ្ងៃនេះ ក៏ផ្អែកទៅលើអត្រាការប្រាក់សម្បទាន គឺមិនមែនគិតតាមអត្រាការប្រាក់ពាណិជ្ជកម្មនោះទេ។ ចំណុចសំខាន់មួយទៀតនៅក្នុងរឿងនេះ គឺអាមេរិកស្នើបង្វែបន្ទុកសេវាបំណុលមួយភាគធំ គឺយ៉ាងហោចណាស់៧០ភាគរយ បង្វែមកជាការជួយនៅក្នុងការអភិវឌ្ឍន៍វិស័យសង្គមកិច្ច ពិសេសគឺខាងផ្នែកអប់រំ សិក្សាធិការ ដោយផ្ដល់ជាអាហារូបករណ៍ទាំងក្នុងស្រុកក្ដី ក្រៅស្រុកក្ដៅ និងជួយទៅដល់គោលដៅអភិវឌ្ឍន៍ផ្សេងទៀតដូចជា ការអភិរក្សផ្នែកវប្បធម៌ ការបោសសំអាតមីននិងយុទ្ធភ័ណ្ឌមិនទាន់ផ្ទុះជាដើម។
ឯកឧត្តម ប្រាក់ សុខុន មានប្រសាសន៍ឲ្យដឹងថា ទាក់ទងនឹងបញ្ហានេះឯកឧត្តម ប្រធានាធិបតី អូបាម៉ា បានបញ្ជាក់ថា ឯកឧត្តមរីករាយដើម្បីចាត់ឲ្យក្រុមសម្របសម្រួលធ្វើការជាមួយក្រុម ជំនាញរបស់កម្ពុជា ដើម្បីស្វែងរកចំណុចស្រុះស្រួលណាមួយ ក្នុងការដោះស្រាយបញ្ហានេះ ហើយឲ្យពិនិត្យកិច្ចព្រមព្រៀងដែលកម្ពុជាបានធ្វើជាមួយ មូលនិធិរូបយវត្ថុអន្តរជាតិ ទាក់ទងទៅនឹងអត្រាសងបំណុលនេះ និងរកលទ្ធភាពដើម្បីសម្រួលក្នុងការដោះស្រាយបញ្ហានេះ។ ឯកឧត្តមប្រធានាធិបតីក៏បានលើកឡើងអំពីបំណងដែលខាងសភាអាមេរិកបាន បញ្ចេញកន្លងទៅ ទាក់ទងទៅនឹងស្ថានភាពសិទ្ធិមនុស្សនៅកម្ពុជា អំពីដំណើរការប្រជាធិបតេយ្យ និងដំណើរឆ្ពោះទៅកាន់ការបោះឆ្នោតខាងមុខ យោបល់ដែលបានធ្វើឡើងដោយអ្នករាយការណ៍ពិសេសរបស់អគ្គលេខាធិការ អង្គការសហប្រជាជាតិ ទាក់ទងទៅនឹងបញ្ហាសិទ្ធិមនុស្សដោយឯកឧត្ដមប្រធានាធិបតី យល់ថា មានផលប្រយោជន៍សម្រាប់កម្ពុជា នៅក្នុងការសម្រេចនូវកំណែទម្រង់ដែលកម្ពុជាកំពុងខិតខំធ្វើ។
ឯកឧត្តម ប្រធានាធិបតីសហរដ្ឋអាមេរិកក៏ បានសម្តែងការសង្ឃឹមថា ទំនាក់ទំនងទ្វេភាគីរវាងកម្ពុជានិងសហរដ្ឋអាមេរិកអាចនឹងមាន លក្ខណៈប្រសើរជាងនៅពេលខាងមុខនេះ ហើយឯកឧត្តម បានចាត់ឲ្យឯកអគ្គរដ្ឋទូតសហរដ្ឋអាមេរិកប្រចាំកម្ពុជាធ្វើការ ជាមួយនឹងក្រុមកម្ពុជា ដើម្បីរិះរកវិធីលើកតម្កើងទំនាក់ទំនងទ្វេភាគីរវាងប្រទេសយើង ទាំង២នេះ។
សម្ដេច តេជោបានមានប្រសាសន៍ថ្លែងអំណរគុណចំពោះការនិយាយដោយត្រង់ៗរបស់ប្រធានាធិបតីអាមេរិក ហើយសម្តេចបានមានប្រសាសន៍ឲ្យដឹងថា ក្នុងរយៈពេល៤សប្ដាហ៍ចុងក្រោយនេះរាជរដ្ឋាភិបាលកម្ពុជាបានរងនូវ យុទ្ធនាការមួយ ដែលទី១គឺជាយុទ្ធនាការដែលខិតខំរារាំងមិនឲ្យប្រធានាធិបតី អូបាម៉ា ធ្វើដំណើរមកកាន់កម្ពុជា ហើយទី២ជាយុទ្ធនាការមួលបង្កាច់ការពិត ទាក់ទងនឹងស្ថានការសិទ្ធិមនុស្សនិង ដំណើរការប្រជាធិបតេយ្យនៅកម្ពុជា។ ឯកឧត្តម ប្រាក់ សុខុន មានប្រសាសន៍ឲ្យដឹងទៀតថា សម្ដេចតេជោក៏បានមានប្រសាសន៍រំលឹកឡើងវិញថា កាលពីប៉ុន្មានឆ្នាំមុននេះ ប្រទេសធំៗមួយចំនួន ក្នុងនោះមានសហរដ្ឋអាមេរិក សហគមន៍អឺរ៉ុប អូស្រ្តាលី បានមកពឹងសុំឲ្យសម្ដេចតេជោ ទៅនិយាយជាមួយរដ្ឋាភិបាលរបស់ប្រទេសមីយ៉ាន់ម៉ា ដើម្បីឲ្យមីយ៉ាន់ម៉ា ធ្វើកំណែទម្រង់ខាងនយោបាយ ដើម្បីលើកស្ទួយស្ថានភាពសិទ្ធិមនុស្ស សិទ្ធិនយោបាយនៅប្រទេសនោះ។ បញ្ហានេះសម្តេចតេជាបានមានប្រសាសន៍បញ្ជាក់ថា ឥឡូវតាមរយៈយុទ្ធនាការមួលបង្កាច់នេះ ហាក់ដូចជាកម្ពុជាពេលនេះក្លាយទៅជាកូនសិស្សដែលអាក្រក់ជាង មីយ៉ាន់ម៉ាទៅទៀត។ គ្រូរបស់មីយ៉ាន់ម៉ាដែលគេពឹងនោះ បានក្លាយទៅជាអ្នកដែលមានស្ថានភាពមិនល្អទៅវិញ?។
សម្ដេច តេជោនាយករដ្ឋមន្ត្រីបានជម្រាបជូនឯកឧត្តម អូបាម៉ាថា ស្ថានភាពសិទ្ធិមនុស្សពិសេសសេរីភាពខាងនយោបាយ នៅកម្ពុជាមិនចាញ់ស្ថានភាពសិទ្ធិសេរីនយោបាយនៅប្រទេសជិតខាងនោះទេ។ ជាឧទាហរណ៍ ប្រទេសខ្លះគេមិនត្រឹមតែរំលាយគណបក្សនយោបាយចោលប៉ុណ្ណោះទេ គេចាប់ទាំងអ្នកនយោបាយដាក់គុក ហើយហាមឃាត់អ្នកនយោបាយមិនឲ្យធ្វើនយោបាយទៀតផង។ នៅប្រទេសកម្ពុជាបានបើកចំហយ៉ាងទូលំទូលាយជូនគ្រប់គណបក្ស គឺគណបក្សប្រឆាំងមានសិទ្ធិធ្វើអ្វីៗគ្រប់យ៉ាងឲ្យតែស្ថិតនៅក្រោម ក្របខណ្ឌនៃច្បាប់។
សម្ដេចអគ្គមហាសេនាបតីតេជោហ៊ុន សែន មានប្រសាសន៍បញ្ជាក់ថា ចំពោះមតិយោបល់របស់អ្នករាយការណ៍ពិសេស របស់អង្គការសហប្រជាជាតិ យោបល់នោះគឺជាយោបល់ល្អហើយ ប៉ុន្តែកម្ពុជាក៏មានច្បាប់គ្រប់គ្រងកិច្ចការងារបោះឆ្នោតផងដែរ។ សម្ដេចតេជោបានលើកជាឧទាហរណ៍ថា ច្បាប់កម្ពុជាបានតម្រូវឲ្យ សមាជិកនៃគណៈកម្មាធិការជាតិនេះ ជាមនុស្សអព្យាក្រឹត ប៉ុន្តែក្នុងយោបល់ដែលអ្នករាយការណ៍ពិសេសបានលើកឡើង គឺបានស្នើឲ្យបញ្ចូលសមាសភាពពីគណបក្សប្រឆាំងទៅក្នុងគណៈកម្មាធិការ ជាតិរៀបចំការបោះឆ្នោតនោះ ដែលការនេះវាផ្ទុយទៅនឹងច្បាប់។
ទាក់ ទងទៅនឹងបញ្ហាដីធ្លីនិងការបណ្ដេញប្រជាពលរដ្ឋមួយចំនួនចេញពីដី ដែលគាត់រស់នៅ សម្ដេចតេជោបានទទួលស្គាល់ថា ករណីនេះមានខ្លះនៅពេលកន្លងទៅ ដោយសារតែប្រជាជនមួយចំនួនខ្លះបានទៅរស់នៅដោយខុសច្បាប់ទៅលើដី នោះ ដូច្នេះរាជរដ្ឋាភិបាលត្រូវបង្ខំអនុវត្តតាមច្បាប់ តម្រូវឲ្យពួកគាត់ចេញ ប៉ុន្តែសម្ដេចតេជោបានសង្កត់ធ្ងន់ថា ករណីនេះមានតិចតួចណាស់ បើប្រៀបធៀបទៅនឹងអ្វីដែលយើងបានធ្វើ ចំពោះប្រជាជនដែលអត់មានដី។ សព្វថ្ងៃនេះយើងកំពុងដំណើរការនូវវិធានការថ្មីលើនយោបាយចាស់ ដែលនោះគឺការវាស់វែងដីធ្លី ផ្ដល់កម្មសិទ្ធិប្រមាណ២លានហិកតាជូនប្រជាពលរដ្ឋយើង។ សម្ដេចតេជោបានទទួលស្គាល់ថា មុននឹងរាជរដ្ឋាភិបាលចាត់វិធានការនេះជាងកន្លះឆ្នាំមុនមានទំនាស់ដីធ្លីប្រាកដមែន ប៉ុន្តែចាប់តាំងពីរាជរដ្ឋាភិបាលបានអនុវត្តនូវវិធានការថ្មី លើនយោបាយចាស់នោះ គឺជម្លោះពាក់ព័ន្ធនឹងបញ្ហាដីធ្លីបានរួមនៅតូចបំផុត។
សម្ដេច តេជោបានមានប្រសាសន៍ឲ្យដឹងថា កំណែទម្រង់លើវិស័យនេសាទនិងដីធ្លីនេះ គឺជាអាទិភាពធំ២ របស់រាជរដ្ឋាភិបាលក្នុងគ្រាបច្ចុប្បន្ននេះ។ ពាក់ព័ន្ធនឹងការព្រួយបារម្ភដែលបានលើកឡើងដោយលោកប្រធានាធិបតីសហរដ្ឋអាមេរិក អំពីបញ្ហាចាប់ឃុំ ប្រធានស្ថានីយវិទ្យុមួយរូបនោះ សម្ដេចតេជោពន្យល់ថា មានការយល់ច្រឡំថា មានការប៉ុនប៉ងបំបិទសម្លេងវិទ្យុនោះ ប៉ុន្តែជាការពិតវិទ្យុនោះនៅមានដំណើរការដដែលហើយនៅតែមាន ប្រជាប្រិយភាពជាដដែល។
សម្ដេចតេជោបានបញ្ជាក់ថា គឺបុគ្គលទេដែលត្រូវប្រឈមមុខនឹងច្បាប់ ពីព្រោះបុគ្គលនោះធ្វើខុសចំពោះច្បាប់ ហេតុដូច្នេះបុគ្គលនោះត្រូវតែដោះស្រាយបញ្ហារបស់ខ្លួនទៅនឹងច្បាប់។
សម្ដេចតេជោនាយករដ្ឋមន្ត្រី បានបញ្ជាក់ថា នៅកម្ពុជាមិនមានអ្នកទោសនយោបាយទេ ប៉ុន្តែមានអ្នកនយោបាយដែលមានទោស មានអ្នកនយោបាយដែលធ្វើខុសចំពោះច្បាប់ បើអ្នកនយោបាយធ្វើខុសចំពោះច្បាប់ អ្នកនយោបាយនោះត្រូវទទួលទោសទៅតាមច្បាប់។
ឯកឧត្តម ប្រាក់ សុខុនរដ្ឋមន្រ្តីប្រតិភូអមនាយករដ្ឋមន្រ្តី បានបញ្ជាក់ថា ឯកឧត្តម ប្រធានាធិបតីសហរដ្ឋអាមេរិកបានអរគុណចំពោះការពន្យល់ទាំងអស់នេះ ហើយឯកឧត្តមប្រធានាធិបតីបានបញ្ជាក់សារជាថ្មីថា បំណងរបស់ឯកឧត្ដមគឺជាបំណងចង់ឃើញស្ថានភាពទូទៅនៅប្រទេសកម្ពុជា កាន់តែប្រសើរឡើង ហើយក្រុមការងាររបស់ឯកឧត្តម នឹងបន្តធ្វើការជាមួយក្រុមការងាររបស់ កម្ពុជា ដើម្បីធ្វើយ៉ាងល្អឲ្យទំនាក់ទំនងរវាងប្រទេសយើងទាំង២កាន់តែមាន ភាពប្រសើរឡើងថែមទៀត។ ឯកឧត្តម ប្រធានាធិបតីក៏បានសម្ដែងនូវការសោកស្ដាយចំពោះពេលវេលាដែលមានតិច តួចពេកសម្រាប់ទស្សនកិច្ចរបស់ឯកឧត្តម នៅកម្ពុជាដែលមិនមានពេលវេលាគ្រប់គ្រាន់ ដើម្បីទស្សនាប្រទេសកម្ពុជាដែលល្អផូរផង់នោះ ព្រោះថាក្រុមការងាររបស់ឯកឧត្តមរៀបចំតែកម្មវិធីប្រជុំ ៕