ពិធីប្រកាសផ្សព្វផ្សាយ គោលនយោបាយជាតិ និងផែនការសកម្មភាពជាតិ ដីពីការគាំពារនិងអភិវឌ្ឍកុមារតូច ឆ្នាំ ២០១៤-២០១៨

   ការផ្សព្វផ្សាយគោលនយោបាយជាតិ និងផែនការ​សកម្មភាពជាតិស្ដីពីការគាំពារនិងអភិវឌ្ឍកុមារតូច ឆ្នាំ​២០១៤-២០១៨ ត្រូវបានប្រកាសផ្សព្វផ្សាយ នាព្រឹក​ថ្ងៃចន្ទទី១ខែកញ្ញានេះ ក្រោមអធិបតីភាព សម្ដេច​អគ្គមហា សេ នាបតីតេជោ ហ៊ុន សែន នាយក​រដ្ឋមន្ត្រីនៃព្រះរាជាណាចក្រកម្ពុជា នៅវិទ្យា​ស្ថាន​​ជាតិ​អប់រំស្ថិត ។

ឯកឧត្ដម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន​និងកីឡា បានលើកឡើងថា ការគាំពារ និង អភិវឌ្ឍន៍កុមារតូច ជាបញ្ហាដែល​ត្រូវយក​ចិត្តទុក​ដាក់​បំផុត ព្រោះកុមារតូចងាយទទួលគ្រោះថ្នាក់ផ្សេងៗ ដែលត្រូវប្រឈម ។ កុមារតូចដែល ចាប់ពីកកំណើត រហូត​ដល់អាយុក្រោម៦ឆ្នាំតែងមានការអភិវឌ្ឍ លើ ផ្នែករាងកាយនិងស្មារតី ដែលជា​តម្រូវការ​ចាំបាច់​សម្រាប់​កុមារ ។ ផ្នែកទាំងនេះ​តែងលូតលាស់ទន្ទឹមគ្នា ហើយជះឥទ្ធិពលឱ្យគ្នាទៅវិញទៅមក ។ កុមារ​តូចមាន​ការ​អភិវឌ្ឍ ឆាប់រហ័សផ្នែក ខួរក្បាល នៅឆ្នាំ ដំបូង នៃជីវិតរបស់គេ ។ បទពិសោធន៍ជាច្រើនបានបង្ហាញថា ជីវិតដំបូងរបស់កុមារ ត្រូវផ្ដោតទៅលើការថែទាំ ការជួយទំនុកបំរុងពីគ្រួសារនិងសង្គម ឱ្យទទួលបាននូវ សេវានានាដូចជា អាហារូបត្ថម្ភ ការថែទាំសុខភាព ការផ្ដល់ឱកាសរៀនសូត្រ ការការពារពីគ្រោះថ្នាក់ផ្សេងៗ។ ការងារទាំងនេះ អាចអនុវត្ត បានជោគជ័យ អាស្រ័យដោយមានគោលនយោបាយ និងការវិនិយោគ ដ៏សមស្របសម្រាប់កុមារតូចនិងគ្រួសារ ។

 រាជរដ្ឋាភិបាលកម្ពុជា តែងតែយល់អំពីសារៈ​សំខាន់​នៃការគាំពារនិងអភិវឌ្ឍន៍ កុមារតូចដែលជា គុណ​ប្រយោជន៍ ដល់អនាគតរបស់កុមារម្នាក់ៗ ក្នុងការ​ក្លាយ​ខ្លួនទៅជាសសរទ្រូងនៃប្រទេសជាតិ ។ ការ គាំពារ​ និងអភិវឌ្ឍន៍កុមារតូចជាការងារអាទិភាព ហើយ​ជាផ្នែកមួយខានមិនបាន នៃការអប់រំសម្រាប់ ទាំង អស់គ្នាហើយក៏ជាយុទ្ធសាស្ត្រ កាត់​បន្ថយ​ភាព​ក្រីក្រ របស់រាជរដ្ឋាភិបាលផងដែរ ។

សម្ដេចតេជោនាយករដ្ឋមន្ត្រី បានថ្លែងរម្លឹកអំពីការ​យក​ចិត្តទុកដាក់របស់រាជរដ្ឋាភិបាល ចំពោះមាតា និង​កុមារ ជាពិសេសកុមារតូច ហើយចំពោះមុខនេះ សម្ដេចតេជោបានអំពាវនាវ ដល់មន្ត្រីអនុវត្តការ ងារ ពាក់ព័ន្ធកុមារ អាជ្ញាធររាជធានីខេត្តក្រុង ស្រុក ខណ្ឌ ឃុំសង្កាត់ ភូមិទាំងអស់ ត្រូវរួមគ្នាយកចិត្តទុកដាក់ ឱ្យបានពិតប្រាកដ និងសកម្ម ផុលផុសទាំងអស់គ្នា លើវិស័យកុមារនេះឱ្យបានប្រកបដោយ មនសិការ និងឆន្ទៈអាណិត ស្រឡាញ់កុមារ ក្នុង​នាម​ជា​មនុស្ស​ជាតិដូចគ្នា និងក្នុងនាមជាអ្នកបន្តវេននៃ សង្គមជាតិ របស់យើង។ តាមរយៈពិធីនេះដែរ សម្តេចតេជោ ​ ក៏បាន​ថ្លែង​សរសើរ​ដល់​ការ​ខិត​ខំ​ របស់ក្រសួងអប់រំ យុវជន និងកីឡា ដែលបានយកចិត្តទុកដាក់ក្នុងការធ្វើ​កំណែ​ទម្រង់ ដោយតាមរយៈ ការ ប្រឡង​សញ្ញាបត្រមធ្យមសិក្សា​ទុតិយភូមិ​ឆ្នាំនេះ ​សិស្សជាប់​បាន​តែ​ជាង២៥%ប៉ុណ្ណោះ ខុសពីឆ្នាំមុនៗ ដែល មានសិស្សជាប់ដល់ទៅជាង៨០%នោះ។ ក្នុង បញ្ហានេះ សម្តេចតេជោនាយករដ្ឋមន្ត្រី ​ថ្លែងថា «កំណែទម្រង់ បានចាប់ផ្តើមហើយ»។ សម្តេចក៏សង្ឃឹមដែរថា កំណែទម្រង់នេះ មិនត្រឹមធ្វើតែធ្វើនៅមធ្យម សិក្សា ទុតិយភូមិទេ ប៉ុន្តែក៏នឹងធ្វើ​នៅមធ្យម​សិក្សា​បឋម​ភូមិផងដែរ ។

ដោយការប្រលង សញ្ញាបត្រ មធ្បមសិក្សា ទុតិយភូមិជាលើកទី២ នឹងប្រព្រឹត្តទៅ នៅថ្ងៃទី១៣ និង១៤តុលាខាងមុខ សម្តេចតេជោបានអំពាវនាវ ឱ្យ សិស្សានុសិស្ស ដែលធ្លាក់ពីការប្រលងលើកទី១ ​ខិតខំ​រៀនសូត្រ ដើម្បីមានឱកាសបានប្រលងជាប់។ សម្ដេចបញ្ជាក់ថា ប្រសិនបើមិនមានការខិតខំទេ ក្មួយៗ​សិស្សានុសិស្ស នឹងត្រូវរៀនត្រួតថ្នាក់ ហើយការ ប្រឡងនៅឆ្នាំក្រោយ ក្រសួងអប់រំ យុវជននិងកីឡា មិ​ន​ប្រាកដ​​ឱ្យមានការប្រលង ជាលើកទី២ ដូចនេះ ទៀតទេ ។  សម្តេចតេជោ ក៏បានអំ​ពាវ​នាវ​ដល់​មាតា​បិតា​ អាណាព្យាបាល និងសិស្សានុសិស្ស ទាំងអស់ ឱ្យយល់និងចូលរួមខិតខំទាំងអស់គ្នា ក្នុងកំណែទម្រង់នេះ ជាពិសេស មាតាបិតា អាណាព្យាបាល គប្បី ជំរុញកូនចៅ ឱ្យខិតខំរៀនសូត្រ ចាប់តាំងពីថ្នាក់បឋមសិក្សាឡើងទៅ ពីព្រោះមិនមាន ដោះ ស្រាយបញ្ហា ដោយការសូកប៉ាន់ ឬការបន្ធូរបន្ថយរបស់គ្រូបង្រៀនទៀតទេ ។ សម្ដេចតេជោ សង្កត់ធ្ងន់ថា បើមិនដូច្នេះ យើងមិនអាច រកឃើញធនធានមនុស្សដែលពូកែទេ ៕ s.thy

           

ប្រតិភូក្រុម​ត្រួតពិនិត្យ​ការប្រឆាំង​ការលាង​សម្អាត​ប្រាក់​ និងអំពីហិ​រញ្ញប្បទាន​​ភេរវកម្ម​នៅកម្ពុជា

ប្រតិភូក្រុមត្រួតពិនិត្យការប្រឆាំងការលាងសម្អាតប្រាក់​ និងអំពីហិរញ្ញប្បទាន​ភេរវកម្ម​ប្រចាំ​តំបន់​​អា​ស៊ី​ប៉ាស៊ីហ្វិច​កោតសសើរដល់ការងារស្តីពីការប្រឆាំងការលាងសម្អាតប្រាក់​ និងអំពី​ហិរញ្ញ​ប្ប​ទាន​ភេរវកម្មនៅកម្ពុជា ។ ការកោតសសើរបែបនេះ ធ្វើឡើងក្នុងជំនួប រវាងឯកឧត្តម បណ្ឌិត​សភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីជាមួយឯកឧត្តម Yogpal Singh និង លោកស្រី Julia Bacay Abad សហប្រធាន​ ក្រុមត្រួតពិនិត្យ ការប្រឆាំងការ​លាងសម្អាត​ប្រាក់​ និងអំពីហិរញ្ញប្បទាន​ភេរវកម្មប្រចាំតំបន់អាស៊ីប៉ាស៊ីហ្វិច ​នាព្រឹកថ្ងៃទី០១​ ខែ​កញ្ញា​ ឆ្នាំ ២០១៤នៅទីស្តីការគណៈរដ្ឋមន្រ្តី ។

ឯកឧត្តម ឧបនាយករដ្ឋមន្រ្តី សុខ អាន បានមានប្រសាសន៍ថា​ ប្រទេសកម្ពុជា​បានធ្វើ​វិសោធន៍​កម្មច្បាប់ស្តីពីការប្រឆាំងការ​លាងសម្អាត​ប្រាក់​ និងអំពីហិរញ្ញប្បទាន​ភេរវកម្ម ដូចជា​កាល​ពី​​ថ្ងៃទី​២១​​ខែមិថុនា​ឆ្នាំ២០១១ រាជរដ្ឋាភិបាលកម្ពុជា បានផ្តល់ការប្តេជ្ញាចិត្ត ក្នុងការអនុវត្តផែនការ ការ​សម្រប​សម្រួល​ផ្ទៃក្នុង និងយុទ្ធសាស្ត្រថ្នាក់ជាតិ ប្រឆាំងការលាងសម្អាតប្រាក់​ និងអំពី​ហិរញ្ញ​ប្ប​ទាន​ភេរវកម្ម ហើយកម្ពុជាក៏បានធ្វើវិសោធន៍កម្មច្បាប់មួយចំនួន ​ដើម្បីផ្តន្ទាទោសដល់​ជនល្មើស​ក្នុងការលាង​សម្អាតប្រាក់​ និងអំពីហិរញ្ញប្បទាន​ភេរវកម្មនេះ ឲ្យស្របទៅតាមស្តង់ដាអន្តរជាតិ។ លើសពីនេះ កម្ពុជា​ក៏បាន​បង្កើតឲ្យមាន អង្គភាព​សហប្រតិបត្តិការ ​សម្រាប់ស៊ើបការ​ហិរញ្ញវត្ថុ​នៅ​កម្ពុជា​​ផងដែរ។ ក្នុងនោះ   នៅ​ឆ្នាំ២០១២​ រាជរដ្ឋាភិបាលបាន​ការបង្កើតគណៈកម្មការថ្នាក់ជាតិមួយ​ស្តីពីការប្រឆាំងការសម្អាតប្រាក់ហិរញ្ញប្បទាន​ភេរវកម្ម ។ នៅឆ្នាំ២០១៣ រាជរដ្ឋាភិបាលបានកសាង​ផែន​ការយុត្តិសាស្ត្រជាតិ​ ស្តីពីការ​ប្រឆាំងការសម្អាតប្រាក់ហិរញ្ញប្បទាន​ភេរវកម្ម ។ នៅឆ្នាំ​២០១៣-​២០១៧ កម្ពុជាមានផែនការ ​នឹងបន្តយក​ចិត្តទុកដាក់​បន្ថែមទៀតលើការងារដែលមានស្រាប់។ ក្នុងឆ្នាំ២០១៣ផងដែរ រាជរដ្ឋាភិបាល​បានដាក់ឲ្យ​ប្រើប្រាស់​ច្បាប់ ស្តីពី​វិសោធន៍កម្ម មាត្រា៣,២៩ និងមាត្រា៣០​នៃច្បាប់ស្តីពីការប្រឆាំងការសម្អាតប្រាក់ហិរញ្ញប្បទាន​ភេរវកម្ម ។ ឯកឧត្តម សុខ អាន​បានស្នើឲ្យគណៈប្រតិភូ ទៅពិភាក្សាជា​មួយនឹងអភិបាល​ធនា​គារជាតិកម្ពុជា ​ទៅតាមផ្លូវ​ច្បាប់ ​ដើម្បី​ឲ្យ​ការងារកាន់​តែរលូនថែមទៀត ។

ជាការឆ្លើយតប  ឯកឧត្តម Yogpal Singh បានបញ្ជាក់ថា ឯកឧត្តម មកកម្ពុជានៅពេលនេះ គឺ​ដើម្បីត្រួត​ពិនិត្យ​ការអនុវត្ត​ផ្នែក​ច្បាប់ និងស្វែងយល់អំពីការងារ លើការ​ប្រឆាំង​ការលាង​សម្អាត​ប្រាក់​​ និង​អំពី​ហិរញ្ញ​ប្បទាន​ភេរវកម្មរបស់ប្រទេសកម្ពុជា ។

ឯកឧត្តម Yogpal Singh  មានប្រសាសន៏ថា ដោយសារ​តែ​កម្ពុជា​បាន​ធ្វើ​ការ​ល្អ​កន្លងមក ទើបក្រុមការងារប្រឆាំងការលាងសម្អាតប្រាក់​ និងអំពីហិរញ្ញប្បទាន​ភេរវកម្មថ្នាក់អន្តរជាតិ គេបាន​ដកកម្ពុជា​ចេញពីបញ្ជី​ពណ៌ប្រផេះ​កាលពី​ខែមិថុនា​ឆ្នាំ២០១៤៕S…thy