ការវាយប្រហារគ្នារវាង កឹម សុខា និង សម រង្ស៊ី កាន់តែឡើងកម្តៅក្តៅឡើងៗហើយ។ ទាំងសងខាងសុទ្ធតែបង្ហាញពីភាពខ្លាំងរបស់ខ្លួន ដោយយកប្រជាធិបតេយ្យ សិទ្ធិមនុស្ស មកបិទបាំង។ ក្នុងបរិបទនៃជម្លោះនេះ គណបក្សសមរង្ស៊ី ខិតខំពន្យល់ទៅអ្នកគាំទ្រខ្លួនថា កឹម សុខា ជាអាយ៉ងសម្តេច ហ៊ុន សែន។ ឯ កឹម សុខា ខំពន្យល់ទៅអ្នកគាំទ្ររបស់ខ្លួនថា បក្សសមរង្ស៊ី ជាបក្សបុគ្គលនិយម គួ្រសារនិយម ផ្តាច់ការ គ្មានប្រជាធិបតេយ្យដូច កឹម សុខា ឡើយ។
ដើម្បីផ្តួលរំលំ កឹម សុខា គណបក្សសមរង្ស៊ី បានប្រើប្រាស់គ្រប់មធ្យោបាយទាំងអស់ដែលខ្លួនមាន ។ ពេលនោះទាំងកាសែត វិទ្យុ សម រង្ស៊ី បានផ្សាយយ៉ាងកងរំពងពីមហិច្ឆតាស្រេកឃ្លានអំណាចរបស់ កឹម សុខា និងភាពជាប់ជំពាក់រវាង កឹម សុខា ជាមួយសម្តេច ហ៊ុន សែន ប្រមុខគណបក្សប្រជាជនកម្ពុជា។
វិទ្យុភ្លើងទៀនបានពិព័ណ៌នាពីសាវតារបស់ កឹម សុខា យ៉ាងដូច្នេះថា៖ « លោកប្រធានស្តីទី គង់ គាំ ក៏បានជម្រាបជូនប្រជាពលរដ្ឋ និងសកម្មជនគណបក្សសមរង្ស៊ី បន្តទៀតផងដែរថា កាលណោះអង្គការអន្តរជាតិគេបានធ្វើការទូន្មានលោក កឹម សុខា ថា ប្រសិនបើចង់ធ្វើនយោបាយ ឲ្យលោក កឹមសុខា មកចូលរួមធ្វើនយោបាយជាមួយគណបក្សសមរង្ស៊ី មិនចាំបាច់បង្កើតផ្សេងនោះទេ ក៏ប៉ុន្តែដោយសារតែមហិច្ឆតារបស់លោក កឹម សុខា ចង់ធ្វើជាប្រធានបក្ស និងការអូសទាញបំពាក់បំប៉នមនោគមន៍វិជ្ជាពីសំណាក់លោក ហ៊ុន សែន បានធ្វើឲ្យលោក កឹម សុខា បង្កើតគណបក្សផ្សេង តែខ្លាចប្រជាពលរដ្ឋលោកមិនស្គាល់ លោក កឹម សុខា ក៏បានយកឈ្មោះសិទ្ធិមនុស្សមកដាក់ ដែលជាឈ្មោះរបស់មជ្ឈមណ្ឌលសិទ្ធិមនុស្ស »។
ចំណែកលោក សម រង្ស៊ី ដែល កឹម សុខា ដាក់បណ្តាសារឲ្យខ្ចាត់ព្រាត់ពីប្រទេសនោះ ទំនងជាដឹងថា លោកអនុប្រធានទីងមោងរបស់គាត់ ពុំមានស្មារតីគ្រប់គ្រាន់សម្រាប់វាយបកទៅ កឹម សុខា ទើបលោក សម រង្ស៊ី ជួយស្រែកពីក្រៅប្រទេសក្នុងន័យជាន់ក កឹម សុខា មិនឲ្យរើរួចពីពាក្យថា អាយ៉ងសម្តេច ហ៊ុន សែន។ លោក សម រង្ស៊ី បានរៀបរាប់យ៉ាងដូច្នេះថា៖ “យើងមិនចាំបាច់និយាយពីគណបក្សថ្មីថ្មោង គណបក្សតូចតាច ដែលតាំងខ្លួនជាគណបក្សប្រឆាំង ប៉ុន្តែជាគណបក្សដែលលោក ហ៊ុន សែន បានជួយបង្កើត។ លោក ហ៊ុន សែន ធ្វើជាឆ្មប បានបង្កើតគណបក្សតូចតាច គណបក្សខ្លះហ្នុងអត់មានអ្នកណាគេមានជំនឿ គេឲ្យតម្លៃ ថាជាគណបក្សប្រឆាំងពិតប្រាកដទេ។ គឺជាគណបក្សដែលជំពាក់ជំពិនតាំងពីកំណើត គឺជំពាក់ជំពិនជាមួយគណបក្សប្រជាជន គឺជាគណបក្សដែលបន្លំ គឺជាគណបក្សប្រឆាំងមកបំបែកសម្លេងអ្នកប្រឆាំងមែនទែន”។
សេចក្តីពន្យល់របស់ សម រង្ស៊ី ដែលថា កឹម សុខា ជាអាយ៉ងសម្តេច ហ៊ុន សែន ប្រមុខគណបក្សប្រជាជនកម្ពុជា ត្រូវអ្នកសារព័ត៌មានជាតិ និងអន្តរជាតិសុំការបំភ្លឺពី កឹម សុខា។ សំណួរសំខាន់ដែលគ្រប់មជ្ឈដ្ឋានអ្នកសារព័ត៌មានដាក់ជូនទៅ កឹម សុខា នោះ គឺ តើ កឹម សុខា ជាមនុស្សរបស់សម្តេច ហ៊ុន សែន ដូច សម រង្ស៊ីថាមែនទេ? សំណួរនេះ បានតាមលង កឹម សុខា គ្រប់ពេលវេលាទាំងអស់ មិនថា កឹម សុខា នៅក្នុងប្រទេស ឬក្រៅប្រទេសនោះទេ សូម្បីតែអ្នកគាំទ្រ កឹម សុខា ក៏មិនទាន់អស់មន្ទិលពីរឿងអាយ៉ងនេះដែរ។ ទីបំផុត កឹម សុខា ចេះត្រឹមតែឆ្លើយថា គេចោទខ្ញុំតែប៉ុណ្ណោះ! សូមស្តាប់ការបញ្ជាក់របស់ កឹម សុខា៖ “ចោទនេះ វាចោទហួសហេតុ មកមូលបង្កាច់ថា គណបក្សសិទ្ធិមនុស្សអាយ៉ងគេនេះ។ លោក សម រង្ស៊ី និយាយផ្ទាល់មាត់តែម្តងពីម្សិលមិញនេះ តាមព័ត៌មានផ្សាយពេញពិភពលោក។ មិញនេះ អ្នកព័ត៌មានសួរខ្ញុំទៀត ថាលោក សម រង្ស៊ី ចោទថាយើងហ្នឹង គណបក្សសិទ្ធិមនុស្សអាយ៉ងគេ គ្មានឧត្តមគតិជាតិដូចគាត់ទេ”។
ពេលនេះអវសាន្តនៃជីវិតនយោបាយរបស់ កឹម សុខា ចេញជារូបរាងហើយ។ នៅក្រៅប្រទេស សម រង្ស៊ី បានប្រាប់ទៅគ្រប់បណ្តាញសារព័ត៌មានថា កឹម សុខា ជាអាយ៉ងគណបក្សប្រជាជនកម្ពុជា។ ឯក្នុងស្រុក គង់ គាំ បានដើរគ្រប់ច្រកល្ហកពន្យល់ទៅអ្នកគាំទ្រសម រង្ស៊ី កុំឲ្យច្រឡំជឿ កឹម សុខា។ ជាក់ស្តែងនៅក្នុងកម្មវិធីសំណេះសំណាលមួយ ដែលរៀបចំដោយគណបក្សសមរង្ស៊ី លោក គង់ គាំ បានទម្លាយឲ្យដឹងថា កឹម សុខា មិនស្មោះត្រង់ទេ ពេលមួយ កឹម សុខា បានណាត់ជួបខ្ញុំ គង់ គាំ ក្នុងចេតនាអូសទាញ គង់ គាំ ឲ្យចេញពីទីងងឹត មកទីភ្លឺ ដូចដែល កឹម សុខា ធ្លាប់អូសទាញ ម៉ៅ មុនីវណ្ណ យ៉ាងនោះដែរ។ ប៉ុន្តែជំនួបនេះ គង់ គាំ បានសម្តែងនូវការសោកស្តាយ ដោយសារមានវត្តមានលោកឧបនាយក ញឹក ប៊ុនឆៃ ដែលគេស្គាល់ថា ជាមនុស្សរបស់រាជរដ្ឋាភិបាល។ គង់ គាំ បានធ្វើអត្ថាធិប្បាយយ៉ាងដូច្នេះថា៖ “និយាយពីសិទ្ធិមនុស្ស កឹម សុខា អត់ស្មោះត្រង់។ គាត់ទូរស័ព្ទមកខ្ញុំថា បងខ្ញុំចង់ជួបបង។ ខ្ញុំថា មានអី មកជួបកន្លែងខ្ញុំគណបក្សសមរង្ស៊ីឬយ៉ាងម៉េច? ថាទេចង់ទៅជួបនៅខាងក្រៅ ខ្ញុំនៅឯខាងព្រែកលាប អញ្ជើញមកជួបខ្ញុំព្រែកលាបមក។ ខ្ញុំទៅ ទៅដល់គាត់ចតឡាននៅចិញ្ចើមផ្លូវព្រែកលាបហ្នឹង។ ខ្ញុំទៅដល់ក្រោយឡានគាត់ គាត់ទូរស័ព្ទថា បងដល់ណាហើយ។ ខ្ញុំថាខ្ញុំនៅក្រោយឡានឯកឧត្តមហ្នឹងហើយៗ គាត់ប្រាប់ខ្ញុំវិញថា អញ្ជើញឯកឧត្តមចុះពីលើឡានឯកឧត្តម មកជិះឡានខ្ញុំដើម្បីនិយាយគ្នាបានច្រើន។ ខ្ញុំក៏ឡើងឡានគេទៅៗដល់ហ្នុង ញឹក ប៊ុនឆៃ នៅកាហ៊ើៗក្នុងហ្នុង។ បើស្មោះត្រង់ម៉េចមិននិយាយប្រាប់មុនថា មាន ញឹក ប៊ុនឆៃ ផងទៅ ខ្ញុំក៏ប្រយ័ត្នប្រយែងបន្តិចទៅ ព្រោះមានអ្នកថ្មីមួយ”។
វត្តមានលោក ញឹក ប៊ុនឆៃ បានដាស់អារម្មណ៍លោកអនុប្រធានទីមោងឲ្យលោតចេញពីកន្ត្រក មកពិចារណាពីល្បិចកលរបស់ កឹម សុខា។ ក្នុងជំនួបនោះគេឃើញមានវត្តមានរបស់លោក ញឹក ប៊ុនឆៃ, កឹម សុខា និង គង់ គាំ បានពិភាក្សាលើប្រធានបទរួបរួមគ្នា។ ពេលនោះ កឹម សុខា បានខិតខំបញ្ចុះបញ្ចូល គង់ គាំ ដែលគណបក្សសមរង្ស៊ី ហៅថា ជាការបែងក្រឡារបស់ កឹម សុខា។ ប៉ុន្តែអ្វីដែលធ្វើឲ្យ គង់ គាំ ប្រាកដក្នុងចិត្តគឺថា កឹម សុខា ពិតជាមនុស្សរបស់សម្តេច ហ៊ុន សែន ត្រង់ថា អ្វីដែលបានជជែកគ្នាដោយសម្ងាត់នោះ ត្រូវ កឹម សុខា យកទៅរាយការណ៍ជូនសម្តេចទាំងអស់ នេះបើតាមការរៀបរាប់របស់ គង់ គាំ “ក្បាច់គាត់ជម្លខ្ញុំមួយទៀត លោក កឹម សុខា ទេអ្នកជម្លខ្ញុំថា បើ សម រង្ស៊ី មិនរួបរួមទេ ប្រហែលខ្ញុំគិតគូររូបរួមហ៊្វុនស៊ិនប៉ិច និងនរោត្តម រណឫទ្ធិហើយ។ គេវ៉ៃក្រឡាទុកអញ្ចឹង ប៉ុន្តែឆ្ងល់អញ្ចេះជិះពីព្រែកលាបទៅ ទៅចុះនៅឯស្វាយចន្ទីស្គន់ឯណោះ ទៅស៊ីនំបញ្ចុកជាមួយគ្នានៅហ្នុង។ ប៉ុន្តែវិលត្រឡប់មកវិញ ហ៊ុន សែន និយាយថា អញដឹងហើយទៅស៊ីនំបញ្ចុកនៅឯណានោះ! ខ្ញុំអត់និយាយសោះ ស្តាប់តែ កឹម សុខា ស្តាប់តែ ញឹក ប៊ុនឆៃ ប៉ុន្តែ ហ៊ុន សែន ដែលថាហ្នឹងថាកុំចង់យកការណ៍ពី ហ៊ុន សែន អត់បានទេ ដូច្នេះល្បែងនេះ ល្បែង ហ៊ុន សែន ទាំងអស់”។
សេចក្តីបញ្ជាក់របស់ គង់ គាំ អម្បាញ់មិញនេះ ដូចជា ដេញទាន់ ជាន់កែង កឹម សុខា ពេកហើយ។ ម្តងនេះ កឹម សុខា លែងគិតពីរឿងអាយ៉ង មិនអាយ៉ងជាមួយគណបក្សសមរង្ស៊ីទៀតហើយ គេឃើញ កឹម សុខា ដើរបន្ទាបបន្ថោកគណបក្សសមរង្ស៊ីគ្រប់ទីកន្លែង ដើម្បីឲ្យគេឯងដឹងថា គណបក្សសមរង្ស៊ីកើតចេញពីឈាម និងទឹកភ្នែកប្រជាពលរដ្ឋ ជាបក្សស្រេកឃ្លានអំណាច ខ្លាចបាត់បង់កៅអីជាដើម។ សេចក្តីនេះ កឹម សុខា បានបញ្ជាក់យ៉ាងដូច្នេះ “ស្លាប់មនុស្សច្រើនណាស់ណា ទម្រាំតែបាន២៦កៅអី ស្លាប់មនុស្សអស់ប៉ុន្មាននាក់ខ្មែរ មិនមែនធម្មតាទេណា ជាប់គុកអស់ប៉ុន្មាននាក់ វេទនាអស់ប៉ុន្មាននាក់ ច្រើនណាស់។ ដូច្នេះ អស់លោកបានសោយសុខ តំណាងរាស្ត្រប្រាក់ខែ ១០លានហើយ បងប្អូនសុខខ្លួនលោកហើយ អត់សួរលោកជំនប់នៅតាមមូលដ្ឋានទេ ប្រាក់ខែប៉ុន្មាន ហើយនៅជាមួយប្រជារាស្ត្រវេទនាយ៉ាងណា? បានប៉ុន្មាន?តំណាងរាស្ត្រឥឡូវឡើងដល់ ១០លានរៀល។ អញ្ចឹងហើយគេមិនមែនចង់បាត់បង់តំណែងទេបងប្អូន អស់លោក ២៦នាក់នោះ គេ១០លានរៀលក្នុងមួយខែ គេខ្លាចរួមគ្នាទៅ គេអត់បានឈរទៀត ដូច្នេះរួមមិនរួមខ្ញុំមិនដឹងទេ ប៉ុន្តែខ្ញុំខំ”។
តាមពិតអ្វីដែល កឹម សុខា លើកឡើងមុននេះ គឺជាតថភាពដែលប្រជារាស្ត្រខ្មែរឃើញមុន កឹម សុខា ទៅទៀតថា សម រង្ស៊ី បុគ្គលនិយម គ្រួសារនិយម បក្ខពួកនិយម ព្រោះថា មុននឹង កឹម សុខា ផ្សងព្រេងបង្កើតគណបក្សសិទ្ធិមនុស្ស សម រង្ស៊ី ត្រូវសម្តេច ហ៊ុន សែន ប្រមុខគណបក្សប្រជាជនកម្ពុជាធាក់ធ្លាក់ពីលើរេញប្រជាធិបតេយ្យពីរលើករួចទៅហើយ ចុះពេលនេះ អាក្រូចដូចអាពោតដែរឬអី បានជា កឹម សុខា ទៅធ្វើជាអាយ៉ង សម រង្ស៊ី?
ភាពមិនប្រាកដប្រជានេះហើយដែលធ្វើឲ្យយុវជនជំនាន់នេះខ្ពើម កឹម សុខា និង សម រង្ស៊ី ហើយងាកមកបោះឆ្នោតជូនគណបក្សប្រជាជនកម្ពុជា។ ប៉ុន្តែ កឹម សុខា ពុំបានសិក្សាពីអវត្តមានរបស់យុវជន ក្នុងគណបក្សសិទ្ធិមនុស្សឲ្យបានស៊ីជម្រៅឡើយ ថាហេតុអ្វីបានជាយុវជនមិនគាំទ្រគណបក្សសិទ្ធិមនុស្ស? ករណីនេះ កឹមសុខា បាននិយាយទាំងមិនចេះអៀនខ្មាស់ថា ៖ « លោកយាយ លោកតា ខ្ញុំស្តាយណាស់អត់មានយុវជនមកយើងទាំងអស់គ្នានេះខំតស៊ូនេះ គឺដើម្បីក្មេងក្រោយៗ ប៉ុន្តែក្មេងអត់មកស្តាប់យើងទេ » ។
តាមពិត យុវជនមិនស្តាប់ពាក្យរោយរាយគ្មានប្រយោជន៍របស់ កឹម សុខា ពិតជាមានហេតុផលដូចបុរាណពោលផ្តាំថា ៖ « មានភ្លើង ទើបមានផ្សែង» និង « ដាំស្វាយ បានផ្លែស្វាយ » នោះអី ។ មួយវិញទៀត ពាក្យថា ៖ « អង្គុយលើចង្អេរ លើកខ្លួនឯង » នេះជាមាយាទរបស់ កឹម សុខា ។ ពេលនេះដើម្បីផ្តួលរំលំ សម រង្ស៊ី កឹម សុខា បានបញ្ជាក់ជូនអ្នកគាំទ្រ គណបក្សសិទ្ធិមនុស្សថា សម រង្ស៊ី ពុំមែនជាអ្នកស្នេហាជាតិដូច កឹម សុខា នោះទេ។ ជាក់ស្តែង សម រង្ស៊ី តែងចោទ សម្តេច ហ៊ុន សែន ថាកាន់អំណាចយូរ ចុះ សម រង្ស៊ី វិញ ធ្វើត្រឹមតែជាមេបក្សសោះ ម្តេចក៏កាន់អំណាចមួយជីវិតដែរ? សូមស្តាប់សេចក្តីពន្យល់របស់ កឹម សុខា ៖ « អញ្ចឹងសូមឲ្យបងប្អូនកុំឲ្យតែឮថា ពួកប្រឆាំងៗ សុទ្ធតែអ្នកស្នេហាជាតិទាំងអស់នោះ។ខ្លះប្រឆាំងគេ ដើម្បីខ្លួនឯង មិនមែនប្រឆាំងគេដើម្បីជាតិឯណា? មិនមែនប្រឆាំងគេ ដើម្បីប្រជារាស្ត្រឯណា?បើយើងមិនហ៊ានកែខ្លួនឯងផង ចង់ទៅកែគេយ៉ាងម៉េច? ចោទថាគេហ្នឹងកាន់អំណាចយូរហើយខ្លួនឯងហ្នឹងមិនទាន់ធ្វើនាយករដ្ឋមន្ត្រីផង ធ្វើប្រធានបក្ស មួយជីវិតដែរ » ។
ព្យុះកំហឹងរវាងមេបក្សប្រឆាំងទាំងពីរ ប្រៀបបាននឹងភ្នំភ្លើងផ្ទុះ បានក្លាយទៅជាជម្ងឺមហារីកទៅហើយ។ សម្រាប់អ្នកគាំទ្រគណបក្សប្រឆាំងទាំងពីរបានត្រឹមតែអង្គុយមើល អាយ៉ៃឆ្លងឆ្លើយរវាងអ្នកខ្លាំងទាំងពីរយ៉ាងជក់ចិត្ត ។ ប៉ុន្តែមិនទាន់ទាំងចប់ចម្រៀងអាយ៉ៃផង អ្នកទស្សនាបានវិលទៅកាន់លំនៅដ្ឋានវិញអស់ នៅសល់តែ តាមេក្រូ តែម្នាក់គត់ រង់ចាំសារមេក្រូ និងទារលាភសក្ការៈខ្លះៗពីអ្នកខ្លាំងទាំងពីរ។
ភាពមានៈនៃមេបក្សប្រឆាំងទាំងពីរនេះ ត្រូវលោក ម៉ម សូណង់ដូ ប្រធានសមាគមអ្នកប្រជាធិបតេយ្យ បានរិៈគន់ឥតសំចៃមាត់ថា ទង្វើរបស់ កឹម សុខា និង សម រង្ស៊ី ជាទង្វើល្ងង់ខ្លៅបំផុត ដែលក្នុងជីវិតរបស់លោក មិនដែលឃើញទាល់តែសោះ។ លោក ម៉ម សូណង់ដូ ដែលគេស្គាល់ថា ជាអ្នកគាំទ្របក្សប្រឆាំង ទាំងងងឹតងងល់ដែរនោះ បានទូន្មាន កឹម សុខា ថា មិនត្រូវបង្ខំប្រជាពលរដ្ឋឲ្យជឿលើខ្លួនទេ និងមិនត្រូវយកធម៌ព្រះពុទ្ធទៅបោកប្រាស់រាស្ត្រនោះឡើយ ហើយបើចង់ឲ្យគេជឿ ទាល់តែធ្វើអ្វីមួយ ឲ្យគេឃើញជាក់ស្តែងសិន។ លោក ម៉ម សូណង់ដូ បានស្រោចទឹកឲ្យ កឹម សុខា មុននឹងរូបលោកចូលគុគព្រៃស យ៉ាងដូច្នេះ ៖ « ប្រសិនបើគេជឿយើងកើត ទាល់តែយើងបញ្ចេញស្នាដៃអីមួយឲ្យច្បាស់លាស់ប្រសិនបើយើងទើបនឹងកើតមួយថ្ងៃ ពីរថ្ងៃ ហើយចង់បង្ខំប្រជាពលរដ្ឋឲ្យថាយើងល្អពីព្រោះយើងមើលសៀវភៅឃើញអ្នកដឹកនាំជាតិពីមុនៗមកថាល្អអញ្ចេះ ហើយយើងយកមកសម្តែងនៅមុខប្រជាពលរដ្ឋយើងយកធម៌ព្រះពុទ្ធមកសម្តែងនៅមុខប្រជាពលរដ្ឋ ក៏វាអត់បានការអីដែរ។ កុំអួតថាខ្លួនឯងពូកែ ខ្លួនឯងស្រឡាញ់ជាតិជាងគេអត់អាចនិយាយអញ្ចឹងបានទេ។ ដូចអ្នកទាត់បាល់អន្តរជាតិ អញ្ចឹង គេលក់ខ្លួនគេថ្លៃរាប់លានដុល្លារ ប៉ុន្តែមុននឹងគេទិញរាប់លានដុល្លារគេសួរថា តើហ្អែងទាត់នៅក្លឹបណា? ទាត់បានប៉ុន្មានឆ្នាំហើយ ? ហើយបានពានរង្វាន់ប៉ុន្មានហើយ? បើឃើញថាហ្អែងនៅកន្លែងណាឈ្នះនៅកន្លែងហ្នឹង នោះទើបអញយក។ ប៉ុន្តែ សម្រាប់មនុស្សខ្លះ អត់ដឹងអីសោះ អត់ដឹងមកពីក្នុងព្រៃណាហើយអួតថាខ្ញុំអ្នកទាត់បាល់ដែរ ខ្ញុំចង់បានលុយប៉ុណ្ណេះ គឺគ្មាននរណាគេឲ្យទេ។ ទាត់ខ្យល់សោះហ្នឹង រឿងគឺតែប៉ុណ្ណឹងទេ ។តើយើងតស៊ូហ្នឹង ដើម្បីបោករាស្ត្រ? ឬជួយប្រជាពលរដ្ឋ ឬមួយស្រឡាញ់ជាតិ ឬក៏សម្រាប់តែក្រុមពួករបស់យើងមួយដែរ?បើសម្រាប់តែក្រុមពួកយើងមួយដែរ គឺមិនចាំបាច់ទៅតវ៉ាអីទេ គឺយើងនៅតែខូចដដែលៗហ្នឹង។ រឿងនេះបើយើងថាគេទៅប្រកួតតែឯង តែយើងសំពត់ធ្លុះដែរនោះ តើយើងចង់ឲ្យប្រជាពលរដ្ឋធ្វើយ៉ាងម៉េចដែរ? ប្រសិនបើយើងចង់ដោះស្រាយបញ្ហាជាតិយើងត្រូវហ៊ាននិយាយពិត ហ៊ានលាតត្រដាង។ យ៉ាងណាក៏ដោយ គឺត្រូវមានគណបក្សមួយ គ្រប់គ្រងជាតិយើងដែរហើយគណបក្សណាមួយក៏ខ្មែរដែរ » ។
បើទោះជា ម៉ម សូណង់ដូ បានផ្តល់ដំបូន្មានដល់ កឹម សុខា ឲ្យលះបង់នូវគំនិតអត្មិះមានះ ដែលមាននៅក្នុងកាយវាចាចិត្តយ៉ាងនេះក្តី ក៏ភាពទំនើង រឹងរូសរបស់ កឹម សុខា នៅតែមិនអាចកែបានឡើយ។
ដើម្បីជៀសវាងអ្នកគាំទ្រគណបក្សសិទ្ធិមនុស្សចោទថា លំអៀងម្ខាងៗ លោក ម៉ម សូណង់ដូ បានរិៈគន់យ៉ាងពេញទំហឹង ចំៗ ទៅលោក សម រង្ស៊ី ថា សម រង្ស៊ី គឺជាកំពូលអ្នកល្ងិតល្ងង់ ប្រកាប់ប្រចាក់គ្នាក្នុងផ្ទៃបក្ស ហើយមាយាទបែប សម រង្ស៊ី នេះ ដឹកនាំអាជីវកម្មបក្សប្រឆាំង ៣០០ឆ្នាំ ទៀត ក៏នៅតែចាញ់ដែរ។ លោក ម៉ម សូណង់ដូ បានឲ្យដំបូន្មានថា ៖ « ខ្ញុំបន្ទោសបំផុត តើបន្ទោសនរណាគេ? គឺខ្ញុំបន្ទោសគណបក្ស សម រង្ស៊ី ហ្នឹងតែម្តងគឺគណបក្សនយោបាយប្រឆាំងហ្នឹងតែម្តង។ សព្វថ្ងៃ យុទ្ធសាស្ត្ររបស់គាត់ ហើយនិងការឆ្លាតវៃរបស់គាត់ គឺទាបបំផុត។អ្វីដែលខ្ញុំបន្ទោសគណបក្សប្រឆាំង សម រង្ស៊ី ហ្នឹង ហើយដែលខ្ញុំថាគណបក្សប្រឆាំងហ្នឹងជាគណបក្សអន់ គឺគាត់ឈរដល់ ៣០០អាណត្តិទៀត ក៏នៅតែចាញ់គេអញ្ចឹង។ ឥឡូវខ្ញុំសូមនិយាយអំពីយុទ្ធសាស្ត្ររបស់គាត់។ ទី១ គឺរឿងដែលគាត់គាំទ្រឲ្យមាន ៥០ បូក ១ ។តាមធម្មតា ៥០ បូក ១ គឺវាល្អហើយ ខ្ញុំគាំទ្រដែរទេតើ។ អ្វីដែលគាត់បានធ្វើក្នុងនាមគាត់ជាមេគណបក្សប្រឆាំងសម្រាប់កាលៈទេសៈសព្វថ្ងៃ គាត់មិនត្រូវរើសយុទ្ធសាស្ត្រ ៥០ បូក ១ ទេ។ បើគាត់រើសយកយុទ្ធសាស្ត្រ ៥០ បូក ១ទាល់តែគាត់ហ្នឹងជាគណបក្សធំណាស់ ហើយការបោះឆ្នោតហ្នឹងគាត់គិតថា អញនឹងឈ្នះ នោះទើបយើងរើស ៥០ បូក ១ ។ហើយបើយើងនៅទាបជាងគេបំផុត គាត់បែរជាទៅគាំទ្រ ៥០ បូក ១ អាហ្នឹងហើយដែលខ្ញុំថា គាត់ជាអ្នកដឹកនាំមួយខ្សោយជាទីបំផុតអវិជ្ជាជាទីបំផុតក្នុងអាជីវកម្មរបស់គាត់ដែលធ្វើជាគណបក្សប្រឆាំង ។ នេះខ្ញុំនិយាយឲ្យត្រង់ ដែលយើងយក៥០ បូក ១ពេលណាដែលយើងមានគណបក្សធំ ខ្លាំង នោះទើបយើងយក ៥០ បូក ១ យើងមានសំណាងនឹងឈ្នះ ពីព្រោះគណបក្សយើងធំ។ចំណែកពេលនេះ មិនត្រឹមតូចទេ តែគាត់ឈ្លោះគ្នាទៀត គាត់បែរជាយក ៥០ បូក១ អាហ្នឹងហើយ ដែលខ្ញុំត្រូវបន្ទោសគាត់ » ។
ការរិៈគន់ ចំៗ លើ កឹម សុខា និង សម រង្ស៊ី របស់លោក ម៉ម សូណង់ដូ អ្នកគាំទ្របក្សប្រឆាំងទាំងពីរ ស្វាគមន៍ និងទទួលយកបាន ព្រោះពួកគេទាំងនោះក៏មើលឃើញយ៉ាងច្បាស់ដែរថា ទង្វើរបស់ កឹម សុខា និង សម រង្ស៊ី អាចនឹងដឹកនាំពួកគេជួបនឹងគ្រោះមហន្តរាយ បើពួកគេបន្តគាំទ្រពួកបក្សប្រឆាំងតទៅទៀត។ ចំណែកបងប្អូននៅក្រៅប្រទេស បានផ្ញើបណ្តាំតាមបទបង្ហាញភាគទី២នេះ ទៅមេបក្សប្រឆាំងទាំងពីរថា បើ កឹម សុខានិង សម រង្ស៊ី មិនស្តាប់នរណាក៏ហីចុះ តែសូមឲ្យមេបក្សប្រឆាំងទាំងពីរយកសម្តីលោក ម៉ម សូណង់ដូ មកឆ្លុះបញ្ចាំងនូវទង្វើប្រាំថ្ងៃរបស់ខ្លួនផង។
ចុងក្រោយនៃបទបង្ហាញនេះ លោក ម៉ម សូណង់ដូ ដែលក្រាញននាលដើម្បីការពារមេបក្សប្រឆាំងទាំងពីរ បានធ្វើសេចក្តីសន្និដ្ឋានថា ទាំង សម រង្ស៊ី ទាំង កឹម សុខា មិនមែនធ្វើនយោបាយដើម្បីផលប្រយោជន៍ជាតិនោះទេ ហើយលោក ក៏បានទទួលស្គាល់ដែរថា មេបក្សប្រឆាំងទាំងពីរពិតជាបានប្រកាប់ប្រចាក់គ្នាមែន។ នេះទំនងជា ម៉ម សូណង់ដូ យល់ឃើញថា បើនៅតែបន្តបិទបាំងនូវអំពើខិលខូច មេបក្សទាំងពីរនេះទៀត ឬុបលោកក៏អស់តម្លៃជាមនុស្ស ដូចមេបក្សប្រឆាំងទាំងពីរនោះដែរ។ នេះជាសម្តីរបស់លោក ម៉ម សូណង់ដូ ៖ « អ្វីដែលខ្ញុំបានសង្កេតឃើញតាំងពីឆ្នាំ១៩៩៣រហូតមកដល់ថ្ងៃនេះ ខ្ញុំឃើញអ្នកដើរតួនាទីជាគណបក្សប្រឆាំងហ្នឹង កៅអីហ្នឹងកាន់តែស្រុតទៅៗ ៗ ៗ ហើយទន្ទឹមនឹងការស្រុតហ្នឹងឃើញគណបក្សប្រឆាំងដែលតាំងខ្លួនជាអ្នកប្រជាធិបតេយ្យហ្នឹង ឃើញតែជេរ តិតៀនគ្នា ឈ្លោះប្រកែកគ្នាហើយម្នាក់ៗពើងទ្រូងរៀងខ្លួន។ សព្វថ្ងៃ ខ្ញុំសង្កេតឃើញពួកគណបក្សនយោបាយគាត់មិនមែនធ្វើការសម្រាប់ជាតិទេគឺធ្វើការសព្វថ្ងៃនេះសម្រាប់ផ្ចាញ់ផ្ចាល់គ្នា កាប់ចាក់គ្នា ហាក់ដូចជាប្រទេសមួយ និងប្រទេសមួយទៀតជាសត្រូវនឹងគ្នាចង់ស៊ីសាច់ហុតឈាមគ្នា ដូចគ្មានអើពើទៅដល់អនាគតជាតិរបស់ខ្លួន មិនអើពើទៅដល់អនាគតប្រជាពលរដ្ឋរបស់ខ្លួនផងដែរគឺខ្ញុំយល់ឃើញអញ្ចឹង » ។
តើ កឹម សុខា និង សម រង្ស៊ី មានល្បិចអ្វីទៀត ដើម្បីបោករាស្ត្រ ? ៕