ថ្នាក់ដឹកនាំ
និងមន្ត្រីរាជការគ្រប់លំដាប់ថ្នាក់ នៃទីស្ដីការគណៈរដ្ឋមន្ត្រី បានជួបជុំគ្នា ក្នុងពិធីសំណេះ
សំណាល និងជប់លៀង អបអរសាទរ ចូលឆ្នាំសកល ឆ្នាំ២០១៣ ។
កម្មវិធីនេះ
បានធ្វើឡើង កាលពីល្ងាចថ្ងៃទី ២៨ ធ្នូ ក្រោមអធិបតីភាព ឯកឧត្ដម ឧបនាយករដ្ឋមន្ត្រី
សុខ អាន រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងលោកជទាវ ។
មានប្រសាសន៍សំណេះសំណាលក្នុងឱកាសនោះ
ឯកឧត្ដម ឧបនាយករដ្ឋមន្ត្រី សុខ អាន បានកោតសរសើរ និងវាយតម្លៃខ្ពស់
ចំពោះមន្ត្រីរាជការ ក្រោមឱវាទនៃទីស្ដីការគណៈរដ្ឋមន្ត្រីទាំងអស់ ដែលបានខិតខំប្រឹងប្រែងបំពេញការងារ
តាមតួនាទី និងភារកិច្ចរបស់ខ្លួន ក្នុងក្របខណ្ឌទីស្ដីការគណៈរដ្ឋមន្ត្រី ដែលជាសេនាធិការផ្ទាល់ របស់រាជរដ្ឋាភិបាល
ពិសេស បានបម្រើជូនដោយជោគជ័យ តាមគោលនយោបាយ និង ការណែនាំរបស់
សម្ដេចតេជោនាយករដ្ឋមន្ត្រី ។
ឯកឧត្តម
ឧបនាយករដ្ឋមន្ត្រី សុខ អាន បានលើកឡើងដែរថា ជាច្រើនឆ្នាំមកហើយ ដែល ទីស្ដីការគណៈរដ្ឋមន្ត្រី
មិនដែលបានរៀបចំពិធីសំណេះសំណាល និងពិធីជប់លៀងជួបជុំសប្បាយរីករាយ ដូច្នេះទេ
ទើបតែឆ្នាំនេះ ប៉ុន្តែជាការកត់សំគាល់ ការជួបជុំពិសាភោជនាហារនេះ មិនមានកំដរដោយ វង់តន្ត្រី
នោះទេ ដោយសារតែយើងកំពុងស្ថិតនៅក្នុងអំឡុងពេល នៃការកាន់មរណទុក្ខ ចំពោះព្រះបរមសព
នៃ ព្រះមហាវីរក្សត្រនៃយើង។
ក្នុងការសំណេះសំណាលនេះ ឯកឧត្ដម ឧបនាយរដ្ឋមន្ត្រី សុខ អាន
ក៏បាន រំលេចឡើង នូវលទ្ធផល ការងារទាំងឡាយ ដែលមន្ត្រីរាជការទីស្ដីការគណៈរដ្ឋមន្ត្រី
សម្រេចបានកន្លងមក ក្នុងភារកិច្ចជាសេនាធិការផ្ទាល់របស់រាជរដ្ឋាភិបាល
ក៏ដូចជាសមិទ្ធផលនានា ដែលរាជរដ្ឋាភិបាល ក្រោមការដឹកនាំ របស់ សម្ដេចតេជោ ហ៊ុន សែន សម្រេចបាន
ជាអាទិ៍ ជោគជ័យនៃការធ្វើជាម្ចាស់ផ្ទះរៀបចំ កិច្ចប្រជុំធំៗជាច្រើន ពិសេស
កិច្ចប្រជុំកំពូលអាស៊ានលើកទី២១និងកិច្ចប្រជុំពាក់ព័ន្ធជាច្រើនទៀត ដែល
ទើបបញ្ចប់ថ្មីៗនេះ, ការដាក់ប្រាសាទព្រះវិហារ ចូលជាសម្បត្តិបេតិកភណ្ឌពិភពលោក, ការធ្វើកំណែទំរង់
រដ្ឋបាល, អភិបាលកិច្ចល្អ កំណែទំរង់លុបចោលឡូនេសាទ ជាពិសេស កំណែទំរង់ដ៏ស៊ីជម្រៅក្នុង
វិស័យដីធ្លី ដែលសម្ដេចតេជោនាយករដ្ឋមន្ត្រី បានបញ្ជូនក្រុមយុវជនស្ម័គ្រចិត្ត
ចុះទៅវាស់វែងធ្វើប័ណ្ណកម្មសិទ្ធិ ជូន ប្រជាពលរដ្ឋប្រកបដោយជោគជ័យ។
សមិទ្ធផលសំខាន់ៗជាច្រើនទៀត ក៏ត្រូវបានឯកឧត្ដម ឧបនាយក រដ្ឋមន្ត្រី សុខ អាន បង្ហាញផងដែរ
នោះគឺការខិតខំពង្រឹងសន្តិភាព ស្ថិរភាពនយោបាយ ស្ថិរភាពម៉ាក្រូសេដ្ឋកិច្ច ទប់ស្កាត់អតិផរណា
ការជំរុញឲ្យមានកំណើនសេដ្ឋកិច្ច ដែលជាការទាក់ទាញ និងលើក ទឹកចិត្តដល់ការវិនិយោគនៅកម្ពុជា
និងការរីកចម្រើននៃវិស័យទេសចរណ៍។
ដើម្បីបន្តការកែទំរង់រដ្ឋបាល ឲ្យកាន់តែស៊ីជម្រៅ ឯកឧត្ដមឧបនាយករដ្ឋមន្ត្រី
បានជំរុញឲ្យមានការបង្កើន សេវាសាធារណៈឲ្យបានល្អ ក្នុងនោះក៏ត្រូវបង្កើនសមត្ថភាពធនធានមនុស្សមន្ត្រីរាជការ
ដែលអនុវត្តការងារផ្ដល់សេវាសាធារណៈ ឲ្យកាន់តែប្រសើរ កាន់តែពូកែ
ឲ្យមន្ត្រីសេវាសាធារណៈដិតដាមដោយស្មារតីសេវាសាធារណៈ បម្រើ ការងារសេវាសាធារណៈបានល្អ
មានភក្ដីភាព មានសីលធម៌ វិជ្ជាជីវៈ និងកាន់តែខិតជិតប្រជាជន ធ្វើឲ្យប្រជាពលរដ្ឋ
ទទួលយកសេវាសាធារណៈដោយរីករាយ ។
នៅក្នុងពិធីជួបជុំនេះ
ក៏មានការបំពាក់ឥស្សរិយយស និងមេដាយ ជូនដល់មន្ត្រីរាជការ បុគ្គលិក
ដែលមានស្នាដៃក្នុងការបំពេញការងារ កន្លងមក ហើយក៏មានចាប់ឆ្នោតរង្វាន់ផ្សងសំណាងផងដែរ
៕