លោកគង់ គាំ ប្រធានស្តីទីគណបក្សសម
រង្ស៊ី បានសារភាពថា គណបក្សប្រឆាំងពិតជាបានដាក់ចេញនូវគោលការណ៍មួយ ដោយតម្រូវឱ្យសមាជិកក្រុមប្រឹក្សាឃុំ
សង្កាត់ចំនួន ២៦៦០ រូប របស់ខ្លួនធ្វើការសច្ចាប្រណិធាន ឬហៅថា ស្បថ ពិតប្រាកដមែន
គឺនៅថ្ងៃទី២៨ ខែ មករា ឆ្នាំ ២០១២ មួយថ្ងៃមុនការបោះឆ្នោតព្រឹទ្ធសភាមកដល់
នេះបើយើងតាមការស្រង់សម្តីចុះផ្សាយក្នុងគេហទំព័ររបស់សារព័ត៌មានមួយចំនួនកាលពីថ្ងៃទី២៧
ខែ ធ្នូ ឆ្នាំ ២០១១។
គណបក្សសម រង្ស៊ី ត្រូវបានគេដឹងថា
ជាញឹកញាប់តែងតែប្រឌិតនូវបញ្ហា បង្កើតជារឿងរ៉ាវផ្សេងៗ ដើម្បីជាលេសធ្វើការចោទប្រកាន់មកលើរាជរដ្ឋាភិបាលថា
ជាអ្នកបានរំលោភលើសិទ្ធិមនុស្ស។ ប៉ុន្តែ ក្នុងពេលការបោះឆ្នោតជ្រើសតាំងសមាជិកព្រឹទ្ធសភាខិតជិតចូលមកដល់
បែជាផ្ទុះឡើងនូវការបញ្ជាដាច់ខាតពីលោក សម រង្ស៊ី ពីបរទេសមកដល់សមាជិករបស់ខ្លួនឱ្យស្បថ
និងដកទូរស័ព្ទដៃ ។ តើអំពើបែបនោះក្រុមអ្នកការពារសិទ្ធិមនុស្សមួយចំនួនដែលតែងតែគាំទ្របក្សប្រឆាំងមានប្រតិកម្មយ៉ាងណា?នៅឈរឱបដៃមើល
និងនាំគ្នាស្រែកបន្ទរស្វាគមន៍នូវសកម្មភាពខុសច្បាប់នោះ ឬក៏គួរគប្បីនាំគ្នាចេញសេចក្តីថ្លែងការណ៍ថ្កោលទោស
លោក សម រង្ស៊ី ដែលបាន និងកំពុងរំលោភសិទ្ធិស្របច្បាប់របស់សមាជិកគណបក្សខ្លួនឯងនោះ។
ការចេញមុខមកការពារខ្លួនទាំងបំពានច្បាប់របស់លោក
គង់ គាំ នេះ បន្ទាប់ពីមានការចេញផ្សាយសេចក្តីថ្លែងការណ៍រួមមួយរបស់បណ្តាញប្រជាជនកម្ពុជាដើម្បីសន្តិភាព
(CPNP)ដែលបានបង្ហើបនូវព័ត៌មានដ៏រសើបមួយ
អាចនឹងធ្វើឱ្យសមាជិកក្រុមប្រឹក្សាឃុំ សង្កាត់របស់គណបក្សសម រង្ស៊ី ដកសេចក្តីទុកចិត្តទាំងស្រុងចេញពីការគាំទ្រគណបក្សប្រឆាំងមួយនេះ
ដោយសារហេតុផល «បង្ខំឱ្យពួកគេស្បថ ថា ត្រូវតែបោះឆ្នោតឱ្យគណបក្ស សម រង្ស៊ី
និងទូរស័ព្ទដៃត្រូវបានដកហូត» ដែលការចេញបទបញ្ជារបស់លោកសម រង្ស៊ី បែបនោះ
ត្រូវបានក្រុមអ្នកវិភាគវាយតម្លៃថា គឺជាអំពើផ្ទុយពីគោលការណ៍លទ្ធិប្រជាធិបតេយ្យ
និងរំលោភសិទ្ធិមនុស្សយ៉ាងធ្ងន់ធ្ងរ »។
បណ្តាញប្រជាជនកម្ពុជាដើម្បីសន្តិភាព
ដែលបង្កើតឡើងដោយអង្គការមិនមែនរដ្ឋាភិបាល សមាគមនិងសហជីពនៅកម្ពុជាចំនួន១៤៩
បានផ្សព្វផ្សាយថា តាមព័ត៌មានដែលពួកគេទទួលបានក្រៅផ្លូវការ និងគួរឱ្យទុកចិត្តបាន
ផ្តល់ដោយគណបក្សសម រង្ស៊ី ទើបមានការចេញផ្សាយនូវសេចក្តីថ្លែងការណ៍នេះឡើងដោយ
CPNP បានដាក់ចំណងជើងថា សិទ្ធិស្របច្បាប់របស់សមាជិកក្រុមប្រឹក្សាឃុំ
សង្កាត់ ត្រូវបានគំរាមដកហូតដោយលោក សម រង្ស៊ី។
CPNP បានហៅទង្វើរបស់លោក សម រង្ស៊ី
ថាបានធ្វើឡើងបំពានច្បាប់ទាំងកំរោល និងចាត់ទុកថា ការបង្ខំឱ្យស្បថ គឺជាអំពើផ្តាច់ការ
រំលោភលើច្បាប់រដ្ឋធម្មនុញ្ញ ផ្ទុយពីគោលការណ៍លទ្ធិប្រជាធិបតេយ្យ និងជាការរំលោភសិទ្ធិមនុស្សពេញទី ដោយយោងថា
អំណាចទាំងអស់ជារបស់ប្រជាពលរដ្ឋ មិនមែនជារបស់បុគ្គល ឬត្រូវបានបំពានទាំងបង្ខំដោយបុគ្គល
ឬក្រុមអ្នកនយោបាយណាមួយឡើយ។
សេចក្តីថ្លែងការណ៍បានបន្ថែមថា ច្បាប់ការពារកិត្តិយស
និងសេចក្តីថ្លៃថ្នូររបស់ប្រជាពលរដ្ឋ។ ការបង្ខិតបង្ខំត្រូវបានហាមឃាត់ជាដាច់ខាត។
ក្រៅពីនេះCPNP បានហៅការដកហូតទូរស័ព្ទដៃពីសមាជិកក្រុមប្រឹក្សាឃុំ
សង្កាត់ គឺជាការដកសិទ្ធិក្នុងការបញ្ចេញមតិ អាចជាការសង្ស័យមិនទុកចិត្តគ្នា។
ជាមួយនឹងការប្រដូចទង្វើនោះទៅនឹងរបបប៉ុលពត CPNP បានបញ្ជាក់ក្នុងសេចក្តីថ្លែងការណ៍របស់ខ្លួនដោយចាត់ទុកបទបញ្ជារបស់លោក
សម រង្ស៊ី ថាជាអំពើក្បត់នឹងឆន្ទៈរបស់ប្រជាពលរដ្ឋដែលជាម្ចាស់ឆ្នោត។
ជាការចេញមុខបកស្រាយក្នុងអ្វីមួយដែលអ្នកតាមដានស្ថានការណ៍នយោបាយនៅកម្ពុជា
យល់ថាជាការនិយាយបង្វែងដាន បំភ័ន្តសាធារណៈមតិ ដោយហេតុលោក គង់ គាំ បានឆ្លើយតបវិញថា
ការតម្រូវឱ្យក្រុមប្រឹក្សាឃុំ សង្កាត់ស្បថនោះ គឺដើម្បីបញ្ជាក់ពីជំហរស្មោះត្រង់ជាមួយម្ចាស់ឆ្នោត
ប្រជាពលរដ្ឋ និងប្រទេសជាតិ។
គេបានដឹងថា ការឱ្យសមាជិករបស់ខ្លួនស្បថ
មិនមែនកើតឡើងជាលើកទីមួយទេ គឺគណបក្សសម រង្ស៊ី បានអនុវត្តរបៀបនេះរៀងរាល់ពេលបោះឆ្នោតជាច្រើនដងកន្លងមកហើយ។
ការតម្រូវឱ្យស្បថនេះ
បើទោះបីជាលោក គង់ គាំ បដិសេធថា មិនមែនដើម្បីបង្ហាញការស្មោះត្រង់ជាមួយបក្សសម
រង្ស៊ី ក្តី ប៉ុន្តែ ក្នុងន័យដែលគេអាចសង្ស័យថា «មិនអាចក្បត់បក្សបានជាដាច់ខាត»នេះហើយ គឺជាបទបញ្ជាដាច់ណាត់ ទើបបានជាមានការដាក់កំហិតបន្ថែមទៀតដោយតម្រូវឱ្យគ្រប់គ្នាត្រូវតែដកទូរស័ព្ទដៃនៅថ្ងៃទី២៨
ខែ មករា ឆ្នាំ ២០១២។ តើលោក គង់ គាំ បកស្រាយយ៉ាងណាដែរជុំវិញការបង្ខំឱ្យស្បថ
និងឱ្យដកទូរស័ព្ទដៃ ដែលជាអំពើរំលោភលើសិទ្ធិមនុស្សយ៉ាងចំហរបែបនេះ? តើលោកគង់
គាំ ចេះច្បាប់ដែរឬទេ នៅពេលដែលខ្លួនគាត់គាំទ្រនូវអំពើខុសច្បាប់បែបនោះ?
ចម្លើយសំរាប់ជាមេរៀនដើម្បីបង្ហាញជូនដល់
លោក គង់ គាំ ឱ្យស្គាល់អំពីនីតិច្បាប់ ជាដំបូង ប្រសិនបើគណបក្សសម រង្ស៊ី
យកគោលការណ៍ដែលតម្រូវឱ្យស្បថ មកប្រើមែននោះ
គឺជាកំហុសដែលត្រូវប្រឈមនឹងផ្លូវច្បាប់ដោយជៀសមិនផុត ដោយហេតុថា យោងតាមជំពូកទី១១ ប្រការ១១ នៃបទបញ្ជា និងនីតិវិធី
សម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៣ រៀបចំដោយ គជប
បានចែងថា «ធ្វើការគាបសង្កត់ ឬគំរាមកំហែង
ឬបង្ខំធ្វើសម្បថឱ្យគេបោះឆ្នោតឱ្យគណបក្សនយោបាយរបស់ខ្លួន ឬគណបក្សនយោបាយណាមួយដែលខ្លួនចូលចិត្ត
»នឹងត្រូវទទួលទោសទណ្ឌដោយពិន័យជាប្រាក់ពី៥លានរៀល
ទៅ២៥លានរៀល ដោយពុំទាន់គិតដល់ទោសព្រហ្មទណ្ឌផ្សេងទៀតចំពោះជនណា ឬក៏គណបក្សណាដែលបានប្រព្រឹត្តអំពើរំលោភច្បាប់
ប្រសិនរកឃើញថាមានកំហុសមែននោះ ។ ការពិន័យ និងដាក់ទោសទណ្ឌនេះក៏មានចែងក្នុងមាត្រា
១២៤ ថ្មី នៃច្បាប់អំពីការបោះឆ្នោតជ្រើសតាំងសមាជិកព្រឹទ្ធសភាផងដែរ។
ដូច្នេះ ការធ្វើនយោបាយរបស់មេបក្សប្រឆាំង
លោក សម រង្ស៊ី ដែលផ្តើមចេញពីការគាបសង្កត់ និងបង្ខំឱ្យសមាជិករបស់ខ្លួនស្បថ
និងការដកហូតសិទ្ធិបញ្ចេញមតិតាមរយៈការដកទូរស័ព្ទដៃមិនឱ្យប្រើ នៅមុនថ្ងៃបោះឆ្នោតនោះ
គឺបានបង្ហាញពីយុទ្ធវិធីគំរាមកំហែង រំលោភសិទ្ធិមនុស្ស និងជាន់ឈ្លីលើច្បាប់ដោយមិនអាចប្រកែកបានឡើយ។
សមាជិករបស់គណបក្ស សម រង្ស៊ី អាចពិចារណាដើម្បីការពារសិទ្ធិស្របច្បាប់របស់ខ្លួន។
ម៉្យាងទៀត ដើម្បីឱ្យមាននូវយុត្តិធម៌ក្នុងការសំរេចចិត្តក្នុងសកម្មភាពនយោបាយ
តើគួរគប្បីត្រូវនាំគ្នាងើបឡើងប្រឆាំងតវ៉ាយ៉ាងណាវិញទៅលោក សម រង្ស៊ី ប្រសិនបើបទបញ្ជានោះ
ជាអំពើផ្ទុយពីផ្លូវច្បាប់ ប៉ះពាល់ដល់ផ្លូវចិត្ត និងរំលោភលើឆន្ទៈរបស់ខ្លួនបែបនេះ?។
ដោយៈ ពូន សំរេច