បទវិចារណកថា
ការបដិសេធមិនទទួលទ្ធផលការបោះឆ្នោត គឺមានន័យស្មើនឹងក្បត់ឆន្ទៈប្រជាពលរដ្ឋ
ទោះបីជាលទ្ធផលនៃការបោះឆ្នោតជ្រើសរើសក្រុមប្រឹក្សាឃុំ
សង្កាត់ អាណត្តិទី៣ កាលពីថ្ងៃទី០៣ខែមិថុនា ឆ្នាំ២០១២ គណៈកម្មាធិការជាតិរៀបចំការបោះឆ្នោតមិនទាន់ប្រកាសជាផ្លូវការយ៉ាងណាក៏ដោយ
ក៏មានសារព័ត៌មានខ្លះបានផ្សព្វផ្សាយស្តីអំពីលទ្ធផលទូទាំងប្រទេស បង្ហាញថា
គណបក្សប្រជាជនកម្ពុជាបានទទួល១៥៨៩ក្នុងចំណោមឃុំ សង្កាត់ចំនួន ១៦៣៣ឃុំ រីឯឃុំ
សង្កាត់ដែលសេសសល់ចំនួន៤៤ ទៀតបានទៅគណបក្សផ្សេង។ ប៉ុន្តែត្រូវបានគណបក្សសម
រង្ស៊ី បដិសេធមិនទទួលយក។
ផ្ទុយទៅវិញលោក
កឹម សុខា ប្រធានគណបក្សសិទ្ធិមនុស្ស នៅអល់អែករារែកមិនទាន់និយាយថាទទួលយក
ឬក៍មិនទទួលយកនោះទេ ប៉ុន្តែលោក កឹម សុខា មានការសប្បាយចិត្ត ហើយប្រកាសទទួលស្គាល់ថា គណបក្សសិទ្ធិមនុស្ស
បាន១៨ឃុំ ។
យើងឃើញថា រៀងរាល់ការបោះឆ្នោតម្តងៗ
គណបក្សប្រឆាំងតែងតែស្រែកមិនទទួលស្គាល់លទ្ធផលនៅពេលដែលដឹងថាគណបក្សរបស់ខ្លួនចាញ់ឆ្នោត
នេះវាជាទម្លាប់ និងចរិតពិតរបស់គណបក្សប្រឆាំង។
ជាក់ស្តែងតាមបទពិសោធន៏នៃការបោះឆ្នោតព្រឹទ្ធសភាកន្លងមក
មុនកាលបរិច្ឆេទមិនទាន់ដល់ថ្ងៃបោះឆ្នោតគណបក្សសម រង្ស៊ី
ក៏ធ្លាប់ចោទប្រកាន់ថា គណៈកម្មាធិការជាតិរៀបចំបោះឆ្នោតមិនឯករាជ្យ និងបានលំអៀងគាំទ្រគណបក្សកាន់អំណាចជាដើម។ការចោទប្រកាន់ដូចនេះវាមិនសមហេតុសមផលនោះទេ
ពីព្រោះនៅក្នុងសមាសភាពគ.ជ.ប ក៏មានតំណាងគណបក្សសម រង្ស៊ី ជាសមាជិកផងដែរ។
ដោយឡែកនាយកប្រតិបត្តិនៃអង្គការខុមហ្រែល
បាននិយាយថា ការបោះឆ្នោតប្រព្រឹត្តទៅដោយរលូន ទោះបីជាមានរបាយការណ៏ថា
មានភាពមិនប្រក្រតីយ៉ាងណាក៏ដោយ ក៏បរិយាស មានសន្តិភាព
និងដំណើការនៃការបោះឆ្នោតមានភាពល្អ និងមានអ្នកចូលរួមបោះឆ្នោតប្រហែល៦០ភាគរយ។
ជាធម្មតាការបោះឆ្នោតនៅលើពិភពលោក ឈ្មោះអ្នកបោះឆ្នោតនៅក្នុងបញ្ជីមិនបានមក
ចូលរួមបោះឆ្នោត១០០ភាគរយនោះទេ ។ ទោះយ៉ាងណា ចំនួនអ្នកបោះឆ្នោតនៅកម្ពុជា
គឺមិនបានប៉ះពាល់ដល់ដំណើរការលទ្ធិប្រជាធិបតេយ្យនោះទេ ផ្ទុយទៅវិញ
គឺអាចនិយាយបានថា កម្ពុជាបាននាំមុខគេក្នុងចំណោមបណ្តាប្រទេសមួយចំនួន
ដែលមានចំនួនអ្នកបោះឆ្នោតតិចជាងនេះ តួយ៉ាងដូចជាតាមរយៈសារព័ត៌មាន
The Christian Science កាលពីថ្ងៃទី ២១ខែមិនា ឆ្នាំ២០១១ បានលើកយកការបោះឆ្នោត
ប្រធាធិបតី នៅប្រទេសហៃទី ជុំទី១ នាថ្ងៃទី២០ ខែមីនា ឆ្នាំ២០១១ មានអ្នកចូលរួមបោះឆ្នោត
២២,៧៩ ភាគរយ និងការបោះឆ្នោតជុំទី២
មានអ្នកចូលរួមបោះឆ្នោតចំនួនតែ ២២,៥២ភាគរយប៉ុណ្ណោះ។
ក្រោយពីការបោះឆ្នោត
គឺនៅថ្ងៃទី១៧ ខែឧសភា ឆ្នាំ២០១១ ក្រុមប្រឹក្សាសន្តិសុខនៃអង្គការសហប្រជាតិ បានចេញសេចក្តីថ្លែងការណ៏បញ្ជាក់ថា
«សមាជិកក្រុមប្រឹក្សាសន្តិសុខអង្គការសហប្រជាជាតិ សូមអបអរសារទចំពោះប្រជាពលរដ្ឋហៃទី
ដែលដំណើរការបោះឆ្នោតដោយសន្តិភាព និងស្វាគមន៏នូវរដ្ឋាភិបាលថ្មី.......» ។
ដោយឡែក
ការបោះឆ្នោតនៅក្នុងប្រទេសកម្ពុជា គឺមានអ្នកចូលរួមទៅបោះឆ្នោតជាង៦០ភាគរយ
នោះគឺជាចំនួនមួយដែលខ្ពស់ឆ្ងាយពីបណ្តាប្រទេសមួយចំនួន មិនត្រឹមតែប៉ុណ្ណោះ
ការបោះឆ្នោតជ្រើសរើសក្រុមប្រឹក្សាឃុំ សង្កាត់ នៅក្នុងប្រទេសកម្ពុជា
គឺបានប្រព្រឹត្តទៅដោយសេរី ត្រឹមត្រូវ និងយុត្តិធម៌
ដោយមានអ្នកសង្កេតការណ៍រាប់ម៉ឺននាក់
រួមទាំងមានតំណាងមកពីគណបក្សនយោបាយទាំងអស់ដែលប្រកួតប្រជែងចូលរួមសង្កេតការណ៍ផងដែរ។
ដូច្នេះ បើគណបក្សប្រឆាំងបដិសេធលទ្ធនៃការបោះឆ្នោតនេះ គឺមានន័យថា
បក្សសម រង្ស៊ី គឺបាន ក្បត់នឹងឆន្ទៈប្រជាពលរដ្ឋ
ពីព្រោះការប្រជាពលរដ្ឋបានអនុវត្តនូវកាតព្វកិច្ចរបស់ខ្លួនរួចហើយ ដើម្បីជ្រើសអ្នកដឹកនាំមូលដ្ឋាន
និងការអភិវឌ្ឍន៏ភូមិឃុំ ។ បើប្រជាពលរដ្ឋបានបោះឆ្នោតជូនហើយ បែជាគណបក្សសម
រង្ស៊ី មិនព្រមទទួលយក គឺមានន័យថា
បក្សប្រឆាំង មិនចង់ឱ្យមានការអភិវឌ្ឍន៏ប្រទេស ហើយមិនត្រឹមតែប៉ុណ្ណោះ
គឺជាការភ្លេចខ្លួនថាកម្ពុជាជាប្រទេសមានច្បាប់ទម្លាប់មិនមែនអាណាធិបតេយ្យដូចមេបក្សប្រឆាំងនោះទេ។
អត្ថដោយៈ រួម ជាតិ