ឯកឧត្តម លី ខឹឈាង នាយករដ្ឋមន្ត្រីនៃសាធារណរដ្ឋប្រជាមានិតចិន កាលពីថ្ងៃទី២ ខែកញ្ញា ឆ្នាំ២០១៣ បានប្រកាសពីការផ្តល់នូវកម្ចីឥតការប្រាក់ចំនួន ២០០លានយ័ន បន្ថែមទៀតដល់កម្ពុជា ពិសេសទៅលើអ្វីដែលភាគីទាំងពីរ (កម្ពុជា-ចិន) បានព្រមព្រៀងគ្នាកាលពីខែមេសា ឆ្នាំ២០១៣ ទៅលើគម្រោងប្រចាំឆ្នាំរបស់ខ្លួន។
ការប្រកាសផ្តល់កម្ចីឥតការប្រាក់នេះ បានធ្វើឡើងក្នុងជំនួបពិភាក្សាការងារទ្វេភាគីរវាងសម្តេចអគ្គមហាសេនាបតីតេជោ ហ៊ុន សែន ជាមួយឯកឧត្តម លី ខឺឈាង នៅទីក្រុងណាន់នីង តំបន់ស្វយ័តក្វាងស៊ី នៃសាធារណរដ្ឋប្រជាមានិតចិន ក្នុងឱកាសដែលសម្តេចនាយករដ្ឋមន្ត្រីអញ្ជើញទៅចូលរួមពិព័រណ៍អាស៊ាន-ចិនលើកទី១០ និងកិច្ចប្រជុំកំពូលធុរកិច្ចវិនិយោគអាស៊ាន-ចិនលើកទី១០ ដែលប្រារព្ធពិធីបើកនៅព្រឹកថ្ងៃទី៣ ខែកញ្ញា ឆ្នាំ២០១៣។
ការផ្សាយរបស់ទូរទស្សន៍ជាតិកម្ពុជាបានឲ្យដឹងថា ប្រមុខរដ្ឋាភិបាលនៃប្រទេសទាំងពីរកម្ពុជា-ចិន បានសំដែងនូវការរីករាយ ដោយបានជួបពិភាក្សាការងារទ្វេភាគីសាជាថ្មីម្តងទៀត បន្ទាប់ពីបានធ្វើឡើងកាលពីខែមេសា ឆ្នាំ២០១៣ កន្លងទៅថ្មីៗនេះ។ ភាគីទាំងពីរបានសំដែងនូវការវាយតំលៃខ្ពស់ និងកោតសរសើរចំពោះភាពរីកចម្រើន នៃទំនាក់ទំនងនិងកិច្ចសហប្រតិបត្តិការលើគ្រប់វិស័យ ដែលសម្រេចបានក្នុងរយៈពេលដ៏ខ្លីមកនេះ បន្ទាប់ពីការដាក់ចេញនូវយុទ្ធសាស្ត្រគ្រប់ជ្រុងជ្រោយ ពិសេសលើវិស័យនយោបាយ សេដ្ឋកិច្ច ការពារជាតិ សន្តិសុខ បច្ចេកវិទ្យា កសិកម្ម ទេសចរណ៍ និងការបង្កើនកិច្ចសហការនៅគ្រប់វេទិកាទាំងអស់ ទាំងក្នុងតំបន់ និងអន្តរជាតិ ដែលមានការយកចិត្តទុកដាក់ដូចគ្នា។
ភាគីទាំងពីរក៏បានសន្យារួមគ្នាផងដែរ អំពីការជំរុញទំនាក់ ទំនងនៃគណបក្សនយោបាយទាំងពីរ គឺគណបក្សប្រជាជនកម្ពុជា និងបក្សកុម្មុយនីស្តចិនដោយបានចាត់ទុកថា ការផ្លាស់ប្តូរនូវដំណើរទស្សនកិច្ចនៃថ្នាក់ដឹកនាំគណបក្សទាំងពីរ កាលពីពេលកន្លងមកបានរួមចំណែកដល់ការធ្វើឲ្យប្រសើរឡើងនៃទំនាក់ទំនងរបស់ប្រទេសទាំងពីរផងដែរ។
ឯកឧត្តមនាយករដ្ឋមន្ត្រីចិនបានលើកឡើងដែរថា នៅក្នុងពេលប៉ុន្មានថ្ងៃខាងមុខនេះនឹងមានថ្នាក់ដឹកនាំចិនដែលជាមនុស្សលំដាប់ទី៥ របស់ការិយាល័យនយោបាយមជ្ឈិមបក្សកុម្មុយនីស្តចិនអញ្ជើញទៅបំពេញទស្សនកិច្ចនៅកម្ពុជា។
ឯកឧត្តម លី ខឺឈាង បានសំដែងនូវការអបអរសាទរសាជាថ្មីម្តងទៀតជូនចំពោះគណបក្ស ប្រជាជនកម្ពុជា ពិសេសជូនចំពោះសម្តេចតេជោនាយករដ្ឋមន្ត្រី ដែលបានទទួលជោគជ័យដ៏ត្រចះត្រង់ពីការបោះឆ្នោតជ្រើសតាំងតំណាងរាស្ត្រនីតិកាលទី៥ ដែលបានប្រព្រឹត្តទៅកាលពីថ្ងៃទី២៨ កក្កដា ឆ្នាំ២០១៣ និងសង្ឃឹមថា សម្តេចតេជោនឹងដឹកនាំរាជរដ្ឋាភិបាលនីតិកាលទី៥ ក្នុងការនាំប្រទេសកម្ពុជាឲ្យកាន់តែរីកចម្រើនទ្វេឡើងថែមទៀត។
សម្តេចតេជោនាយករដ្ឋមន្ត្រីបានថ្លែងអំណរគុណជូនចំពោះ ឯកឧត្តមប្រធានាធិបតី ឯកឧត្តមនាយករដ្ឋមន្ត្រី និងថ្នាក់ដឹកនាំនៃសាធារណរដ្ឋប្រជាមានិតចិន ដែលបានផ្ញើនូវសារលិខិតចូលរួមអបអរសាទរជូនចំពោះគណបក្សប្រជាជនកម្ពុជា ដែលបានទទួលជោគជ័យពីការបោះឆ្នោតជ្រើសតាំងតំណាងរាស្ត្រនីតិកាលទី៥ ដែលបានបញ្ចប់ទៅកាលពីពេលថ្មីៗកន្លងមក។ សម្តេចតេជោបានមានប្រសាសន៍ថា សម្តេចពិតជាមានការរីករាយដែលក្នុងរយៈពេលជាង៥ ខែកន្លងមកថ្នាក់ដឹកនាំទាំងពីរបានជួបពិភាក្សាគ្នាចំនួនពីរលើក ដែលនេះបង្ហាញឲ្យឃើញពីភាពជិតស្និទ្ធ និងកិច្ចសហប្រតិបត្តិការក្នុងឋានៈជាមិត្តល្អ ជាដៃគូល្អ នៅក្នុងទំនាក់ទំនងយុទ្ធសាស្ត្រគ្រប់ជ្រុងជ្រោយនៃប្រទេសទាំងពីរ។ សម្តេចតេជោនាយករដ្ឋមន្ត្រីបានថ្លែងនូវអំណរគុណជូនចំពោះរដ្ឋាភិបាលចិន ដែលបានបញ្ជូនឯក ឧត្តម វ៉ាង យី រដ្ឋមន្ត្រីការបរទេសចិនអញ្ជើញទៅបំពេញទស្សនកិច្ចនៅកម្ពុជា កាលពីពេលថ្មីៗកន្លងទៅ ដែលនោះគឺជា ការបង្ហាញឲ្យឃើញនូវការគាំទ្រយ៉ាងម៉ឺងម៉ាត់របស់ចិនចំពោះប្រទេសកម្ពុជា។
នៅថ្ងៃទី២ ខែកញ្ញា ក្នុងឱកាសស្នាក់អាស្រ័យបំពេញទស្សនកិច្ចនៅទីក្រុងណាន់នីង តំបន់ស្វយ័តក្វាងស៊ី នៃសាធារណរដ្ឋប្រជាមានិតចិន សម្តេចអគ្គមហាសេនាបតីតេជោ ហ៊ុន សែន ក៏បានទទួលជួបសវនាការដោយឡែកពីគ្នាជាបន្តបន្ទាប់ជាមួយឯកឧត្តម ឈិន វូ អភិបាលខេត្ត ក្វាងស៊ី និង ឯកឧត្តម លី ជីហេង អភិបាលខេត្តយូណាននៃសាធារណរដ្ឋប្រជាមានិតចិន។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានថ្លែងនូវអំណរ គុណចំពោះការធ្វើបដិសណ្ឋារកិច្ចយ៉ាងកក់ក្តៅបំផុត ពីសំណាក់ថ្នាក់ដឹកនាំខេត្តក្វាងស៊ីដោយមានប្រសាសន៍ថា សម្តេចបានអញ្ជើញទៅកាន់ខេត្តក្វាងស៊ីចំនួន៧ ដងរួចហើយៗត្រូវបានថ្នាក់ដឹកនាំ និងប្រជាជនខេត្តក្វាងស៊ីផ្តល់ឋានៈជាពលរដ្ឋកិត្តិយសខេត្តក្វាងស៊ី ផងដែរ។
ឯកឧត្តម ឈិន វូ បានជម្រាបជូនសម្តេចតេជោនាយករដ្ឋមន្រ្តីថា ប្រជាពល រដ្ឋខេត្តក្វាស៊ីចំនួនជាង ៥២ លាននាក់សូមស្វាគមន៍សម្តេចតេជោជានិច្ចក្នុងការអញ្ជើញទៅកាន់ខេត្តក្វាងស៊ី ពិសេសនៅទីក្រុងណាន់នីងនោះ។ ទាក់ទិនទៅនឹងលទ្ធផលនៃការបោះឆ្នោតនៅកម្ពុជាកាលពីពេលកន្លងមក ឯកឧត្តមអភិបាលខេត្តមានប្រសាសន៍ថា ជោគជ័យរបស់គណបក្សប្រជាជនកម្ពុជា គឺបានបង្ហាញថា ប្រជាជនកម្ពុជានៅតែគាំទ្រ និងគោរពចំពោះសម្តេចតេជោនាយករដ្ឋមន្រ្តី ដែលមានសមត្ថភាពខ្ពស់ក្នុងការដឹកនាំប្រទេសកម្ពុជាឲ្យកាន់តែមាន ការរីកចំរើនថែមទៀត។
ឯកឧត្តម អភិបាលខេត្តមានប្រសាសន៍ឲ្យដឹងដែរថា លោកមានការរីករាយខ្លាំងណាស់ដោយ បានឃើញវត្តមានអង្ករកម្ពុជាដ៏មានគុណភាពខ្ពស់ និងមានរស់ជាតិឆ្ងាញ់មាននៅលើទីផ្សាររបស់ខេត្តក្វាងស៊ី ពិសេសនៅទីក្រុងណាន់នីងផ្ទាល់តែម្តង ។
ឯកឧត្តម ឈិន វូ បានឲ្យដឹងថា ថ្នាក់ដឹកនាំខេត្តក្វាងស៊ីនឹងធ្វើការពិភាក្សាជាមួយភាគីកម្ពុជា ក្នុងការកែច្នៃកសិផលរបស់កម្ពុជា ដើម្បីនាំចេញមកកាន់ខេត្តក្វាងស៊ី ពិសេសលើផលិតផលកសិកម្ម និងការបង្កើនជើងហោះហើរពីណាន់នីងទៅកាន់កម្ពុជា ដើម្បីរួមចំណែកដល់ការលើកកម្ពស់វិស័យទេសចរណ៍ នៃប្រទេសទាំងពីរឲ្យកាន់តែរីកចំរើនថែមទៀត។
ដោយឡែក ឯកឧត្តម លី ជីហេង អភិបាលខេត្តយូណានបានថ្លែងថា ប្រជាជនចិននៅទូទាំងប្រទេស ពិសេសប្រជាជនចិនខេត្តយូណានមានការគោរពស្រឡាញ់សម្តេចតេជោខ្លាំង ណាស់ ដែលតាមរយៈ នេះឯកឧត្តមសូមគោរពអញ្ជើញសម្តេចទៅបំពេញទស្សនកិច្ច នៅខេត្តយូណាន តាមពេលវេលាដ៏សមស្របណាមួយ។
ឯកឧត្តម លី ជីហេង បន្តថា ប្រជាជនចិនរង់ចាំស្វាគមន៍សម្តេចតេជោគ្រប់ពេលវេលាពោល គឺប្រជាជនចិនចាត់ទុកសម្តេចតេជោគឺជាបងប្អូនរបស់ប្រជាជនចិន។ សម្តេចតេជោនាយករដ្ឋមន្រ្តី និងឯកឧត្តមអភិបាលខេត្តយូណាន ក៏បានពិភាក្សាគ្នាផងដែរពីការជំរុញកិច្ចសហប្រតិបត្តិការលើវិស័យទេសចរណ៍ ដោយសារតែខេត្តយូណាន់គឺជាខេត្តមួយ ដែលមានសក្តានុពលលើវិស័យទេសចរណ៍ និងជាខេត្តមួយដែលមានចំណតអាកាសដ្ឋានអន្តរជាតិលំដាប់ទី ៤ នៅក្នុងប្រទេសចិន៕