ក្រុមយុវជនស្ម័គ្រចិត្តសម្ដេចតេជោ សំរាកចំនួន៥ថ្ងៃ បន្ទាប់ពីបំពេញភារកិច្ច អស់រយៈពេល១ខែកន្លងមក
បន្ទាប់ពីចុះយុទ្ធនាការវាស់វែងដីធ្លីធ្វើប្លង់ជូនប្រជាពលរដ្ឋអស់រយៈពេល១ខែកន្លងមក ក្រុមយុវជនស្ម័គ្រចិត្តសម្ដេចតេជោហ៊ុន សែន បានទទួលការសំរាកចំនួន៥ថ្ងៃ ហើយបាននាំគ្នាវិលត្រឡប់ទៅលេង លំនៅដ្ឋានជួបជុំក្រុមគ្រួសា នៅថ្ងៃទី២៩ កក្កដា នឹងវិលត្រឡប់មកកាន់កន្លែងការងារវិញនៅថ្ងៃទី២ ខែសីហា ឆ្នាំ២០១២។
ក្នុងពេលធ្វើដំណើរវិលត្រឡប់ឆ្ពោះទៅលេងលំនៅដ្ឋាននៅវេលាព្រឹកថ្ងៃទី២៩ កក្កដា ឆ្នាំ២០១២នោះ ក្រុម យុវជន ស្ម័គ្រចិត្តសម្ដេចតេជោចុះទៅខេត្តកំពង់ចាម ដែលធ្វើដំណើរដោយរថយន្ត ចំនួន៤គ្រឿងបានមកឈប់ សំចតនៅ មុខសាលាខេត្តកំពង់ចាមប្រមាណជា ៣០នាទី ហើយក្នុងពេលនោះគេសង្កេតឃើញវត្តមាន លោកលន់ លឹមថៃ អភិបាលរងខេត្ត ជាតំណាងដ៏ ខ្ពស់ខ្ពស់លោកហ៊ុន ណេង អភិបាលខេត្តកំពង់ចាម ទទួលការសួរសុខទុក្ខ រាក់ទាក់ ស្វាគមន៍យ៉ាងស្និតស្នាលដល់ក្រុមយុវជននៅក្នុងឱកាសនោះ។
នៅក្នុងឱកាសឈប់សំចតនោះផងដែរ លោកអ៊ុក បូនីន អ្នកទទួលផ្នែកសំរបសំរួលកិច្ចការក្រុមយុវជនវាស់វែងដីធ្លីខេត្តកំពង់ចាម បានឱ្យដឹងថា ដោយមានទឹកចិត្តគោរពយ៉ាងមោះមុតតាមគោលនយោបាយ របស់រាជរដ្ឋភិបាល ក្រុមយុវជនស្ម័គ្រចិត្តសម្ដេចតេជោ ហ៊ុនសែនរួមនិងកំលាំងជំនាញសុរិយោដីបានបំពេញភារកិច្ចវាស់ដីធ្វើប្លង់កម្មសិទ្ធិជូនប្រជាពលរដ្ឋនៅក្នុងខេត្តកំពង់ចាមបានប្រព្រឹត្តិទៅប្រកបដោយភាពរលូន និងសំរេចបានលទ្ធផលយ៉ាងធំធេង នៅក្នុងពេលបំពេញការងារដែលទើបតែចាប់ផ្ដើមបានរយៈ ពេល១ខែ ប៉ុណ្ណោះ។
លោកអ៊ុក បូនីន បានឱ្យដឹងបន្តថា ក្រុមយុវជនស្ម័គ្រចិត្តសម្ដេចតេជោ ចុះមកខេត្តកំពង់ចាម សរុប មានចំនួន៨៤នាក់ ចែកចេញជា៧ក្រុម បានចូលរួមសហការជាមួយមន្ទីររៀបចំដែនដីនគររូបនីយកម្ម និងសំណង់សុរិយោដីធ្វើការវាស់វែងដីធ្លីធ្វើប្លង់ជូនប្រជាពលរដ្ឋជំហានដំបូងមានចំនួន៤ស្រុក ក្នុងនោះមានស្រុកស្ទឹងត្រង់ ស្រុកអូររាំងឪ ស្រុកតំបែរ និងស្រុកមេមត់។
យុទ្ធនាការវាស់វែងនេះបានចាប់ផ្ដើម ពីថ្ងៃទី២៨ ខែមិថុនា គិតមកត្រឹមថ្ងៃទី២៨ខែកក្កដាឆ្នាំ២០១២ មានរយៈពេល១ខែគត់ ក្រុមការងារសំរេចបានលទ្ធផល វាស់ដីបានចំនួន៣២៦៤ក្បាលដី ស្មើ៤៥១៦,៤២ហិចតា មានចំនួន២៨០៣គ្រួសារ។
លោកបូ នីន បានឱ្យដឹងបន្តទៀតថា លទ្ធផលដែលទទួលបានប្រកបដោយផ្លែផ្កានេះពិតជាស្នាដៃរួមគ្នារវាង ក្រុមយុវជនស្ម័គ្រចិត្តសម្ដេចតេជោហ៊ុន សែន ជាមួយកំលាំងជំនាញមន្ទីររៀបចំដែនដីនគរូបនីយកម្ម និងសំណង់សុរិយោដីខេត្តកំពង់ចាម។ ពិសេសគឺដោយសារមានការយកចិត្តទុកដាក់ខ្ពស់ពីសំណាក់អាជ្ញាធរខេត្តកំពង់ចាមតែងតែគិតគូជាប្រចាំចំពោះជីវភាព សន្តិសុខ និងទីកន្លែងស្នាក់នៅយ៉ាងសមរម្យ និងដោះស្រាយគ្រប់ ឧបសគ្គសព្វបែបយ៉ាងមិនដែលឱ្យក្រុមការងារជួបការលំបាក៕
.jpg)
