ភ្នំពេញ: កាលពីវេលាម៉ោងជិត ៨ ព្រឹកថ្ងៃទី៨ ខែតុលា ឆ្នាំ២០១៣សម្តេចអគ្គមហាសេនា បតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់ អញ្ជើញទៅចូលរួមកិច្ចប្រជុំកំពូលអាស៊ាន លើកទី២៣ និងកិច្ចប្រជុំកំពូលពាក់ព័ន្ធ ដែលនឹងប្រព្រឹត្តទៅពីថ្ងៃ៩ ដល់ថ្ងៃទី១០ ខែតុលា ឆ្នាំ២០១៣ នៅទីក្រុងបេនដារ សេរី បេហ្កាវ៉ាន់ប្រទេសប្រ៊ុយណេដារូសាឡាម។
នៅព្រលានយន្តហោះ មុននឹងចាកចេញជាមួយសម្តេចនាយករដ្ឋមន្ត្រី ហ៊ុន សែន ទៅប្រទេសប្រ៊ុយណេឯកឧត្តម ស្រ៊ី ថាមរុង្គ រដ្ឋមន្ត្រីប្រតិភូអមនាយករដ្ឋមន្ត្រី បានឲ្យដឹងថា កិច្ចប្រជុំកំពូលអាស៊ាន លើកទី២៣ និងកិច្ចប្រជុំកំពូលពាក់ព័ន្ធ ដែលនឹងប្រព្រឹត្តទៅពីថ្ងៃទី៩ និងថ្ងៃទី១០ ខែតុលា ឆ្នាំ២០១៣ខាងមុខដែលមានវត្តមានសម្តេចតេជោចូល រួមមាន៖ កិច្ចប្រជុំកំពូលអាស៊ានលើកទី២៣, កិច្ចប្រជុំកំពូលអាស៊ាន ជប៉ុនលើកទី១៦, កិច្ចប្រជុំកំពូលអាស៊ាន .សាធារណកូរ៉េលើកទី១៦ ,កិច្ចប្រជុំកំពូលអាស៊ាន .ចិនលើកទី១៦, កិច្ចប្រជុំកំពូលអាស៊ាន .សហរដ្ឋអាមេរិកលើកទី១ , កិច្ចប្រជុំកំពូលអាស៊ានបូក៣លើកទី១៦ , កិច្ចប្រជុំកំពូល អាស៊ានអាស៊ីបូព៌ាលើកទី៨,កិច្ចប្រជុំកំពូលអាស៊ាន.ឥណ្ឌាលើកទី១១, កិច្ចប្រជុំកំពូលអាស៊ាន,អង្គការសហប្រជាជាតិលើកទី៥។
អញ្ជើញអមដំណើរសម្តេចតេជោ រួមមាន ឯកឧត្តម ឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការ អន្តរជាតិ, ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងពាណិជ្ជ កម្ម , ឯកឧត្តម អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ, ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា និងសមាជិកជាន់ខ្ពស់ដទៃទៀតនៃរាជរដ្ឋាភិបាលកម្ពុជា។
សូមបញ្ជាក់ថាក្រៅពីកិច្ចប្រជុំ កំពូលទាំងនោះ សម្តេចអគ្គមហាសេនាបតីតេជោ ហ៊ុន សែន នឹងជួបពិភាក្សាទ្វេភាគីជាមួយឯកឧត្តមតូនី អាបបុត (Tony Abbott) នាយករដ្ឋមន្ត្រីអូស្ត្រាលី ឯកឧត្តម ចន ឃី (John Key) នាយករដ្ឋមន្ត្រីនូវែលហ្សេឡង់ និង ឯកឧត្តម បាន គីមូន (Ban Ki moon) អគ្គលេខាធិការអង្គការសហប្រជាជាតិ។សម្តេចអគ្គមហាសេនាបតីតេជោ ហ៊ុន សែន ប្រមុខនៃរាជរដ្ឋាភិបាលកម្ពុជាអាណត្តិទី៥នៃរដ្ឋសភា ដែលអញ្ជើញធ្វើដំណើរតាមយន្តហោះពិសេស របស់ព្រះរាជាណាចក្រកម្ពុជាបាន ទៅដល់ចំណតអាកាសយានដ្ឋានអន្តរជាតិប្រ៊ុយណេ ទីក្រុងបានដា ស៊េរីបេហ្កាវ៉ាន នៃរាជាណាចក្រប្រ៊ុយណេ ដារូសាឡឹម ប្រកបដោយសុវត្ថិភាព នៅវេលាម៉ោង ១០ និង៤៥នាទីត្រូវនិងម៉ោង ៩ និង ៤៥នាទី ម៉ោងនៅព្រះរាជាណាចក្រកម្ពុជា។
សម្តេចតេជោនាយករដ្ឋមន្ត្រី និង គណៈប្រតិភូជាន់ខ្ពស់ទទួលបានការធ្វើគារវកិច្ចស្វាគមន៍យ៉ាងកក់ក្តៅ បំផុតពីឯកឧត្តម លោកជំទាវ ជាឥស្សរជន ជាន់ខ្ពស់រដ្ឋាភិបាលនៃប្រទេសប្រ៊ុយណេដារូសា ឡឹម និងឯកឧត្តម ឆាយ សុខន ឯកអគ្គរាជទូតវិសាមញ និង ពេញសមត្ថភាពរបស់ព្រះរាជាណាចក្រកម្ពុជាប្រចាំរាជា ណាចក្រប្រ៊ុយណេដារូសាឡឹម ព្រមទាំងវត្តមានឥស្សរជនការទូត នៃប្រទេសទាំងពីរកម្ពុជា ប្រុយណេដារូសាឡឹម ជាច្រើនរូប។
តាមការគ្រោងទុក សម្តេចតេជោ ហ៊ុន សែន នឹងអញ្ជើញធ្វើមាតុភូមិនិវត្តន៍វិញ នៅរសៀលថ្ងៃទី១០ ខែតុលា ឆ្នាំ២០១៣៕
