លោកនេត សាវឿន អគ្គស្នងការនគរបាលជាតិក្នុងពិធីតែងតាំងលោកខេង ស៊ុំ ជាស្នងការខេត្តបន្ទាយមានជ័យនៅរសៀលនេះ
បន្ទាយមានជ័យ: ថ្លែងក្នុងពិធីតែងតាំងលោកខេង ស៊ុំ ជាស្នងការខេត្តបន្ទាយមានជ័យនៅរសៀលនេះ លោកនេត សាវឿន អគ្គស្នងការនគរបាលជាតិបានសម្តែងការសោកស្តាយយ៉ាងខ្លាំងចំពោះ កំហុសឆ្គងរបស់មន្ត្រីប៉ូលិសក្នុងខេត្តបន្ទាយមានជ័យ និងប៉ូលិសក្រសួងមហាផ្ទៃមួយចំនួន។
បើតាមលោកនាយអគ្គស្នងការនគរបាលជាតិ មន្ត្រីប៉ូលិសដែលប្រព្រឹត្តខុសឆ្គងមានចាប់ពីថ្នាក់ស្នងការ ស្នងការរងរហូតដល់នាយការិយាល័យនិងនាយកផ្នែក និងដែលរាលដាលរហូតដល់ស្ថាប័នគ្រឿងញៀននៃក្រសួងមហាផ្ទៃគឺលោកមឹក ដារ៉ា និងលោកជា ឡេង។
លោកនេត សាវឿនបានចាត់ទុកទង្វើរបស់ប៉ូលិសទាំងនោះថាបានធ្វើឲ្យបាត់បង់កិត្តិយសនិងជំនឿទុកចិត្តពីប្រជាពលរដ្ឋដែលប៉ូលិសគ្រប់គ្នាជាពិសេសប៉ូលិសខេត្តបន្ទាយមានជ័យត្រូវ តែខិតខំស្តារមុខមាត់និងជំនឿចិត្តរបស់ប្រជាពលរដ្ឋឡើងវិញ។
លោកអះអាងថា ក្រសួងមហាផ្ទៃ ក៏ដូចជារដ្ឋាភិបាលបានចាត់ទុកថានេះជាប្រវត្តិសាស្ត្រដ៏ជូរចត់មួយរបស់ប៉ូលិសដែលមានមេប៉ូលិសធំៗបានប្រព្រឹត្តការលក់ដូរគ្រឿងញៀន ទទួលសំណូក ដោះលែងជនល្មើស និងក្លែងបន្លំឯកសារ ។
លោកបានផ្តាំផ្ញើឲ្យស្នងការថ្មី និងប៉ូលិសទាំងអស់ស្តារមុខមាត់ប៉ូលិសឡើងវិញតាមរយៈការអនុវត្តការងារឲ្យបានត្រឹមត្រូវ និងជាពិសេសគោរពច្បាប់យ៉ាងខ្ជាប់ខ្ជួននិងមានការទទួលខុសត្រូវខ្ពស់បំផុតចំពោះមុខប្រជាពលរដ្ឋ។ លោកអះអាងថាការសោកស្តាយដ៏ធំធេងនៅពេលនេះគឺមិនមែនសោកស្តាយប៉ូលិសប៉ុន្មាននាក់ដែលត្រូវគេចាប់ខ្លួននោះទេ តែសោកស្តាយកំហុសឆ្គងដែលពួកគេបានប្រព្រឹត្ត។
លោកនេត សាវឿនក៏បានថ្លែងគាំទ្រផងដែរដល់អង្គភាពប្រឆាំងអំពើពុករលួយដែលបានចាត់ការរឿងនេះគឺចាត់ការទៅលើមន្ត្រីគណបក្សប្រជាជនតែម្តង។ ដូច្នេះវាជាការបង្ហាញថា អង្គភាពនេះពិតជាមានការប្តេជ្ញាចិត្តក្នុងការលុបបំបាត់អំពើពុករលួយមិនមែនដូចការរិះគន់របស់បក្សប្រឆាំងនិងសង្គមស៊ីវិលមួយចំនួននោះឡើយ៕
ដោយ : សុផុន