ថ្ងៃទី១៣ ខែ តុលា ឆ្នាំ២០១១ វេលាម៉ោង
១៥ និង០០នាទី នៅវិមានសន្តិភាពមានបើកសម័យប្រជុំពេញអង្គគណៈរដ្ឋមន្ត្រីពិសេស ក្រោមអធិបតីភាពដ៍ខ្ពង់ខ្ពស់បំផុតរបស់
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
ក្នុងអាណត្តិទី ៤ ដើម្បីពិភាក្សា
វាយតម្លៃផលប៉ះពាល់ដោយសារទឹកជំនន់
និងវិធានការដោះស្រាយ ។
ក្រោយពីបានស្តាប់របាយការណ៍ដែលធ្វើឡើងដោយឯកឧត្តម
លឹម គានហោ រដ្ឋមន្រ្តីក្រសួងធនធានទឹក
និងឧតុនិយម ឯកឧត្តម ចាន់ សារុន រដ្ឋមន្រ្តីក្រសួងកសិកម្ម រុក្ខាប្រមាញ់
និងនេសាទ ឯកឧត្តម ញឹម វណ្ណដា ទេសរដ្ឋមន្រ្តី
អនុប្រធានទី១គណៈគម្មាធិការគ្រប់គ្រងគ្រោះមហន្តរាយ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា
និងឯកឧត្តម គាត ឈន់ ឧបនាយករដ្ឋមន្រ្តី
រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ អំពីផលប៉ះពាល់ ដល់ជីវភាព
និងធ្វើឲ្យបាត់បង់អាយុជីវិតប្រជាពលរដ្ឋចំនួន ២៤៧ នាក់ ការបង្កបង្កើនផល
ក៏ដូចជាសត្វពាហនៈ ដោយសារគ្រោះទឹកជំនន់គិតត្រឹមថ្ងៃទី ១៣ ខែតុលា ឆ្នាំ
២០១១ និង
វិធានការជាក់ស្តែងនានាដែលបានអនុវត្ត ដើម្បីជួយសង្គ្រោះ ការបង្ការហានិភ័យនានា
ព្រោះតាមការព្យាករណ៍ទឹកភ្លៀងនៅបន្តអូសបន្លាយរហូតដល់ពាក់កណ្តាលខែវិច្ចិកា
ឆ្នាំ២០១១ ក៏ដូចជាការត្រៀមស្តារឡើងវិញនូវហេដ្ឋារចនាសម្ព័ន្ធ និងការបង្កបង្កើនផលរួចមក
កិច្ចប្រជុំពេញអង្គគណៈរដ្ឋមន្ត្រីពិសេស បានសម្រេច ៖
១-ផ្អាកការរៀបចំកម្រិតជាតិក្នុងរាជធានីភ្នំពេញនូវព្រះរាជពិធីបុណ្យអុំទូក
បណ្ដែតប្រទីប និងសំពះព្រះខែ សម្រាប់ឆ្នាំ ២០១១
ដែលគ្រោងប្រព្រឹត្តទៅនៅថ្ងៃទី ៩ -១០ និង១១ ខែវិច្ឆិកា តែរក្សាការឈប់សំរាកជូនដល់មន្រ្តីរាជការ
និយោជិក កម្មករ និងរក្សាការធ្វើនូវពិធីបុណ្យចំរើនព្រះជន្មវស្សាព្រះមហាវីរៈក្សត្រ
ទិវាបុណ្យឯករាជ្យជាតិ ៩ វិច្ឆិកា និងខួប ២០ ឆ្នាំ នៃការយាងនិវត្តចូលមាតុប្រទេសរបស់ព្រះមហាវីរៈក្សត្រដដែល។
សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ថា
ដោយសារទឹកជំនន់ឆ្នាំ ២០១១ នេះនៅអូសបន្លាយ ហើយហានិភ័យនៅមានកម្រិតខ្ពស់សម្រាប់ប្រជាពលរដ្ឋ
ការផ្អាកការរៀបចំកម្រិតជាតិ នូវព្រះរាជពិធីបុណ្យអុំទូក បណ្ដែតប្រទីប
និងសំពះព្រះខែ គឺដើម្បីប្រមូលកម្លាំង
និងធនធានទៅបំរើឲ្យការសង្គ្រោះប្រជាពលរដ្ឋដែលរងគ្រោះ
និងការស្តារឡើងវិញនូវហេដ្ឋារចនាសម្ព័ន្ធ ដែលទទួលរងការខូចខាត។
ដោយឡែកនៅមូលដ្ឋានប្រជាពលរដ្ឋ
អាជ្ញាធរដែនដីអាចរៀបចំពិធីបុណ្យនេះជាធម្មតាតាមប្រពៃណី
និងលទ្ធភាពដែលមាន។
២-សម្រាប់ការជួយសង្គ្រោះដល់ប្រជាពលរដ្ឋ
ដែលទទួលរងគ្រោះដោយសារទឹកជំនន់ សម្តេចអគ្គមហាសេនាបតីតេជោ
ហ៊ុន សែន បានសម្រេចឲ្យប្រមូលផ្តុំការជួយសង្គ្រោះតែមួយច្រកគឺ
គណៈកម្មាធិការជាតិគ្រប់គ្រងគ្រោះមន្តរាយ កាកបាទក្រហមកម្ពុជា
និងអាជ្ញាធរដែនដី សហការគ្នា ដោយប្រើប្រាស់ជំនួយរបស់រាជរដ្ឋាភិបាល
និងអំណោយរបស់កាកបាទក្រហមកម្ពុជា។
ដើម្បីធានាឲ្យការផ្តល់ជំនួយសង្គ្រោះបានទាន់ពេល និងដល់ដៃប្រជាពលរដ្ឋ
សម្តេចតេជោនាយករដ្ឋមន្រ្តី បានអនុញ្ញាតឲ្យប្រើប្រាស់កងកម្លាំងខេមរភូមិន្ទនៃបញ្ជាការដ្ឋានអង្គរក្ស
និងកងពលតូចលេខ៧០ ព្រមទាំងមធ្យោបាយសម្រាប់ជួយ វិចខ្ចប់ លើកដាក់ និង
ដឹកជញ្ជូនផងដែរ។
-សម្តេចតេជោនាយករដ្ឋមន្រ្តី បានស្វាគមន៍នូវរាល់ជំនួយសង្គ្រោះនានាពីបណ្តាប្រទេសជាមិត្ត
ក៏ដូចជាអង្គការដៃគូរនានា ដោយបានអនុញ្ញាតឲ្យគណៈកម្មាធិការជាតិគ្រប់គ្រងគ្រោះមហន្តរាយជាអ្នកសម្របសម្រួលធ្វើយ៉ាងណាឲ្យម្ចាស់ជំនួយគេអាចអនុវត្តការផ្តល់ជំនួយសង្រ្គោះនេះដោយខ្លួនគេ។
-ទោះបីជាគ្រោះទឹកជំនន់ឆ្នាំ
២០១១ នេះ បំផ្លាញនូវហេដ្ឋារចនាសម្ព័ន្ធជាច្រើន
ក៏ប៉ុន្តែរាជរដ្ឋាភិបាលនៅតែរក្សាបានសន្តិសុខស្បៀងក៏ដូចជាលទ្ធភាពនៃការនាំចេញអង្ករដដែលសម្រាប់ឆ្នាំ
២០១២ ខាងមុខនេះ។
អង្គប្រជុំគណៈរដ្ឋមន្ត្រី បានបិទសម័យប្រជុំនៅវេលាម៉ោង ១៧
និង ៣៥ នាទី។
រាជធានីភ្នំពេញ ថ្ងៃទី១៣ ខែតុលា
ឆ្នាំ២០១១