កំណាត់ផ្លូវ
ជាតិលេខ ៣ ពីចោមចៅរាជធានីភ្នំពេញ ទៅកាន់ទីរួមខេត្តកំពត
ដែលកសាងឡើងដោយឥណទានកំចីរបស់សាធារណ រដ្ឋកូរ៉េ
ត្រូវបានសម្ពោធដាក់ឲ្យប្រើប្រាស់ជាផ្លូវការហើយនៅថ្ងៃទី ១៤
ខែវិច្ឆិកា ឆ្នាំ ២០១១ ក្រោមអធិបតីភាពដ៏ខ្ពង់ខ្ពស់ បំផុតរបស់សម្តេចអគ្គមហាសេនាបតីតេជោ ហ៊ុន សែន និងឯកឧតត្តម ចាង ហូជីន(Jang
Ho Jin) ឯកអគ្គរដ្ឋទូត នៃសាធារណរដ្ឋកូរ៉េប្រចាំនៅកម្ពុជា
ហើយត្រូវបានប្រសិទ្ធនាមថា ជាផ្លូវមិត្តភាពកម្ពុជា-កូរ៉េ
ដូចគ្នានឹងចំណែកផ្លូវជាតិលេខ ៣ ពីត្រពាំងរពៅ
មកដល់ទីរួមខេត្តកំពតផងដែរ។
សម្តចតេជោនាយករដ្ឋមន្រ្តីមានប្រសាសន៍ឲ្យ
ដឹងអំពីផលប្រយោជន៍នៃការប្រើប្រាស់ហិរញ្ញប្បទានបរទេស
ក្នុងពិធីសម្ពោធថា គំរោងទាំងបួន
ដែលប្រើប្រាស់ដោយហិរញ្ញប្បទានរបស់សាធារណរដ្ឋកូរ៉េ និង
បីគំរោងទៀត ដែលប្រើប្រាស់ហិរញ្ញប្បទានរបស់ធនាគារអភិវឌ្ឍន៏អាស៊ី
និង ជំនួយឥតសំណងរបស់ប្រទេសអូស្ត្រាលី ដែលកំពុងតែបើកការដ្ឋាននេះ
គឺសុទ្ធតែជាហេដ្ឋារចនាសម្ពន្ធយុទ្ធសាស្រ្តក្នុងនោះសំណង់
ប៉ុស្តិ៍ត្រួតពិនិត្យការឆ្លងកាត់ព្រំដែន គឺជាការជួយ
លើកកំពស់ប្រសិទ្ធភាពភាព និង ផាសុខភាព ក្នុងការឆ្លងកាត់ព្រំដែន
ហើយការធ្វើឲ្យប្រសើរឡើងកំណាត់ផ្លូវជាតិលេខ ៣
ពីទីរួមខេត្តកំពតដល់វាលរេញគឺជាការធ្វើឲ្យបណ្តាញផ្លូវតភ្ជាប់ទៅនឹង
ផ្លូវជាតិ លេខ ៤ ឆ្ពោះ
ទៅកាន់កំពង់ផែសមុទ្រទឹកជ្រៅនៅខេត្តព្រះសីហនុ
មានភាពប្រទាក់ក្រឡាបំពេញសក្តានុពលឲ្យគ្នា ទៅវិញទៅមក
ក្នុងតួនាទីជាច្រករបៀងសមុទ្រស្របទៅនឹងការយកចិត្តទុកដាក់របស់សហគមន៏
អន្តរជាតិ ជាពិសេស ប្រទេសក្នុងមហាអនុតំបន់មេគង្គ និង
កិច្ចសហប្រតិបត្តិការទ្វេភាគីកម្ពុជា វៀតណាម។ សម្តេចតេជោបាន
បញ្ជាក់ថា ដោយសារតែបណ្តាញផ្លូវទាំងនេះ
ដែលមិនត្រឹមតែបំរើឲ្យចរាចរណ៍ដឹកជញ្ជូនតភ្ជាប់ពីរាជធានីភ្នំពេញ និង
ពីតំបន់ដទៃនៃប្រទេសកម្ពុជា
ទៅកាន់កំពង់ផែសមុទ្រប៉ុណ្ណោះទេគឺថែមទាំងបានបំពេញតួនាទីជាផ្លូវ
វាងរំដោះការកកស្ទះចរាចរណ៏
ដែលរាជរដ្ឋាភិបាលកម្ពុជាកំពុងតែខិតខំដោះស្រាយ
ដើម្បីកាត់បន្ថយគ្រោះ ថ្នាក់ចរាចរណ៏ ដែលបណ្តាលឲ្យមានពិការភាព និង
បាត់បង់ជីវិតមនុស្សព្រមទាំងបាត់បង់ទ្រព្យសម្បត្តិរដ្ឋ និង
ទ្រព្យសម្បត្តិឯកជនជាច្រើននោះ ។
សម្តេចតេជោ ថ្លែងឲ្យ
ដឹងអំពីប្រសិទ្ធភាពសេដ្ឋកិច្ចដែលទទួលបានពីផ្លូវជាតិនេះថា
ជារួមផ្លូវជាតិលេខ ៣ និង បណ្តាញផ្លូវដែលបែកចេញពីផ្លូវជាតិលេខ ៣
នេះ គឺជា មធ្យោបាយ
ដែលអាចជួយសំរួលយ៉ាងធំធេងដល់ការផ្លាស់ប្តូរសេដ្ឋកិច្ច
ពាណិជ្ជកម្មលើគ្រប់វិស័យ និង
ទេសចរណ៏តាមច្រករបៀងសមុទ្រខាងត្បូងឈាងខាងលិចឆ្ពោះទៅប្រទេសថៃ និង
ពីតំបន់របៀងឆ្នេរនេះ ទៅកាន់រាជធានីភ្នំពេញ និង
ទៅកាន់ប្រទេសវៀតណាម ឡាវ តាមផ្លូវគោកដោយងាយស្រួល ហើយឆាប់រហ័ស និង
មានតម្លៃទាបផងដែរ ។ ដូចនេះហើយ ទើបដៃគូអភិវឌ្ឍន៏បានកំណត់ថា
ជាចំណែកមួយ នៃអនុរបៀងសេដ្ឋកិច្ច មាត់សមុទ្រភាគ ខាង
ត្បូងរបស់មហាអនុតំបន់មេគង្គ ដែលតភា្ជប់បណ្តាញផ្លូវអាស៊ានលេខ ១២៣
ពីប្រទេសថៃមកប្រទេស កម្ពុជាតាមរយៈផ្លូវជាតិលេខ ៤៨
ដោយឆ្លងកាត់ផ្លូវជាតិលេខ ៤ និង ផ្លូវជាតិលេខ ៣ ត្រង់ចំណុចផ្លូវ
បំបែក វាលរេញ ហើយបន្តហួសទៅប្រទេសវៀតណាមតាមផ្លូវជាតិលេខ ៣៣
ច្រកព្រំដែនកម្ពុជា-វៀតណាម ព្រែកចាក (កំពត) សាសៀរ (ហាទៀង) និង
តាមផ្លូវជាតិលេខ ២ តាមច្រកភ្នំដិន ដែលអាចជួយជំរុញសន្ទុះ
នៃការធ្វើសមាហរណកម្មរបស់កម្ពុជា ទៅក្នុងតំបន់លើគ្រប់វិស័យ
ដែលអាចជួយឲ្យរាជរដ្ឋាភិបាលកម្ពុជា
បានសំរេចជោគជ័យលើគោលដៅនៃកម្មវិធីលើកកំពស់កំណើនសេដ្ឋកិច្ចជាតិ
និង ជីវិភាពប្រជាពលរដ្ឋ ឲ្យប្រសើរទ្បើងជាលំដាប់ ។
សម្តេចតេជោ
ថ្លែងបន្តឲ្យដឹងថា ការសម្ពោធកំណាត់ផ្លូវជាតិលេខ៣
និងការសម្ពោធបើកការដ្ឋានផ្លូវបន្ថែមទៀត
គឺជាលទ្ធផលនៃកិច្ចសហប្រតិបត្តិការកម្រិតកំពូលរវាងប្រមុខរដ្ឋាភិបាល
កម្ពុជា និងប្រធានាធិបតី របស់សាធរណរដ្ឋកូរ៉េ ទាំងអតីតប្រធានាធិបតី គឹម ដេ យ្យុង និងប្រធានធិបតីបច្ចុប្បន្ន លី ម្យុងបាក់ ដែលសុទ្ធតែបានគាំទ្រនូវគម្រោងទាំងឡាយរបស់កម្ពុជា។
ឯកឧត្តម ចាង ហូជីន
ឯកអគ្គរដ្ឋទូតសាធារណរដ្ឋកូរ៉េប្រចាំនៅកម្ពុជាថ្លែងថា រដ្ឋាភិបាល និង
ប្រជាជនសាធារណរដ្ឋកូរ៉េមានសេចក្តីសោមនស្សរីករាយក្រៃលែងដោយបានចូល
រួមចំណែកនៅ ក្នុង ឱកាសនេះ
ដើម្បីគម្រោងកែលម្អនូវហេដ្ឋារចនាស័ម្ពន្ធរបស់ប្រទេសមួយនេះ។
ឯកឧត្តម ចាង ហូជីន មានប្រសាសន៍ថា ខ្ញុំសូមសំដែងនូវការដឹងគុណយ៉ាងជ្រាលជ្រៅ ចំពោះសម្តេចតេជោនាយករដ្ឋមន្រ្តី
ចំពោះ
ការគាំទ្រយ៉ាងខ្លាំងក្លាដល់ការអនុវត្តប្រកបដោយសុវត្ថិភាពយ៉ាង
រឹងមាំ នូវចំណងមិត្តភាព និង កិច្ចសហ
ប្រតិបត្តិការរវាងប្រទេសទាំងពីរនោះ។
ឯកឧត្តម ត្រាំ អ៊ីវតឹក
រដ្ឋមន្រ្តីក្រសួងសាធារណការ និង ដឹកជញ្ជូនថ្លែងថា ការចំណាយថវិកាសរុប
សម្រាប់ការសាងសង់កំណាត់ផ្លូវជាតិលេខ ៣ ប្រវែង ១៣៤,៨០គម
ពីចោមចៅដល់ទីរួមខេត្តកំពតមាន ប្រមាណ ៤១,៥ លានដុល្លារអាមេរិក
ក្នុងនោះកំចីឥណទានពីរដ្ឋាភិបាលសាធារណរដ្ឋកូរ៉េចំនួន ៣៦,៩
លានដុល្លារអាមេរិក និង ថវិកាបដិភាគរបស់រាជរដ្ឋាភិបាលកម្ពុជាចំនួន
៤,៦ លានដុល្លារអាមេរិកដោយ ប្រើប្រាស់រយៈពេលសាងសង់ចំនួន ៣៦
ខែគិតចាប់ពីថ្ងៃទី ០២ ខែមិថុនា ឆ្នាំ ២០០៨ និងបានបញ្ចប់ រួច
រាល់កាលពីថ្ងៃទី ០១ ខែមិថុនា ឆ្នាំ ២០១១ កន្លងទៅតាមពេលវេលាកំណត់។
ឯកឧត្តម
រដ្ឋមន្រ្តីមានប្រសាសន៍ឲ្យដឹងថា ការដ្ឋានផ្លូវជាតិលេខ៣១,៣៣,១១៧
និងផ្លូវវាងទីរួមខេត្តកំពត មានប្រវែងសរុប ១០៦គីឡូម៉ែត្រ
ដែលបានបើកការដ្ឋាននេះនឹងត្រូវចំណាយថវិកាសរុបប្រមាណ ៣៥,៣ លាន
ដុល្លារអាមេរិក
ក្នុងនោះថវិកាកម្ចីឥណទានពីរដ្ឋាភិបាលនៃសាធារណរដ្ឋកូរ៉េចំនួន ៣០
លានដុល្លារ អាមេ រិក និង ថវិកាបដិភាគរាជរដ្ឋាភិបាលកម្ពុជាចំនួន ៥,៣
លានដុល្លារអាមេរិក ដែលត្រូវប្រើប្រាស់រយៈពេលសាងសង់ចំនួន ៣០ ខែ
គិតចាប់ពីថ្ងៃ ទី០១ ខែសីហា ឆ្នាំ២០១១ រហូតដល់ខែមករា ឆ្នាំ ២០១៤ ខាងមុខ។
ចំណែក
គម្រោងធ្វើឱ្យប្រសើរឡើងវិញផ្លូវជាតិលេខ ៣៣
ពីកំពង់ត្រាចដល់ព្រំដែនកម្ពុជា-វៀត ណាមប្រវែង ១៥,៨៤គ.ម
និងគម្រោងឯទៀតៗនឹងត្រូវចំណាយថវិកាសរុប ១៨,៧០ លានដុល្លារអាមេរិក
ក្នុងនោះថវិកា បដិភាគរបស់រាជរដ្ឋាភិបាលកម្ពុជាចំនួន ១,១
លានដុល្លាអាមេរិក ត្រូវប្រើរយៈពេលសាង សង់ចំនួន ១៨ ខែ គិតចាប់ពីថ្ងៃទី
០១ ខែ កក្កដា ឆ្នាំ ២០១១ រហូតដល់ចុងខែធ្នូ ឆ្នាំ២០១២ ។
សូម
បញ្ជាក់ថា
ពិធីសម្ពោធដាក់ឲ្យប្រើប្រាស់ផ្លូវជាតិមិត្តភាពកម្ពុជា-កូរ៉េ
ក៏មានការប្រកាសបើកការដ្ឋាននាពេលជាមួយគ្នានោះដែររួមមានគម្រោង
កែលម្អផ្លូវចំនួន ៦ គម្រោងមានប្រវែងសរុប ១០៦ គ.ម ដែល
បួនគម្រោងត្រូវបានអនុវត្តក្រោមឥណទានកម្ចីរបស់សាធារណរដ្ឋកូរ៉េ
គឺ(១) ផ្លូវជាតិលេខ ៣១ ចាប់ពីបែក គូស ដល់កំពង់ត្រាច (២) ផ្លូវជាតិលេខ
៣៣ ចាប់ពីកំពង់ត្រាច ដល់ទីរួមខេត្តកំពត (៣) ផ្លូវខេត្តលេខ ១១៧
ចាប់ពីអង្គសុភីផ្លូវបំបែកផ្លូវជាតិលេខ ៣១
ដល់តន់ហន់(ព្រំដែនកម្ពុជា-វៀតណាម) និង (៤) ផ្លូវ វាងទីរួមខេត្ត កំពត
ចាប់ពីឃុំជុំគ្រៀល បំបែកផ្លូវជាតិលេខ ៣៣ ដល់ឃុំកំពង់គ្រែង
ចំណុចបំបែកផ្លូវជាតិលេខ ៣ និង បី
គម្រោងទៀតអនុវត្តក្រោមឥណទានកម្ចីរបស់ធនាគារអភិវឌ្ឍន៏អាស៊ី និង
ជំនួយឥតសំណងរបស់ប្រទេសអូស្ត្រាលី
គឺគម្រោងធ្វើឲ្យប្រសើរទ្បើងវិញផ្លូវជាតិលេខ ៣៣
ពីកំពង់ត្រាចដល់ព្រំដែនកម្ពុជា-វៀតណាម
គម្រោងសាងសង់ប៉ុស្តិ៍ព្រំដែន កម្ពុជា-វៀតណាម ព្រែកចាក (កំពត) សាសៀរ
(ហាទៀង) និងគម្រោងថែទំាផ្លូវជាតិលេខ ៣ ពីទីរួមខេត្តកំពតដល់វាលរេញ ។
តាមរយៈ
ឯកអគ្គរដ្ឋទូតសាធារណៈរដ្ឋកូរ៉េបានឲ្យដឹងថា
ជំនួយសរុបរបស់សាធារណរដ្ឋកូរ៉េ
ដែលបានផ្តល់ដល់កម្ពុជាតាមរយៈកំចីឥណទានសម្រាប់ការអភិវឌ្ឍន៍
សេដ្ឋកិច្ច នឹងកើនឡើងចំនួន ៣៤០ លានដុល្លារសហរដ្ឋអាមេរិក ។
