សម្តេចអគ្គមហាសេនាបតីតេជោ ហ៊ុន សែន
បានប្រកាសថា គម្រោងពិភាក្សានៅសភាជាតិ នៅថ្ងៃទី២៤ ខែវិច្ឆិកា
លើសេចក្ដីព្រាងច្បាប់ថវិកាជាតិឆ្នាំ២០១២ នោះ
គឺមិនមានការរាំងស្ទះ ឬបរាជ័យទេ
បើទោះបីជាគណបក្សប្រឆាំងបានប្រកាសធ្វើពហិការ
ក្នុងគោលបំណងឲ្យគម្រោងការអនុម័តនោះទទួលបរាជ័យក៏ដោយ។
មាន
ប្រសាសន៍ប្រតិកម្ម ក្នុងវេទិការាជរដ្ឋាភិបាល និងផ្នែកឯកជន
លើកទី១៦ ដែលប្រារព្ធធ្វើឡើង នាព្រឹកថ្ងៃទី២៣វិច្ឆិកា ឆ្នាំ២០១១
នៅវិមានសន្តិភាព សម្តេចតេជោនាយករដ្ឋមន្ត្រី
បានថ្លែងថា "សំឡេងភាគតិចចាប់បង្ខំសំឡេងភាគច្រើន
ដោយបង្កើតវិបត្តិនៃការជាប់គាំងនយោបាយរយៈពេលមួយឆ្នាំ
ក្រោយការបោះឆ្នោត ឆ្នាំ២០០៣។ ឥឡូវនេះប្រហែលជាមានការប៉ុនប៉ងភាគតិច
ចាប់បង្ខំឲ្យភាគច្រើនគោរពតាមទៀតហើយ
ហើយមានការដាក់គំនាបមកខ្ញុំទៀតថា បើមិនចរចាទេ គេនឹងធ្វើ។
តែខ្ញុំប្រាប់ត្រឡប់ទៅវិញថា បើឆ្កួត ឆ្កួតតែម្នាក់ឯងទៅ
ហើយបើយល់ល្អ លាទាំង ២៦ នាក់ទៅ។ តែបើលាលែងនោះ គេនឹងយកអាសនៈនោះ
ទៅឲ្យគណបក្សដទៃ"។
ទាក់
ទងនឹងការប្រកាសលាឈប់ពីសមាជិករដ្ឋសភា
ដោយអ្នកតំណាងរាស្រ្តគណបក្ស សម រង្ស៊ី ចំនួន ៣ រូបកាលពីថ្ងៃទី ២១
ខែវិច្ឆិកា ឆ្នាំ២០១១
ក្នុងគោលបំណងធ្វើឲ្យរាំងស្ទះការប្រជុំរដ្ឋសភា
ដើម្បីអនុម័តថវិកាជាតិឆ្នាំ ២០១២ សម្តេចតេជោនាយករដ្ឋមន្រ្តី
បានមានប្រសាសន៍បញ្ជាក់ថា "ប្រហែលជាមិនលាទេ ព្រោះស្អែកនេះ
គេប្រហែលជាចូលរួមប្រជុំរដ្ឋសភាហើយ គឺគេលាតែ ៤ នាក់ទេ
ដើម្បីឲ្យរដ្ឋសភា មានសមាជិកត្រឹមតែ ១១៩ នាក់។
តែខ្ញុំផ្តាំត្រឡប់ទៅវិញថា កុំរង់ចាំចរចា គឺកុំរង់ចាំឲ្យសោះ។
ខ្ញុំកំពុងចរចាជាមួយវិស័យឯកជន ឬសង្គមស៊ីវិល។
ប៉ុន្តែមកដាក់លក្ខខណ្ឌឲ្យខ្ញុំ បើមិនចរចា គេនឹងធ្វើពហិការ
មិនចូលរួមប្រជុំ គឺអត់បានទេ។ វាខុសគ្នានឹងប្រព័ន្ធ ២ ភាគ ៣
ដែលកូរ៉ុម (រដ្ឋសភា) ត្រូវស្មើនឹង ៨៥ ឬ ៨៧ ទើបអាចប្រជុំបាន។
ប៉ុន្តែឥឡូវ កូរ៉ុម មានតែ ៦២ ទេ គឺអាចប្រជុំបានហើយ
គ្មានបញ្ហាអ្វីទាល់តែសោះ ក្នុងពេលដែលគណបក្សប្រជាជនកម្ពុជា
មានរហូតដល់ ៩០ អាសនៈ ក្នុងចំណោមអាសនៈរដ្ឋសភាសរុប ១២៣ រូប។
ដូច្នេះកូរ៉ុម មិនចាំបាច់ខ្ញុំទៅ ឬឯកឧត្តម ស ខេង និងឯកឧត្តម ទៀ បាញ់
ទៅតែគ្រប់ដែរ"។
សម្តេចតេជោនាយករដ្ឋមន្ត្រី
បានផ្តាំផ្ញើទៅបក្សប្រឆាំង តាមវេទិកានេះទៅវិញផងថា "បើឆ្កួត
ឆ្កួតតែឯងទេ កុំនាំខ្ញុំឆ្កួត ខ្ញុំមិនឆ្កួតជាមួយទេ។
វាមិនដែលសំឡេងភាគតិចឯណា មកចាប់បង្ខំ ធ្វើវេតូ
ជំទាស់នឹងសំឡេងភាគច្រើនទេ។ បក្សប្រឆាំង គ្មានសិទ្ធិវេតូទេ។
ហើយក៏គ្មាននរណាមួយមានសិទ្ធិវេតូទេ សូម្បីតែព្រះមហាក្សត្រ
ក៏មិនមានសិទ្ធិវេតូទេ។
សម្តេចតេជោ
ក៏បានមានប្រសាសន៍ឲ្យដឹងអំពីសិទ្ធិវេតូនៅក្នុងប្រទេសដទៃថា
នៅលើពិភពលោក មានតែប្រធានាធិបតីអាមេរិកមួយគត់ ដែលមានសិទ្ធិវេតូ
ជំទាស់នឹងការសម្រេចរបស់រដ្ឋសភា។ ក្រៅពីនោះគ្មានទេ។
សូម្បីនៅប្រទេសបារាំង សភាក៏មានការបោះឆ្នោត និងប្រធានាធិបតី
ក៏ត្រូវបោះឆ្នោត ប៉ុន្តែប្រធានាធិបតីបារាំង គ្មានសិទ្ធិវេតូ
នឹងការសម្រេចរបស់រដ្ឋសភានោះទេ"។
សម្តេចអគ្គមហាសេនាបតីតេជោ ហ៊ុន សែន
ក៏បានបញ្ជាក់ថា "ចំពោះការលើកឡើងរបស់គណបក្សប្រឆាំង
គឺខ្ញុំបានចារអក្សរត្រឡប់ទៅវិញថា បើឆ្កួត ឆ្កួតតែឯងទៅ
ខ្ញុំមិនរវល់ឆ្កួតជាមួយទេ ហើយបើយល់ល្អ លាទាំង ២៦ នាក់ទៅ
កុំឲ្យវាពិបាក។ អស់លោកលោកស្រី ជាអង្គទូត
គឺគេនឹងគ្រោងប្តឹងទៅអស់លោកថា សភាមិនគ្រប់ទឹក។ សភាមិនគ្រប់ទឹក
ឬមិនគ្រប់ទឹក វាស្ថិតនៅ ថាតើមានកូរ៉ុមប្រជុំ ឬអត់?
បើមានកូរ៉ុមប្រជុំ គឺបានហើយ។ តែបើអ្នកឯងលា ត្រូវដាក់ឈ្មោះ
មកជំនួស។ បើអ្នកឯងមិនដាក់ឈ្មោះមកជំនួសទេ គឺអ្នកឯងបោះបង់អាសនៈ។
តែឥឡូវ អ្នកឯងមិនទាន់បោះបង់អាសនៈឯណា ដូច្នេះសភានៅតែ ១២៣
អាសនៈដដែល។ ដូច្នេះអ្នកឯងលា គ្មានប្រសិទ្ធភាពទេ"៕