នៅវិមានសន្តិភាព នាថ្ងៃទី ២៦ ខែមករា ឆ្នាំ ២០១២ សម្តេចអគ្គមហាសេនាបតីតេជោ ហ៊ុន សែន
បានស្នើឲ្យឯកឧត្តម JAE HYUN SHIN ឯកអគ្គរដ្ឋទូតសម្រាប់កិច្ចសហប្រតិបត្តិការលើវិស័យធនធានរ៉ែ
និង ថាមពល នៃសាធារណរដ្ឋកូរ៉េ ពាំនាំនូវការផ្តាំផ្ញើជូនចំពោះឯកឧត្តម
ប្រធានាធិបតីនៃសាធារណរដ្ឋកូរ៉េ ដើម្បីពិនិត្យផ្តល់ប្រាក់កំចី
ដើម្បីកសាងបណ្តាញចែកចាយអគ្គិសនីដែលកំពុងត្រូវការនៅព្រះរាជាណាចក្រកម្ពុជា
និងបានស្វាគមន៍ចំពោះបំណងរបស់ក្រុមហ៊ុនកូរ៉េក្នុងការរុករក
និងធ្វើអាជីវកម្មធនធានរ៉ែនៅកម្ពុជា។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីឲ្យដឹងថា
ក្នុងឱកាសចូលជួបសំដែងការគួរសមចំពោះ
សម្តេចតេជោនាយករដ្ឋមន្ត្រី ឯកឧត្តម JAE HYUN SHIN បានមានប្រសាសន៍ឲ្យដឹងថា
ដំណើរទស្សនកិច្ច របស់ឯកឧត្តមមកកាន់ព្រះរាជាណាចក្រកម្ពុជានាពេលនេះ
គឺដើម្បីបញ្ជាក់អំពីបំណង នៃសាធារណរដ្ឋកូរ៉េក្នុងការ
ចូលរួមអភិវឌ្ឍវិស័យធនធានរ៉ែ ប្រេងកាត និង
ថាមពលនៅក្នុងប្រទេសកម្ពុជា។ ឯកឧត្តម SHIN បាន បន្តថា ក្រុមហ៊ុនកូរ៉េបានធ្វើការសិក្សាលើធនធានរ៉ែនៅខេត្តព្រះវិហារ
តាកែវ កំពង់ស្ពឺ ហើយនៅពេលការសិក្សា បានបញ្ចប់នោះ ឯកឧត្តមស្នើឲ្យមានការគាំទ្រពីសម្តេចតេជោនាយករដ្ឋមន្ត្រី
ដើម្បីឲ្យក្រុមហ៊ុនកូរ៉េធ្វើអាជីវកម្ម នៅតំបន់នោះ។ ឯកឧត្តម JAE HYUN SHIN
បានស្នើឲ្យសម្តេចតេជោនាយករដ្ឋមន្ត្រីគាំទ្រការសហការរបស់ក្រុមហ៊ុនកូរ៉េជាមួយដៃគូកម្ពុជា
ដើម្បីរុករកធ្វើអាជីវកម្មលើធនធានរ៉ែនៅកម្ពុជា ហើយឯកឧត្តមក៏បានបង្ហាញពីចំណាប់អារម្មណ៍លើការវិនិយោគធនធានប្រេងកាត
និង ថាមពលផងដែរ។
ឯកឧត្តម អ៊ាង សុផល្លែត ឲ្យដឹងថា សម្តេចអគ្គមហាសេនាបតីតេជោ
ហ៊ុន សែន បានស្វាគមន៍ ចំពោះគម្រោងវិនិយោគនេះ ដោយបានមានប្រសាសន៍ថា
ក្រុមហ៊ុនរបស់ភាគីកូរ៉េ ដែលបានការសិក្សានៅ កម្ពុជាពេលដែលបានទទួលលទ្ធផលហើយ
ក្រុមហ៊ុនដែលធ្វើការសិក្សានោះនឹងត្រូវទទួលបានអាទិភាព
ក្នុងការធ្វើអាជីវកម្ម។ សម្តេចតេជោ
បានស្វាគមន៍ចំពោះបំណងចាប់ដៃគូសហការជាមួយ
ក្រុមហ៊ុនកម្ពុជានៅក្នុងការរុករក និង ធ្វើអាជីវកម្មធនធានរ៉ែនៅកម្ពុជា។ ចំពោះបញ្ហាប្រេងកាត
សម្តេចតេជោបានធ្វើការណែនាំ ឯកឧត្តម
JAE HYUN SHIN ឯកអគ្គរដ្ឋទូតសម្រាប់កិច្ចសហប្រតិបត្តិការលើវិស័យធនធានរ៉ែ
និង ថាមពល នៃសាធារណរដ្ឋកូរ៉េ ឲ្យបន្តសហការពិភាក្សាជាមួយអាជ្ញាធរប្រេងកាតកម្ពុជា
ថែមទៀត៕