សម្តេចអគ្គមហាសេនាបតីតេជោ ហ៊ុន សែន
នាថ្ងៃទី ៦ ខែកុម្ភៈ ឆ្នាំ ២០១២ បានស្វាគមន៍នូវ គម្រោងវិនិយោគលើវិស័យអគ្គិសនីនៅកម្ពុជារបស់
ក្រុមហ៊ុនអគ្គិសនី Raichaburi Electricity Generating Holding PLC
របស់ថៃសហការជាមួយ ក្រុមហ៊ុនកោះកុង INDUSTRY កម្ពុជា ដោយសម្តេចមានប្រសាសន៍វាយតម្លៃថា
គម្រោងនេះនឹង ទទួលបានជោគជ័យ
ព្រោះបានផ្តល់នូវផលប្រយោជន៍រួមទាំងកម្ពុជា និង ថៃផងដែរ។
សម្តេចតេជោនាយករដ្ឋមន្ត្រីមានប្រសាសន៍ឲ្យដឹងថា ប្រទេសទាំងពីរ(កម្ពុជា-ថៃ)កំពុងត្រូវការ
និង ខ្វះខាតថាមពល ដោយសម្តេចបានផ្តល់អនុសាសន៍ឲ្យក្រុមហ៊ុនចម្រុះនេះស្វែងរកអ្នកសិក្សា
ដែលឯករាជ្យដើម្បី វាយតម្លៃលើផលប៉ះពាល់បញ្ហាបរិស្ថាន នៅក្នុងគម្រោងអភិវឌ្ឍអគ្គិសនីដើរដោយថាមពលធ្យូងថ្មនេះ។
សម្តេចតេជោនាយករដ្ឋមន្ត្រីក៏បានស្នើ
ឲ្យក្រុមហ៊ុនពិនិត្យលើការជួយបណ្តុះបណ្តាលធនធានមនុស្ស ដើម្បីឲ្យពួកគេអាចយកមកប្រើប្រាស់
បាននៅក្នុងរោងចក្រនេះ នៅពេលដែលរោងចក្របានបើកដំណើរការ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីឲ្យដឹងថា
នៅពេលទទួលបានការអនុញ្ញាត ឲ្យចូលជួបសំដែងការគួរសមនៅវិមានសន្តិភាពក្នុងរាជធានីភ្នំពេញ លោក ណុបពល មីលីនហ្គាងហ្គូន (NOPPOL
MILINTGANGGOON) អគ្គនាយកប្រតិបត្តិនៃក្រុមហ៊ុនអគ្គិសនី Raichaburi
Electricity Generating Holding PLC បានស្នើសុំសម្តចតេជោនាយករដ្ឋមន្ត្រី ផ្តល់នូវការគាំទ្រចំពោះគម្រោងវិនិយោគរបស់ក្រុមហ៊ុនលោក
ដែលបានសហការជាមួយក្រុមហ៊ុនកោះកុង INDUSTRY ដើម្បីសាងសង់
រោងចក្រអគ្គិសនីប្រើដោយធ្យូងថ្ម ដែលមានកម្លាំង ១៨០០
មេហ្គាវ៉ាត់នៅខេត្តកោះកុង។ លោក NOPPOL បានគោរពរាយការណ៍ជូនសម្តេចតេជោនាយករដ្ឋមន្ត្រីថា Raichaburi Electricity Generating
Holding PLC គឺជាក្រុមហ៊ុនដ៏ធំមួយនៅក្នុងព្រះរាជាណាចក្រថៃ ដែលទុនចំនួន
៤៥%ជាទុនរបស់អាជ្ញាធរអគ្គិសនីថៃ និង
បានចុះបញ្ជីក្នុងទីផ្សារភាគហ៊ុនកាលពីឆ្នាំ ២០០០ និង ជាក្រុមហ៊ុនដែលផលិតអគ្គិសនីឯករាជ្យ
ដោយមានបទពិសោធន៍ធ្វើនៅក្នុងប្រទេសឡាវ និងប្រទេសដទៃទៀតផងដែរ។
លោក NOPPOL បានថ្លែងថា ក្រុមហ៊ុនរបស់លោកនឹងប្រើប្រាស់បច្ចេកវិទ្យាដ៏ទំនើប
ជាមួយបច្ចេកវិទ្យាដែល បានប្រើប្រាស់នៅក្នុងប្រទេសឡាវមកកាន់កម្ពុជា
ដែលបច្ចេកវិទ្យានោះប្រើប្រាស់មិនប៉ះពាល់បរិស្ថាន ហើយនឹងលក់អគ្គិសនី
មកឲ្យកម្ពុជាក្នុងតម្លៃពិសេស ចំណែកថាមពលអគ្គិសនីដែលនៅសេសសល់
នឹងលក់ទៅឲ្យប្រទេសថៃវិញ។
លោក NOPPOL MILINTGANGGOON បានថ្លែងថា
ការសិក្សាក្នុងជំហានដំបូងគឺបានធ្វើរួចមក
ហើយៗក៏បានសិក្សាពីផលប៉ះពាល់បរិស្ថាននឹងត្រូវបានធ្វើបន្តនៅពេលដែលការសិក្សានេះបានបញ្ចប់
ហើយក្រុមហ៊ុននឹងផ្តល់ឯកសារជូនក្រសួងឧស្សាហកម្ម រ៉ែ និង ថាមពល និង
ក្រសួងបរិស្ថាន កម្ពុជា ដើម្បីធ្វើការពិនិត្យលើគម្រោងវិនិយោគនេះ៕