នាព្រឹកថ្ងៃទី២២
ខែកុម្ភៈ ឆ្នាំ២០១២ នៅទីស្នាក់ការគណបក្សប្រជាជនកម្ពុជាខេត្តកំពង់ចាមឯកឧត្តម
ជា សុផារ៉ា សមាជិកគណៈកម្មាធិការកណ្តាលគណបក្សប្រជាជនកម្ពុជា
និងជាអនុប្រធានទី១ ក្រុមការងារគណបក្សប្រជាជនកម្ពុជា ប្រចាំខេត្តកំពង់ចាម
រួមជាមួយនិងឯកឧត្តម ហ៊ុន ម៉ានិត បុត្រាសម្ដេចតេជោ ហ៊ុន សែន
បានធ្វើពិធីទទួលសមាជិកក្រុមប្រឹក្សាខេត្ត ស្រុក និងឃុំ នៃគណបក្សសមរង្ស៊ីខេត្តកំពង់ចាមចំនួន
១៧ នាក់ ដែលបានបោះបង់គណបក្សសម រង្ស៊ី មកចូលរួមជាមួយគណបក្សប្រជាជនកម្ពុជា។
លោក បាន សុធា និងលោក លី សូផាត អតីតសមាជិកក្រុមប្រឹក្សាខេត្តកំពង់ចាម នៃគណបក្សសមរង្ស៊ី បានបញ្ជាក់ថា មូលហេតុដែលសមាជិកក្រុមប្រឹក្សាខេត្ត និងស្រុកមួយចំនួន នៃគណបក្សសមរង្ស៊ី សម្រេចមកចូលរួមជាមួយនឹងគណបក្សប្រជាជនកម្ពុជា នាពេលនេះ ដោយសារតែគណបក្សសមរង្ស៊ី គ្មានគោលនយោបាយច្បាស់លាស់ ហើយគណបក្សសមរង្ស៊ី ប្រឆាំងផ្កាប់មុខ គ្មានការអភិវឌ្ឍ ចេះតែនិយាយតែប្រឆាំង ដើម្បីបន្ទុចបង្អាក់ ការផ្ដល់ជំនួយពីបរទេស សម្រាប់អភិវឌ្ឍន៍ជាតិ។ អតីតមន្រ្តីជាន់ខ្ពស់នៃគណបក្ស សម រង្ស៊ី ខេត្តកំពង់ចាមបានឲ្យដឹងនៅក្នុងពិធីនោះថា មានអំពើពុករលួយ នៅក្នុងជួរថ្នាក់ដឹកនាំគណបក្សសមរង្ស៊ីទាំងខេត្ត និងទាំងថ្នាក់ជាតិ និងបក្ខពួកគ្រួសារនិយម ដែលធ្វើឲ្យពួកគេមិនអាចរស់នៅជាមួយគ្នាបាន។ លោក លី សូផាត បានចាត់ទុកគណបក្ស សម រង្ស៊ី សព្វថ្ងៃប្រៀបដូចសំពៅដែលគ្មានក្តោង ទូកអត់ច្រវ៉ា កាណូតគ្មានម៉ាស៊ីន ដែលវិលវល់មិនអាចទៅមុខរួច។ លោក លី សូផាត បញ្ជាក់ថា បងប្អូន ដែលមកចូលរួមជាមួយគណបក្សប្រជាជនកម្ពុជា គឺដោយសារឃើញការដឹកនាំដ៏ត្រឹមត្រូវរបស់គណបក្សប្រជាជនកម្ពុជា ដែលមានសម្តេចទាំងបីជាប្រមុខ បានធ្វើឲ្យប្រទេសជាតិមានសុខសន្តិភាព មានការអភិវឌ្ឍន៍ ពិសេសក្នុងគណបក្សមានការដឹកនាំប្រកបដោយប្រជាធិបតេយ្យ។
ជាមួយនឹងការស្វាគមន៍
និងថ្លែងអំណរគុណចំពោះអតីតសមានជិកគណបក្ស សម រង្ស៊ី
ដែលបានផ្តល់យុត្តិធម៌ដល់គណបក្សប្រជាជនកម្ពុជា ឯកឧត្តម ជា សុផារ៉ា បានចាត់ទុកវត្តមានអតីតសមាជិកគណបក្ស
សម រង្ស៊ី មកចូលរួមជាមួយគណបក្សប្រជាជនកម្ពុជា គឺជារបត់នយោបាយថ្មីមួយរបស់បងប្អូនក្នុងការចូលរួមកសាងអភិវឌ្ឍន៍ប្រទេសជាតិ។
ឯកឧត្តម ជា សុផារ៉ា បានមានប្រសាសន៍ឲ្យដឹងថា
តាំងពីថ្ងៃទី ២៨ មិថុនា ឆ្នាំ ១៩៥៤ មកដល់ពេលបច្ចុប្បន្ន
គណបក្សប្រជាជនកម្ពុជាមានគោលនយោបាយដឹកនាំច្បាស់លាស់ ដែលអនុម័តដោយមហាសន្និបាតគណបក្ស
មិនមែនចេះតែនឹកឃើញថាៗនោះទេ។
ការសម្រេចជោគជ័យក្នុងការបង្រួបបង្រួមជាតិ កសាងសន្តិភាព និងអភិវឌ្ឍន៍ជាតិ
បានធ្វើឲ្យគណបក្សប្រជាជនកម្ពុជាទទួលបានការគាំទ្រពីប្រជាពលរដ្ឋ។ដោយបានចាត់ទុក
សម្តីរបស់ថ្នាក់ដឹកនាំគណបក្ស សម រង្ស៊ី ចោទប្រកាន់អ្នកចាកចេញថា
ជាសាច់ស្អុយ ស្លឹកឈើជ្រុះ ថាជាសម្តីប្រមាថដល់កិត្តិយសអ្នកដែលខំជួយកសាងគណបក្ស
សម រង្ស៊ី ឯកឧត្តម ជា សុផារ៉ា បានបញ្ជាក់ថា
គណបក្សប្រជាជនកម្ពុជាគ្មានគោលនយោបាយពេលក្តៅប្រើចង្កឹះ ពេលត្រជាក់បោះបង់ចោលនោះទេ។
ឯកឧត្តម ជា សុផារ៉ា បានពន្យល់ថា
ស្លឹកឈើដែលជ្រុះ មានន័យថា ដើមឈើនោះរលួយឬស អស់ហើយរងចាំតែថ្ងៃដួលរលំប៉ុណ្ណោះ។
សូមរម្លឹកថា
កាលពីថ្ងៃទី៧ ខែកុម្ភៈ ឆ្នាំ២០១២ អតីតសមាជិកគណបក្សសិទ្ធិមនុស្ស ១០ នាក់
នៅខេត្តកំពង់ចាម ដឹកនាំដោយលោក វ៉ាន់ ស៊ីវឿន អតីតសមាជិកព្រឹទ្ធសភា
គណបក្សសមរង្ស៊ី នៅអាណត្តិទី២ ក៏បានមកចូលរួមនយោបាយជាមួយគណបក្សប្រជាជនកម្ពុជា
នៅខេត្តកំពង់ចាមផងដែរ។ អតីតសមាជិកគណបក្សសិទ្ធិមនុស្សទាំង ១០ នាក់នោះ
ទើបតែបានចាកចេញពីគណបក្សសមរង្ស៊ី ទៅចូលរួមនយោបាយជាមួយគណបក្សសិទ្ធិមនុស្ស
កាលពីថ្ងៃទី១១ ខែតុលា ឆ្នាំ២០១១៕