បទវិចារណកថា
លទ្ធផលនៃការស្ទង់មតិរបស់IRI ធ្វើឱ្យលោក កឹម សុខា ថប់ដង្ហើម
កាលពីថ្ងៃទី១០ ខែ ឧសភា ឆ្នាំ ២០១២ វិទ្យាស្ថានសាធារណរដ្ឋអន្តរជាតិ (IRI) បានបង្ហាញនូវលទ្ធផលស្ទង់មតិ
របស់ខ្លួនតាមរយៈការធ្វើសន្និសីទកាសែតនៅសណ្ឋាគារសាន់វ៉េភ្នំពេញ
ឲ្យដឹងថា « មានមនុស្ស៦៧ ភាគរយគាំទ្រគណបក្សប្រជាជនកម្ពុជា , ៨៧ភាគរយគាំទ្រ ការដឹកនាំរបស់សម្តេចតេជោក្នុងដំណែងជានាយករដ្ឋមន្ត្រី
និងមនុស្ស៨១ភាគរយយល់ថា រដ្ឋាភិបាលកំពុងតែដើរលើផ្លូវត្រូវ »។
ត្រង់ចំណុចនេះមានន័យថា
វិទ្យាស្ថានសាធារណរដ្ឋអន្តរជាតិ(IRI) ពិតជាបានទទួលស្គាល់នូវសមិទ្ធផលរបស់រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា។
សូម្បីតែវិទ្យាស្ថានស្រាវជ្រាវឯករាជ្យ ក៏គេមានការទទួលស្គាល់នូវការដឹកនាំរបស់រាជរដ្ឋាភិបាលកម្ពុជាដែរ ផ្ទុយទៅវិញបែរជាគណបក្សប្រឆាំងបដិសេធនូវរបាយការណ៍នេះទៅវិញ ដែលក្នុងចំណោមនោះ
លោក កឹម សុខា ប្រធានគណបក្សសិទ្ធិមនុស្សបាននិយាយមូលបង្កាច់ផ្ទុយអំពីលទ្ធផលនៃការស្រាវជ្រាវទាំងនេះដោយបលើកឡើងថា « អ្នកគាំទ្រគណបក្សប្រជាជនកម្ពុជាពិតប្រាកដប្រហែល៣០%តែប៉ុណ្ណោះ» នេះបើយោងតាមការផ្សាយរបស់វិទ្យុអាស៊ីសេរី
កាលពីថ្ងៃទី ៦ ខែឧសភា
ឆ្នាំ២០១២។
ការថ្លែងទាំងបំពាន ឬបដិសេធមិនទទួលស្គាល់នូវការពិត
គឺជាការបង្ហាញនូវភាពទន់ខ្សោយនៃយុទ្ធសាស្ត្ររបស់មេបក្សប្រឆាំងមួយនៅកម្ពុជា។
ត្រង់ចំណុចនេះ យើងខ្ញុំដែលជាអ្នកនិពន្ធចង់និយាយថា បើតាមក្បួនសឹករបស់ស៊ុនជឺ អ្នកប្រាជ្ញចិនខាងចម្បាំងបាននិយាយថា
ដឹងកម្លាំងដៃគូរប្រកួត ដឹងកម្លាំងរបស់ខ្លួនច្បាំង១០០ដងឈ្នះទាំង១០០ដង ប៉ុន្តែ
បើមិនដឹងកម្លាំងដៃគូរប្រកួត និងមិនដឹងកម្លាំងរបស់ផងខ្លួន ច្បាំង១០០ដងប្រាកដជាចាញ់ទាំង១០០ដង។
ការលើកឡើងយ៉ាងនេះចង់បញ្ជាក់ឲ្យសាធារណៈជនឲ្យបានដឹងថា
លោក កឹម សុខា ក្នុងនាមជាមេដឹកនាំបក្សមួយរូប មិនទាំងដឹងពីការគាំទ្ររបស់ប្រជាពលរដ្ឋដែលគាំទ្រគណបក្សសិទ្ធិមនុស្សផង ហេតុអ្វីក៏ហ៊ានទាយថា អ្នកគាំទ្រគណបក្សប្រជាជនកម្ពុជាមានតែ៣០ភាគរយទៅវិញ។ តើលោក កឹម សុខា សំអាងលើអ្វី? ឬសំអាងតែសម្តីគ្មានប្រយោជន៍ដើម្បីអួតឲ្យម្ចាស់ជំនួយនៅក្រៅប្រទេសឱ្យបន្តផ្តល់ជំនួយដើម្បីចិញ្ចឹមនិងទ្រទ្រង់ ជីវិតរបស់គណបក្សសិទិ្ធមនុស្ស
និងក្រុមរបស់ខ្លួនទៀត ឬមួយក៏លោក កឹម សុខា បានដឹងខ្លួនថា នឹងចាញ់ឆ្នោតពេលខាងមុខ ដោយសារខ្លួនអសមត្ថភាព ទើបចេះតែស្វែងរកលេសដើម្បីបិទបាំងនូវការពិត ។
មិនត្រឹមតែប៉ុណ្ណោះ លោក កឹម សុខា បាននិយាយបំភ្លើសថា គណបក្សប្រជាជនកម្ពុជាបានប្រើប្រាស់ផ្សព្វផ្សាយរបស់រដ្ឋផ្តាច់មុខ និងករណីផ្សេងៗទៀត។ យោងតាមការផ្សាយរបស់វិទ្យុអាស៊ីសេរី
កាលពីថ្ងៃទី
៦ ខែឧសភា ឆ្នាំ២០១២។
ការលើកឡើងរបស់ លោក
កឹម សុខា ខាងលើ ត្រូវបានអ្នកដែលស្និទ្ធនឹងលោកកឹម
សុខាបានបង្ហើបឲ្យដឹងថា កាលបោះឆ្នោតសកលឆ្នាំ២០០៨
លោក កឹម សុខា
ធ្លាប់អួតប្រាប់សមាជិកក៏ដូចជាសមាជិកគណៈកម្មាធិការនាយករបស់គណបក្សសិទ្ធិមនុស្សថា
គណបក្សសិទ្ធមនុស្សនឹងទទួល៦៣អាសនៈ ប៉ុន្តែលទ្ធផលជាក់ស្តែង គឺបានតែ៣អាសនៈ។ ត្រង់ចំណុចនេះជាឧទាហរណ៍មួយដែលលោក កឹម សុខា
បានអួតកន្លងមក តែការពិត លោក កឹម សុខា
គឺគ្រាន់តែជាមេបក្សចោលម្សៀតម្នាក់ ដែលមិនព្រមទទួលស្គាល់ការពិតតែប៉ុណ្ណោះ ។
ម៉្យាងវិញទៀត ការមិនទទួលស្គាល់ការពិតថា ខ្លួនដឹកនាំខ្សោយ សូម្បីតែស្ថាបនិករបស់គណបក្សសិទ្ធិមនុស្សជាច្រើនបានចាកចេញជាបន្តបន្ទាប់ ពីព្រោះការដឹកនាំរបស់ លោក
កឹម សុខា បក្សពួកនិយម ផ្តាច់ការ អំណាចតែលោក កឹម សុខា ម្នាក់ឯង។ លោក កឹម សុខាតែងតែនិយាយថាគណបក្សសិទ្ធិមនុស្សជាគណបក្សប្រជាធិបតេយ្យពិតប្រាកដ ដោយសំអាងលើការបែងចែកអំណាចបីដាច់ពីគ្នា គឺគណៈកម្មាធិការនាយក
គណៈកម្មាធិការប្រតិបត្តិ និងគណៈកម្មាធិការវិន័យ គឺវាគ្រាន់តែជាល្បិចស្ពិនភ្នែកសាធារណៈជនថា លោក
កឹម សុខា បានបែងចែកអំណាចដាច់ពីគ្នាតែប៉ុណ្ណោះ តែធាតុពិតគណៈកម្មាធិការទាំងបីការសំរេចកិច្ចការងារគឺជាសិទ្ធិផ្តាច់មុខរបស់លោកកឹម សុខា តែម្នាក់ឯងគត់។ ឧទាហរណ៍រាល់ការដឹកនាំប្រជុំគណៈកម្មាធិការនាយក លោក សឺន ស៊ូបែរ្តិ៍
ជាប្រធាន ប៉ុន្តែរាល់ការប្រជុំភាគច្រើន គឺលោក កឹម សុខា
ជាអ្នកដឹកនាំប្រជុំ ទោះបីជាមានវត្តមាន ឬអវត្តមានរបស់លោក សឺន ស៊ូបែរ្តិ៍ គឺវាមិនសំខាន់នោះទេ ពីព្រោះលោក
កឹម សុខា ធ្លាប់និយាយថា ការដាក់លោក សឺន ស៊ូបែរ្តិ៍ ដើម្បីទាញយកប្រជាប្រិយភាពពីសមាជិកដែលធ្លាប់ជាសមាជិកគណបក្សលោកតាសឺន
សាន ដែលជាឪពុករបស់លោក សឺន ស៊ូបែរ្តិ៍ តែប៉ុណ្ណោះ។ ដូច្នេះ បើសិនលោក
សឺន ស៊ូបែរ្តិ៍ មិនមែនជាកូនរបស់លោកតា សឺន សាន វិញនោះ លោក កឹម
សុខា ប្រាកដជាមិនរក្សាទុកតំណែងគណៈកម្មាកានាយកឲ្យលោក សឺន
ស៊ូបែរ្តិ៍ នោះឡើយ។
បើនិយាយអំពីធនធានមនុស្សនៅក្នុងគណបក្សសិទ្ធិមនុស្សវិញ ភាគច្រើនជាមនុស្សចាស់ហើយបានចូលនិវត្តន៏មកពីបរទេស និងមកពីអង្គការមិនមែនរដ្ឋាភិបាល។ល។ល។
សួរថាតើប្រជាពលរដ្ឋគាំទ្រអ្នកទាំងនោះធ្វើអ្វី? ដើម្បីអ្វី? បើចាស់ៗអស់ទៅហើយ ហើយសុខភាពពួកគាត់ក៏ទ្រុឌទ្រោមផងនោះ។
អ្នកវិភាគឯករាជ្យសម្គាល់ឃើញថា
លោក កឹម សុខា សូម្បីតែដឹកនាំគណបក្សតូចមួយ លោក កឹម សុខា មិនអាចដឹកនាំបានល្អផង ដោយសារតែការដឹកនាំផ្តាច់ការបក្សពួកនិយម បានធ្វើឲ្យសកម្មជនក៏ដូចជាថ្នាក់ដឹកនាំគណបក្សបាននាំគ្នាចាកចេញពីគណបក្សសិទ្ធិមនុស្សជាបន្តបន្ទាប់ ចុះទម្រាំទៅដឹកនាំរដ្ឋាភិបាលតើអាចដឹកនាំបានឬទេ បើប្រជាពលរដ្ឋ១៤លាននាក់នោះ
ពិតជាមិនអាចដឹកនាំបានទេ។
ចំពោះការចោទមកលើគណបក្សកាន់អំណាចថាបានយកថវិការទៅទិញទឹកចិត្តនោះ វាមិនពិតទេ ពីព្រោះសមាជិករបស់គណបក្សនយោបាយទាំងអស់ គឺសុទ្ធតែជាមនុស្សមិនមែនជាសត្វ ឬរបស់នោះទេ ។ក្នុងន័យថា មនុស្សគឺរស់នៅជាមួយឧត្តមគតិ
និងសេចក្តីថ្លៃថ្នូរ គឺមិនថោកដូចលោក កឹម សុខា នោះទេ។
កន្លងមកដោយសកម្មជនរបស់គណបក្សសិទ្ធិមនុស្សបានអស់ជំនឿលើ
លោក កឹម សុខា ហេតុដូច្នេះគេត្រូវតែរកមេដឹកនាំល្អជាងលោក កឹម សុខា
វាជាសិទ្ធិរបស់ប្រជាពលរដ្ឋម្នាក់ៗ។
ដោយឡែក លោក
កឹម សុខា និយាយថា បើគណបក្សផ្សេងឈ្នះឆ្នោតសង្រ្គាមនឹងផ្ទុះឡើងវិញ
ចំពោះពាក្យទាំងនេះ គណបក្សប្រជាជនពុំធ្លាប់និយាយឡើយ ហើយក៏វាគ្មានសេចក្តីប្រកាសណាមួយពីប្រមុខរាជរដ្ឋាភិបាល ឬមន្ត្រីជាន់ខ្ពស់របស់គណបក្សប្រជាជននាពលកន្លងមកដែរ ហើយម្យ៉ាងទៀត សព្វថ្ងៃក្រោមការដឹកនាំរបស់រាជរដ្ឋាភិបាលនៃគណបក្សប្រជាជនកម្ពុជា បាន និងកំពុងរស់នៅជាមួយសន្តិភាពពេញផ្ទៃប្រទេស វាមិនដូចសម័យមុន ដែលប្រទេសកម្ពុជាទាំងមូលបានបែងចែកក្រុមក្រហម
ក្រុមខៀវ ក្រុមស និងបែងចែកខ្មែរជាច្រើនតំបន់ ឥឡូវ សម័យតេជោសែន នៅចុងឆ្នាំ១៩៩៨ ក្រោមយុទ្ធសាស្រ្តឈ្នះ‑ឈ្នះ របស់សម្តេចអគ្គមហាសេនាបតីតេជោ
ហ៊ុន សែន បានរំលាយអង្គការចាត់តាំងខ្មែរក្រហម ធ្វើឲ្យរលំរលាយអស់ បានធ្វើឲ្យប្រទេសកម្ពុជាទទួលបាននូវសុខសន្តិភាព និង
ស្ថេរភាពនយោបាយ កម្លាំងកងទ័ពជាតិ ឯកភាពជាតិតែមួយស្ថិតក្នុងរដ្ឋធម្មនុញ្ញតែមួយ
ហេតុដូច្នេះ ប្រជាពលរដ្ឋត្រូវការសន្តិភាព
មិនចង់ឃើញមានសង្រ្គាមកើតឡើងទៀតទេ ហេតុនេះប្រជាពលរដ្ឋកម្ពុជាភាគច្រើន
សូមគាំទ្ររាជរដ្ឋាភិបាល និងបន្តគាំទ្រ សម្តេចតេជោ សែន បន្តជានិច្ចនិរន្តរ។
ដោយៈ រួម ជាតិ