លោកជំទាវ
ហ៊ីលឡារី គ្លីនតុន រដ្ឋមន្រ្តីក្រសួងការបរទេសសហរដ្ឋអាមេរិក មាន ប្រសាសន៍
កាលពីថ្ងៃទី ១១ ខែកក្កដា ឆ្នាំ ២០១២ ថា ទំនាក់ទំនងរវាងសហរដ្ឋអាមេរិកជាមួយ
ព្រះរាជាណាចក្រកម្ពុជា មានចំណុចរីកចម្រើនជាវិជ្ជមានយ៉ាងច្រើន ហើយក៏នៅមាន
សក្កានុពលជាច្រើនទៀត ដែលប្រទេស ទាំងពីរអាចធ្វើកិច្ចសហប្រតិបត្តិការជាមួយគ្នាបាន
ផងដែ។យោងតាមលោក អ៊ាង សុផល្លែត ជំនួយការសម្តេចតេជោនាយករដ្ឋមន្រ្តីឲ្យដឹងថា
នៅក្នុងជំនួប សម្តែងការគួរសម ជាមួយ សម្តេចអគ្គមហាសេនាបតីតេជោ ហ៊ុន សែន
នៅវិមាន សន្តិភាព ក្នុងរាជធានីភ្នំពេញ លោកជំទាវ គ្លីនតុន មានប្រសាសន៍ថា នៅក្នុងដំណើរទស្សនកិច្ច
មកកាន់ កម្ពុជា ដើម្បីចូលរួមក្នុងកិច្ចប្រជុំ អាស៊ាននេះ គឺដើម្បីស្ថាបនាឲ្យមានការរីក
ចម្រើន នូវអ្វី ដែលបានពិភាក្សា និងបានសហការគ្នានាពេលកន្លង មកនោះ។ លោកជំទាវ
គ្លីនតុន ថ្លែងថា លោកជំទាវបានសង្កេតឃើញថា មានចំណុចរីកចម្រើនជាច្រើន នៃកិច្ចសហប្រតិបត្តិការរវាង
ប្រទេសទាំងពីរ ដែលសហរដ្ឋអាមេរិក នឹងបញ្ជាក់នូវការ ផ្តួចផ្តើមរបស់ខ្លួនដែលអាមេរិកនឹង
ជំរុញទំនាក់ទំនងរវាងអាមេរិកជាមួយកម្ពុជា ក៏ដូចជាជាមួយអាស៊ានឲ្យបានកាន់តែស៊ីជម្រៅ
ថែមទៀត លើវិស័យគ្រប់គ្រងគ្រោះមហន្តរាយ វិស័យអប់រំ គឺការជំរុញវិស័យការសិក្សាភាសា
អង់គ្លេសក៏ដូចជា វិស័យពាណិជ្ជកម្ម សេដ្ឋកិច្ច និងវិនិយោគជាដើម។លោកជំទាវហ៊ីលឡារី
គ្លីនតុន មានប្រសាសន៍ថា នៅក្នុងដំណើរទស្សនកិច្ចនេះ លោកជំទាវ បាន នាំមកជា
មួយនូវ គណៈប្រតិភូវិនិយោគសហរដ្ឋអាមេរិកយ៉ាងធំមកកាន់កម្ពុជា ហើយដែលនឹងមានកិច្ចប្រជុំ
ធុរកិច្ចអាមេរិក នៅថ្ងៃទី ១៣ កក្កដានេះ នៅឯខេត្តសៀមរាប។ លោកជំទាវ គ្លីនតុន
ថ្លែងថា អ្វីដែលសហរដ្ឋ អាមេរិកចង់ឃើញនៅពេលនេះ គឺបណ្តា ប្រទេសអាស៊ានរៀបចំ
និងបង្កើត ក្រមប្រតិបត្តិឲ្យមានប្រសិទ្ធភាពពាក់ព័ន្ធនឹងបញ្ហាសមុទ្ទខាងត្បូងនោះ។លោក
អ៊ាង សុផល្លែត ឲ្យដឹងថា នៅក្នុងជំនួបនោះ លោកជំទាវ គ្លីនតុន បានថ្លែងអំណរគុណ
យ៉ាងជ្រាលជ្រៅ ចំពោះកម្ពុជា ដែលបានគាំទ្រទៅដល់កិច្ចផ្តួចផ្តើមរបស់សហរដ្ឋអាមេរិកទៅលើការអភិវឌ្ឍ
តំបន់ មេគង្គខាងក្រោម ដោយមានប្រសាសន៍ថា នៅថ្ងៃ សុក្រខាងមុខនេះ លោកជំទាវនឹងប្រកាស
អំពីការផ្ដល់ជំនួយចំនួន៥០លានដុល្លារអាមេរិកសម្រាប់ការអភិវឌ្ឍន៍តំបន់ មេគង្គ
ខាងក្រោម នេះ។ លោកជំទាវមានប្រសាសន៍ថា លោកជំទាវសប្បាយរីករាយយ៉ាងខ្លាំង
ចំពោះកិច្ច សហប្រតិបត្តិការជាមួយកម្ពុជា លើវិស័យសន្តិសុខ ដោយលោកជំទាវមានប្រសាសន៍ថា
សហរដ្ឋអាមេរិកមានបំណងពង្រីកកិច្ចសហប្រតិបត្តិការ លើវិស័យ សន្តិសុខបន្ថែមទៀត។
លោកជំទាវក៏បានស្វាគមន៍នូវគំនិតរបស់អាស៊ាន ដែលចង់ឲ្យអាស៊ានជាប្រទេសដែលគ្មាន
អាវុធនុយក្លេអ៊ែរ ហើយជាងនេះទៅទៀតលោកជំទាវក៏បានថ្លែងអំណរគុណ និងស្វាគមន៍ចំពោះ
ការបន្តជួយគាំទ្រដល់ការកាត់ទោសខ្មែរក្រហមផងដែរ។លោកជំទាវ គ្លីនតុន បានសម្តែងនូវការ
អបអរសាទរចំពោះ ការធ្វើជាម្ចាស់ផ្ទះដឹកនាំកិច្ចប្រជុំអាស៊ានរបស់កម្ពុជា ដែលទទួលបាន
ជោគជ័យ ផងដែរ។នៅក្នុងជំនួបនោះ សម្ដេចតេជោ ហ៊ុន សែន បានថ្លែងអំណរគុណ ចំពោះ
សហរដ្ឋអាមេរិកដែលបានជួយព្រះរាជាណាចក្រកម្ពុជា ចំពោះគ្រោះទឹកជំនន់កាលពីឆ្នាំ
២០១១ កន្លងមកនេះ។
ពាក់ព័ន្ធនឹងការផ្ដួចផ្ដើមរបស់សហរដ្ឋអាមេរិក
ចំពោះការអភិវឌ្ឍមេគង្គក្រោមនេះ សម្ដេច នាយករដ្ឋមន្រ្តីបានមានប្រសាសន៍ថា
នេះគឺជាការផ្ដួចផ្ដើមដ៏ត្រឹមត្រូវរបស់សហរដ្ឋអាមេរិក ដែលការផ្ដួចផ្ដើមនេះមិនត្រឹមតែជួយដល់បញ្ហាគ្រោះទឹកជំនន់ទេ
ថែមទាំងជួយដល់ការធ្វើ សមាហរណកម្មរបស់អាស៊ានផងដែរ ដែលនេះជា គោលដៅរបស់អាស៊ានសម្រាប់ឈានទៅ
កាន់ សហគមន៍អាស៊ាននៅឆ្នាំ ២០១៥ ខាងមុខ។ ពាក់ព័ន្ធនឹងបញ្ហាសមុទ្រចិនខាងត្បូង
ក្រមប្រតិបត្តិសមុទ្ទចិនខាងត្បូង (COC) សម្ដេចបានមានប្រសាសន៍ថា វាគ្មានមធ្យោបាយអ្វីដែលល្អប្រសើរជាងការអនុវត្តតាម
សេចក្តីថ្លែងការណ៍ស្តីពីការប្រតិបត្តិ របស់ភាគីសមុទ្ទចិនខាងត្បូង (DOC) ដែលឈានទៅរក COC ដែលមានប្រសិទ្ធភាពនោះទេ។ ជាងនេះទៅទៀត
សម្ដេចក៏បានសម្តែងនូវការសប្បាយរីករាយ ដែលលោកជំទាវបាននាំមកនូវធុរកិច្ចអាមេរិកយ៉ាងធំមកកាន់កម្ពុជានេះ
ហើយអ្វីដែលលោកជំទាវបានលើកឡើង ពាក់ព័ន្ធនឹងការតភ្ជាប់នោះ គឺជាកត្តាសំខាន់ណាស់
ព្រោះបើមិនអាចតភ្ជាប់គ្នារវាងប្រទេសអាស៊ាន និងការតភ្ជាប់ លើការដឹកជញ្ជូនរវាងគ្នានោះទេគឺមិនអាច
ទទួលបាននូវសមាហរណកម្មរបស់អាស៊ាន ដែលជាកត្តាសំខាន់ដើម្បីកសាងសហគមន៍អាស៊ាននាថ្ងៃអនាគតនោះដែរ។សម្ដេចតេជោហ៊ុន
សែន ក៏បានថ្លែងអំណរគុណចំពោះលោកជំទាវហ៊ីឡារី គ្លីនតុន ក៏ដូចសហរដ្ឋអាមេរិកផងដែរ
ដែលបាន គាំទ្រការកាត់ទោសខ្មែរក្រហម៕
អត្ថបទអង្គភាពព័ត៌មាន និងប្រតិកម្មរហ័ស