ឯកឧត្តមបណ្ឌិត Fazal Ur Rahman ឯកអគ្គរដ្ឋទូតប៉ាគីស្ថាន
ដែលត្រូវបញ្ចប់បេសកកម្មនៅព្រះរាជាណាចក្រកម្ពុជា នារសៀលថ្ងៃទី១០ ខែធ្នូ ឆ្នាំ២០១២
បានថ្លែងអំណរគុណក្នុងនាមរដ្ឋាភិបាលប៉ាគីស្ថាន
ចំពោះសម្តេចអគ្គមហាសេនាបតីតេជោ ហ៊ុន សែន ដែលបានគាំទ្រ ដល់ប្រទេសប៉ាគីស្ថានក្នុងការក្លាយជាដៃគូសន្ទនាពេញសិទ្ធិរបស់អាស៊ាន។
ឯកឧត្តមឯកអគ្គរដ្ឋទូតប៉ាគីស្ថាន ក៏បានបង្ហាញនូវមោទនភាព
ក្នុងការជំរុញទំនាក់ទំនងរវាងប្រជាជន និងប្រជាជន ពិសេសការបង្កើនកិច្ចសហប្រតិបត្តិការលើវិស័យពាណិជ្ជកម្ម
នៃប្រទេសទាំងពីរកម្ពុជា-ប៉ាគីស្ថានឲ្យកាន់តែរឹងមាំក្នុងពេលរយៈពេលបេសកកម្មការទូតនៅកម្ពុជា
។
ឯកឧត្តម អ៊ាង សុផល្លែត
ជំនួយការសម្តេចតេជោនាយករដ្ឋមន្ត្រីឲ្យដឹងថា ក្នុងឱកាសចូលសំដែងការគួរសម
និងជំរាបលាសម្តេចអគ្គមហាសេនាបតីតេជោ ហ៊ុន សែន នៅវិមានសន្តិភាព ឯកឧត្តមបណ្ឌិត
Fazal Ur Rahman បានឲ្យដឹងថា
ប្រទេសកម្ពុជាបានចូលរួមតាំងពិព័រណ៍ពាណិជ្ជកម្មចំនួន២ឆ្នាំជាប់ៗគ្នានៅក្នុងប្រទេសប៉ាគីស្ថាន
ហើយនៅឆ្នាំ២០១៣ ខាងមុខ ឯកឧត្តមបណ្ឌិត ចម ប្រសិទ្ធ នឹងអញ្ជើញទៅបំពេញទស្សនកិច្ចការងារ
និងចូលរួមក្នុងពិធីតាំងពិព័រណ៍ពាណិជ្ជកម្មលើកទី៣ នៅប៉ាគីស្ថានផងដែរ ដើម្បីជំរុញពាណិជ្ជកម្មនៃប្រទេសទាំងពីរឲ្យកាន់តែរឹងមាំថែមទៀត
ពិសេសការជំរុញទំនាក់ទំនងរវាងប្រជាជន និងប្រជាជន អ្នកវិនិយោគ និងអ្នកវិនិយោគ
ដើម្បីជំរុញឲ្យលំហូរពាណិជ្ជកម្មមានការរីកចំរើនថែមទៀតពីមួយឆ្នាំទៅមួយឆ្នាំ។
នៅក្នុងកិច្ចសន្ទនាគ្នានោះដែរ តាមនាមឲ្យឯកឧត្តមប្រធានាធិបតី
និងឯកឧត្តមនាយករដ្ឋមន្ត្រីនៃប្រទេសប៉ាគីស្ថាន ឯកឧត្តមបណ្ឌិត
Fazal Ur Rahman បានមានប្រសាសន៍ចូលរួមសំដែងនូវមរណទុក្ខដ៏ក្រៀមក្រំបំផុតជាមួយព្រះរាជវង្សានុវង្ស
ក៏ដូចជាថ្នាក់ដឹកនាំកម្ពុជាទាំងអស់ ចំពោះការចូលទិវង្គតរបស់ព្រះករុណា ព្រះមហាវីរក្សត្រជាទីសក្ការៈដ៏ខ្ពង់ខ្ពស់
របស់ថ្នាក់ដឹកនាំ និងប្រជារាស្ត្រកម្ពុជា។ ក្នុងនាមថ្នាក់ដឹកនាំ និងប្រជាជនប៉ាគីស្ថាន
ឯកឧត្តមឯកអគ្គរដ្ឋទូតប៉ាគីស្ថាន ក៏បានសំដែងនូវការអបអរសាទរយ៉ាងជ្រាលជ្រៅបំផុត
ចំពោះជោគជ័យដែលរាជរដ្ឋាភិបាលកម្ពុជា ក្រោមការដឹកនាំប្រកបដោយកិត្តិបណ្ឌិត របស់សម្តេចតេជោនាយករដ្ឋមន្ត្រី
ទទួលបានក្នុងការធ្វើជាម្ចាស់ផ្ទះដឹកនាំកិច្ចប្រជុំកំពូលអាស៊ានលើកទី២១ និងកិច្ចប្រជុំពាក់ពន្ធ័នានាកាលពីពេលកន្លងមក។
សម្តេចតេជោនាយករដ្ឋមន្ត្រីមានប្រសាសន៍បញ្ជាក់ថា នៅពេលដែលកម្ពុជាធ្វើជាប្រធានដឹកនាំកិច្ចប្រជុំកំពូលអាស៊ាន
និងកិច្ចប្រជុំកំពូលពាក់ពន្ធ័ដទៃទៀតនោះ ស្ថានភាពមិនជាល្អប៉ុន្មានទេ
និងមានបញ្ហាជាច្រើននៅក្នុងតំបន់ និងនៅក្នុងពិភពលោក ប៉ុន្តែទោះបីជាយ៉ាងណាក៏ដោយ
ក៏កម្ពុជាបានខិតខំប្រឹងប្រែងជំនះនូវការលំបាក់គ្រប់បែបយ៉ាង
ដើម្បីឆ្លុះបញ្ចាំងនូវការទទួលខុសត្រូវក្នុងនាមអាស៊ាន និងជាប្រធានអាស៊ានផង។
ពាក់ពន្ធ័ទៅនឹងការធ្វើពាណិជ្ជកម្មនៃប្រទេសទាំងពីរកម្ពុជា-ប៉ាគីស្ថាន
សម្តេចតេជោនាយករដ្ឋមន្ត្រីមានប្រសាសន៍ថា
បើទោះបីជាទំហំពាណិជ្ជកម្មនៃប្រទេសទាំងពីរ នៅមានទំហំតិចតួចក៏ដោយ ប៉ុន្តែនោះគឺជាការចាប់ផ្តើមដ៏ល្អ។
សម្តេចតេជោនាយករដ្ឋមន្ត្រីក៏បានមានប្រសាសន៍លើកទឹកចិត្តដល់ថ្នាក់ដឹកនាំនៃប្រទេសទាំងពីរ
បន្តធ្វើការរួមគ្នាជាបន្តទៅទៀត ដើម្បីធ្វើយ៉ាងណាជំរុញទំនាក់ទំនងលើវិស័យពាណិជ្ជកម្ម
និងទំនាក់ទំនងទ្វេភាគីរវាងប្រទេសទាំងពីរ ឲ្យកាន់តេរឹងមាំថែមទៀត៕