ទាក់ទងនឹងការវាយតម្លៃរបស់មនុស្សមួយចំនួន
សម្តេចតេជោបានមានប្រសាសន៍បញ្ជាក់ថា
ការចំណាយទៅលើការកសាងព្រះមេរុព្រះបរមរតនកោដ្ឋ
ត្រូវចំណាយថវិកាអស់ដល់ទៅប្រមាណជា ៥លានដុល្លារសហរដ្ឋអាមេរិក
ដោយសម្តេចតេជោមានប្រសាសន៍បញ្ជាក់ថា ការវាយតម្លៃបែបនេះ
គឺជាការធ្វើឲ្យអាប់យសរបស់ប្រជាជាតិខ្មែរទាំងមូល។
បើផ្អែកតាមការវាយតម្លៃដោយមនុស្សមួយចំនួន
រាប់ទាំងព្រះអង្គម្ចាស់ ស៊ីសុវត្ថិ ធម្មិកោ
ទីប្រឹក្សាអមព្រះរាជខុទ្ទកាល័យព្រះមហាក្សត្រ
ដែលបានប្រាប់សារព័ត៌មាន The Cambodia Daily
ត្រូវបានសម្តេចតេជោសែនបញ្ជាក់ថា
ការចំណាយលើការកសាងព្រះមេរុសម្តេចព្រះមហាវីរក្សត្រ
ព្រះបរមរតនកោដ្ឋ អស់មិនតិចជាង ៥លានដុល្លារសហរដ្ឋអាមេរិកនោះ
គឺដោយសារពួកគេទាំងនោះធ្លាប់ស៊ី ធ្លាប់លួច
ធ្លាប់កឹបកេងទ្រព្យសម្បត្តិជាតិ។ សម្តេចតេជោសង្កត់ធ្ងន់ថា
ខ្ញុំសូមបញ្ជាក់ជូនប្រជាពលរដ្ឋកម្ពុជាថា
បើទោះបីជាមើលឃើញភាពស្កឹមស្កៃនៃសំណង់
ហើយដែលមានតម្លៃប៉ាន់ស្មានគួរតែ ៥លានដុល្លារ ក៏ប៉ុន្តែតម្លៃនេះ
ស្ថិតនៅក្រោម ១,២ដុល្លារសហរដ្ឋអាមេរិកតែប៉ុណ្ណោះ។
“នេះជាការវាយតម្លៃអាក្រក់ណាស់
វាហាក់ដូចជាការប្រមាថចំពោះអតីតព្រះមហាក្សត្រ
ប្រមាថចំពោះព្រះមហាក្សត្រ និងសម្តេចម៉ែ ក៏ដូចជាព្រះរាជវង្សានុវង្ស
និងរាជរដ្ឋាភិបាលកម្ពុជាថា បានចំណាយខ្ជះខ្ជាយទៅលើព្រះរាជសព
ដោយគ្រាន់តែព្រះមេរុនេះអស់តម្លៃប្រមាណជា
៥លានដុល្លារសហរដ្ឋអាមេរិក”។
សម្តេចតេជោមានប្រសាសន៍ឲ្យដឹងថា ខ្ញុំគិតថា
អំពើថោកទាបទាំងឡាយដែលអ្នកដទៃបាន និយាយ រាប់ទាំងព្រះអង្គម្ចាស់
ស៊ីសុវត្ថិ ធម្មិកោ បើមិនយល់ទេ សូមលួចសួរមករាជរដ្ឋាភិបាល
សូមកុំឆ្លើយទាំងមិនដឹងអីជាមួយនឹងសារព័ត៌មាន ព្រោះសំណង់នេះ
មើលពីក្រៅគឺមានតម្លៃ ៥លានដុល្លារមែន ក៏ប៉ុន្តែថ្ងៃនេះ
ខ្ញុំបញ្ជាក់ជូនប្រជាពលរដ្ឋកម្ពុជាទូទាំងប្រទេសថា
តម្លៃនេះមានក្រោម ១,២លានដុល្លារ ហើយមិនបានធ្វើការដេញថ្លៃទេ។
សម្តេចតេជោនាយករដ្ឋមន្ត្រីបានមានប្រសាសន៍សង្កត់ធ្ងន់ថា
ខ្ញុំសូមទូលទៅព្រះអង្គម្ចាស់ ធម្មិកោ ថា
ប្រសិនបើព្រះអង្គម្ចាស់មិនយល់
ព្រះអង្គអាចសរសេរសំបុត្រមកសួរខ្ញុំជានាយករដ្ឋមន្រ្តីក៏បាន
សួរសម្តេចចៅហ្វាវាំង គង់ សំអុល ក៏បាន ឬសួរឯកឧត្តមឧបនាយករដ្ឋមន្រ្តី
គាត ឈន់ ក៏បាន ព្រោះខ្ញុំបានចារឲ្យទទួលខុសត្រូវខាងថវិកា
សម្រាប់ការចំណាយសម្រាប់ពិធីទាំងមូល
ដោយមិនឲ្យប៉ះពាល់ដល់ថវិកាព្រះបរមរាជវាំងនោះឡើយ។
សម្តេចតេជោសែនបានមានប្រសាសន៍ឲ្យដឹងថា ខ្ញុំសូមយកឱកាសនេះ
ដើម្បីបញ្ជាក់ជូនបងប្អូនប្រជាពលរដ្ឋកម្ពុជានៅទូទាំងប្រទេសថា
រាជរដ្ឋាភិបាលមានកាតព្វកិច្ច
ដើម្បីនឹងធ្វើយ៉ាងណាឲ្យសក្តិសមទៅនឹងព្រះបិតាជាតិរបស់យើង
ដូច្នេះយើងត្រូវការវេលាមិនតិចជាងរយៈពេល ៣ខែទេ
សម្រាប់ការរៀបចំព្រះរាជពិធីនេះ
ដែលកាលពីព្រះរាជសពរបស់ព្រះករុណាព្រះសុរាម្រិត
បានចំណាយពេលរហូតដល់ទៅ ៥ខែ
ប៉ុន្តែដោយសារតែមិនចង់ឲ្យមានការឆ្លងឆ្នាំ ទាំងឆ្នាំចិន
និងឆ្នាំខ្មែរ
ដូច្នេះទើបត្រូវបូជាព្រះរាជសពនៅក្នុងឆ្នាំរោងរាប់ទាំងឆ្នាំចិន
និងឆ្នាំខ្មែរ ពោល
គឺព្រះរាជពិធីថ្វាយព្រះភ្លើងនឹងប្រព្រឹត្តទៅនៅថ្ងៃទី៤ ខែកុម្ភៈ
ឆ្នាំ២០១៣ ខាងមុខនេះ។
ទាក់ទងទៅនឹងការកសាងព្រះមេរុព្រះបរមរតនកោដ្ឋ
ដោយមិនដាក់ឲ្យដេញថ្លៃត្រូវបានសម្តេចតេជោសែនបញ្ជាក់ថា
ប្រសិនបើមានការដេញថ្លៃ មកដល់ពេលនេះមិនទាន់បានបើកការដ្ឋានទេ
ព្រោះនីតិវិធីនៃការធ្វើលទ្ធកម្មសាធារណៈ
តម្រូវឲ្យមានការផ្សព្វផ្សាយតាមទូរទស្សន៍ វិទ្យុ និងសារព័ត៌មាន
និងត្រូវប្រើពេលមិនតិចជាង ២ខែ ទើបអាចបើកធ្វើការដេញថ្លៃបាន។
ទន្ទឹមនឹងនេះពាក់ព័ន្ធទៅនឹងការចោទប្រកាន់ដែលថា
ក្រុមហ៊ុនសាងសង់នេះ ជារបស់កូនសម្តេចចៅហ្វាវាំង គង់ សំអុល
សម្តេចតេជោនាយករដ្ឋមន្ត្រីបញ្ជាក់ថា តើយើងទៅរកក្រុមហ៊ុនណា?
ព្រោះរឿងសំណង់នេះស្មុគស្មាញណាស់
ដែលសូម្បីតែរូបខ្ញុំក៏ចេះមិនអស់ដែរ
អំពីទិដ្ឋភាពទាំងឡាយទាក់ទងជាមួយនឹងព្រះមេរុនេះ
ប៉ុន្តែយើងបានអង្វរករក្រុមហ៊ុនដើម្បីធ្វើ។
សម្តេចតេជោនាយករដ្ឋមន្រ្តីបានមានប្រសាសន៍ដោយពន្យល់ថា
ដោយសារយើងត្រូវការពេលវេលាខ្លី
ដូច្នេះយើងពិបាកក្នុងការរកជាងណាស់ “ខ្ញុំសូមបញ្ជាក់ជូនថា
រាល់ការទទួលខុសត្រូវក្នុងឋានៈខ្ញុំជានាយករដ្ឋមន្រ្តី
ហើយជាអនុប្រធានគណៈប្រចាំការនៃព្រះរាជពិធីបុណ្យព្រះសពនេះ
គឺខ្ញុំមានការទទួលខុសត្រូវខ្លាំងណាស់ជាមួយនឹងបញ្ហានេះ
រួមជាមួយសមាជិកនានានៃគណៈកម្មការបុណ្យ”។
គួរជម្រាបជូនដែរថា សំណង់សមិទ្ធផលនានានៃការដ្ឋានសាងសង់ព្រះមេរុ
ដែលចាប់បដិសន្ធិឡើងនេះ
បានប្រារព្ធពិធីក្រុងពាលីសម្រាប់ដំណើរការសាងសង់ជាផ្លូវការ
នាថ្ងៃទី១ ខែវិច្ឆិកា ឆ្នាំ២០១២
ដោយសម្រេចបាននូវលទ្ធផលយ៉ាងល្អប្រសើរជាបន្តបន្ទាប់។
ការដ្ឋានសាងសង់ព្រះមេរុ នាពេលនេះ សម្រេចបានប្រមាណជា ៦៥%
នៃផែនការ និងគ្រោងបញ្ចប់នៅបំណាច់សប្តាហ៍ទី៣ នៃខែមករា ឆ្នាំ២០១៣
ខាងមុខនេះ៕