សៀមរាប ថ្ងៃទី១៥ ខែធ្នូ ឆ្នាំ២០១២
- សូមក្រាបថ្វាយបង្គំព្រះថេរានុត្ថេរៈគ្រប់ព្រះអង្គជាទីគោរពសក្ការៈ
- ឯកឧត្តម ផាក ដេវ៉ុន ប្រធានទីភ្នាក់ងារសហប្រតិបត្តិការអន្តរជាតិកូរ៉េ (KOICA)
- ឯកឧត្ដមបណ្ឌិត ស៊ូ ភិរិន្ទ អភិបាលនៃគណៈអភិបាលខេត្តសៀមរាប និងជាអនុប្រធានអាជ្ញាធរអប្សរា
- ឯកឧត្ដម ប៊ុន ណារិទ្ធ អគ្គនាយកអាជ្ញាធរអប្សរា
- បណ្ឌិត Shin Eui Cheol តំណាង KOICA ប្រចាំព្រះរាជាណាចក្រកម្ពុជា
- ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិនិងអន្តរជាតិ បងប្អូនប្រជាពលរដ្ឋ និងក្មួយៗសិស្សនិស្សិតទាំងអស់ ជាទីមេត្រី!
ថ្ងៃនេះ ខ្ញុំព្រះករុណា ខ្ញុំមានសេចក្តីសោមនស្សរីករាយចូលរួមជាមួយ ឯកឧត្តម លោកជំទាវ អស់លោក លោកស្រី បងប្អូនប្រជាពលរដ្ឋ និងក្មួយៗសិស្សនិស្សិតទាំងអស់ ក្នុងពិធីសម្ពោធផ្លូវមិត្តភាពកម្ពុជា-កូរ៉េ (ផ្លូវក្រវ៉ាត់កូរ៉េ) នាពេលនេះ។ ឆ្លៀតក្នុងឱកាសនេះ ខ្ញុំព្រះករុណា ខ្ញុំសូមសម្តែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីនៃអាជ្ញាធរអប្សរា ព្រមទាំងអាជ្ញាធរខេត្តគ្រប់លំដាប់ថ្នាក់ ដែលបានចូលរួមធ្វើឱ្យសម្រេចបាននូវសមិទ្ធផលដ៏ថ្លៃថ្លានេះ។ ទន្ទឹមនឹងនេះ ក្នុងនាមរាជរដ្ឋាភិបាល ខ្ញុំព្រះករុណា ខ្ញុំសូមសម្តែងនូវការស្វាគមន៍យ៉ាងកក់ក្តៅចំពោះ ឯកឧត្តម ផាក ដេវ៉ុន ប្រធានទីភ្នាក់ងារសហប្រតិបត្តិការអន្តរជាតិកូរ៉េ (KOICA) និងគណៈប្រតិភូ ដែលបានចំណាយពេលវេលាដ៏មានតម្លៃចូលរួមក្នុងពិធីដ៏មានសារៈសំខាន់នេះ និងសូមថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនកូរ៉េ តាមរយៈ KOICA ដែលបានផ្តល់ជំនួយឧបត្ថម្ភជាបន្តបន្ទាប់ ទាំងថវិកានិងបច្ចេកទេស សម្រាប់គម្រោងសាងសង់ផ្លូវមិត្តភាពកម្ពុជា-កូរ៉េ ដែលជាផ្លូវវាងតំបន់រមណីយដ្ឋានអង្គរដ៏សំខាន់ មានសារៈប្រយោជន៍ដល់កិច្ចគាំពារ និងអភិរក្សរមណីយដ្ឋានដ៏មានតម្លៃជាប្រវត្តិសាស្ត្រនេះ។
ការជួបជុំគ្នាថ្ងៃនេះ គឺជាព្រឹត្តិការណ៍ដ៏មានសារៈសំខាន់ ដែលឆ្លុះបញ្ចាំងឱ្យឃើញពីការរីកចម្រើនមួយកម្រិតទៀតនៃហេដ្ឋារចនាសម្ព័ន្ធគមនាគមន៍នៅលើទឹកដីអង្គរដ៏បវរនៃយើង។ ផ្លូវមិត្តភាពកម្ពុជា-កូរ៉េ មិនត្រឹមតែជានិមិត្តរូបតំណាងឱ្យមិត្តភាពរវាងព្រះរាជាណាចក្រកម្ពុជានិងសាធារណរដ្ឋកូរ៉េ ប៉ុណ្ណោះទេ ប៉ុន្តែថែមទាំងជាសក្ខីភាពបញ្ជាក់ឱ្យឃើញនូវការរីកលូតលាស់និងភាពរឹងមាំនៃកិច្ចសហ-ប្រតិបត្តិការរវាងប្រទេសយើងទាំងពីរទៀតផង។
សមិទ្ធផលដ៏ថ្លៃថ្លានេះ អាចសម្រេចបានដោយសារមានការយកចិត្តទុកដាក់ខ្ពស់របស់រាជរដ្ឋា-ភិបាលក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងកិច្ចខិតខំប្រឹងប្រែងរបស់អាជ្ញាធរអប្សរា ក៏ដូចជាអាជ្ញាធរ ខេត្តសៀមរាប ព្រមទាំងជំនួយឧបត្ថម្ភគាំទ្រទាំងថវិកានិងបច្ចេកទេសពីសំណាក់មិត្តកូរ៉េ ដើម្បីរួម ចំណែកដល់ការការពារ អភិរក្ស និងអភិវឌ្ឍតំបន់រមណីយដ្ឋានអង្គរប្រកបដោយចីរភាព។
បន្តិចទៀតនេះ យើងនឹងសម្ពោធដាក់ឱ្យប្រើប្រាស់ជាផ្លូវការនូវផ្លូវក្រវ៉ាត់កូរ៉េ ដែលជាសមិទ្ធផល នៃការអនុវត្តគម្រោងសាងសង់ផ្លូវមិត្តភាពកម្ពុជា-កូរ៉េ ដំណាក់កាលទី២។ កញ្ចប់ថវិកានៃគម្រោងនេះ គឺជាជំនួយឥតសំណងរបស់សាធារណរដ្ឋកូរ៉េ ដែលបានអនុវត្ដនៅក្នុងតំបន់រមណីយដ្ឋានអង្គរចាប់តាំង ពីឆ្នាំ២០១០មក ដោយមានកិច្ចសហប្រតិបត្តិការយ៉ាងជិតស្និទ្ធជាមួយអាជ្ញាធរអប្សរា។ គិតមកដល់ពេលនេះ រដ្ឋាភិបាលនៃសាធារណរដ្ឋកូរ៉េបានផ្ដល់ជំនួយជាថវិកាសរុបចំនួន ១៧,៤លានដុល្លារ សម្រាប់ ការកសាងផ្លូវប្រវែង ៣៤,៥គ.ម ដែលក្នុងនោះ ដំណាក់កាលទី១ មានចំនួន ៥,៩លានដុល្លារ សម្រាប់ សាងសង់កំណាត់ផ្លូវប្រវែង១៤គ.ម និងដំណាក់កាលទី២ មានចំនួន ១១,៥លានដុល្លារ សម្រាប់សាងសង់កំណាត់ផ្លូវប្រវែង ២០,៥គ.ម ក្នុងគោលបំណងបញ្ចៀសការដឹកជញ្ជូនធ្ងន់ៗឆ្លងកាត់តំបន់ប្រាសាទ សំដៅរួមចំណែកដល់កិច្ចគាំពារ អភិរក្ស និងអភិវឌ្ឍរមណីយដ្ឋានអង្គរ ដែលជាសម្បត្តិបេតិកភណ្ឌពិភពលោក។
ឯកឧត្តម លោកជំទាវ អស់លោក លោកស្រី បងប្អូនប្រជាពលរដ្ឋ និងក្មួយៗសិស្សនិស្សិត
ឆ្លៀតក្នុងឱកាសនេះ ខ្ញុំព្រះករុណា ខ្ញុំសូមអធិប្បាយដោយសង្ខេបអំពីប្រវត្តិនៃការចុះបញ្ជីរមណីយដ្ឋានអង្គរជាបេតិកភណ្ឌពិភពលោក និងអំពីបេសកកម្មដែលរាជរដ្ឋាភិបាល ក៏ដូចជាអាជ្ញាធរអប្សរា បាននិងកំពុងអនុវត្ត ក្នុងកិច្ចការពារ អភិរក្ស និងអភិវឌ្ឍតំបន់រមណីយដ្ឋានអង្គរ។ រមណីយដ្ឋាន អង្គរ ត្រូវបានចុះក្នុងបញ្ជីបេតិកភណ្ឌពិភពលោក នៅខែធ្នូ ឆ្នាំ១៩៩២ ក្នុងសម័យប្រជុំលើកទី១៦ របស់គណៈកម្មាធិការបេតិកភណ្ឌពិភពលោកនៅទីក្រុងសាន់តាហ្វេ សហរដ្ឋអាមេរិក។ នៅពេលនោះ រមណីយដ្ឋានអង្គរត្រូវបានចុះបញ្ជីជាបេតិកភណ្ឌប្រឈមនឹងគ្រោះថ្នាក់ ហើយតម្រូវឱ្យរាជរដ្ឋាភិបាលកម្ពុជាបំពេញលក្ខខណ្ឌចំនួន៥ ក្នុងរយៈពេល៣ឆ្នាំ ដែលរួមមាន (១) បង្កើតច្បាប់ការពារបេតិកភណ្ឌឱ្យបានគ្រប់គ្រាន់ (២) បង្កើតស្ថាប័នជាតិសម្រាប់រៀបចំរមណីយដ្ឋានអង្គរ (៣) កំណត់ព្រំតំបន់ការពារ (៤) កំណត់តំបន់ទ្រនាប់ចាំបាច់ និង(៥) បង្កើតយន្តការសម្រាប់ត្រួតពិនិត្យ និងសម្របសម្រួលគម្រោងអន្តរជាតិនៅអង្គរ។ ដើម្បីបំពេញលក្ខខណ្ឌទាំងនេះ យន្តការនិងលិខិតបទដ្ឋាន គតិយុត្តិមួយចំនួនត្រូវបានបង្កើតឡើង ដូចជា គណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្រ្តអង្គរ ហៅកាត់ថា ICC-Angkor អាជ្ញាធរដើម្បីការពាររមណីយដ្ឋាននិងរៀបចំតំបន់អង្គរ ហៅកាត់ថា អាជ្ញាធរអប្សរា ព្រះរាជក្រឹត្យស្តីពីការកំណត់និងការចាត់ចែងគ្រប់គ្រងតំបន់សៀមរាប អង្គរ និងច្បាប់ស្តីពីកិច្ចការពារបេតិកភណ្ឌវប្បធម៌។
ដោយសារកិច្ចខិតខំប្រឹងប្រែងរបស់រាជរដ្ឋាភិបាល និងដោយមានការចូលរួមយ៉ាងផុលផុសពីសំណាក់បណ្តាប្រទេសជាមិត្ត គណៈកម្មាធិការបេតិកភណ្ឌពិភពលោកបានសម្រេចដករមណីយដ្ឋានអង្គរចេញពី “បញ្ជីបេតិកភណ្ឌប្រឈមនឹងគ្រោះថ្នាក់” នៅឆ្នាំ២០០៤ នៅក្នុងកិច្ចប្រជុំ នៅទីក្រុងស៊ូចូវ សាធារណរដ្ឋប្រជាមានិតចិន ហើយរមណីយដ្ឋានអង្គរត្រូវបានចារឹតជាអចិន្ត្រៃយ៍នៅក្នុងបញ្ជីបេតិកភណ្ឌពិភពលោក ចាប់ពីពេលនោះមក។
ក្នុងរយៈពេល២០ឆ្នាំកន្លងមកនេះ រាជរដ្ឋាភិបាល ក៏ដូចជាអាជ្ញាធរអប្សរា បានយកចិត្តទុកដាក់យ៉ាងខ្លាំង ក្នុងកិច្ចអភិរក្សនិងអភិវឌ្ឍសម្បត្តិវប្បធម៌ ដោយសម្រេចបាននូវសមិទ្ធផលធំៗជាបន្តបន្ទាប់ ដូចជា ការស្រោចស្រង់រមណីយដ្ឋានអង្គរឱ្យរួចផុតពីគ្រោះថ្នាក់ ការអភិរក្សសម្បត្តិបេតិកភណ្ឌទាំងរូបីនិងអរូបី និងការអភិវឌ្ឍសេដ្ឋកិច្ច-សង្គម នៅក្នុងតំបន់សៀមរាប-អង្គរ។ ជាមួយគ្នានេះ អាជ្ញាធរអប្សរាក៏បាននិងកំពុងខិតខំជួសជុលនិងស្តារឡើងវិញនូវប្រព័ន្ឋធារាសាស្ត្របុរាណមួយចំនួន ដើម្បីជាប្រយោជន៍ ដល់ការគ្រប់គ្រងនិងការប្រើប្រាស់ធនធានទឹកប្រកបដោយចីរភាព និងដើម្បីបញ្ចៀសការជន់លិចតំបន់ អង្គរនិងក្រុងសៀមរាប។
ដើម្បីធានាបាននិរន្តរភាពសម្រាប់តំបន់រមណីយដ្ឋានអង្គរ អាជ្ញាធរអប្សរាមានភារកិច្ចដ៏ធំធេងក្នុងការគ្រប់គ្រង អភិរក្ស ថែរក្សា ការពារ និងអភិវឌ្ឍរមណីយដ្ឋាននេះ ដោយឈរលើទស្សនាទាន “អភិរក្សដើម្បីអភិវឌ្ឍ និងអភិវឌ្ឍដើម្បីអភិរក្ស“។ ក្នុងន័យនេះ អាជ្ញាធរអប្សរាមានបេសកកម្មមិនត្រឹមតែអភិរក្ស ថែរក្សា ប្រាសាទនានាដែលជាបេតិកភណ្ឌរូបី និងទំនៀមទំលាប់ ប្រពៃណី វប្បធម៌របស់បងប្អូនក្នុងតំបន់អង្គរ ដែលជាបេតិកភណ្ឌអរូបីប៉ុណ្ណោះទេ ប៉ុន្តែថែមទាំងគិតគូរអំពីការរៀបចំហេដ្ឋារចនាសម្ព័ន្ឋផ្លូវថ្នល់ក្នុងតំបន់អង្គរ ដើម្បីបម្រើឱ្យការអភិវឌ្ឍវិស័យទេសចរណ៍ លើកកម្ពស់កម្រិតជីវភាព ប្រជាពលរដ្ឋនៅក្នុងតំបន់ ក៏ដូចជា រួមចំណែកដល់ការកាត់បន្ថយភាពក្រីក្រនៅកម្ពុជាជារួមផងដែរ។ លើសពីនោះទៅទៀត អាជ្ញាធរអប្សរានៅមានគម្រោងនិងកម្មវិធីជាច្រើនទៀត ដែលផ្តោតការយកចិត្តទុកដាក់ជាពិសេសទៅលើការលើកកម្ពស់ជីវភាពរបស់សហគមន៍មូលដ្ឋានផ្ទាល់ ដូចជា គម្រោងអភិវឌ្ឍន៍សហគមន៍សហការជាមួយប្រទេសនូវែលសេឡង់ និងគម្រោងខ្សែក្រវ៉ាត់បៃតងសហការជាមួយប្រទេសអាល្លឺម៉ង់ជាដើម ដែលជារួមគម្រោងទាំងនេះមានគោលដៅលើកកម្ពស់ការចូលរួមរបស់ប្រជាជន ក្រីក្រនៅជនបទក្នុងខេត្តសៀមរាប ក្នុងការទទួលបានផលប្រយោជន៍ពីសកម្មភាពនានារបស់គម្រោង។
ឯកឧត្តម លោកជំទាវ អស់លោក លោកស្រី បងប្អូនប្រជាពលរដ្ឋ និងក្មួយៗសិស្សនិស្សិត
គម្រោងសាងសង់ផ្លូវក្រវ៉ាត់កូរ៉េនេះ បានទទួលការគាំទ្រនិងអបអរសាទរពីកិច្ចប្រជុំពេញអង្គ លើកទី១៩ របស់ ICC-Angkor ដែលបានប្រព្រឹត្តទៅនៅខេត្តសៀមរាប កាលពីសប្តាហ៍កន្លងទៅនេះ ដោយសមិទ្ធផលនេះពិតជាបានរួមចំណែកយ៉ាងសំខាន់ដល់ការអភិរក្ស និងអភិវឌ្ឍតំបន់រមណីយដ្ឋានអង្គរយ៉ាងពិតប្រាកដ។ ទន្ទឹមនឹងនេះ កិច្ចប្រជុំ ICC-Angkor ក៏បានផ្តល់ជាអនុសាសន៍ ចំពោះកំណាត់ ផ្លូវមួយភាគធំ ដែលស្ថិតនៅក្នុងតំបន់១ គួររក្សាទុកជាផ្លូវសម្រាប់ការដឹកជញ្ជូនភ្ញៀវទេសចរ ក៏ដូចជាសម្រាប់បម្រើឱ្យសកម្មភាពដឹកជញ្ជូនផលិតផលរបស់បងប្អូនប្រជាពលរដ្ឋក្នុងស្រុកភូមិ ដោយគិតគូរដល់ការសាងសង់ផ្លូវវាងបន្ថែម ដើម្បីបញ្ចៀសការដឹកជញ្ជូនធ្ងន់ៗឱ្យចេញផុតពីតំបន់ប្រាសាទនានា។
ខ្ញុំព្រះករុណា ខ្ញុំមានជំនឿយ៉ាងមុតមាំថា រដ្ឋាភិបាលនៃសាធារណរដ្ឋកូរ៉េ តាមរយៈឯកឧត្តម ផាក ដេវ៉ុនប្រធានទីភ្នាក់ងារសហប្រតិបត្តិការអន្តរជាតិកូរ៉េ (KOICA) នឹងបន្តជួយសាងសង់បណ្តាញ ផ្លូវវាងដ៏មានសារសំខាន់នេះបន្ថែមទៀត ដើម្បីបញ្ចៀសការដឹកជញ្ជូនធ្ងន់ៗឱ្យចេញផុតពីតំបន់ប្រាសាទ ទាំងស្រុង តាមរយៈការកែលម្អផ្លូវគ្រួសក្រហមដែលមានស្រាប់ចំនួនពីរខ្សែគឺៈ
-ខ្សែទី១ ភ្ជាប់ពីចំណុចខាងលិចនៃកំណាត់ផ្លូវក្រវ៉ាត់កូរ៉េដំណាក់កាលទី២ផ្នែកខាងជើង រហូតដល់ចំណុចប្រសព្វនឹងផ្លូវជាតិលេខ៦។
-ខ្សែទី២ ភ្ជាប់ពីចំនុចខាងកើតនៃកំណាត់ផ្លូវក្រវ៉ាត់កូរ៉េដំណាក់កាលទី២ផ្នែកខាងជើង រហូតដល់ចំណុចប្រសព្វនឹងផ្លូវជាតិលេខ៦៧។
ជាថ្មីម្តងទៀត ខ្ញុំព្រះករុណាខ្ញុំសូមសម្តែងការកោតសរសើរចំពោះថ្នាក់ដឹកនាំ និងមន្រ្តីទាំងអស់នៃអាជ្ញាធរអប្សរា ព្រមទាំងអាជ្ញាធរខេត្តសៀមរាបគ្រប់លំដាប់ថ្នាក់ ដែលបានចូលរួមសហការយ៉ាងល្អក្នុងការកសាងសមិទ្ធផលដ៏មានសារសំខាន់នេះ។ ខ្ញុំព្រះករុណាខ្ញុំក៏សូមយកឱកាសនេះថ្លែងអំណរគុណ ចំពោះរដ្ឋាភិបាលនិងប្រជាជនកូរ៉េ ដែលបានផ្តល់ជំនួយឧបត្ថម្ភទាំងថវិកានិងបច្ចេកទេសជាបន្តបន្ទាប់ ក្នុងការកសាងផ្លូវមិត្តភាពកម្ពុជា-កូរ៉េនេះ ហើយក៏សូមសម្តែងនូវការកោតសរសើរចំពោះអ្នកជំនាញការកូរ៉េទាំងអស់ ដែលបានបំពេញបេសកកម្មរបស់ខ្លួននៅកម្ពុជា ប្រកបដោយជោគជ័យ ជាពិសេស គឺបានចែករំលែកទាំងចំណេះដឹង និងបទពិសោធដល់អ្នកបច្ចេកទេសកម្ពុជា ឱ្យយល់ដឹងអំពីបច្ចេកទេសក្នុងការគ្រប់គ្រងនិងថែទាំផ្លូវ។
មុននឹងបញ្ចប់ ខ្ញុំព្រះករុណា ខ្ញុំសូមអំពាវនាវដល់គ្រប់ក្រសួង ស្ថាប័នពាក់ព័ន្ធ និងអាជ្ញាធរមានសមត្ថកិច្ចគ្រប់លំដាប់ថ្នាក់ ជាពិសេសអាជ្ញាធរអប្សរា សូមបន្តយកចិត្តទុកដាក់ខ្ពស់ក្នុងការគិតគូររៀបចំដល់ការកសាងបណ្តាញផ្លូវគមនាគមន៍ឱ្យបានសមស្រប ឆ្លើយតបទៅនឹងតម្រូវការជាក់ស្តែងរបស់ភ្ញៀវទេសចរ ក៏ដូចជាកិច្ចការពារ អភិរក្ស និងអភិវឌ្ឍតំបន់រមណីយដ្ឋានអង្គរ។ ជាមួយគ្នានេះដែរ ខ្ញុំព្រះករុណា ខ្ញុំសូមអំពាវនាវដល់បងប្អូនប្រជាពលរដ្ឋទាំងអស់ ដែលប្រើប្រាស់ផ្លូវនេះ សូមជួយរួមចំណែកថែរក្សាការពារផ្លូវសាធារណៈនេះឱ្យបានស្ថិតស្ថេរគង់វង្ស ដើម្បីជាប្រយោជន៍ដល់ការលើកកម្ពស់ជីវភាពប្រចាំថ្ងៃរបស់បងប្អូនក្នុងពេលបច្ចុប្បន្ន ក៏ដូចជាក្មួយៗជំនាន់ក្រោយ។ ជាងនេះទៅទៀត ខ្ញុំព្រះករុណា ខ្ញុំក៏សូមអំពាវនាវដល់សប្បុរសជន ដៃគូអភិវឌ្ឍន៍ និងសហគមន៍អន្តរជាតិ ជាពិសេសមិត្តកូរ៉េ សូមបន្តជួយផ្តល់ជំនួយឧបត្ថម្ភ ទាំងថវិកានិងបច្ចេកទេស ដល់កិច្ចគាំពារ អភិរក្ស និងអភិវឌ្ឍតំបន់រមណីយដ្ឋានអង្គរឱ្យកាន់តែប្រសើរឡើងថែមទៀត ដើម្បីធ្វើឱ្យតំបន់នេះក្លាយជាគោលដៅ ទេសចរណ៍វប្បធម៌ ប្រវត្តិសាស្ត្រ និងធម្មជាតិដ៏ទាក់ទាញ នៅក្នុងតំបន់និងពិភពលោក។
ជាទីបញ្ចប់ ខ្ញុំព្រះករុណា ខ្ញុំសូមប្រគេនពរព្រះថេរានុត្ថេរៈគ្រប់ព្រះអង្គ នូវពុទ្ធពរទាំងបួនប្រការ គឺ អាយុ វណ្ណ សុខៈ ពលៈ និងសូមជូនពរ ឯកឧត្តម លោកជំទាវ អស់លោក លោកស្រី បងប្អូនប្រជាពលរដ្ឋ និងក្មួយៗសិស្សនិស្សិតទាំងអស់ សូមមានសុខភាពល្អ ទទួលបានជ័យជំនះគ្រប់ភារកិច្ច និងមានសុភមង្គលក្នុងគ្រួសារ។
ខ្ញុំព្រះករុណា ខ្ញុំសូមប្រកាសដាក់ឱ្យប្រើប្រាស់ជាផ្លូវការ “ផ្លូវមិត្តភាពកម្ពុជា-កូរ៉េ” ចាប់ពីពេលនេះតទៅ។