ឯកឧត្តម ម៉ាក ហ្គោឌីង (Mark Gooding) ឯកអគ្គរាជទូតចក្រភពអង់គ្លេស ប្រចាំព្រះរាជាណាចក្រកម្ពុជា នៅក្នុងឱកាសចូលជួបសម្តែងការគួរសម និងពិភាក្សាការងារ ជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី២៨ ខែកុម្ភៈ ឆ្នាំ២០១៣ បានមានប្រសាសន៍កត់សម្គាល់អំពីការរីកចម្រើននូវកិច្ចសហប្រតិបត្តិការរវាងប្រទេសទាំងពីរ (ចក្រភពអង់គ្លេស-កម្ពុជា) និងការអភិវឌ្ឍនរីកចម្រើនយ៉ាងពិតប្រាកដនៅក្នុងព្រះរាជាណាចក្រកម្ពុជា ជាពិសេសលើវិស័យទេសចរណ៍ វិស័យពាណិជ្ជកម្ម និងការវិនិយោគ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីបានមានប្រសាសន៍ឲ្យដឹងថា ឯកឧត្តម ម៉ាក ហ្គោឌីង (Mark Gooding) បានមានប្រសាសន៍ថា ឯកឧត្តមមានការរីករាយយ៉ាងខ្លាំងជាមួយនឹងកិច្ចសហប្រតិបត្តិការក្នុងប្រទេសកម្ពុជា រយៈពេល ១៨ខែកន្លងមកនេះ ក្នុងពេលឯកឧត្តមបានបំពេញបេសកកម្មការទូតនៅកម្ពុជា។ ឯកឧត្តម ម៉ាក ហ្គោឌីង បានមើលឃើញពីការអភិវឌ្ឍរីកចម្រើនយ៉ាងពិតប្រាកដនៅក្នុងប្រទេសកម្ពុជា ជាពិសេសលើវិស័យទេសចរណ៍ ដោយមានភ្ញៀវទេសចរមកពីចក្រភពអង់គ្លេសជាច្រើនបានមកកាន់កម្ពុជា។ ទាក់ទងការរីកចម្រើនលើវិស័យពាណិជ្ជកម្ម ការវិនិយោគ ឯកឧត្តមឯកអគ្គរាជទូតបានកត់សម្គាល់ថា នៅក្នុងឆ្នាំ២០១២កន្លងមក ទំហំពាណិជ្ជកម្មរវាងប្រទេសទាំងពីរ បានកើនឡើងប្រមាណជា ២៨ភាគរយ ដែលមានទឹកប្រាក់ចំនួនប្រមាណ ៧៥០លានដុល្លារអាមេរិក។ នៅលើវិស័យអប់រំ ឯកឧត្តម ម៉ាក ហ្គោឌីង បានមានប្រសាសន៍ឲ្យដឹងថា ក្នុងឆ្នាំ២០១៣នេះ ចក្រភពអង់គ្លេសនឹងបើកសមាគមនិស្សិតទៅសិក្សានៅចក្រភពអង់គ្លេស។ ពាក់ព័ន្ធទៅនឹងសាលាក្តីខ្មែរក្រហម ចក្រភពអង់គ្លេសនឹងផ្តល់ជំនួយជាទឹកប្រាក់ចំនួន ២លាន ២សែនដុល្លារអាមេរិក សម្រាប់ការកាត់ទោសអតីតមេដឹកនាំជាន់ខ្ពស់ខ្មែរក្រហមបន្ថែមទៀត។ បើគិតរហូតមកដល់ពេលនេះ អង់គ្លេសបានជួយដល់សាលាក្តីខ្មែរក្រហម មានទឹកប្រាក់សរុបប្រមាណជាង ១០លានដុល្លារអាមេរិក។
ឯកឧត្តម ម៉ាក ហ្គោឌីង បានជម្រាបជូនសម្តេចតេជោនាយករដ្ឋមន្ត្រីថា ឯកឧត្តមបានឃើញដោយផ្ទាល់នូវការអភិវឌ្ឍរីកចម្រើន ដូចជា ផ្លូវថ្នល់ មជ្ឈមណ្ឌលសុខភាព សាលារៀន។ នៅក្នុងខេត្តក្រចេះ ស្ទឹងត្រែង មណ្ឌលគីរី រតនគីរី ដែលឯកឧត្តមបានធ្វើដំណើរទៅកាន់ខេត្តទាំងអស់នោះដោយផ្ទាល់នាពេលកន្លងមក។ ជាមួយគ្នានោះដែរ ឯកឧត្តមក៏បានសម្តែងនូវការស្វាគមន៍យ៉ាងខ្លាំងបំផុត ចំពោះដំណើរការកម្មវិធីបែងចែកកម្មសិទ្ធិដីធ្លីជូនប្រជាពលរដ្ឋ (គោលនយោបាយចាស់ សកម្មភាពថ្មី) ដោយឯកឧត្តមឯកអគ្គរាជទូតចាត់ទុកថា កម្មវិធីនេះពិតជាជួយដល់ការអភិវឌ្ឍកម្ពុជា។
សម្តេចតេជោនាយករដ្ឋមន្ត្រីបានមានប្រសាសន៍ថ្លែងអំណរគុណ ចំពោះឯកឧត្តម ឯកអគ្គរាជទូតចក្រភពអង់គ្លេស ហើយបានសម្តែងនូវការពេញចិត្តជាមួយនឹងការរីកចម្រើន និងការកើនឡើងនូវទំហំពាណិជ្ជកម្ម ទេសចរណ៍ រវាងកម្ពុជា និងចក្រភពអង់គ្លេស។ សម្តេចតេជោបានមានប្រសាសន៍ថា នេះគឺជាការបង្ហាញនូវកិច្ចសហប្រតិបត្តិការល្អរវាងប្រទេសទាំងពីរ ដោយសម្តេចមានក្តីសង្ឃឹមថា ចំនួនវិនិយោគិនរបស់ចក្រភពអង់គ្លេសនឹងកើនឡើងផងដែរ។ សម្តេចតេជោនាយករដ្ឋមន្ត្រីបានមានប្រសាសន៍ឲ្យដឹងថា ការបើកការិយាល័យពាណិជ្ជកម្ម និងវិនិយោគនៅស្ថានទូតចក្រភពអង់គ្លេស គឺពិតជាលើកស្ទួយ និងជម្រុញជំនឿទុកចិត្តរបស់ទេសចរណ៍ និងវិនិយោគចក្រភពអង់គ្លេសមកកាន់កម្ពុជា។ ទន្ទឹមនេះសម្តេចតេជោនាយករដ្ឋមន្ត្រីក៏បានសម្តែងនូវការពេញចិត្តចំពោះការត្រៀមបើកនូវសមាគមនិស្សិតទៅសិក្សា នៅចក្រភពអង់គ្លេសនៅកម្ពុជា ដែលនេះ គឺជាការចាប់ផ្តើម និងមានសារសំខាន់ណាស់សម្រាប់ទំនាក់ទំនងរវាងយុវជន និងយុវជន នៃប្រទេសទាំងពីរ។
ទាក់ទងទៅនឹងវិស័យទេសចរណ៍ សម្តេចតេជោនាយករដ្ឋមន្ត្រីបានមានប្រសាសន៍ថា កំណើនទេសចររបស់ចក្រភពអង់គ្លេស មកកាន់ព្រះរាជាណាចក្រកម្ពុជា គឺជាកត្តាសំខាន់មួយក្នុងការជម្រុញនូវទំនាក់ទំនងរវាងប្រជាជន និងប្រជាជននៃប្រទេសទាំងពីរ។ សម្តេចតេជោក៏បានថ្លែងអំណរគុណចំពោះរាជរដ្ឋាភិបាលនៃចក្រភពអង់គ្លេស ដែលបានជួយដល់កម្ពុជាលើវិស័យសុខាភិបាល ការចូលរួមចំណែកក្នុងការផ្តល់ថវិកា សម្រាប់ការកាត់ទោសអតីតមេដឹកនាំខ្មែរក្រហម ដោយសម្តេចតេជោបានឯកភាពជាមួយឯកឧត្តមឯកអគ្គរាជទូតអង់គ្លេសចំពោះការព្រួយបារម្ភអំពីវ័យចំណាស់របស់អតីតមេដឹកនាំខ្មែរក្រហម ក៏ដូចជាក្តីបារម្ភចំពោះបញ្ហាថវិកាសម្រាប់កាត់ទោសមេដឹកនាំខ្មែរក្រហមផងដែរ។
ពាក់ព័ន្ធទៅនឹងការផ្តល់កម្មសិទ្ធិដីធ្លីជូនដល់ប្រជាជន សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់ថា កម្មសិទ្ធិតែមួយមុខមិនគ្រប់គ្រាន់ទេ ត្រូវមានការយកចិត្តទុកដាក់ទៅលើបញ្ហា៤ទៀត ដែលក្នុងនោះ មានការផ្តល់ជូនប្រជាជនដែលប្តូរទីលំនៅថ្មី ភូមិថ្មី នូវផ្លូវថ្នល់ ដើម្បីធ្វើដំណើរទៅវិញទៅមកតភ្ជាប់ជាមួយភូមិ និងផ្លូវជាតិ។ ការផ្តល់ជូននូវមណ្ឌលសុខភាព និងវិស័យអប់រំដែលជាកត្តាចាំបាច់។ ក្នុងករណីនេះ សម្តេចតេជោក៏បានស្នើឲ្យចក្រភពអង់គ្លេសបន្តជួយដល់កម្ពុជាលើវិស័យដែលអាចជួយបានផងដែរ៕