សណ្ឋាគារ រ៉ាហ្វលឡឺរ៉ូយ៉ាល់ ថ្ងៃទី២៨ ខែមេសា ឆ្នាំ២០១៣
- ឯកឧត្តម Pan Guangxue ឯកអគ្គរដ្ឋទូតសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា
- លោកឧកញ៉ា Yum Sui Sang ប្រធានសមាគមអាណិកជន និងធុរកិច្ច ចិន ហុងកុង និងម៉ាកាវ នៅកម្ពុជា
- ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ និងអន្តរជាតិទាំងអស់ជាទីមេត្រី!
ខ្ញុំនិងភរិយាខ្ញុំមានក្តីសោមនស្សរីករាយចូលរួមជាមួយ ឯកឧត្តម លោកជំទាវ លោកឧកញ៉ា អស់លោក លោកស្រី ក្នុងពិធីជប់លៀងអបអរខួបលើកទី១៥ នៃការបង្កើត «សមាគមអាណិកជន និង ធុរកិច្ច ចិន ហុងកុង និងម៉ាកាវ នៅកម្ពុជា» នាពេលនេះ។ ខ្ញុំសូមសម្តែងនូវការកោតសរសើរ និងថ្លែង អំណរគុណចំពោះសមាគម ដែលក្នុងរយៈពេល១៥ឆ្នាំកន្លងមក បានខិតខំជួយផ្សព្វផ្សាយដល់សហគមន៍ ធុរកិច្ចក្នុងទីក្រុងហុងកុង និងម៉ាកាវ បានយល់ដឹងជ្រួតជ្រាបអំពីកាលានុវត្តភាព និងសក្តានុពលភាពនៃការវិនិយោគនៅក្នុងប្រទេសកម្ពុជា ព្រមទាំងជួយសម្របសម្រួលដល់ការធ្វើធុរកិច្ច ក៏ដូចជាសកម្មភាព ពាណិជ្ជកម្មនៅក្នុងប្រទេសកម្ពុជារបស់វិនិយោគិនមកពីទីក្រុងហុងកុង និងទីក្រុងម៉ាកាវ។
នៅក្នុងរយៈពេល១៥ឆ្នាំមកនេះ ជាមួយនឹងសមាជិករបស់ខ្លួនជាង៧០ ក្រុមហ៊ុនដែលភាគច្រើនមកពីវិស័យផ្សេងៗដូចជា វាយនភណ្ឌ ឪសថ ដឹកជញ្ជូន ផលិតផលក្រដាស គីមី ប្លាស្ទិក គ្រឿងចក្រ សមាគមអាណិកជន និងធុរកិច្ច ចិន ហុងកុង និងម៉ាកាវនៅកម្ពុជា ពិតជាបានចូលរួមយ៉ាងសំខាន់ក្នុងការអភិវឌ្ឍវិស័យឧស្សាហកម្មនៅក្នុងប្រទេសកម្ពុជា ដែលវិស័យនេះបានរួមចំណែកដ៏ធំធេងដល់ការអភិវឌ្ឍសេដ្ឋកិច្ច។ ការខិតខំជួយការពារសិទ្ធិនិងផលប្រយោជន៍ស្របច្បាប់របស់សមាជិកសមាគម ការផ្តល់ព័ត៌មានអំពីច្បាប់ បទប្បញ្ញត្តិ គោលនយោបាយ បរិយាកាសវិនិយោគ និងលក្ខខណ្ឌរស់នៅក្នុងប្រទេសកម្ពុជា ដល់វិនិយោគិនមកពីហុងកុង និងម៉ាកាវ ព្រមទាំងការជួយដោះស្រាយបញ្ហាផ្សេងៗរបស់សមាជិក គឺជាបេសកកម្មដ៏ចម្បងដែលគាំទ្រដល់ការធ្វើធុរកិច្ចរបស់សមាជិកសមាគមនៅក្នុងប្រទេសកម្ពុជា។
លើសពីនេះ ការចូលរួមចំណែកដ៏ថ្លៃថ្លារបស់សមាគម ក្នុងការថែរក្សា និងលើកកម្ពស់មិត្តភាពជាប្រពៃណីរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ឆ្លុះបញ្ចាំងឱ្យឃើញថាសមាគមបាននិងកំពុងចូលរួមយ៉ាងសកម្មជាមួយរដ្ឋាភិបាលនៃសាធារណរដ្ឋប្រជាមានិតចិន ក្នុងការពង្រឹង និងពង្រីកទំនាក់ទំនងរវាងប្រទេសទាំងពីរ ដើម្បីបុព្វហេតុដ៏ឧត្តុង្គឧត្តមសម្រាប់ប្រជាជននៃប្រទេសទាំងពីរ។
ឆ្លៀតក្នុងឱកាសដ៏ប្រពៃនេះ ខ្ញុំសូមធ្វើការវាយតម្លៃខ្ពស់ និងថ្លែងអំណរគុណយ៉ាងជ្រាលជ្រៅបំផុតជូនចំពោះរដ្ឋាភិបាល និងប្រជាជននៃសាធារណរដ្ឋប្រជាមានិតចិន ដែលតែងតែបានផ្តល់កិច្ចសហប្រតិបត្តិការ និងជួយឧបត្ថម្ភគាំទ្រជារៀងរហូតមក ដល់ការអភិវឌ្ឍសេដ្ឋកិច្ចសង្គមកម្ពុជា។
ក្នុងពិធីជប់លៀងដ៏ឱឡារិកនេះ ខ្ញុំសូមអញ្ជើញឯកឧត្តម លោកជំទាវ លោកឧកញ៉ា អស់លោក លោកស្រី លើកកែវឡើង ដើម្បី ៖
អបអរសាទរចំពោះមិត្តភាពជាប្រពៃណី និងយូរអង្វែងរវាងព្រះរាជាណាចក្រកម្ពុជា និង សាធារណរដ្ឋប្រជាមានិតចិន។ សូមឱ្យទំនាក់ទំនងរវាងប្រទេសទាំងពីរកាន់តែមានភាពរឹងមាំ ពីមួយជំនាន់ទៅមួយជំនាន់។
សូមជូនពរសមាគមអាណិកជន និងធុរកិច្ច ចិន ហុងកុង និងម៉ាកាវ នៅកម្ពុជា ឱ្យបន្ត បេសកកម្មដ៏មានអត្ថន័យរបស់ខ្លួន ទទួលបានជោគជ័យត្រចះត្រចង់បន្ថែមទៀត។
សូមជូនពរ ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយសជាតិ និងអន្តរជាតិទាំងអស់ សូមមានសុខភាពល្អ សុភមង្គលក្នុងគ្រួសារ និងទទួលបានជោគជ័យ លើគ្រប់ភារកិច្ច។
សូមអរគុណ!