សមាជិក
សមាជិកាគណបក្សប្រជាជនកម្ពុជាប្រមាណ១ម៉ឺននាក់ តំណាងឲ្យប្រជាពលរដ្ឋមកពីបណ្តាឃុំនានាក្នុងស្រុកបាទី
ក្នុងពិធីជួបសំណេះសំណាលជាមួយឯកឧត្តមបណ្ឌិតសភាចារ្យ សុខ អាន
នាព្រឹកថ្ងៃ១១ ខែកក្កដា ឆ្នាំ២០១៣ ក្នុងឃុំក្រាំងលាវ ស្រុកបាទី ខេត្តតាកែវ
បានប្តេជ្ញាបោះឆ្នោតគាំទ្រគណបក្សប្រជាជនកម្ពុជាដែលមានលេខរៀងទី៤
ដោយសារគណបក្សប្រជាជនកម្ពុជាមានគុណសម្បត្តិដែលជាសសរស្តម្ភពីរសំខាន់
គឺការរំដោះប្រជាពលរដ្ឋពីរបបប្រល័យពូជសាសន៍ និងការកសាងសុខសន្តិភាព
និងការអភិវឌ្ឍន៍ជាតិ ជាពិសេសគណបក្សប្រជាជនកម្ពុជា ហ៊ានថា ហ៊ានធ្វើ
មិនសន្យាចោល។
ឯកឧត្តមបណ្ឌិតសភាចារ្យ សុខ អាន
សមាជិកអចិន្ត្រៃយ៍គណកម្មាធិការកណ្តាលគណបក្សប្រជាជនកម្ពុជា និងជាបេក្ខជនតំណាងរាស្ត្រគណបក្សប្រជាជនកម្ពុជាមណ្ឌលខេត្តតាកែវ
សម្រាប់អាណត្តិទី៥ បានមានប្រសាសន៍ឲ្យដឹងថា
គណបក្សប្រជាជនកម្ពុជាទទួលបានជោគជ័យក្នុងការបោះឆ្នោត ជាពិសេសកំណើនអសនៈមណ្ឌលខេត្តតាកែវជាបន្តបន្ទាប់
គឺដោយសារការដឹកនាំដ៏ល្អរបស់សម្តេចអគ្គមហាសេនាបតីតេជោ ហ៊ុន សែន។ ឯកឧត្តមបណ្ឌិតសភាចារ្យ
សុខ អាន បានមានប្រសាសន៍បញ្ជាក់ថា ដូច្នោះ បើស្រឡាញ់, បើអាណិត, បើពេញចិត្ត,
បើជឿទុកចិត្ត សម្តេចអគ្គមហាសេនាបតីតេជោ ហ៊ុន សែន
សូមបោះឆ្នោតជូនគណបក្សប្រជាជនកម្ពុជា។ បន្ទរ ប្រសាសន៍ឯកឧត្តមបណ្ឌិតសភាចារ្យ
សុខ អាន សមាជិក សមាជិកាគណបក្សប្រជាជនដែលចូលរួមក្នុងពិធីទាំងអស់ បានស្រែកជ័យោឃោសគាំទ្រគណបក្សប្រជាជនកម្ពុជាដែលមានលេខរៀងទី៤។
ឯកឧត្តមបណ្ឌិតសភាចារ្យ សុខ អាន
បានមានប្រសាសន៍ឲ្យដឹងថា គណបក្សប្រជាជនកម្ពុជាមានសសរស្តម្ភពីរសំខាន់
គឺទី១,រំដោះប្រជាពលរដ្ឋពីរបបប្រល័យពូជសាសន៍ ហើយបច្ចុប្បន្នមេដឹកនាំជាន់ខ្ពស់បំផុតនៃរបបខ្មែរក្រហមកំពុងទទួលការកាត់ទោសដោយតុលាការ
ដោយមានការចូលរួមពីចៅក្រមបរទេស។ ទី២, កសាងបានសុខសន្តិភាព
និងអភិវឌ្ឍន៍ប្រទេសជាតិ កាត់បន្ថយភាពក្រីក្រជូនប្រជាពលរដ្ឋ។
ដោយប្រៀបធៀបជាមួយបណ្តាប្រទេសផ្សេងៗនៅតំបន់អារ៉ាប់
និងក៏ដូចជាប្រទេសជិតខាងដែលកំពុងប្រឈមមុខនឹងអសន្តិសុខក្នុងប្រទេស
ឯកឧត្តមបណ្ឌិតសភាចារ្យ សុខ អាន បានមានប្រសាសន៍បញ្ជាក់ថា
ការរីកចម្រើននៃព្រះរាជាណាចក្រកម្ពុជាយើងសព្វថ្ងៃ
គឺដោយសារប្រទេសយើងមានសុខសន្តិភាព
ដែលរាជរដ្ឋាភិបាលដឹកនាំដោយសម្តេចអគ្គមហាសេនាបតីតេជោ ហ៊ុន សែន សម្រេចបាន។
អ្នកដែលធ្លាប់ឆ្លងកាត់សង្គ្រាមបានដឹងថា សុខសន្តិភាពមានតម្លៃប៉ុនណា។
បច្ចុប្បន្ន គម្រូរបស់កម្ពុជាក្នុងការកសាងសុខសន្តិភាព
និងការបង្រួបបង្រួមជាតិ
ការអភិវឌ្ឍន៍ប្រទេសទទួលបានការចាប់អារម្មណ៍នៅក្នុងពិភពលោក។
ឯកឧត្តមបណ្ឌិតសភាចារ្យ សុខ អាន
បានចាត់ទុកការឃោសនារបស់គណបក្សប្រឆាំងអំពីវិធីរកថវិកាដើម្បីតម្លើងប្រាក់បៀរវត្សរ៍ដល់កម្មករ
មន្ត្រីរាជការ គឺជាការភូតកុហក់ គ្មានលក្ខណៈវិទ្យាសាស្ត្រ។ ឯកឧត្តមបណ្ឌិតសភាចារ្យ
សុខ អាន បានមានប្រសាសន៍ពន្យល់ថា ការតម្លើងថ្លៃស្រូវរបស់កសិករជូនកសិករ
ក្រៅពីការដាក់ចេញគោលនយោបាយនាំអង្ករចេញ ១លានតោនក្នុងឆ្នាំ២០១៥
គឺត្រូវទាក់ទាញការវិនិយោគរោងម៉ាស៊ីនកិនស្រូវ
ដើម្បីកែច្នៃអង្ករនាំចេញឲ្យមានស្តង់ដារអន្តរជាតិ
និងការស្វែងរកទីផ្សារ ទើបធ្វើឲ្យតម្លៃស្រូវរបស់កសិករកើនឡើង
មិនមែនគ្រាន់តែសន្យានោះទេ។
បញ្ហាប្រាក់ខែកម្មករកម្ពុជាមធ្យមជាង
១៣០ដុល្លារអាមេរិក ដែលបច្ចុប្បន្នខ្ពស់ជាងប្រទេសឡាវ បង់ក្លាដេស ឥណ្ឌា ភូមា នឹងកើនឡើងនៅពេលដែលការវិនិយោគរោងចក្រកាន់តែច្រើនក្រោមការទាក់ទាញដោយរាជរដ្ឋាភិបាលសម្តេចតេជោ
និង ដោយសារតែប្រទេសមានសុខសន្តិភាព ហើយកម្មករកាន់តែមានសមត្ថភាពផលិត។
ឯកឧត្តមបណ្ឌិតសភាចារ្យ សុខ អាន បានបដិសេធថា
ការប្រកាសយកចំណូលពីទេសចរចូលមើលរមណីយដ្ឋានអង្គរវត្ត
ដើម្បីតម្លើងប្រាក់បៀរវត្សរ៍ គឺមិនអាចធ្វើបាន
ព្រោះចំណូលនេះមិនគ្រប់គ្រាន់សម្រាប់ថែរក្សា
និងអភិរក្សតំបន់រមណីយដ្ឋានអង្គរផង ហើយដៃគូអន្តរជាតិដែលបច្ចុប្បន្នកំពុងជួយជួសជុលប្រាសាទនានាមិនគាំទ្រឡើយ។
ឯការប្រកាសលុបចោលបំណុលរបស់ប្រជាពលរដ្ឋក្នុងពេលដែលប្រទេសកម្ពុជាអនុវត្តសេដ្ឋកិច្ចទីផ្សារសេរី
គឺមិនអាចធ្វើបាន ហើយជាការភូតកុហក់។
រដ្ឋគ្រាន់តែជាអ្នកសម្របសម្រួល
តែមិនអាចចាប់បង្ខំឲ្យធនាគារឯកជនណាមួយលុបចោលបំណុលបានឡើយ។
ឯកឧត្តមបណ្ឌិតសភាចារ្យ សុខ អាន បានព្រមានថា
បើបងប្អូនប្រជាពលរដ្ឋណាជឿតាមបក្សប្រឆាំង ហើយទៅខ្ចីលុយធនាគារ
ដោយសង្ឃឹមថា គេនឹងលុបបំណុលនោះ អាចនឹងជួបផលវិបាកជាមិនខាន។
ដោយរំលឹកឡើងពីអភិវឌ្ឍន៍វិស័យអគ្គិសនី
ដែលរាជរដ្ឋាភិបាលដឹកនាំដោយសម្តេចអគ្គមហាសេនាបតីតេជោ ហ៊ុន សែន
បាននិងកំពុងអនុវត្តន៍
ធ្វើឲ្យតម្លៃប្រើប្រាស់អគ្គិសនីរបស់ប្រជាពលរដ្ឋថយចុះជាបន្តបន្ទាប់
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ជម្រាបប្រជាពលរដ្ឋនៅក្នុងឃុំក្រាំងលាវថា
ឯកឧត្តមនឹង ឯកឧត្តម សូរ ឃុន
ដែលជាបេក្ខជនតំណាងរាស្ត្រគណបក្សប្រជាជនកម្ពុជាមណ្ឌលតាកែវផងដែរ នឹងជួយសម្រួលក្នុងការតបណ្តាញអគ្គិសនី
ជូនប្រជាពលរដ្ឋចំនួន២ភូមិ ក្នុងឃុំក្រាំងលាវ ដែលនៅជិតផ្លូវជាតិលេខ៣
ឲ្យមានអគ្គិសនីប្រើប្រាស់នៅក្រោយការបោះឆ្នោតនាពេលខាងមុខនេះ។