ប្រជាពលរដ្ឋជាច្រើនពាន់នាក់ ដែលជាសមាជិក សមាជិកា គណបក្សប្រជាជនកម្ពុជា មកពីបណ្តាឃុំនានានៃស្រុកបូរីជលសារ នាព្រឹកថ្ងៃទី៥
ខែកក្កដា ឆ្នាំ២០១៣ បាន អះអាងចំពោះមុខឯកឧត្តមបណ្ឌិតសភាចារ្យ សុខ អាន បេក្ខជនតំណាងរាស្រ្ត គណបក្សប្រជាជនមណ្ឌលតាកែវថា គាំទ្រគណបក្សប្រជាជនកម្ពុជា
ដែលមានលេខរៀងទី៤ ដើម្បីបានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តី ។
ការសន្យារបស់ប្រជាពលរដ្ឋបានធ្វើឡើងនៅក្នុងពីធីសំណេះសំណាលមួយ នៅក្នុងឃុំគោកពោធិ៍ ជាមួយឯកឧត្តមបណ្ឌិតសភាចារ្យ សុខ អាន សមាជិកអចិន្រ្តយ៍គណៈកម្មាធិការកណ្តាលគណបក្សប្រជាជនកម្ពុជា និងជាបេក្ខជនតំណាងរាស្រ្តនៅក្នុងការបោះឆ្នោតជ្រើសរើសសមាជិកសភាអាណត្តីទី V នាថ្ងៃទី២៨ ខែកក្កដា ឆ្នាំ ២០១៣ ។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា ចាប់តាំងពីឆ្នាំ១៩៩៣ នៃការបោះឆ្នោតជ្រើសរើសសមាជិកសភាអាណត្តិទីI រហូតមកដល់អាណត្តីទីIV គណបក្សប្រជាជនកម្ពុជាទទួលបានការគាំទ្រពីប្រជាពលរដ្ឋខេត្តតាកែវរហូត តាំងពី ៣អសនៈ ក្នុងចំណោម ៨អសនៈរហូតមកដល់៦អសនៈ នៅក្នុងការបោះឆ្នោតជ្រើសរើសសភាអាណត្តិទីIV ឆ្នាំ២០០៨ គឺឡើងមួយ អាណត្តិមួយអសនៈ បានសេចក្តីថា
ប្រជាពលរដ្ឋសម្រេចចិត្តបានត្រឹមត្រូវក្នុងការគាំទ្រចំពោះអ្នកឈ្នះ ដែលជាគណបក្សបានជួយប្រជាជនឲ្យជួយផុតពីរបបប្រល័យពូជសាសន៍ កសាងប្រទេសឲ្យមានសុខសន្តិភាព ស្ថេរភាពនយោបាយ និងមានការអភិវឌ្ឍជាក់ស្តែងលើគ្រប់វិស័យ
។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍បញ្ជាក់ថា រាជរដ្ឋាភិបាល ក្រោមការដឹកនាំរបស់គណបក្សប្រជាជនកម្ពុជាបានកសាងហេដ្ឋារចនាសម្ព័ន្ធជាតិ ផ្លូវ ស្ពាន សាលារៀន
មន្ទីរពេទ្យ ជាពិសេសមណ្ឌលសុខភាព និងសម្ភព នៅតាមមូលដ្ឋាន បើកទូលាយឲ្យមានជំនឿសាសនា ដែលបច្ចុប្បន្នមានវត្តអារាមជាង៤ពាន់ ព្រះសង្ឍមានជាង៥ម៉ឹនអង្គ។ ការដាក់ចេញនូវនយោបាយនាំអង្ករចេញឲ្យបាន១លានតោន
នាឆ្នាំ២០១៥ និងការទាក់ទាញការវិនិយោគ បង្កើតម៉ាស៊ីនកិនស្រូវ ដើម្បីនាំចេញ នឹងធ្វើឲ្យតម្លៃស្រូវរបស់កសិកកើនឡើង។ ការបង្កើតវារីអគ្គិសនី និងការនាំចូលថាមពលអគ្គិសនីពីបរទេស បានធ្វើឲ្យតម្លៃប្រើប្រាស់អគ្គិសនីចុះថោកជាបន្តបន្ទាប់
ជាមួយគ្នានោះ ការលុបបំបាត់អំពើពុករលួយតាមរយៈការលើកកម្ពស់ការផ្តល់សេវាសាធារណៈជូនប្រជាពលរដ្ឋឲ្យមានប្រសិទ្ធភាព លើកកម្ពស់សមត្ថភាព និងបៀវត្សជូនមន្រ្តីរាជការជាបន្តបន្ទាប់ បានធ្វើឲ្យភាពក្រីក្ររបស់ប្រជាពលរដ្ឋបានធ្លាក់ចុះមកដល់១៩ភាគរយ ក្នុងឆ្នាំ ២០១៣នេះ ។
ទាក់ទងនឹងប្រាក់ខែកម្មកររោងចក្រ ឯកឧត្តមបណ្ឌិតសភាចារ្យ សុខ អាន បានមានប្រសាសន៍ពន្យល់ថា
សព្វថ្ងៃកម្មកររោងចក្រកម្ពុជាមានបៀវត្សខ្ពស់ជាងកម្មកររោងចក្រ នៅប្រទេសបង់ក្លាដេស និងឥណ្ឌា ។ កម្មកររោងចក្រនៅកម្ពុជាមានប្រាក់ខែទាបបំផុតជាង១០០ដុល្លារ
និងខ្ពស់បំផុតជាង ២០០ដុល្លារ
ដែលក្នុងមួយខែៗមានប្រាក់ជាមធ្យម ៤០ដុល្លារ ផ្ញើមកឲ្យ ឳពុកម្តាយ ។ ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា
ការតម្លើងប្រាក់ខែជូនកម្មករត្រូវធ្វើឡើងដោយការពិភាក្សារវាង ៣ភាគី គឺ ១) ភាគីម្ចាស់រោងចក្រ ២) សហជីព ៣) គឺរាជរដ្ឋា-ភិបាល គឺយើងមិនអាចចាប់បង្ខំបានឡើយ ។ មធ្យោបាយតម្លើងប្រាក់ខែជូនកម្មករ ក្រៅពីការពិភាក្សា គឺការទាក់ទាញការវិនិយោគឲ្យបានច្រើន និងធ្វើឲ្យកម្មករកម្ពុជាមានសមត្រភាពជំនាញ
ដើម្បីធានាផលិតភាពការងារ គឺមិនមែនគ្រាន់តែជាការសន្យានោះទេ ។ ជាមួយនឹងការរំលឹកឡើងវិញកិត្យានុភាពរបស់ព្រះរាជាណាចក្រកម្ពុជា នៅលើឆាកអន្តរជាតិ តាមរយៈការដាក់បញ្ជូលព្រះសាទព្រះវិហារជាសម្បត្តិបេតិកភណ្ឌពិភពលោក និងការរៀបចំកិច្ចប្រជុំលើកទី៣៧ ក្នុងនាមជាប្រធានគណៈកម្មាធិការបេតិកភណ្ឌពិភពលោក ការរៀបចំកិច្ចប្រជុំកំពូលអាស៊ានជាប្រធានអាស៊ានជាដើម ឯកឧត្តមបណ្ឌិតសភាចារ្យ សុខ អាន បានមានប្រសាសន៍ជម្រាបជូនប្រជាពលរដ្ឋស្រុកបូរីជលសារថា គណបក្សប្រជាជនកម្ពុជា ហ៊ាននិយាយ ហ៊ានធ្វើ មិនសន្យាឡើយ ៕