តាមរយៈ ឯកឧត្តម កៃ រ៉ាឡា សាណាណា
ហ្គោសម៉ៅ (Kay Rala Xanana Gusmao) នាយករដ្ឋមន្រ្តី និងជារដ្ឋមន្រ្តីការពារជាតិ និងសន្តិសុខ នៃសាធារណរដ្ឋប្រជាធិបតេយ្យទីម័រខាងកើត
ព្រះរាជាណាចក្រកម្ពុជានាថ្ងៃទី០៥ ខែកញ្ញា ឆ្នាំ២០១៣ បានប្រកាសគាំទ្រសាធារណរដ្ឋប្រជាធិបតេយ្យទីម័រខាងកើតជាសមាជិកទី
១១ របស់សមាគមប្រជាជាតិអាស៊ីអាគ្នេយ៍ (ASEAN)។
ឯកឧត្តម អ៊ាង សុផល្លែត
ជំនួយការសម្តេចតេជោ បានឲ្យដឹងថា នៅក្នុងជំនួបពិភាក្សាការងារ
ជាមួយឯកឧត្តម កៃ រ៉ាឡា សាណាណា ហ្គោសម៉ៅ (Kay Rala Xanana
Gusmao)នាយក រដ្ឋមន្រ្តី និងជារដ្ឋមន្រ្តីការពារជាតិ
និងសន្តិសុខ នៃសាធារណរដ្ឋប្រជាធិបតេយ្យទីម័រខាងកើត នៅវិមានសន្តិភាព កាលពីថ្ងៃទី៥
ខែកញ្ញា ឆ្នាំ២០១៣ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី
នៃព្រះរាជាណាចក្រកម្ពុជា បានជម្រាបជូនឯកឧត្តម កៃ រ៉ាឡា សាណាណា ហ្គោសម៉ៅ
ថា ជំហររបស់កម្ពុជា គឺគាំទ្រប្រទេសទីម័រឲ្យចូលជាសមាជិកអាស៊ានដោយពុំមានការជំទាស់នោះឡើយ។
ដោយចាត់ទុកដំណើរទស្សនកិច្ចរបស់ឯកឧត្តមនាយករដ្ឋមន្រ្តីទីម័រខាងកើត
មកកាន់កម្ពុជាថាជាការចាប់ផ្តើមនៃទំនាក់ទំនងរវាងប្រទេសទាំងពីរ
(កម្ពុជា-ទីម័រ) សម្តេចតេជោនាយករដ្ឋមន្ត្រីបានមានប្រសាសន៍សំដែងនូវការអបអរសាទរចំពោះសេដ្ឋកិច្ចប្រទេសទីម័រ
ដែលមានការរីកចម្រើនឡើងយ៉ាងល្អប្រសើរ ទោះបីជាក្នុងកាលៈទេសៈ ដែលពិភពលោកទទួលរងនូវបញ្ហាវិបត្តិហិរញ្ញវត្ថុយ៉ាងណាក្តី។
សម្តេចតេជោបានស្នើឲ្យឯកឧត្តមនាយករដ្ឋមន្រ្តីទីម័រខាងកើត
និងគណៈបរតិភូទាំងមូល ពិនិត្យមើលលទ្ធភាពវិស័យផ្សេងៗ ដែលប្រទេសទាំងពីរអាចធ្វើកិច្ចសហប្រតិបត្តិការជាមួយគ្នាបាន
ពិសេសលើវិស័យអង្ករ ដែលកម្ពុជាមានអតិរេកស្រាប់នោះ។
ឯកឧត្តម អ៊ាង សុផល្លែត បានឲ្យដឹងថា
ឯកឧត្តម កៃ រ៉ាឡា សាណាណា ហ្គោសម៉ៅ បានមានប្រសាសន៍ថា ដំណើរទស្សនកិច្ចរបស់ឯកឧត្តមមកកាន់ព្រះរាជាណាចក្រកម្ពុជានាពេល
នេះគឺដើម្បីពង្រឹងទំនាក់ទំនងរវាងប្រទេសទាំងពីរ ហើយក៏ដើម្បីពិនិត្យមើលវិស័យសក្តានុពលសេដ្ឋកិច្ចរបស់ប្រទេសទាំងពីរ
ដែលអាចធ្វើកិច្ចប្រតិបត្តិការជាមួយគ្នាបានផងដែរ។
ឯកឧត្តម កៃ រ៉ាឡា សាណាណា
ហ្គោសម៉ៅ កើតនៅថ្ងៃទី២០ ខែមិថុនា ឆ្នាំ១៩៤៦ នៅម៉ា ណាទុទូ ប្រទេសទីម័រឡេស្ត។
នៅឆ្នាំ ២០០២-២០០៧ ឯកឧត្តមជាប្រធានាធិបតីប្រទេសទីម័រឡេស្ត។ នៅខែសីហា ឆ្នាំ២០០៧
ជានាយករដ្ឋមន្រ្តី និងនៅខែសីហា ឆ្នាំ២០១២ ជានាយករដ្ឋមន្រ្តីប្រទេសទីម័រឡេស្តសម្រាប់អាណត្តិទី២។
ឯកឧត្តម កៃ រ៉ាឡា សាណាណា
ហ្គោសម៉ៅ (Kay Rala Xanana Gusmao ) នាយករដ្ឋមន្រ្តី និងជារដ្ឋមន្រ្តីការពារជាតិ និងសន្តិសុខ នៃសាធារណរដ្ឋទីម័រឡេស្ត
បានអញ្ជើញមកដល់កម្ពុជា សម្រាប់ទស្សនកិច្ចផ្លូវការរយៈពេល ៥ថ្ងៃ (05.09-09.2013)។ ក្នុងដំណើរទស្សនកិច្ចរបស់ឯកឧត្តម កៃ រ៉ាឡា សាណាណា ហ្គោសម៉ៅ (Kay
Rala Xanana Gusmao ) ភាគីទាំងពីរក៏បានចុះហត្ថលេខាលើអនុស្សរណៈនៃការយោគយល់គ្នា
ស្តីពីកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងបច្ចេកទេសផងដែរ៕