ឯកឧត្តម លាវ យន់សាន មន្ត្រីជាន់ខ្ពស់នៃបក្សកុម្មុយនីស្តចិន
ដែលបានដឹកនាំប្រតិភូបក្សកុម្មុយនីស្តចិនមកទស្សនកិច្ចនៅកម្ពុជា បានឲ្យដឹងនៅរសៀលថ្ងៃទី១១
ខែកញ្ញា ឆ្នាំ២០១៣ ថា បក្សកុម្មុយនិស្តចិនគាំទ្ររាជរដ្ឋាភិបាលកម្ពុជា ដែលដឹកនាំដោយសម្តេចអគ្គមហាសេនាបតីតេជោ
ហ៊ុន សែន។
ឯកឧត្តម លាវ យន់សាន ដែលជាសមាជិកការិយាល័យនយោបាយ
សមាជិកគណៈលេខានៃគណៈកម្មាធិការមជ្ឈឹមបក្សកុម្មុយនីស្តចិន និងជាមនុស្សសំខាន់ទី៥
ក្នុងជួរគណៈកម្មាធិការអចិន្ត្រៃយ៍នៃការិយាល័យនយោបាយមជ្ឈឹមបក្សកុម្មុយនីស្តចិន
និងគណៈប្រតិភូអមដំណើរបានអញ្ជើញមកបំពេញទស្សនកិច្ចនៅកម្ពុជារយៈពេលពីរថ្ងៃ
(១១-១២ ខែកញ្ញា ឆ្នាំ២០១៣)បានមានប្រសាសន៍បែបនេះ
ក្នុងពិធីជួបពិភាក្សាការងារជាមួយសម្តេចតេជោនាយករដ្ឋមន្ត្រីនៅវិមានសន្តិភាព
នាទីស្តីការគណៈរដ្ឋមន្ត្រី ដែលក្នុងឱកាសនោះក្រៅពីអះអាងពីការបន្តពង្រឹង
និងពង្រីកកិច្ចសហប្រតិបត្តិការរវាងប្រទេសជាតិទាំងពីរ (កម្ពុជា-ចិន) ឯកឧត្តម លាវ យន់សាន ក៏បានពាំនាំការផ្តាំផ្ញើសាកសួរសុខទុក្ខពីសំណាក់ឯកឧត្តមប្រធានាធិបតី
ឯកឧត្តមនាយករដ្ឋមន្ត្រីនៃសាធារណរដ្ឋប្រជាមានិតចិន ជូនចំពោះសម្តេចតេជោនាយករដ្ឋមន្ត្រីផងដែរ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីបានឲ្យដឹងថា
ឯកឧត្តម លាវ យន់សាន មានប្រសាសន៍ថា នេះជាខួបលើកទី ៥៥ឆ្នាំ នៃទំនាក់ទំនងការទូតមិត្តភាពកម្ពុជា-ចិន
ហើយដំណើរទេស្សនកិច្ចរបស់ឯកឧត្តម និងគណៈប្រតិភូជាន់ខ្ពស់នៃគណបក្សកុម្មុយនីស្តចិននៅកម្ពុជាពេលនេះ
គឺដើម្បីពង្រឹង និងពង្រីកបន្ថែមទៀតនូវកិច្ចសហប្រតិបត្តិការគ្រប់ជ្រុងជ្រោយ
និងជំរុញការអភិវឌ្ឍថែមទៀត ហើយក៏ជាការបង្ហាញជំហររបស់មជ្ឈឹមបក្សកុម្មុយនិស្តចិនចំពោះការគាំទ្ររាជរដ្ឋាភិបាលកម្ពុជា
ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំកម្ពុជាឆ្ពោះទៅកាន់ការអភិវឌ្ឍនោះ។
សម្តេចតេជោបានថ្លែងអំណរគុណ ចំពោះការផ្តាំផ្ញើសាកសួរសុខទុក្ខពីសំណាក់ឯកឧត្តមប្រធានាធិបតី
ឯកឧត្តមនាយករដ្ឋមន្ត្រីចិន និងបានថ្លែងអំណរគុណផងដែរ ចំពោះបក្សកុម្មុយនីស្តចិន
ដែលតែងតែគាំទ្របុព្វហេតុសន្តិភាព និងការអភិវឌ្ឍកម្ពុជា និងបានអនុញ្ញាតឲ្យយុវជនកម្ពុជាបានទៅសិក្សាបទពិសោធន៍នៅប្រទេសចិន
និងជំរុញសម្ព័ន្ធភាពរវាងខេត្ត និងខេត្ត។ សម្តេចតេជោនាយករដ្ឋមន្ត្រីបានសំដែងនូវការរីករាយ
ចំពោះសកម្មភាពនៃកិច្ច សហប្រតិបត្តិការរវាងប្រទេសទាំងពីរ ជាពិសេសលើវិស័យសេដ្ឋកិច្ច
វិនិយោគ និងទេសចរណ៍។
សូមរំលឹកផងដែរថា កម្ពុជាទទួលបាននូវការវិនិយោគយ៉ាងច្រើនពីវិស័យឯកជនរបស់ចិន
ពិសេសនៅក្នុងវិស័យហេដ្ឋារចនាសម្ព័ន្ធ ថាមពល បច្ចេកវិទ្យាព័ត៌មាន និងទូរគមនាគមន៍
កសិកម្ម និងទេសចរណ៍។ ពាណិជ្ជកម្មទ្វេភាគីរបស់ប្រទេសទាំងពីរក៏មានការកើនឡើងគួរឲ្យ
កត់សម្គាល់ ដែលតាមសិ្ថតិរបស់ចិន គឺមានទំហំប្រមាណ ២,៩ពាន់លានដុល្លារអាមេរិក
នៅឆ្នាំ ២០១២ កន្លងទៅនេះ។ ប្រការនេះបានផ្តល់នូវជំនឿដោយសុទិដ្ឋិថា
គោលដៅនៃទំហំពាណិជ្ជកម្មទ្វេភាគីកម្ពុជា-ចិន ចំនួន ៥ពាន់លានដុល្លារ
សម្រាប់ឆ្នាំ២០១៧ គឺទំនងជានឹងសម្រេចបានជាមិនខាន។
ព្រះរាជាណាចក្រកម្ពុជា
និងសាធារណរដ្ឋប្រជាមានិតចិនបានភ្ជាប់ទំនាក់ទំនងការទូតជាមួយគ្នានៅថ្ងៃទី១៩
ខែកក្កដា ឆ្នាំ១៩៥៨ ដែលចាប់តាំងពីពេលនោះរហូតមកដល់បច្ចប្បន្ននេះកិច្ច សហប្រតិបត្តិការទ្វេភាគីកម្ពុជា-ចិន
បានក្លាយយជាកិច្ចសហប្រតិបត្តិការជាដៃគូយុទ្ធសាស្ត្រគ្រប់ជ្រុងជ្រោយ ដែលបានប្រកាសឡើងកាលពីខែធ្នូ
ឆ្នាំ២០១២។ ឆ្នាំ២០១៣ នេះជាខួបលើកទី ៥៥ឆ្នាំ នៃថ្ងៃបង្កើតទំនាក់ទំនងការទូតកម្ពុជា-ចិន
ដែលភាគីទាំងពីរបានកំណត់ថា ជាឆ្នាំមិត្តភាពកម្ពុជា-ចិន តាមរយៈនេះភាគីទាំងពីរបានប្រកាសពីការរៀបចំសកម្មភាពនានា
ដើម្បីអបអរសាទរខួបអនុស្សាវរីយ៍ នៃថ្ងៃបង្កើតទំនាក់ទំនងការទូតរបស់ប្រទេសទាំងពីរឲ្យបានអធិកអធមជាទីបំផុត៕