ថ្ងៃទី ១៣ ខែ មេសា ឆ្នាំ ២០១៤
- សូមក្រាបថ្វាយបង្គំ ព្រះមង្គលសិលាចារ្យឥន្ទកេសរោ ពេជ្រ សន ព្រះមេគណខេត្ត និងព្រះថេរានុថេរៈគ្រប់ព្រះអង្គ ជាទីសក្ខារៈដ៏ខ្ពង់ខ្ពស់ !
សូមគោរព ៖
- ឯកឧត្តម បណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុក ទីស្តីការគណៈរដ្ឋមន្រ្តី ឯកឧត្តម លោកជំទាវ ទេសរដ្ឋមន្រ្តី រដ្ឋមន្រ្តី
ជាទីគោរពដ៏ខ្ពង់ខ្ពស់!
- ឯកឧត្តម ហ៊ុន ម៉ានី សមាជិករដ្ឋសភា និងជាប្រធានសហភាពសហព័ន្ធយុវជន កម្ពុជា !
- ឯកឧត្តម លោកជំទាវ សមាជិក សមាជិកា ព្រឹទ្ធសភា រដ្ឋសភា និងរាជរដ្ឋាភិបាល !
- ឯកឧត្តម លោកជំទាវ អស់លោក លោកស្រី តំណាងអង្គទូតប្រចាំនៅព្រះរាជា
ណាចក្រកម្ពុជា !
- ក្មួយៗសមាជិក សមាជិកា សហភាពសហព័ន្ធយុវជនទូទាំងប្រទេស និង ភ្ញៀវកិត្តិយសជាតិ-អន្តរជាតិ ជាទីមេត្រី !
ថ្ងៃនេះ ជាទិវាដ៏មហានក្ខត្តប្ញក្សអធិកអធម ឧត្តុង្គឧត្តម ពោរពេញដោយក្តីមោទនភាព ដែលយើងបានជួបជុំគ្នាជាថ្មីម្តងទៀត ក្នុងការរៀបចំព្រឹត្តការណ៌អង្គរ សង្រ្កាន្ត ប្រកបដោយមនោសញ្ចេតនា ជាមួយនឹងសេចក្តីសោមន្សរីករាយក្រៃលែងដើម្បីអបអរសាទរ ទទួលពរជ័យក្នុងពិធីបុណ្យចូលឆ្នាំខ្មែរប្រពៃណីជាតិ ឆ្នាំមមី ឆស័ក ព.ស ២៥៥៨ គ.ស ២០១៤ ។
ស្ថិតក្នុងបរិយាកាសដ៏សែនរីករាយនេះ ក្នុងនាមក្រុមប្រឹក្សា គណៈអភិបាលខេត្ត និងក្នុងនាមខ្លួនខ្ញុំព្រះករុណាផ្ទាល់ ខ្ញុំសូមសំដែងនូវការស្វាគមន៍យ៉ាងកក់ក្តៅបំផុត និងគារវកិច្ច ចំពោះវត្តមានដ៏ឧត្តុង្គឧត្តមរបស់ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ដែលបានឆ្លៀតឱកាស និងចំណាយពេលវេលាដ៏មានតម្លៃ និងមមាញឹក អញ្ជើញជាអធិបតីដ៏ខ្ពង់ខ្ពស់ក្នុងពិធី បើកព្រឹត្តិការណ៍អង្គរសង្រ្កាន្ត ឆ្នាំមមី ឆស័ក ព.ស ២៥៥៨ គ.ស ២០១៤ ព្រមទាំងវត្តមាន ឯកឧត្តម លោកជំទាវ ទេសរដ្ឋមន្រ្តី រដ្ឋមន្រ្តី ឯកឧត្តម ហ៊ុន ម៉ានីសមាជិករដ្ឋសភា និង ជាប្រធានសហភាពសហព័ន្ធយុវជនកម្ពុជា ឯកឧត្តម លោកជំទាវតំណាងរាស្រ្ត តំណាងអង្គទូតប្រចាំកម្ពុជា លោក លោកស្រី អ្នកនាងកញ្ញា និងក្មួយៗយុវជនទាំងអស់ ដែលបានអញ្ជើញជាអធិបតី និង ជាភ្ញៀវកិត្តិយស ដ៏ឧត្តុង្គឧត្តម ដែលញុំាងឲ្យអង្គពិធីនេះប្រព្រឹត្តទៅយ៉ាងមហាឡារិកក្រៃលែង ។
- ឯកឧត្តម ឧបនាយករដ្ឋមន្រ្តី ជាទីគោរពដ៏ខ្ពង់ខ្ពស់ !
- ឯកឧត្តម លោកជំទាវ អស់លោក លោកស្រី អ្នកនាងកញ្ញា ភ្ញៀវកិត្តិយសជាតិ-អន្តរជាតិ ជាទីគោរព និងជាទីមេត្រី !
ជាមួយនឹងភាពជោគជ័យដ៏ត្រចះត្រចង់កាលពីឆ្នាំ២០១៣កន្លងមក ព្រឹត្តិ- ការណ៌អង្គរសង្រ្កាន្តឆ្នាំ២០១៤នេះ ត្រូវបានផ្តួចផ្តើម និង រៀបចំជាថ្មីម្តងទៀត ដោយសហភាពសហព័ន្ធយុវជនកម្ពុជា និង ដោយមានកិច្ចសហការគាំទ្រយ៉ាង ពេញលេញពីសំណាក់ក្រសួង ស្ថាប័ន មន្ទីរ-អង្គភាពពាក់ព័ន្ធ និងអាជ្ញាធរមូលដ្ឋាន ក្នុងខេត្តសៀមរាប។ ទោះបីជាពុំទាន់មានបទដ្ឋានកំណត់ក៏ដោយ ក៏អង្គរសង្រ្កាន្ត បានក្លាយជាព្រឹត្តិការណ៌វប្បធម៌ដ៏ធំមួយប្រចាំឆ្នាំក្នុងខេត្តសៀមរាប ដែលអាច ចាត់ទុកជាសម្បត្តិបេតិកភណ្ឌដ៏ស្តុកស្តម្ភ ហើយមានតម្លៃយ៉ាងជ្រាលជ្រៅសម្រាប់ ការអភិវឌ្ឍសេដ្ឋកិច្ច និង សង្គម តាមរយៈការលើកកម្ពស់តម្លៃវប្បធម៌ សង្គមធម៌ នៃព្រះរាជាណាចក្រកម្ពុជា ដែលជារដ្ឋមួយដ៏ចំណាស់ក្នុងតំបន់អាស៊ីអាគ្នេយ៍។ ភាពល្បីល្បាញប្រកបដោយកិត្យានុភាពនៃវប្បធម៌ និងការផ្សព្វផ្សាយព្រឹត្តិការណ៌នេះ យើងរំពឹងទុកថានឹងទាក់ទាញបាននូវកំណើនភ្ញៀវទេសចរជាតិ និងអន្តរជាតិ ឲ្យមក ទស្សនាខេត្តសៀមរាបកាន់តែច្រើនឡើងថែមទៀត ដើម្បីចូលរួមកម្សាន្តសប្បាយក្នុងពិធីបុណ្យចូលឆ្នាំខ្មែរប្រពៃណីជាតិ ជាមួយនឹងការទស្សនាកម្មវិធីផ្សេងៗ នៃ ព្រឹត្តិការណ៌អង្គរសង្រ្កាន្ត ក្នុងរយៈពេល៣ថ្ងៃនេះនៅលើទីតាំងផ្សេងៗជាច្រើនកន្លែង ក្នុងតំបន់រមណីយដ្ឋានអង្គរ ក៏ដូចជាក្នុងក្រុងសៀមរាបផងដែរ។
- ឯកឧត្តម ឧបនាយករដ្ឋមន្រ្តី ជាទីគោរពដ៏ខ្ពង់ខ្ពស់ !
- ឯកឧត្តម លោកជំទាវ អស់លោក លោកស្រី អ្នកនាងកញ្ញា ភ្ញៀវកិត្តិយសជាតិ-អន្តរជាតិ ជាទីគោរព និងជាទីមេត្រី !
ជាការពិតណាស់ ព្រឹត្តិការណ៌អង្គរសង្រ្កាន្តឆ្នាំនេះ បានប្រារព្ធធ្វើឡើងក្នុង ស្ថានភាពដែលព្រះរាជាណាចក្រកម្ពុជា កំពុងស្ថិតនៅលើមាគ៌ាអភិវឌ្ឍន៌រីកចំរើន លើគ្រប់វិស័យ និងកំណើនសេដ្ឋកិច្ចប្រកបដោយចរីភាព ក្នុងក្របខ័ណ្ឌសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គមក្រោមការដឹកនាំប្រកបដោយ គតិបណ្ឌិតរបស់រាជរដ្ឋាភិបាល នីតិកាលទី៥ នៃរដ្ឋសភា ដែលមានសម្តេចអគ្គ មហាសេនាបតីតេជោ ហ៊ុន សែន ជាប្រមុខដឹកនាំដ៏ឆ្នើម ។
ក្នុងបរិបទនេះ ខេត្តសៀមរាបក៏មានកាលានុវត្តភាព ជម្រុញកំណើនសេដ្ឋកិច្ច-សង្គម និងការអភិវឌ្ឍរីកចម្រើនគួរឲ្យកត់ក្នុងរយៈពេលកន្លងមក មានជាអាទិ៍ វិស័យ ទេសចរណ៌ កសិកម្ម សិប្បកម្ម និងសេវាកម្មផ្សេងៗជាដើម បានដើរតួនាទីយ៉ាង សំខាន់ប្រកបដោយសក្តានុពលក្នុងការរួមចំណែកសម្រេចបាននូវគោលដៅ ជា យុទ្ធសាស្រ្តក្នុងការកាត់បន្ថយភាពក្រីក្ររបស់ប្រជាពលរដ្ឋ ។
ទន្ទឹមនឹងនេះ អាជ្ញាធរខេត្តសៀមរាប ក៏បានសហការជាមួយអាជ្ញាធរអប្សរា ក្រសួង ស្ថាប័នពាក់ព័ន្ធ ហើយជាពិសេសដោយបានការជួយជ្រោមជ្រែង ដោយឥត សំចៃពីសំណាក់ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្រ្តី ទទួលបន្ទុកទីស្តីការគណៈរដ្ឋមន្រ្តី និងជាប្រធានអាជ្ញាធរអប្សរា ដែលជានិច្ចកាល បានផ្តល់ការគាំទ្រ ទាំងស្មារតី និងថវិកា ក្នុងការរៀបចំកែលម្អសោភ័ណភាពក្រុង និងហេដ្ឋារចនាសម្ព័ន្ធក្រុងសៀមរាប ហើយដែលសមទ្ធិផលទាំងនេះ បានបង្កលក្ខណៈ ងាយស្រួលជាច្រើនសម្រាប់ប្រជាពលរដ្ឋក្នុងខេត្ត ក៏ដូចជាភ្ញៀវទេសចរជាតិ អន្តរជាតិ ដែលមកទស្សនាកម្សាន្ត មានចំនួនកើនឡើងកាន់តែច្រើនពីមួយឆ្នាំទៅមួយឆ្នាំ ជាពិសេសក្នុងពិធីបុណ្យចូលឆ្នាំខ្មែរប្រពៃណីជាតិ និង ព្រឹត្តការណ៌អង្គរសង្រ្កាន្តនេះ។
ឆ្លៀតក្នុងឱកាសនេះ ក្នុងនាមអាជ្ញាធរខេត្ត ខ្ញុំព្រះករុណាខ្ញុំ សូមធ្វើការគាំទ្រ និងសូមថ្លែងអរគុណចំពោះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជន កម្ពុជា និងសហការីទាំងអស់ ដែលបានផ្តួចផ្តើមរៀបចំព្រឹត្តិការណ៍អង្គរសង្រ្កាន្តនេះ ឡើងនៅលើទឹកដីខេត្តសៀមរាបនេះ នាំមកនូវភាពត្រជាក់ត្រជុំ ថ្កុំថ្កើងដល់ទឹកដី អតីតមហានគរខ្មែរក្នុងសម័យអធិរាជាណាចក្រកម្ពុជាដ៏រុងរឿង ។
ខ្ញុំព្រះករុណាខ្ញុំ សូមឆ្លៀតយកឱកាសដ៏ប្រពៃនេះ ដើម្បីថ្លែងអំណរគុណ ដ៏ជ្រាលជ្រៅចំពោះ ឯកឧត្តម បណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ដែលបានយកចិត្តទុកដាក់ចំណាយ ពេលវេលាដ៏មានតម្លៃអញ្ជើញជាអធិបតីដ៏ខ្ពង់ខ្ពស់ក្នុងព្រឹត្តិការណ៌អង្គរសង្រ្កាន្ត ជា សក្ខីភាពនៃការលើកទឹកចិត្តដ៏សំខាន់ដល់យុវជន ឲ្យបន្តកិច្ចប្រឹងប្រែងទាំងកម្លាំង កាយចិត្ត និងប្រាជ្ញាស្មារតី ដើម្បីអភិវឌ្ឍសមត្ថភាពឲ្យរឹងមាំសម្រាប់ជាសរសរទ្រូង នៃការអភិវឌ្ឍប្រទេសជាតិក្នុងពេលបច្ចុប្បន្ន និងទៅអនាគត។
ជាទីបញ្ចប់ ខ្ញុំសូមបួងសួងដល់ទេវតាឆ្នាំថ្មី និង បារមីដែលរក្សាទឹកដីអង្គរ សូមតាមប្រោសប្រទានសព្វសាធុការពរជ័យ ប្រគេនព្រះថេរានុថេរៈគ្រប់ព្រះអង្គ និងជូនឯកឧត្តមឧបនាយករដ្ឋមន្រ្តី ឯកឧត្តម លោកជំទាវ អស់លោក លោកស្រី អ្នកនាងកញ្ញាទាំងអស់ និងសូមមេត្តាជួបប្រទះតែនឹងពុទ្ធពរទាំងបួនប្រការ គឺ អាយុ វណ្ណៈ សុខៈ និង ពលៈ កុំបីឃ្លៀងឃ្លាតឡើយ។