ឯកឧត្តមបណ្ឌិតសភាចារ្យ សុខ អាន ឧបនាយក-រដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី បានអញ្ជើញ បំពេញ ទស្សនកិច្ច ពិសេស ទៅកាន់ សហរដ្ឋអាមេរិក ក្នុងនាមរាជរដ្ឋាភិបាលក ម្ពុជា ដឹក នាំ ដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដើម្បីចូលរួមពិធីប្រគល់-ទទួលរូបចម្លាក់ទុរយោធន៍ (DURYODHANA) នៅទីក្រុងញូវយ៉ក កាលពី រសៀលថ្ងៃទី០៧ ខែឧសភា ឆ្នាំ២០១៤ ជាមួយនឹងវត្តមាន របស់លោក Preet Bhararaរដ្ឋអាជ្ញាប្រចាំតំបន់ភាគខាងត្បូងទីក្រុងញូវយ៉ក សហរដ្ឋអាមេរិក។ ដំណើរទស្សនកិច្ចនេះ ផ្តោតសំខាន់លើសារសំខាន់នៃគោលនយោបាយរបស់រាជរដ្ឋាភិបាលកម្ពុជា ក្នុងការទាមទារមកវិញនូវបុរាណវត្ថុខ្មែរដែលត្រូវបានលួច។ ពិធីនេះក៏ទទួលបានការចូលរួមផងដែរពីតំណាងក្រសួងសន្តិសុខជាតិសហរដ្ឋអាមេរិក អង្គការយូណេស្កូ សាលាបារាំងចុងបូព៌ា និងរាជរដ្ឋាភិបាលកម្ពុជា ជាសាក្សីនៃពិធីនេះ។
រូបចម្លាក់ទុរយោធន៍ត្រូវបានលួចចេញក្នុងទសវត្សឆ្នាំ១៩៧០ ពីប្រាសាទចិននៃរមណីយដ្ឋានកោះកេរដែល ជាទីតាំងបុរាណវិទ្យាដ៏ឆ្ងាយដាច់ស្រយាលមួយ នៅភាគខាងជើងនៃប្រទេសកម្ពុជា ដែលជាគោលដៅនៃការលួចគ្រប់ទិសទី ក្នុងអំឡុងសង្រ្គាមស៊ីវិលរយៈពេល២ទសវត្សនៅកម្ពុជា ដែលបានចាប់ផ្តើមឡើងចាប់ពីចុងទសវត្សឆ្នាំ១៩៦០ ដោយរួមបញ្ជូលទាំងរបបមហាវិនាសកម្មខ្មែរក្រហមផងដែរ។
នៅខែមីនា ឆ្នាំ២០១១ ក្រុមហ៊ុនលក់វត្ថុបុរាណ Sotheby’s បានដាក់ដេញថ្លៃលក់រូបចម្លាក់ទុរយោធន៍របស់ កម្ពុជា នៅទីក្រុងញូវយ៉ក សហរដ្ឋអាមេរិក នៅក្នុងសៀវភៅបញ្ជីបុរាណវត្ថុរបស់ខ្លួនសម្រាប់ការលក់ដេញថ្លៃ ឈ្មោះសប្តាហ៍អាស៊ី ហើយការលក់ដេញថ្លៃមួយត្រូវបានកំណត់ឱ្យចាប់ផ្តើមនៅថ្ងៃច័ន្ទនៃសប្តាហ៍បន្ទាប់ នៅ ទីក្រុងញូវយ៉ក។
ក្រុមអ្នកស្រាវជ្រាវនៃសាលាបារាំងចុងបូព៌ាពិតជាបានជួយបង្ហាញឱ្យឃើញយ៉ាងច្បាស់នូវសិទ្ធិរបស់កម្ពុជា លើ រូបចម្លាក់ទុរយោធន៍ បន្ទាប់ពីការរកឃើញនូវជើងទម្រនៅប្រាសាទចិន ក្នុងរមណីយដ្ឋានកោះកេរ ប្រទេសកម្ពុជា។
ការដាក់ដេញថ្លៃត្រូវបានកំណត់នៅថ្ងៃទី២៤ ខែមីនា ឆ្នាំ២០១១ ប៉ុន្តែត្រូវបានបញ្ឈប់ទៅវិញ នៅពេលដែលរាជរដ្ឋាភិបាលកម្ពុជាបានសរសេរលិខិតមួយទៅកាន់ក្រុមហ៊ុន Sotheby’s ដោយស្នើឱ្យក្រុមហ៊ុនផ្អាកការដាក់ លក់ដេញថ្លៃនេះ ហើយប្រគល់រូបចម្លាក់ទុរយោធន៍មកឱ្យកម្ពុជាវិញ។ គួររំលឹកផងដែរថា គំនិតផ្តួចផ្តើមនេះ គឺផ្តើមចេញមកពីការពិភាក្សាប្រកបដោយផ្លែផ្ការវាងឯកឧត្តម ច័ន្ទ តានី រដ្ឋលេខាធិការនៃទីស្តីការគណៈរដ្ឋមន្រ្តី និងឯកឧត្តម Jeff Daigle ភារធារីស្តីទីស្ថានទូតសហរដ្ឋអាមេរិកប្រចាំនៅកម្ពុជា។
កាលពីខែមេសា ឆ្នាំ២០១២ ក្នុងនាមកម្ពុជា រដ្ឋអាជ្ញាសហរដ្ឋអាមេរិកបានដាក់ពាក្យបណ្តឹងរដ្ឋប្បវេណីទៅតុលាការសហព័ន្ធដើម្បីទាមទារឱ្យមានការរិបអូសរូបចម្លាក់នេះ។
ដំណើរការនីតិវិធីនៅតុលាការបានបញ្ចប់នៅខែធ្នូ ឆ្នាំ២០១៣ នៅពេលដែលក្រុមហ៊ុនលក់វត្ថុបុរាណ Sotheby’s សម្រេចដោះស្រាយជម្លោះ ដោយព្រមព្រៀងប្រគល់រូបចម្លាក់ទុរយោធន៍មកកម្ពុជាវិញ។
ក្នុងពិធីនេះ ក្នុងនាមរាជរដ្ឋាភិបាលកម្ពុជា ឯកឧត្តមបណ្ឌិតសភាចារ្យ សុខ អាន បានបំពាក់គ្រឿងឥស្សរិយយសនៃព្រះរាជាណាចក្រកម្ពុជា ជូនតំណាងការិយាល័យរដ្ឋអាជ្ញាសហរដ្ឋអាមេរិកប្រចាំតំបន់ភាគខាងត្បូងទីក្រុងញូវយ៉ក ក្រសួងសន្តិសុខជាតិសហរដ្ឋអាមេរិក និងសាលាបារាំងចុងបូព៌ា។
រាជរដ្ឋាភិបាលកម្ពុជាសូមថ្លែងអំណរគុណចំពោះរដ្ឋាភិបាលសហរដ្ឋអាមេរិក ជាពិសេសស្ថានទូតសហរដ្ឋអាមេរិក ក្នុងទីក្រុងភ្នំពេញ ចំពោះការប្តេជ្ញាចិត្តក្នុងការអភិរក្សបេតិកភណ្ឌវប្បធម៌របស់មនុស្សជាតិ និងឆន្ទៈ ដ៏មោះមុតក្នុងការលើកកម្ពស់មិត្តភាព និងកិច្ចសហប្រតិបត្តិការរវាងប្រទេសទាំងពីរ និងសូមធ្វើការអំពាវនាវ ដល់សារមន្ទីរ និងអ្នកប្រមូលទុកបុរាណវត្ថុដ៏ទៃទៀតនៅទូទាំងពិភពលោក ឱ្យអនុវត្តតាមគម្រូនៃការប្រគល់ ត្រឡប់មកវិញនូវរតនៈវត្ថុដែលត្រូវបានលួច ទៅឱ្យម្ចាស់ស្របច្បាប់វិញ ដែលនេះ គឺជាការរួមចំណែកក្នុងយុទ្ធនាការជាសកលសម្រាប់ការការពារបេតិកភណ្ឌវប្បធម៌។
សម្រាប់ព័ត៌មានបន្ថែម សូមទំនាក់ទំនងៈ
ឯកឧត្តម ច័ន្ទ តានី
រដ្ឋលេខាធិការនៃទីស្តីការគណៈរដ្ឋមន្រ្តី
ទូរស័ព្ទដៃៈ +៨៥៥-១២-៨០៤ ៦៩៩
អ៊ីម៉េលៈ chantanim@gmail.com