លោក George Yong Boon Yed ប្រធានក្រុមហ៊ុន Kerry Logisties មកពីប្រទេសសិង្ហបុរី បានចាត់ទុកប្រទេសកម្ពុជាសព្វថ្ងៃ ពោរពេញទៅដោយភាពរស់រវើក បើប្រៀបធៀបទៅនឹងទសវត្ស ១៩៩០ កម្ពុជានៅពេលនេះ គឺពិតជាមានការផ្លាស់ប្តូរគួរជាទីពេញចិត្តជាទីបំផុត។
នៅក្នុងឱកាសចូលសម្តែងការគួរសម ជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅវិមានសន្តិភាព ទីស្តីការគណៈរដ្ឋមន្ត្រី នាព្រឹកថ្ងៃទី០៩ ខែមិថុនា ឆ្នាំ២០១៤ លោក George Yong Boon Yed អតីតរដ្ឋមន្ត្រីការបរទេសសិង្ហបុរី និងជានាយកប្រតិបត្តិនៃក្រុមហ៊ុន Kerry Logisties បានមានប្រសាសន៍ថា នេះគឺជាលើកទី៣ ដែលរូបលោកបានមកកាន់ប្រទេសកម្ពុជា និងបានមើលឃើញពីការអភិវឌ្ឍរបស់ប្រទេសកម្ពុជាគួរជាទីមោទនភាពបំផុត។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីបានឲ្យដឹងថា លោក George Yong Boon Yed បានជម្រាបជូនសម្តេចតេជោនាយករដ្ឋមន្ត្រីថា រូបលោកបានជួបជនជាតិសិង្ហបុរីជាច្រើនដែលមកកម្ពុជា ទាំងអ្នកទេសចរក៏ដូចជាអ្នកជំនួញ និងអ្នកបម្រើលើការងាររបស់អង្គការក្រៅរដ្ឋាភិបាលដែលពួកគេទាំងអស់បាន ពោលពាក្យយ៉ាងល្អអំពីកម្ពុជា។
លោក George Yong Boon Yed មានប្រសាសន៍ឲ្យដឹងថា នេះគឺជាដំណាក់កាលថ្មីមួយសម្រាប់កម្ពុជាដែលពោរពេញទៅដោយភាពរស់រវើក ពោលបើប្រៀបធៀបទៅនឹងទសវត្ស១៩៩០ កម្ពុជានៅពេលនេះ គឺពិតជាមានការផ្លាស់ប្តូរគួរជាទីពេញចិត្តជាទីបំផុត។ លោក George Yong Boon Yed បានជម្រាបជូនសម្តេចតេជោដែរថា ដំណើរទស្សនកិច្ចរបស់លោកមកកាន់កម្ពុជានៅពេលនេះ គឺក្នុងតួនាទីថ្មីជាប្រធានក្រុមហ៊ុន Kerry Logisties និងមានទិសដៅដើម្បីក្រុមហ៊ុនភស្តុភារ Kerry នៅក្នុងតំបន់សេដ្ឋកិច្ចពិសេសនៅកម្ពុជា។
ដោយហេតុថា កម្ពុជាមានសក្តានុពលខ្ពស់ ពិសេសហេដ្ឋារចនាសម្ព័ន្ធមានភាពល្អប្រសើរ លោក George Yong Boon Yed បានមានប្រសាសន៍បញ្ជាក់ថា ក្រុមហ៊ុនលោកមានបំណងបើកក្រុមហ៊ុននៅក្នុងតំបន់សេដ្ឋកិច្ចពិសេស ដែលមានឃ្លាំងស្តុកទំនិញដើម្បីផ្គត់ផ្គង់ក្នុងស្រុក និងនាំចេញទៅកាន់ទីផ្សារក្នុងតំបន់ និងជាទីកន្លែងសម្រាប់ឆ្លងកាត់ទំនិញទៅកាន់ប្រទេសដទៃទៀតតាមផ្លូវគោក។
លោកប្រធានក្រុមហ៊ុន Kerry Logisties បានមានប្រសាសន៍ឲ្យដឹងថា បញ្ហាភស្តុភារវានឹងបម្រើឲ្យយន្តការសេដ្ឋកិច្ចកម្ពុជាផង និងសម្រាប់តំបន់ផង ហើយវាក៏ជារបៀបសេដ្ឋកិច្ចថ្មីមួយនៅក្នុងនយោបាយដែលមានស្រាប់ ដែលត្រូវទទួលបាននូវការអនុវត្តដោយក្រុមហ៊ុន Kerry Logisties ផ្ទាល់តែម្តង។ លោកប្រធានក្រុមហ៊ុន ក៏បានគោរពស្នើសុំសម្តេចតេជោនាយករដ្ឋមន្ត្រីធ្វើការគាំទ្រដល់គម្រាងបណ្តាក់ទុនវិនិយោគក្រុមហ៊ុនរបស់លោកនៅកម្ពុជា។
សម្តេចតេជោនាយករដ្ឋមន្ត្រីបានមានប្រសាសន៍ស្វាគមន៍ ចំពោះគម្រោងវិនិយោគរបស់ក្រុមហ៊ុន Kerry Logisties នៅកម្ពុជា ដោយបានណែនាំឲ្យឯកឧត្តម សុខ ចិន្តាសោភា ធ្វើការសហការជាមួយនឹងឯកឧត្តមឧបនាយករដ្ឋមន្ត្រីប្រចាំការ គាត ឈន់ ដើម្បីពិនិត្យមើលពីលក្ខណៈច្បាប់ និងធ្វើការសម្រួលដល់បញ្ហាទាំងអស់នោះ។
សម្តេចតេជោនាយករដ្ឋមន្ត្រីមានប្រសាសន៍ឲ្យដឹងថា កម្ពុជាកន្លងមកគឺ ជាប្រទេសមួយដែលធ្លាប់តែរង់ចាំទទួលជំនួយ ប៉ុន្តែឥឡូវនេះកម្ពុជាកំពុងតែបោះជំហានទៅមុខលើវិស័យពាណិជ្ជកម្ម។ “ការធ្វើពាណិជ្ជកម្មបែរមុខទៅរកប្រទេសខាងក្រៅកាន់តែធំទូលាយឡើង”។ សម្តេចតេជោមានប្រសាសន៍ថា បញ្ហាភស្តុភារ គឺជាបញ្ហាមួយដែលត្រូវបានលើកយកមកពិភាក្សាក្នុងប្រធានបទមួយនៅក្នុងកម្មវិធីកំណែទម្រង់សេដ្ឋកិច្ចរបស់កម្ពុជាផងដែរ៕