សម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្រ្តី នៃព្រះរាជាណាចក្រកម្ពុជា នៅថ្ងៃទី១៦មិថុនានេះ
បានចាប់ផ្តើមដំណើរទស្សនកិច្ចផ្លូវការរយៈពេល៣ថ្ងៃ
នៅទីក្រុងដាកា (Dhaka) នៃសាធារណរដ្ឋប្រជាមានិតបង់ក្លាដែស។ យន្តហោះពិសេសរបស់ព្រះរាជាណាចក្រកម្ពុជា
បានដឹកនាំគណៈប្រតិភូ
ជាន់ខ្ពស់រាជរដ្ឋាភិបាលកម្ពុជា
ធ្វើការចុះចតនៅចំណតអាកាសយានដ្ឋានអន្តរជាតិ
Hazrat Shahhalal ប្រ
កបដោយសុវត្តិភាព នៅវេលាម៉ោង៩និង៥០នាទី ម៉ោងនៅទីក្រុងដាកា ប្រទេសបង់ក្លាដែស
ត្រូវនិងម៉ោង ១០និង៥០នាទី ម៉ោងនៅព្រះរាជាណាចក្រកម្ពុជា។
នៅចំណតអាកាសយានដ្ឋានអន្តរជាតិ
Hazrat Shahhalal វត្តមាននៃការអញ្ជើញដល់របស់សម្តេចតេជោនាយករដ្ឋមន្រ្តី
ត្រូវបានការធ្វើគារវកិច្ចស្វាគមន៍
យ៉ាងកកក្តៅ និងស្នាលស្នាលរ៉ាក់ទាក់បំផុត ពីសំណាក់លោកជំទាវ ហ្សេក
ហាស៊ីណា (Sheikh Hasina) នាយករដ្ឋមន្រ្តី
នៃសាធារណរដ្ឋប្រជាមានិតបង់ក្លាដែស
និងឥស្សរជនបង់ក្លាដេសជាច្រើនរូប។
នៅក្នុងពិធីបដិសណ្ឋារកិច្ចផ្លូវការដែលធ្វើឡើង នៅចំណតអាកាសយានដ្ឋានអន្តរជាតិ Hazrat
Shahhalal សម្តេចអគ្គមហាសេនាបតីតេជោ ហ៊ុន
សែន នាយករដ្ឋមន្រ្តីនៃព្រះរាជាណាចក្រកម្ពុជា
ដែលអមដំណើរដោយផ្ទាល់ពីសមភាគីបង់ក្លាដែស
លោកជំទាវ ហ្សេក ហាស៊ីណា
នាយករដ្ឋមន្រ្តីបង់ក្លាដេស
អញ្ជើញគោរពទង់ជាតិនៃប្រទេសទាំងពីរ ព្រះរាជាណាចក្រកម្ពុជា
សាធារណរដ្ឋប្រជាមានិតបង់ក្លាដែស ក្នុងទិដ្ឋភាពដូចតទៅ (ដាក់សម្លេងគោរពទង់ជាតិកម្ពុជា-បង់ក្លាដែស និងដើរត្រួតពលកងកិត្តិយស)
សូមបញ្ជាក់ថា នេះគឺជាលើកទី១
នៃដំណើរបំពេញទស្សនកិច្ចផ្លូវការរបស់
សម្តេចអគ្គមហាសេនាបតីតេជោ ហ៊ុន
សែន ប្រមុខនៃរាជរដ្ឋាភិបាលកម្ពុជា អញ្ជើញទៅបំពេញទស្សនកិច្ចផ្លូវការ នៅសាធារណរដ្ឋប្រជាមានិតបង់ក្លាដែស បន្ទាប់ពីប្រទេសទាំងពីរ ព្រះរាជាណាចក្រកម្ពុជា និងសាធារណរដ្ឋប្រជាមានិតបង់ក្លាដែស បានភ្ជាប់ទំនាក់ទំនងការទូតជាមួយគ្នា
កាលពីថ្ងៃទី១៧ខែកុម្ភៈឆ្នាំ ១៩៩៣។
ដូចគ្នានិងដំណើរទស្សនកិច្ចផ្លូវការរបស់ សម្តេចតេជោនាយករដ្ឋមន្រ្តី កាលពីខែមករាឆ្នាំ២០០១ លោកជំទាវ
ហ្សេក ហាស៊ីណា
នាយករដ្ឋមន្រ្តីបង់ក្លាដេស
បានដឹកនាំគណៈប្រតិភូជាន់ខ្ពស់រដ្ឋាភិបាលបង់ក្លាដែស
អញ្ជើញបំពេញទស្សនកិច្ចផ្លូវការរយៈពេល៣ថ្ងៃ នៅព្រះរាជាណាចក្រកម្ពុជា។ ក្នុងរយៈពេលជាង២១ឆ្នាំកន្លងមកនេះ
ប្រទេសទាំងពីរកម្ពុជា-បង់ក្លាដែស បានពង្រឹងនិងពង្រីកទំនាក់ទំនងកិច្ចសហប្រតិបត្តិការជាមួយគ្នា មានការរីកចំរើនលើគ្រប់វិស័យ ពិសេសលើទំនាក់ទំនងអន្តរជាតិប្រទេសទាំងពីរកម្ពុជា-បង់ក្លាដែស បានធ្វើការគាំទ្រគ្នាទៅវិញទៅមក
ក្នុងនោះកម្ពុជាបានគាំទ្រដល់បេក្ខភាពរបស់បង់ក្លាដេស
ជាសមាជិកក្រុមប្រឹក្សាប្រតិបត្តិ នៃអង្គការយូណេស្កូ។
បេក្ខភាពនៅក្នុងអង្គការនៃសមុទ្រអន្តរជាតិក្នុងក្រុមB។ ជាសមាជិកក្រុមប្រឹក្សាប្រតិបត្តិសហភាពទូរគមនាគមន៍អន្តរជាតិ។
បេក្ខភាពនៅក្នុងក្រុមប្រឹក្សាសិទ្ធមនុស្ស
របស់អង្គការសហប្រជាជាតិ
អាណត្តិ២០១៥-២០១៧ ។
សមាជិកគណៈកម្មាធិការ
ស្តីពីការលុបបំបាត់ការរើសអើងប្រឆាំងស្រ្តីភេទ
របស់អង្គការសហប្រជាជាតិអាណត្តិ២០១៥-២០១៨ ជាមួយគ្នានេះបង់ក្លាដែសបានគាំទ្រកម្ពុជា
ជាសមាជិកគណៈកម្មាធិការបេតិកភណ្ឌពិភពលោក
និងសមាជិកមិនអចិន្រៃ្តយ៍
នៃក្រុមប្រឹក្សាសន្តិសុខ អង្គការសហប្រជាជាតិអាណត្តិ២០១៣-២០១៤។ ដំណើរបំពេញទស្សនកិច្ចផ្លូវការរបស់
សម្តេចតេជោនាយករដ្ឋមន្រ្តី
ទៅកាន់ទីក្រុងដាកាសាធារណរដ្ឋប្រជាមានិតបង់ក្លាដេសនៅពេលនេះ
គឺដើម្បីពង្រឹងនិងពង្រីកទំនាក់ទំនងកិច្ចសហប្រតិបត្តិការ
នៃប្រទេសទាំងពីរកម្ពុជា-បង់ក្លាដែស ឲ្យកាន់តែរឹងមាំថែមទៀត ពិសេសការជំរុញទំនាក់ទំនងពាណិជ្ជកម្ម
ទេសចរណ៍ នៃប្រទេសទាំងពីរឲ្យឈានដល់ចំណុច កំពូលថ្មីមួយទៀត។