ស្ពានអាកាសស្ទឹងមានជ័យ បានសម្ពោធបើកឱ្យប្រើប្រាស់ជាផ្លូវការ
នៅព្រឹកថ្ងៃទី៣១ខែកក្កដា ឆ្នាំ២០១៤ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ
ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ។
ស្ពានអាកាសស្ទឹងមានជ័យគឺជាស្ពានអាកាសទី៣
និងជាសមិទ្ធផលថ្មីមួយទៀត បន្ទាប់ពីស្ពានអាកាសក្បាលថ្នល់ និងស្ពានអាកាស៧មករា
ដែលបានកើតឡើងក្នុងរយៈពេលត្រឹមតែ ២ឆ្នាំ ប៉ុណ្ណោះ ។
ឯកឧត្ដម ប៉ា សុជាតិវង្ស
អភិបាលរាជធានីភ្នំពេញ បានបញ្ជាក់ថា សមិទ្ធផល ទាំងអស់នេះ
បានកើតចេញពីមនុញ្ញផលនៃសុខសន្តិភាព ស្ថេរភាពនយោបាយ និងការអភិវឌ្ឍ
លើគ្រប់វិស័យរបស់រាជរដ្ឋាភិបាល ក្រោមការដឹកនាំ ប្រកបដោយភាពឈ្លាសវៃ
និងគតិបណ្ឌិត របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី
នៃព្រះរាជាណាចក្រកម្ពុជា ។
ស្ពានអាកាសស្ទឹងមានជ័យ
ស្ថិតនៅក្នុងភូមិសាស្ត្រមុំនៃសង្កាត់ចំនួន៣ គឺសង្កាត់មានជ័យ នៃខណ្ឌមានជ័យ, សង្កាត់ទំនប់ទឹក នៃខណ្ឌចំការមន និងសង្កាត់បឹងសាឡាង នៃ ខណ្ឌ ទួលគោក
ដែលបានអនុវត្តការសាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC)។
ស្ពានអាកាសនេះ ផ្អែកតាមកិច្ចសន្យា គឺត្រូវប្រើរយៈពេល២៨ខែ
ដើម្បីសាងសង់ ដោយចាប់ផ្តើមពីថ្ងៃទី២៦ខែវិច្ឆិកា ឆ្នាំ២០១២
ហើយគ្រោងបញ្ចប់នៅថ្ងៃទី២៦ ខែមីនា ឆ្នាំ២០១៥
ប៉ុន្តែជាក់ស្តែងដោយមានកិច្ចខិតខំប្រឹងប្រែង ក្នុងការស្ថាបនាទាំងថ្ងៃទាំងយប់
ធ្វើឱ្យការសាងសង់នេះ ប្រើរយៈពេលត្រឹមតែ២០ខែប៉ុណ្ណោះ ដោយចំណាយថវិកាសាងសង់
សរុបចំនួន១៨លាន៩សែន ៧ម៉ឺន ៦.៦៧៨ដុល្លារអាមេរិក
ជាកញ្ចប់ថវិកាដែលបានមកពីការវិនិយោគដីជ្រោយចង្វារ
របស់ក្រុមហ៊ុនវិនិយោគទុនអាណិកជនកម្ពុជា (OCIC)។
ស្ពានអាកាសស្ទឹងមានជ័យ រួមមានស្ពានចំនួន៥ ក្នុងនោះមាន ស្ពានមេ១
ស្ពានតូច៣ និងផ្លូវក្រោមដី១ ។ ចំពោះលក្ខណៈបច្ចេកទេសរបស់ស្ពាននេះជាស្ពានបេតុងអាមេ
អាចទទួលទំងន់សរុប ២៥តោន។ បច្ចេកទេសនៃការសាងសង់គឺស្ពានមេ មានសសរ២
ឯស្ពានតូចមានសសរ១ ដោយចន្លោះសសរពីមួយទៅមួយ មានគម្លាតពី២០ទៅ៣០ម
និងមានបង្កាន់ដៃស្ពាន កំពស់ជាង១ម ។
សម្តេចតេជោ ហ៊ុន សែន បានកោតសរសើរដល់សាលារាជធានីភ្នំពេញ
និងក្រុម ហ៊ុនដែលបានខិតខំ ជំរុញការសាងសង់បានសម្រេចជោគជ័យមុនការគ្រោងទុក
និងបានថ្លែងអំណរគុណចំពោះប្រជាពលរដ្ឋដែលរស់នៅជុំវិញស្ពានអាកាសស្ទឹងមានជ័យ
ដែលទទួលផលប៉ះពាល់ពីការសាងសង់ដោយ បានទ្រាំទ្រនូវការលំបាកមួយរយៈពេលនៃការ
សាងសង់ស្ពានអាកាសនេះ។ក្នុងឱកាសនៃការសម្ពោធនេះដែរ សម្តេចតេជោហ៊ុន សែន
ក៏បានប្រកាសចាប់ផ្តើមការសាងសង់ស្ពានអាកាសទី៤ និងផ្លូវក្រោមដី
នៅចំណុចវិទ្យាស្ថានពហុបច្ចេកវិទ្យាកម្ពុជា ប្រសព្វរវាងមហាវិថីសហព័ន្ធរុស្ស៊ី
មហាវិថីម៉ៅសេទុង និងមហាវិថីគីមអ៊ីលស៊ុង។
ក្នុងនេះដែរ សម្តេចតេជោនាយករដ្ឋមន្ត្រី
បានអនុញ្ញាតតាមសំណើរបស់សាលារាជធានីភ្នំពេញ
ដែលសុំរៀបចំទីតាំងក្រោមស្ពានអាកាសស្ទឹងមានជ័យ
ឱ្យក្លាយជាកន្លែងកំសាន្ត និងកន្លែងហាត់ប្រាណ ដោយត្រូវចាក់គម្រប
លើប្រព័ន្ធលូក្រោមស្ពាន ព្រមទាំងដាំស្មៅ ដាំផ្កា កូនឈើ
ដាក់បង់ថ្មសម្រាប់អង្គុយលំហែកាយ ដែលការសាងសង់នេះជាបន្ទុករបស់ក្រុមហ៊ុន OCIC ។ តាមរយៈសមិទ្ធផលស្ពានអាកាសនេះ សម្តេចតេជោ ក៏មិនភ្លេចពីការ
អំពាវនាវជាថ្មីម្តងទៀតចំពោះប្រជាពលរដ្ឋ ឱ្យគោរពច្បាប់ចរាចរ ជាពិសេសបើកបរដោយមានការប្រុងប្រយ័ត្នដើម្បីរក្សាសុវត្ថិភាព
។
ដើម្បីកាត់បន្ថយការកកស្ទះចរាចរក្នុងរាជធានីភ្នំពេញ សម្តេចតេជោ
នាយករដ្ឋមន្ត្រីក៏បានជំរុញសាលារាជធានីភ្នំពេញ
ត្រូវធ្វើឱ្យបាននូវការដោះស្រាយបញ្ហាសេវារថយន្តក្រុង ឱ្យបាន ដែលបញ្ហានេះ
សម្តេចបានជំរុញឱ្យសាលារាជធានីភ្នំពេញ
បង្កើតរដ្ឋករដឹកជញ្ចូនសាធារណៈឱ្យបានឆាប់ ក្នុងនោះ
រដ្ឋគាំទ្រឱ្យមានការនាំចូលរថយន្តក្រុង ដែលអាករ ជាបន្ទុករបស់រដ្ឋ ។
ជាមួយនឹងការខិតខំប្រឹងប្រឺងក្នុងការអភិវឌ្ឍនេះ សម្តេចតេជោ
នាយករដ្ឋមន្ត្រី បានផ្តល់កិតិ្តយសដោយបំពាក់មេដាយជូនថ្នាក់ដឹកនាំ និងក្រុមហ៊ុនសាងសង់ផងដែរ។
សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត
អមដំណើរដោយមន្ត្រីអ្នកមុខអ្នការ បានអញ្ជើញកាត់ខ្សែបូរ ដើម្បីជានិមិត្តរូប
នៃពិធីសម្ពោធបើកឱ្យប្រើប្រាស់ជាផ្លូវការ
នូវស្ពានអាកាសស្ទឹងមានជ័យចាប់ពីពេលនេះតទៅ៕