សិស្សានុសិស្ស ដែលប្រឡងធ្លាក់សញ្ញាប័ត្រមធ្យមសិក្សាទុតិយភូមិក្នុងឆ្នាំសិក្សា ២០១៣-២០១៤នេះ អាចនឹងមានឱកាសប្រឡងម្តងទៀត សាកល្បងសមត្ថភាពរបស់ខ្លួន ដើម្បីបានសញ្ញាប័ត្រអាចបន្តការសិក្សាថ្នាក់ឧត្តមសិក្សា។ នេះជាការប្រកាសឲ្យដឹងដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី១១ ខែសីហា ឆ្នាំ២០១៤ក្នុងពិធីប្រគល់សញ្ញាប័ត្រដល់ និស្សិតសាកលវិទ្យាល័យន័រតុនចំនួន២ ៥០១នាក់នៅមជ្ឈមណ្ឌលសន្និបាត និងពិព័រណ៍កោះពេជ្រ។
សម្តេចតេជោនាយករដ្ឋមន្ត្រីមានប្រសាសន៍ឲ្យដឹងថា បេក្ខជនដែលបានប្រឡងជាប់សញ្ញាប័ត្រមធ្យមសិក្សាទុតិយភូមិឆ្នាំនេះ មានចំនួនមិនខ្ពស់ដូចបណ្ដាឆ្នាំមុនៗ ដែលមានរហូតដល់ជាង៨០% នោះទេ។ ដោយសារបញ្ហានេះ សម្ដេចតេជោបានប្រកាសទុកជាមុនថា សម្តេចនឹងគាំទ្រចំពោះសំណើរបស់រដ្ឋមន្ត្រីក្រសួងអប់រំ យុវជន និងកីឡា ដែលត្រៀមរៀបចំឲ្យមានការប្រឡងជាលើកទី២ សម្រាប់បេក្ខជន ដែលមិនបានប្រឡងជាប់លើកទី១ នោះ ក្នុងរយៈពេល ១ខែ ឬ១ខែកន្លះខាងមុខ។
សម្ដេចតេជោបានមានប្រសាសន៍លើកឡើងថា បើអ្នកប្រឡងលើកទី១ មិនជាប់ អនុញ្ញាតឲ្យមានការប្រឡងលើកទី២ ដោយក្រសួងអប់រំបើកការប្រឡងទៀត ហើយនៅក្នុងរយៈពេលមួយខែ ឬមួយខែកន្លះនោះ គឺសិស្សត្រូវប្រឹងរៀន ព្រោះអត់មានឱកាស ដើម្បីចម្លងវិញ្ញាសា លួចចម្លងអ្វីតាមគ្នាទៀតទេ ដោយរដ្ឋសុខចិត្តចំណាយលុយថែមបន្តិចទៀត ប៉ុន្តែធ្វើឲ្យក្មេងរៀនពិតប្រាកដ។ សម្តេចតេជោបានមានប្រសាសន៍បញ្ជាក់ថា ក្នុងករណីមានការស្នើសុំបែប នេះខ្ញុំគាំទ្រ ហើយក៏ជាសារមួយផ្ញើទៅអ្នកដែលមិនជាប់ក៏ត្រូវប្រឹងប្រែងដែរ។ ប៉ុន្តែទោះបីជាយ៉ាងណា សម្តេចតេជោបានមានប្រសាសន៍ផ្តល់ជាការពិចារណាដល់ក្រសួងអប់រំ យុវជន និងកីឡាថា ប៉ុន្តែយើងសួរថា បើប្រឡងលើកទី២ ហើយមិនជាប់ ត្រូវធ្វើម៉េចទៀត យើងអាចមានជម្រើសផ្សេងទៀតទីមួយ ឲ្យសិស្សរៀនត្រួតថ្នាក់ឆ្នាំ ក្រោយប្រឡងទៀត ប្រឡងទីមួយមិនជាប់ទៅប្រឡងលើកទីពីរទៀត ដើម្បីឲ្យគាត់ប្រឹងរៀនពិតប្រាកដ។ ចំពោះឆ្នាំទី២ បើប្រឡងលើកទី១ ក៏មិនជាប់លើកទី២ ក៏មិនជាប់តើត្រូវធ្វើម្ដេចទៀត ដូច្នេះបញ្ហានេះក្រសួងអប់រំត្រូវគិតគូរថា តើអាចឲ្យគាត់រៀនបរិញ្ញាបត្ររង និងបញ្ហាទាក់ទងនឹងការរៀននៅសាលាឯកទេសនានា។ល។ ដោយបញ្ជាក់ពីលក្ខខណ្ឌសម្រាប់ចូលរៀនដោយក្រសួងអប់រំនោះ។
សម្ដេចតេជោបានមានប្រសាសន៍ឲ្យដឹងថា ខ្ញុំនៅចាំបានថាកាលពីមុន គេចង់ឲ្យកម្រិតនៃការជាប់បាក់ឌុបរហូតទៅដល់ប្រមាណ៨៣% ដល់កំណត់យកពិន្ទុប៉ុណ្ណេះ គឺជាប់បានត្រឹមតែ៨០% ដូច្នេះខ្វះ៣% ទៀត ត្រូវសុំគោលការណ៍ ដើម្បីសុំស្ទូចយកពិន្ទុអ្នកណាខ្ពស់ជាងគេដើម្បីបំពេញ បើសិនជាដូច្នេះទេខ្ញុំគិតថា គុណភាពវានៅតែទាប។ ទាក់ទងបញ្ហានេះសម្តេចតេជោបានមានប្រសាសន៍ផ្តល់ជាអនុសាសន៍ថា ខ្ញុំគិតថា គួរតែបង្កើតនូវរបៀបថ្មីក្នុងកំណែទម្រង់ថ្មី គឺថាឲ្យមានឱកាសប្រឡង ហើយបើសិនប្រឡងគ្រប់ស្តង់ដារមិនគ្រប់ពិន្ទុ សុខចិត្តឲ្យនៅទំនេរ ដើម្បីឲ្យសិស្សរៀនតទៅទៀត រៀនត្រួតថ្នាក់។ បញ្ហាទាក់ទិនជាមួយនឹងវិស័យអប់រំរបស់យើង យើងត្រូវប្រឹងទាំងអស់គ្នា ព្រោះបើគ្មានធនធានមនុស្ស មិនអាចអភិវឌ្ឍន៍ប្រទេសជាតិនេះបានទេ។
សូមបញ្ជាក់ដែរថា ការប្រឡងសញ្ញាបត្រមធ្យមសិក្សាទុតិយភូមិឆ្នាំនេះ ជាឆ្នាំដំបូងនៃកំណែទម្រង់ក្នុងវិស័យអប់រំ ដោយមានការចូលរួមពីស្ថាប័នពាក់ព័ន្ធជាច្រើន រាប់ទាំងស្ថាប័នអង្គភាពប្រយុទ្ធប្រឆាំងអំពើពុករលួយផងដែរ។ ការប្រឡងនេះមានរយៈ ពេល ០២ថ្ងៃ គឺថ្ងៃទី០៤ និងទី០៥ ខែសីហា ឆ្នាំ២០១៤ ដោយនៅទូទាំងប្រទេសមានបេក្ខជនសរុបចំនួន ៩៣ ៤៥៦នាក់ ចែកចេញជា១៥៤មណ្ឌល ក្នុងនោះថ្នាក់វិទ្យាសាស្ត្រ១៤០ មណ្ឌល និងថ្នាក់វិទ្យាសាស្ត្រសង្គម១៤មណ្ឌល ស្មើនឹង៣ ៧៧៩បន្ទប់។
ដោយឡែកសម្រាប់ដែលរៀននៅសាកលវិទ្យាល័យន័រតុន លោក ចាន់ សុខឃាង សាកលវិទ្យាធិការបានឲ្យដឹងថា គិតចាប់ពីឆ្នាំសិក្សា១៩៩៦-១៩៩៧មក ដល់ឆ្នាំសិក្សា២០១១-២០១២និស្សិត ដែលបានបញ្ចប់ការសិក្សាដោយជោគជ័យពីសាកលវិទ្យាល័យន័រតុន មានចំនួន១៤.៧៨៧ ហើយនិស្សិតដែលកំពុងសិក្សានៅសាកលវិទ្យាល័យនាពេលបច្ចុប្បន្នមានចំនួន១២.២៩០នាក់៕