ភ្នំពេញ: ប្រមុខការទូតកម្ពុជា លោកឧបនាយករដ្ឋមន្ត្រី ហោ ណាំហុង បានឡើងថ្លែងការណ៍នៅចំពោះមុខកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ។ កិច្ចប្រជុំដោយបិទទ្វារនោះ បានធ្វើឡើង កាលពីម៉ោង ១០ ព្រឹក ម៉ោងនៅទីក្រុងញូវយ៉ក ត្រូវនឹងម៉ោង ១០ យប់ ម៉ោងនៅក្នុងប្រទេសកម្ពុជា។
ក្នុងសេចក្តីថ្លែងការណ៍ ដែលបានបង្ហោះលើគេហទំព័ររបស់ក្រសួងការបរទេស បានបង្ហាញថា ជាដំបូងលោកប្រមុខការទូត ហោ ណាំហុង បានលើកឡើងពីសង្គ្រាមឈ្លានពានប្រឆាំងកម្ពុជា ប្រព្រឹត្តដោយប្រទេសថៃ កាលពីថ្ងៃទី៤, ៥, ៦ និងថ្ងៃទី៧កុម្ភៈ ឆ្នាំ២០១១។ ការវាយប្រហារ ដែលជាសង្គ្រាមឈ្លានពាននោះ ថៃបានបាញ់លើកម្ពុជាជាច្រើនកន្លែង រួមមាន៖ ប្រាសាទព្រះវិហារ, វត្តកែវសិក្ខាគិរីស្វារៈ ដែលមានចម្ងាយប្រមាណ ៣០០ ម៉ែត្រពីប្រាសាទព្រះវិហារ, តំបន់ឃ្មុំ ដែលមានចម្ងាយប្រមាណ ៥០០ ម៉ែត្រពីប្រាសាទ, តំបន់វាលឥន្ទ្រី និងភ្នំទ្រព្យ ដែលមានចម្ងាយប្រមាណ ១.១២០ ម៉ែត្រ និង ១៦.០០០ ម៉ែត្រ ពីព្រំដែន រួមទាំងនៅតំបន់តាសឹម និងកន្លែងដទៃទៀត នៅបរិវេណប្រាសាទព្រះវិហារ។
លោក ហោ ណាំហុង រដ្ឋមន្ត្រីការបរទេសកម្ពុជា បានលើកឡើងថា ក្នុងពេលវាយប្រហារលើកម្ពុជានោះ ថៃបានប្រើប្រាស់សព្វាវុធធុនធ្ងន់ រួមមាន៖ គ្រាប់មីនចង្ក្រោម និងកាំភ្លើងធំ ប្រភេទ ១០៥, ១២០, ១៣០ និង ១៥៥ ម.ម. ដោយបានបាញ់ផ្លោងចូលក្នុងទឹកដីកម្ពុជា ចម្ងាយប្រមាណ ២០ គ.ម.។
លោកប្រមុខការទូត ហោ ណាំហុង បានគូសបញ្ជាក់ចំពោះមុខក្រុមប្រឹក្សាសន្តិសុខរបស់អង្គការសហប្រជាជាតិថា ការវាយប្រហាររបស់ថៃ ចាប់ផ្តើមពីថ្ងៃទី៤កុម្ភៈ ឆ្នាំ២០១១ បានបណ្តាលឲ្យខូចខាតយ៉ាងធ្ងន់ធ្ងរលើវត្តកែវសិក្ខាគិរីស្វារៈ និងប្រាសាទព្រះវិហារ ដែលជាសម្បត្តិបេតិកភណ្ឌពិភពលោក។ ជាមួយគ្នានោះ ក៏បានបណ្តាលឲ្យកងទ័ពកម្ពុជា និងប្រជាជនស៊ីវិលចំនួន ៦ នាក់ បានពលី និងស្លាប់ ព្រមទាំងរងរបួសចំនួន ៧១ នាក់ផ្សេងទៀត។ ក្នុងចំណោមអ្នករបួស និងស្លាប់ទាំងនោះ ក៏មានមនុស្ស ២ នាក់ បានស្លាប់ និងរបួស ៨ នាក់ផ្សេងទៀត ដោយសារតែគ្រាប់មីនចង្កោម របស់កងទ័ពថៃ។ ការប្រើគ្រាប់មីនចង្កោម ដែលត្រូវបានពិភពលោក ហាមឃាត់។
ក្រៅតែលើកឡើងពីការដាក់ពង្រាយកងទ័ពថៃ និងរថក្រោះ តាមបណ្តោយព្រំដែន ដើម្បីជាការគំរាមកំហែងដល់កម្ពុជានោះ លោកឧបនាយករដ្ឋមន្ត្រី ហោ ណាំហុង ក៏បានរម្លឹកពីឫសគល់ ដែលនាំដល់សង្គ្រាមឈ្លានពានរបស់ថៃលើកម្ពុជានាពេលនេះ។ ហេតុផលទាំងនោះ រួមមាន៖ ថៃរំលោភលើសន្ធិសញ្ញាព្រំដែនបារាំង-សៀម ឆ្នាំ១៩០៤ និងឆ្នាំ១៩០៧ ពិសេសថៃបានរំលោភលើសាលក្រមរបស់តុលាការយុត្តិធម៌អន្តរជាតិ ( ICJ ) ឆ្នាំ១៩៦២។ នោះគឺសេចក្តីសម្រេច ដែលបានដាក់ប្រាសាទព្រះវិហារ និងតំបន់ជុំវិញប្រាសាទ ស្ថិតក្នុងអធិបតេយ្យបូរណភាពទឹកដីកម្ពុជា ដោយផ្អែកតាមខ្សែបន្ទាត់ព្រំដែនរវាងកម្ពុជា និងថៃ គូសដោយបារាំង-សៀម។
លោក ហោ ណាំហុង បានគូសបញ្ជាក់ថា ចាប់តាំងពីតុលាការយុត្តិធម៌អន្តរជាតិ បានចេញសាលក្រម កាលពីឆ្នាំ១៩៦២ ប្រទេសថៃបានទទួលយក ហើយបានដកកងទ័ពចេញពីតំបន់ប្រាសាទព្រះវិហារ និងបរិវេណជុំវិញប្រាសាទ។ ក៏ប៉ុន្តែប្រទេសថៃ បានចាប់ផ្តើមទាមទារទឹកដី ដែលគេហៅថា តំបន់ ៤,៦ គីឡូម៉ែត្រក្រឡា នៅជុំវិញប្រាសាទព្រះវិហារ នៅពេលគណៈកម្មាធិការបេតិកភណ្ឌពិភពលោក បានពិភាក្សា និងទទួលចុះឈ្មោះប្រាសាទព្រះវិហារ ចូលទៅក្នុងបញ្ជីសម្បត្តិបេតិកភណ្ឌពិភពលោក កាលពីឆ្នាំ២០០៨។ ការទាមទាររបស់ថៃ ដោយផ្អែកលើផែនទី ដែលគូសជាឯកតោភាគីរបស់ថៃ និងដោយគ្មានតម្លៃផ្លូវច្បាប់ឡើយ។
ជាមួយនឹងការលើកឡើងខាងលើ លោកប្រមុខការទូត ហោ ណាំហុង ក៏បានលើកបង្ហាញពីការចូលឈ្លានពានទឹកដីកម្ពុជា ពីសំណាក់កងទ័ពថៃ ៣ លើក ជាបន្តបន្ទាប់ ចាប់តាំងពីថ្ងៃទី១៥កក្កដា ឆ្នាំ២០០៨, ថ្ងៃទី១៥តុលា ឆ្នាំ២០០៨ និងថ្ងៃទី៣ ខែមេសា ឆ្នាំ២០០៩ ក្នុងទឹកដីកម្ពុជា នៅតំបន់វត្តកែវសិក្ខាគិរីស្វារៈ វាលឥន្ទ្រីយ៍ ភ្នំទ្រព្យ និងតាសឹម ព្រមទាំងបរិវេណជុំវិញប្រាសាទព្រះវិហារ។ រាល់ការឈ្លានពានរបស់ថៃទាំងនោះ បានរំលោភលើមនុស្សជាតិ ដោយបានធ្វើឲ្យខូចខាតដល់សម្បត្តិបេតិកភណ្ឌ ពិសេសខូចខាតដល់ប្រាសាទព្រះវិហារ។
ជាមួយនឹងការលើកឡើងខាងលើ លោកប្រមុខការទូត ហោ ណាំហុង បានអំពាវនាវដល់ក្រុមប្រឹក្សាសន្តិសុខរបស់អង្គការសហប្រជាជាតិ ដាក់សំពាធជាបន្ទាន់លើប្រទេសថៃ ដើម្បីឲ្យថៃបញ្ឈប់ការឈ្លានពានលើកម្ពុជា។ ការឈ្លានពានរបស់ថៃ ដែលនាំឲ្យប៉ះពាល់ដល់សន្តិសុខ និងស្ថេរភាពក្នុងតំបន់។
មួយវិញទៀត ក្នុងកំឡុងពេលរកដំណោះស្រាយលើជម្លោះព្រំដែនកម្ពុជា និងថៃ លោក ហោ ណាំហុង បានលើកឡើងថា រដ្ឋាភិបាលកម្ពុជា យល់ឃើញថា វាជាការចាំបាច់ ដែលត្រូវតែមានក្រុមអ្នកសង្កេតការណ៍របស់អង្គការសហប្រជាជាតិ ឬក៏កងរក្សាសន្តិភាពរបស់អង្គការសហប្រជាជាតិ ហើយយ៉ាងហោចណាស់ ក៏ត្រូវមានបេសកកម្មស្វែងរកការពិតរបស់អង្គការសហប្រជាជាតិ ចុះមកកាន់តំបន់ជម្លោះព្រំដែន ដើម្បីធានាថា នៅតំបន់ព្រះវិហារ មិនមានកងកម្លាំងប្រដាប់អាវុធតទៅទៀត។
ទោះជាយ៉ាងណាក៏ដោយ លោកប្រមុខការទូត ហោ ណាំហុង បានគូសបញ្ជាក់បន្ថែមថា កម្ពុជាប្រកាន់នូវជំហរដោះស្រាយជម្លោះព្រំដែនជាមួយថៃ ដោយសន្តិវិធី តាមរយៈយន្តការតំបន់ ដូចជា សមាគមអាស៊ាន ព្រោះកម្ពុជា និងថៃ ជាសមាជិកអាស៊ាន។ ប៉ុន្តែក្នុងករណីគ្មានដំណោះស្រាយនៅអាស៊ានទេ កម្ពុជាស្នើឲ្យក្រុមប្រឹក្សាសន្តិសុខរបស់អង្គការសហប្រជាជាតិ ធ្វើអន្តរាគមន៍ ដើម្បីដោះស្រាយជម្លោះព្រំដែនកម្ពុជា និងថៃ ទៅតាមធម្មនុញ្ញអង្គការសហប្រជាជាតិ។
លោកឧបនាយករដ្ឋមន្ត្រី ហោ ណាំហុង ក៏បានស្នើដល់ក្រុមប្រឹក្សាសន្តិសុខរបស់អង្គការសហប្រជាជាតិ គួរតែបញ្ជូនបញ្ហាជម្លោះព្រំដែនកម្ពុជា និងថៃ ទៅកាន់តុលាការយុត្តិធម៌អន្តរជាតិ ដើម្បីប្តឹងបកឲ្យស្រាយសាលក្រម ឆ្នាំ១៩៦២។
នៅចុងបញ្ចប់ លោកប្រមុខការទូត ហោ ណាំហុង បានគូសបញ្ជាក់ថា កិច្ចប្រជុំ ដើម្បីស្វែងរកដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ លើបញ្ហាជម្លោះព្រំដែនកម្ពុជា និងថៃ នាពេលនេះ បានជួយសង្គ្រោះជីវិតជាច្រើន និងជួយដោះទុក្ខវេទនា មិនត្រឹមតែសម្រាប់កម្ពុជាប៉ុណ្ណោះទេ ប៉ុន្តែក៏សម្រាប់ថៃផងដែរ៕
ដោយ : លីហូវ