អំណោយរួមមានអង្ករ ៣០តោន ត្រីខកំប៉ុង ២០០កេះ មី ៣០០កេះ តង់ ១០០ និងថវិកា ចំនួន៨៥លានរៀល ត្រូវបានឯកឧត្តមបណ្ឌិត សុខ អាន
ឧបនាយករដ្ឋមន្ត្រី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី
ប្រគល់ជូនដល់កង យោធពលខេមរៈភូមិន្ទ
ដែលកំពុងឈរជើងការពារនៅទិសប្រាសាទព្រះវិហារក្នុងពិធីសំណេះសំណាល
មួយ ដែលរៀបចំឡើងនៅទីបញ្ជាការដ្ឋាន
កងអង្គរក្សប្រចាំទិសព្រះវិហារ។
ឯកឧត្តម នាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរៈភូមិន្ទ ក្នុងនាមនាយទាហាន ពលទាហានទាំងអស់បានមានប្រសាសន៍ ថ្លែងអំណរគុណដល់សម្តេចអគ្គមហាសេនាបតីតេជោ ហ៊ុន សែន
ដែលតែងតែបានយកចិត្តទុកដាក់ ចំពោះកងទ័ពនៅសមរភូមិមុខ
តាមរយៈជួយឧបត្ថមសំភារៈ ហូបចុក និងកន្លែងស្នាក់នៅសមរម្យ
ដល់កងទ័ព។ ឯកឧត្តមនាយឧត្តមសេនីយ៍ ហ៊ីង ប៊ុនហៀង
ក៏បានមានប្រសាសន៍ លើកឡើងពីវីរៈភាពអង់អាចក្លាហានរបស់
កងទ័ពដែលមានស្មារតីស្នេហាជាតិ និងការពារបាននូវបូរណៈភាពទឹកដី
ព្រមទាំងបានអនុវត្តយ៉ាងម៉ឺងម៉ាត់ តាមបទបញ្ជា
និងអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។
មានប្រសាសន៍ក្នុងឱកាសនោះឯកឧត្តមបណ្ឌិតសភាចារ្យ សុខ អាន
បានសម្តែងនូវការកោតសរសើរចំពោះ នាយទាហាន ពលទាហានដែលបានតស៊ូ
លះបង់អាយុជីវិត ដើម្បីការពារប្រទេសជាតិមាតុភូមិ
និងសេចក្តីសុខសាន្ត របស់ប្រជាពលរដ្ឋ
ជាពិសេសការពារបាននូវសម្បត្តិបេតិកភ័ណ្ឌពិភពលោក។
ឯកឧត្តមបណ្ឌិតបានណែនាំ ដល់ក្រុមគ្រួសារកងទ័ព ឳ្យចេះបង្កបង្កើនផល
ដាំដំណាំ ចិញ្ចឹមសត្វ ដើម្បីផ្គត់ផ្គង់ជីវភាពរស់នៅប្រចាំថ្ងៃ
ជាពិសេសបញ្ជូន
កូនចៅឳ្យចូលរៀនជំនាញវិជ្ជាជីវៈនៅក្នុងមជ្ឈមណ្ឌលបណ្តុះបណ្តាល
វិជ្ជាជីវៈព្រះវិហារ យ៉ាឡាយ។ ឯកឧត្តមបណ្ឌិត សុខ អាន ក៏
បានមានប្រសាសន៍ជម្រាបដល់មន្រ្តីកងយោធពលខេមរភូមិន្ទពីសភាពការណ៍
នយោបាយក្នុង និងក្រៅប្រទេសជាពិសេសជោគជ័យថ្មីៗ របស់កម្ពុជា
នៅក្នុងកិច្ចប្រជុំគណៈអចិន្ត្រៃយ៍លើកទី១៦
របស់គណបក្សនយោបាយនៅអាស៊ី ដែលបានស្នើឳ្យប្រទេសដែលពុំទាន់មាន
សន្តិភាពពេញលេញ គួរយកប្រទេសកម្ពុជាធ្វើជាគំរូ
ក្នុងការដោះស្រាយនូវវិវាទនានាការស្វែងរកសន្តិភាព និងការអភិវឌ្ឍន៍។
ឯកឧត្តមបណ្ឌិត សុខ អាន ក្នុង
ឱកាសនោះ បានប្រគល់អំណោយជូនកងពលតូច លេខ៧,៨,៩
កងពលធំអន្តរាគមលេខ០៣ បញ្ជាការដ្ឋានអង្គរក្ស
វរៈនគរបាលការពារព្រំដែន ក្រុមសង្កេតការណ៍ឈប់បាញ់
និងគណៈកម្មការអភិរក្ស ព្រមទាំងបានចែកជូនដល់នាយទាហាន
ពលទាហានចំនួន១៧០០នាក់ នូវថវិកាម្នាក់ៗទទួលបាន ២០.០០០រៀល។
បន្ទាប់មកឯកឧត្តមបណ្ឌិតបានអញ្ជើញទៅទស្សនកិច្ចមជ្ឈមណ្ឌល
បណ្តុះបណ្តាលវិជ្ជាជីវៈ ព្រះវិហារយ៉ាឡាយ
ដែលរហូតមកដល់បច្ចុប្បន្នមជ្ឈមណ្ឌលបានបើកវគ្គផ្នែកកសិកម្ម ចំនួន
០៣វគ្គ សិក្សាក្នុងរយៈពេល ០១ ខែ លើជំនាញ ដំណាំបន្លែចម្រុះ
និងចិញ្ចឹមត្រី ។ផ្នែកឧស្សាហកម្មសេវាកម្ម សិក្សារយៈពេល ០៤ ខែ
ដែលមានជំនាញ ជួសជុលវិទ្យុ ម៉ាញ៉េ និងទូរទស្សន៍ ជួសជុលម៉ាស៊ីនធុនតូច
និងកែច្នៃវត្ថុអនុស្សាវរីយ៍ចេញពីឈើ។