ព្រះរាជពិធីបុណ្យដ៏អឹកអធឹកចំនួនបីបានកើតមានឡើងព្រមគ្នា
នៅរាជធានីភ្នំពេញ ដែលរៀបចំដោយរាជរដ្ឋាភិបាលកម្ពុជា
គឺបានបង្កប់ទៅដោយអត្ថន័យដ៏ត្រចះត្រចង់
បង្ហាញពីភាពសុខដុមរមនារបស់ប្រជាពលរដ្ឋកម្ពុជា ទាំងក្នុង
និងក្រៅប្រទេស ការឯកភាពជាតិ ទឹកដី ក៏ដូចជា
ការគោរពតាមយ៉ាងត្រឹមត្រូវនូវរបបរាជានិយមអាស្រ័យធម្មនុញ្ញ
ដែលមានព្រះមហាក្សត្រគ្រងរាជសម្បត្តិ។
ព្រះ
រាជពិធីបុណ្យដ៏ធំទាំងបី
បានចាប់ផ្តើមប្រារព្ធធ្វើឡើងតាំងពីថ្ងៃទី២៩ ខែតុលា ឆ្នាំ
២០១១មកម្លេះ
ដែលមានការរៀបចំភ្លឺចំរុះពណ៌នៅតាមដងវិថីតូចធំនានា
ការបាញ់កាំជ្រួចអបអរយ៉ាងកងរំពង ជាពិសេស
វត្តមាននៃការចូលរួមថ្វាយព្រះសព្វសារធុការពរពីសំណាក់ថ្នាក់ដឹក
នាំនៃរាជរដ្ឋាភិបាលជាច្រើនរូបនោះ
គឺព្រះរាជពិធីបុណ្យគម្រប់ខួបព្រះជន្មវស្សា៨៩ យាងចូល៩០
ព្រះវស្សា
ពីធីបុណ្យខួបគម្រប់២០ឆ្នាំនៃការយាងនិវត្តន៍មកកាន់មាតុភូមិរបស់
សម្តេចឪ សម្តេចតា សម្តេចតាទួត ព្រះមហាវីរៈក្សត្រ ព្រះវររាជបិតាឯករាជ្យ
បូរណភាពទឹកដី និងឯកភាពជាតិខ្មែរ
ព្រមទាំងព្រះរាជពិធីបុណ្យខួបគម្រប់៧ឆ្នាំនៃការគ្រប់គ្រងរាជសម្បត្តិ
របស់ ព្រះករុណាព្រះបាទ សម្តេចព្រះបរមនាថ នរោត្តមសីហមុនី
ព្រះមហាក្សត្រនៃព្រះរាជាណាចក្រកម្ពុជា។
នៅ
ក្រោមបរិយាកាសដ៏មហានក្ខត្តឬក្ស
នៃការបានឃើញព្រះវត្តមានរបស់អតីតព្រះមហាក្សត្រ
និងព្រះមហាក្សត្របច្ចុប្បន្ន គង់នៅក្នុងព្រះបរមរាជវាំង
គឺជាសក្ខីភាពកតញ្ញូដ៏ខ្ពង់ខ្ពស់បំផុត របស់រាជរដ្ឋាភិបាល
ឆ្លើយតបទៅនឹងគុណូបក្ការគុណរបស់ព្រះករុណា
ព្រះបាទបរមនាថនរោត្តមសីហមុនី ព្រះមហាក្សត្រប្រកបដោយទសពិធរាជធម៍
និងព្រះបាទនរោត្តមសីហនុ ព្រះវររាជបិតា បង្រួបបង្រួមជាតិ ក៏ជាឱកាសមួយ
ដើម្បីផ្តល់លទ្ធភាព បានទូលថ្វាយអំពីសមិទ្ធផលដ៏ច្រើនសន្ធឹកសន្ធាប់
ក្រោមការដឹកនាំ របស់រាជរដ្ឋាភិបាល ក្នុងរយៈពេល២០មកនេះផងដែរ។
ការ
រក្សាបាននូវរបបរាជានិយមអាស្រ័យធម្មនុញ្ញ
គឺបានកើតមានឡើងដោយការលះបង់ខ្ពស់បំផុតរបស់សម្តេចអគ្គមហសេនាបតីតេជោ
ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបច្ចុប្បន្ន
ជាមួយអតីតព្រះមហាក្សត្រកម្ពុជា គឺសម្តេចព្រះនរោត្តម សីហនុ
សម្តេចឪ សម្តេចតា សម្តេចតាទួតនៃយើងទាំងអស់គ្នា
ដើម្បីការចង់បានសន្តិភាព និងការបង្រួបបង្រួមជាតិ
ទើបរួមគ្នាបង្កើតជាកិច្ចព្រមព្រៀងសន្តិភាពក្រុងប៉ារីស ថ្ងៃទី២៣ ខែតុលា
ឆ្នាំ១៩៩១ និងបានយាងសម្តេចឪ សម្តេចតា ចូលស្រុកវិញ នៅថ្ងៃទី១៤ ខែវិច្ឆកា
ឆ្នាំ១៩៩១ ឱ្យគង់ធ្វើជាព្រះប្រធានក្រុមប្រឹក្សាជាន់ខ្ពស់កម្ពុជា
និងរៀបចំឲ្យមានការបោះឆ្នោតនៅឆ្នាំ១៩៩៣ ដោយអ៊ុនតាក់
ដែលក្រោយមកបង្កើតបានរដ្ឋធម្មនុញ្ញ
ប៉ុន្តែសន្តិភាពនោះមិនបានផ្តល់នូវភាពសុខសាន្តដល់ប្រជាពល
រដ្ឋទាំងស្រុងនោះទេ គឺកើតមានឡើងក្រោមនយោបាយឈ្នះ‑ឈ្នះ
របស់សម្តេច ហ៊ុន សែន នៅចុងឆ្នាំ ១៩៩៨ តែប៉ុណ្ណោះ។
ទោះបីរាជរដ្ឋាភិបាលបានគោរពត្រឹមត្រូវតាមរដ្ឋធម្មនុញ្ញរបស់ខ្លួន
ធម្មនុញ្ញអាស៊ាន ធម្មនុញ្ញសហប្រជាជាតិ ច្បាប់ជាតិ ច្បាប់អន្តរជាតិ
ដើម្បីពង្រឹងនីតិរដ្ឋ និងនូវបានប្រើឧបករណ៍ច្បាប់ជាច្រើនទៀត
ដើម្បីកិច្ចការពារអធិបតេយ្យបូរណភាពទឹកដី និងផលប្រយោជន៍ជាតិខ្មែរ
យ៉ាងណាក៏ដោយ ក៏ពួកក្រុមគណបក្សប្រឆាំង នៅកម្ពុជា
និងអង្គការមិនមែនរដ្ឋាភិបាលមួយចំនួនតូច តែងតែលើកឡើងដដែល ជាដដែល
នូវការចោទប្រកាន់គ្មានមូលដ្ឋាន ទម្លាក់កំហុសលើរាជរដ្ឋាភិបាល
ដើម្បីយកប្រៀបខាងនយោបាយ និងខ្វះមនសិការជាតិចាប់រហូតមក។ ប៉ុន្តែ
ការពិត រាជរដ្ឋាភិបាលកម្ពុជា គឺជាមេស្ថាបនិក
ក្នុងការបង្កើតកិច្ចព្រមព្រៀងសន្តិភាពក្រុង ប៉ារីស ជាពិសេស
បង្កើតឱ្យមាននូវអង្គជំនុំជម្រះវិសាមញ្ញតុលាការកម្ពុជា
ដែលគាំទ្រដោយអង្គការសហប្រជាជាតិ
ដើម្បីកាត់ទោសថ្នាក់ដឹកនាំកំពូលៗនៃរបបខ្មែរក្រហម។ តុលាការនេះ
បាននិងកំពុងឆ្ពោះទៅមុខក្នុងទិសដៅជោគជ័យ
និងបាននាំមកនូវយុត្តិធម៌ដល់ពលរដ្ឋគ្រប់រូបដែលជាជនរងគ្រោះក្នុង
របបនោះ។
ដូច្នេះ សន្តិភាពដែលមាននាពេលបច្ចុប្បន្ន
គឺពិតជាកើតចេញពីការរួមចំណែកដ៏ធំរបស់ព្រះមហាវីរក្សត្រកម្ពុជា
ដែលមិនអាចខ្វះបាន ហើយរាជរដ្ឋាភិបាលកម្ពុជា
ដែលបានប្រកាន់ខ្ជាប់តាមរដ្ឋធម្មនុញ្ញ
និងបានរៀបចំប្រារព្ធព្រះរាជពិធីបុណ្យខួបរបស់ព្រះមហាវីរក្សត្រ
និងព្រះរាជពិធីបុណ្យគ្រងរាជសម្បត្តិ នៃព្រះមហាក្សត្រ
គឺជាសារមួយបង្ហាញប្រាប់ពិភពលោកថា
កម្ពុជាកំពុងរស់នៅជាមួយនឹងសុខសន្តិភាពដ៏ពេញបរិបូរណ៍ ហើយ
កំពុងរក្សាបាននូវស្ថិរភាពនយោបាយ ការបង្រួបបង្រួមជាតិ
ដើម្បីការអភិវឌ្ឍប្រកបដោយចីរភាព៕
ដោយ ទិត សារុនរ៉េត (ទីប្រឹក្សាអមរាជបណ្ឌិត្យសភាកម្ពុជា)
ថ្ងៃទី០៤ ខែវិច្ឆកា ឆ្នាំ២០១១