សម្តេចអគ្គមហាសេនាបតីតេជោ ហ៊ុន សែន បានព្រមានយ៉ាងម៉ឹងម៉ាត់នឹងចាត់វិធានការតាមផ្លូវច្បាប់
ចំពោះការប្រៀបប្រដូចរូបសម្តេចទៅនឹង លោក ហ្គាដាហ្វី
អតីតមេដឹកនាំប្រទេសលីបី ដែលត្រូវបានសម្លាប់ដោយក្រុមប៉ះបោ ក្រោមការគាំទ្រជាអតិបរមាដោយអង្គការណាតូ។
ក្នុងពិធីសម្ពោធកំណាត់ផ្លូវជាតិលេខ៣
ពីចោមចៅរាជធានីភ្នំពេញទៅកាន់ទីរួមខេត្តកំពត នាថ្ងៃទី ១៤ ខែវិច្ឆិកា
ឆ្នាំ ២០១១ សម្តេចតេជោនាយករដ្ឋមន្រ្តីមានប្រសាសន៍
ថា «ខ្ញុំសូមផ្តាំទៅ ថ្ងៃក្រោយកុំប្រៀបធៀប
ហ៊ុន សែន ជាមួយ ហ្គាដាហ្វី បើមិនដូច្នេះទេ ខ្ញុំនឹងធ្វើសកម្មភាពតាមផ្លូវច្បាប់នៅពេល
ដែលចាប់បានអំពីការប្រៀបធៀបបែបនេះតទៅទៀត។ ខ្ញុំមិនអាចអត់ឱនឲ្យបានទេ
ព្រោះនេះជាការប្រមាថអាយុជីវិត»។ សម្តេចតេជោមានប្រសាសន៍ថា
ការប្រមាថអាយុជីវិតមនុស្សមិនថាមនុស្សនោះ ជាមនុស្សសាធារណៈដែលគេអាចជេរបាននោះទេ
ប៉ុន្តែសូមកុំប្រមាថសម្លាប់ ដែលការណ៍នេះត្រូវតែចាត់វិធានការផ្លូវច្បាប់ហើយ។
កុំប្រៀបខ្ញុំជាមួយ ហ្គាដាហ្វី ហើយលោកឯងកុំប្រាថ្នាបំបែក ទឹកដីកម្ពុជា
តាមរយៈការធ្វើសង្រ្គាម ឬ ប្រើអំពើហិង្សាណាមួយ»។
សម្តេចតេជោនាយករដ្ឋមន្រ្តីឲ្យដឹងថា ជំនាន់បញ្ហាកើតមានឡើងនៅប្រទេស
ទុយណេស៊ី ក្រុមប្រឆាំងបានប្រៀបធៀប សម្តេចទៅនឹង បែន ណាលី អតីតប្រធានាធិបតីនៅទុយនេស៊ី។
សម្តេចតេជោបញ្ជាក់ថា
គេមិនយក បែន ណាលី មកប្រៀបធៀបជាមួយកម្ពុជាទេ ព្រោះ បែន ណាលី មិនដែលបោះឆ្នោតទេ។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា រឿងដែលគួរឲ្យខ្លោចចិត្តបំផុត រឿងដែលគួរឲ្យឈឺចាប់
ដែលជាការប្រមាថដល់អាយុជីវិតគឺការប្រៀបធៀបខ្ញុំទៅនឹង ហ្គាដាហ្វី នៅប្រទេសលីប៊ី
ដែល ហ្គាដាហ្វី ត្រូវបានច្បាំងគ្នា ហើយត្រូវបានពួកណាតូចូលជួយអន្តរាគមន៍
ដែលនៅចុងបំផុតចាប់បាន ហ្គាដាហ្វី រួច ហើយបាញ់សម្លាប់ ហ្គាដាហ្វី។ សូម្បីតែសហរដ្ឋអាមេរិកក៏ឲ្យធ្វើការស្រាវជ្រាវដែរ
ថាហេតុអ្វីបានជាបាញ់សម្លាប់ ដែលធម្មតាមេដឹកនាំក្តី ឈ្លើយសឹកក្តី នៅពេលចាប់បានហើយ
គេមិនឲ្យសម្លាប់ក្រៅប្រព័ន្ធច្បាប់ទេ។
សម្តេចតេជោនាយករដ្ឋមន្រ្តីមានប្រសាសន៍ថា ប្រសិនបើក្រុមប្រឆាំងប្រៀបធៀបរូបលោកទៅនឹង
អតីតនាយករដ្ឋមន្រ្តីថៃលោក អាប់ភីស៊ីត វា ចាជីវ៉ា នៅប្រទេសថៃលោកយល់ព្រម
វាគ្មានបញ្ហាអ្វីឡើយ ព្រោះ អាប់ភីស៊ីត ចាញ់ឆ្នោតហើយបានចុះចេញ ហើយឲ្យលោកជំទាវ
យីង ឡាក់ ឡើងធ្វើនាយករដ្ឋមន្រ្តី ព្រោះនេះជារបបបោះឆ្នោត ៥ ឆ្នាំម្តង។
សម្តេចតេជោថ្លែងថា ខ្ញុំសូមប្រកាសនៅឆ្នាំ ២០១៣
ពិតជាមាន ការផ្លាស់ប្តូរ គឺប្តូរពីអាណត្តិទី៤ ទៅកាន់អាណត្តិទី ៥ តែរឿង
ហ៊ុន សែន ធ្វើនាយករដ្ឋមន្រ្តី តទៅទៀតក៏មិនមែនធ្វើនាយករដ្ឋមន្រ្តីនៃអាណត្តិទី៤ដែរ
ប៉ុន្តែធ្វើនាយករដ្ឋមន្រ្តីអាណត្តិទី៥ នេះក្នុងករណីគណបក្សប្រជាជនកម្ពុជាជាប់ឆ្នោត។
បើក្នុងករណីគណបក្សប្រជាជនចាញ់ឆ្នោត សូមកុំបារម្ភ ខ្ញុំអំពាវនាវឲ្យសមាជិកសមាជិកាគណបក្សប្រជាជនគាំទ្រលទ្ធផលបោះឆ្នោតភ្លាម
ដែលក្នុងរយៈ ពេល ៦០ ថ្ងៃក្រោយ សូមមកវិមានសន្តិភាព ខ្ញុំប្រកាសផ្ទេរដំណែងឲ្យដោយមិនចាំបាច់កង្វល់
នោះទេ។
សម្តេចតេជោមានប្រសាសន៍ថា វាអាក្រក់ជួរជាតិបំផុត
ដែលគេប្រមាថខ្ញុំដូច ហ្គាដាហ្វី តើមានន័យដូចម្តេច? ទាំងបដិវត្តន៍ផ្កាម្លិះ
នៅទុយនេស៊ី ទាំងការប្រយុទ្ធគ្នាទៅដោយការឈ្លានពានរបស់បរទេស នៅឯលីប៊ី
ហើយគេបាញ់សម្លាប់ ហ្គាដាហ្វី បែរជាបក្សប្រឆាំងយកមកប្រៀបធៀបបានដែរ។ នៅពេល
ដែលខ្ញុំឆ្លើយតបទៅវិញគេបែរជាថា ខ្ញុំគម្រាមកំហែង។ តើអ្នកណាគម្រាមអ្នកណា
លោកឯងគម្រាមសម្លាប់ ចុះខ្ញុំ ខ្ញុំគ្រាន់តែនិយាយជូនអ្នកឯងត្រឡប់ទៅវិញ
បែរជាថា ខ្ញុំគម្រាមកំហែងទៅវិញ? សម្តេចតេជោថ្លែងថា
«អ្នកឯងបានប្រៀបធៀបខ្ញុំ ជាមួយអ្នកស្លាប់ដោយចម្បាំង អ្នកឯងចង់ច្បាំង
ខ្ញុំត្រូវចាត់វិធានការមុន ព្រោះនេះជាការចាំបាច់របស់រាជរដ្ឋាភិបាល
ដើម្បីការពាររដ្ឋធម្មនុញ្ញ ការពារស្ថិរភាពប្រទេសជាតិ ព្រោះទម្រាំបានបង្រួបបង្រួមជាតិមិនមែនងាយទេ»៕