ថ្ងៃទី ០៩ ខែ ធ្នូ ឆ្នាំ២០១១
ថ្ងៃទី ០៩ ខែ ធ្នូ ឆ្នាំ២០១១ វេលាម៉ោង
៨ និង៣០នាទីព្រឹក នៅវិមានសន្តិភាពមានបើកសម័យប្រជុំពេញអង្គគណៈរដ្ឋមន្ត្រី ក្រោមអធិបតីភាពដ៍ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
ក្នុងអាណត្តិទី ៤ ដើម្បីឆ្លងៈ
១-សេចក្តីព្រាងព្រះរាជក្រឹត្យ
ស្តីពីការបង្កើតគណៈស្ថាបត្យករកម្ពុជា ៖
២-សេចក្តីព្រាងអនុក្រឹត្យ ស្តីពីអត្តសញ្ញាណកម្មគ្រួសារក្រីក្រ
៣-បញ្ហាផ្សេងៗ ៖ សំណើសុំការយល់ព្រមពីគណៈរដ្ឋមន្រ្តី
ដើម្បីសុំសច្ចាប័នពីស្ថាប័ននីតិប្បញ្ញត្តិលើ “សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀង
ស្តីពីការគ្រប់គ្រងការប្រើប្រាស់ហត្ថពលកម្មនៅរដ្ឋកាតា
រវាងរាជរដ្ឋាភិបាលកម្ពុជា និងរដ្ឋាភិបាលនៃរដ្ឋកាតា”។
ក្រោយពីបានស្តាប់របាយការណ៍
និងមតិពិភាក្សាផ្លាស់ប្តូរយោបល់រួចមក កិច្ចប្រជុំពេញអង្គគណៈរដ្ឋមន្ត្រីបានសម្រេចអនុម័តនូវ៖
I-សេចក្តីព្រាងព្រះរាជក្រឹត្យ ស្តីពីការបង្កើតគណៈស្ថាបត្យករកម្ពុជា ៖
សេចក្តីព្រាងព្រះរាជក្រឹត្យ
ស្តីពីការបង្កើតគណៈស្ថាបត្យករកម្ពុជាសរសេរអក្សរកាត់ គ.ស.ក ត្រូវបានរៀបចំឡើងដោយក្រសួងដែនដីនគរូបនីយកម្ម
និងសំណង់ មានគោលបំណង ៖
-ដើម្បីប្រមូលផ្តុំ
និងគ្រប់គ្រងស្ថាបត្យករ ដែលបានចុះបញ្ជីនៅព្រះរាជាណាចក្រកម្ពុជា
ព្រមទាំងលើកកម្ពស់វិជ្ជាជីវៈ គុណភាពស្នាដៃរបស់ស្ថាបត្យករ
និងកិត្យានុភាពនៃស្ថាបត្យកម្មកម្ពុជា។
-ដើម្បីឆ្លើយតបតាមតម្រូវការចាំបាច់
ក្នុងការធ្វើសមាហរណកម្មវិជ្ជាជីវៈស្ថាបត្យកម្មក្នុងតំបន់
ជាពិសេសក្នុងបណ្តាប្រទេសជាសមាជិកអាស៊ាន។
សេចក្តីព្រាងព្រះរាជក្រឹត្យនេះ ចែកចេញជា ៩ ជំពូក
និងមាន ៣៥ មាត្រា មានវិសាលភាពអនុវត្តចំពោះស្ថាបត្យករខ្មែរ
និងស្ថាបត្យករបរទេស ដែលបានចុះឈ្មោះក្នុងបញ្ជី គ.ស.ក ។
II- សេចក្តីព្រាងអនុក្រឹត្យ
ស្តីពីអត្តសញ្ញាណកម្មគ្រួសារក្រីក្រ ៖
នៅព្រះរាជាណាចក្រកម្ពុជា
ការកំណត់អត្តសញ្ញាណគ្រួសារក្រីក្រត្រូវបានអនុវត្តជាច្រើនឆ្នាំមកហើយ
ដោយស្ថានប័នរាជរដ្ឋាភិបាល ដៃគូអភិវឌ្ឍន៍
និងអង្គការមិនមែនរដ្ឋាភិបាលនានា ដើម្បីផ្តល់សេវាសង្គម ផ្តល់ជំនួយ និងការកំណត់អាទិភាពក្នុងការអភិវឌ្ឍន៍ផ្សេងៗ
ដោយប្រើប្រាស់នីតិវិធីផ្សេងៗគ្នា។ ការកំណត់អត្តសញ្ញាណគ្រួសារក្រីក្រ
ដោយប្រើប្រាស់នីតិវិធីផ្សេងៗគ្នានេះមានចំណុចអវិជ្ជមានមួយចំនួនដូចជា៖
-ទិន្នន័យដែលទទួលបានពីការកំណត់អត្តសញ្ញាណគ្រួសារក្រីក្រ
ប្រើប្រាស់បានតែស្ថាប័ន ឬអង្គភាពសាម៉ី តែប៉ុណ្ណោះ
-ទិន្នន័យដែលទទួលបានពីការកំណត់អត្តសញ្ញាណគ្រួសារក្រីក្ររបស់ស្ថាប័នរាជរដ្ឋាភិបាល
ដៃគូអភិវឌ្ឍន៍ និងអង្គការមិនមែនរដ្ឋាភិបាលមិនអាចប្រៀបធៀបគ្នាបាន
-ដំណើរការកំណត់អត្តសញ្ញាណគ្រួសារក្រីក្រ
អាចស្ទួនគ្នានៅក្នុងភូមិមួយ ឬ ឃុំមួយ
-ពុំមានធ្វើបច្ចុប្បន្នភាពទិន្នន័យឡើងវិញ
ដើម្បីពិនិត្យមើលអំពីនិន្នាការនៃគ្រួសារក្រីក្រ។
ការរៀបចំឡើងនូវអនុក្រឹត្យ ស្តីពីអត្តសញ្ញាណកម្មគ្រួសារក្រីក្រ
មានគោលបំណងដើម្បីជម្រុញឲ្យក្រសួង-ស្ថាប័នរាជរដ្ឋាភិបាល
និងដៃគូអភិវឌ្ឍន៍ផ្សេងៗ និងអង្គការមិនមែនរដ្ឋាភិបាលនានា
ប្រើប្រាស់ជាផ្លូវការនូវនីតិវិធីអត្តសញ្ញាណកម្មគ្រួសារក្រីក្រ
ដែលត្រូវបានបង្កើតឡើងដោយក្រសួងផែនការ។
សេចក្តីព្រាងអនុក្រឹត្យ
ស្តីពីអត្តសញ្ញាណកម្មគ្រួសារក្រីក្រមាន ៧ ជំពូក និង ២៣ មាត្រា មានគោលដៅកំណត់អំពីអត្តសញ្ញាណកម្មគ្រួសារក្រីក្រ
ដើម្បីផ្តល់ទិន្នន័យសម្រាប់ប្រើប្រាស់ក្នុងសកម្មភាពកាត់បន្ថយភាពក្រីក្រជូនប្រជាពលរដ្ឋកម្ពុជាស្របតាមគោលនយោបាយអភិវឌ្ឍន៍ជាតិ
និងយុទ្ធសាស្រ្តចតុកោណដំណាក់កាលទី២ របស់រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន។
III-បញ្ហាផ្សេងៗ ៖ អង្គប្រជុំពេញអង្គគណៈរដ្ឋមន្រ្តី
បានសម្រេចបញ្ជូន “សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀង
ស្តីពីការគ្រប់គ្រងការប្រើប្រាស់ហត្ថពលកម្មនៅរដ្ឋកាតា
រវាងរាជរដ្ឋាភិបាលកម្ពុជា និងរដ្ឋាភិបាលនៃរដ្ឋកាតា” ដើម្បីសុំសច្ចាប័នពីស្ថាប័ននីតិប្បញ្ញត្តិ។
កិច្ចព្រមព្រៀងនេះ មានទិសដៅស្វែងរកការគ្រប់គ្រង
ការប្រើប្រាស់ហត្ថពលកម្មកម្ពុជានៅរដ្ឋកាតា ស្របទៅតាមក្របខណ្ឌច្បាប់
និងបទបញ្ជាទាំងឡាយជាធរមានរបស់ព្រះរាជាណាចក្រកម្ពុជា និងរដ្ឋកាតា
ដើម្បីលើកទឹកចិត្តឲ្យផ្នែកឯកជននៃប្រទេសទាំងពីរបានចូលរួមកាន់តែខ្លាំងថែមទៀតក្នុងវិស័យផ្សេងៗ
នៃកិច្ចអភិវឌ្ឍន៍សេដ្ឋកិច្ច សង្គមកិច្ចប្រទេសទាំងពីរ
ស្របទៅតាមទិសដៅនៃសកលភាវូបនីយកម្ម។
-ដើម្បីទប់ស្កាត់ពលករចំណាកស្រុកដោយខុសច្បាប់
ដែលប្រឈមនឹងហានិភ័យខ្ពស់ បណ្តាលឲ្យខ្វះកម្លាំងពលកម្មក្នុងស្រុក សម្តេចតេជោនាយករដ្ឋមន្រ្តី បានផ្តល់អនុសាសន៍ឲ្យទីភ្នាក់ងារជាតិមុខរបរ
និងការងារសហការជាមួយបណ្តាក្រុមហ៊ុនវិនិយោគនានាធ្វើការផ្សព្វផ្សាយ
អំពីតម្រូវការកម្លាំងពលកម្មក្នុងស្រុក
ដែលកំពុងកើនឡើងជូនប្រជាពលរដ្ឋឲ្យបានជ្រាបទូលំទូលាយ។
-សម្តេចអគ្គមហាសេនាបតីតេជោ
ហ៊ុន សែន បានណែនាំដល់ឯកឧត្តម រដ្ឋមន្រ្តីក្រសួងយុត្តិធម៌ឲ្យពិនិត្យបានដិតដល់ចំពោះការអនុវត្តច្បាប់
លើករណីសំណុំរឿងបង្ករបួសស្នាម លើចៅក្រមនៃសាលាដំបូងខេត្តមណ្ឌលគីរី
ដោយផ្ទេរសំណុំរឿងនោះមកសាលាដំបូងរាជធានីភ្នំពេញ ហើយមិនត្រូវអនុគ្រោះ
ឬលើកលែងចំពោះអ្នកបង្កទោះជាអ្នកនោះជាអ្នកណា ឬកូនអ្នកធំណាឡើយ។
-សម្តេចតេជោនាយករដ្ឋមន្រ្តី បានក្រើនរំលឹកឲ្យអាជ្ញាធរដែនដីជុំវិញបឹងទន្លេសាប
និងស្ថាប័នពាក់ព័ន្ធពិសេសឯកឧត្តម ប៊ិន
ឈិន ឧបនាយករដ្ឋមន្រ្តី បន្តដឹកនាំអនុវត្តការទប់ស្កាត់បទល្មើសនេសាទ
និងភាពអនាធិបតេយ្យនៃការនេសាទ
ពេលត្រីកំពុងត្រូវ ព្រោះថាប្រជាពលរដ្ឋបាននិងកំពុងគាំទ្រការអនុវត្តបទបញ្ជាលេខ
០១ប.ប និងការកែទម្រង់ឡូត៍នេសាទ ដែលធ្វើឲ្យផលត្រីបានកើនឡើង។
-ក្នុងគោលបំណងធានាឲ្យមានកំណើនសេដ្ឋកិច្ចខ្ពស់ សម្តេចអគ្គមហាសេនាបតីតេជោ ហ៊ុន សែន បានណែនាំឲ្យឯកឧត្តមអគ្គទេសាភិបាលធនាគារជាតិនៃកម្ពុជាត្រួតពិនិត្យ
និងកែសម្រួលលុបបំបាត់ចោលឧបសគ្គណា ដែលធ្វើឲ្យរាំងស្ទះដល់ការផ្ទេរថវិកា
ពីបរទេសចូលមកវិនិយោគក្នុងព្រះរាជាណាចក្រកម្ពុជា
ទន្ទឹមគ្នានោះដែរអគ្គនាយកដ្ឋានគយ និងរដ្ឋាករ
អគ្គនាយកដ្ឋានកាំកុងត្រូល ក៏ត្រូវពិនិត្យកាត់បន្ថយលុបបំបាត់នូវភាពយឺតយ៉ាវក្នុងការផ្តល់សេវាសម្រាប់ការនាំចូល
និងនាំចេញទំនិញ ពីក្នុងព្រះរាជាណាចក្រកម្ពុជាផងដែរ។
អង្គប្រជុំគណៈរដ្ឋមន្ត្រី បានបិទសម័យប្រជុំនៅវេលាម៉ោង ១២ និង ៣០ នាទី។
រាជធានីភ្នំពេញ ថ្ងៃទី ០៩ ខែ ធ្នូ ឆ្នាំ២០១១