ព្រឹកថ្ងៃទី ២៦ ខែ ធ្នូ ឆ្នាំ ២០១១ សម្ដេចអគ្គមហាសេនាបតីតេជោ ហ៊ុន សែន
នាយករដ្ឋមន្ត្រី នៃព្រះរាជាណាចក្រកម្ពុជា
បានអញ្ជើញចុះពិនិត្យការដ្ឋាន វារីអគ្គិសនី អាតៃ ស្ថិតនៅក្នុងឃុំ
អូរសោម ស្រុក វាលវែងមានចំងាយ ១៧៥ គីឡូម៉ែត្រ ពីទីរួមខេត្តពោធិសាត់
ដែលកំពុងដំណើរការសាងសង់ដោយ ក្រុមហ៊ុន មកពីសាធារណៈរដ្ឋប្រជាមានិតចិន ។ គម្រោងវារីអគ្គិសនី អាតៃមានអានុភាព១២០មេហ្កាវ៉ាត់
មកដល់ ពេលនេះ ការស្ថាបនា សម្រេចបាន ៤៦% ហើយ នឹងគ្រោងដាក់ឲ្យដំណើរការនៅឆ្នាំ
២០១៣ ខាងមុខ ។ តម្លៃរួមនៃគម្រោងវារីអគ្គិសនីអាតៃដោយរួមទាំង
អនុស្ថានីយ៍ និងខ្សែបញ្ជូនដល់ ទីក្រុងពោធិសាត់ មានតម្លៃ២៥៥លាន៣សែនដុល្លាអាមេរិក
ដែលជាការវិនិយោគ ក្នុងរូបភាព B.O.T (សាងសង់ ប្រតិបត្តិការ និផ្ទេរ)
មានរយៈពេល៣៤ឆ្នាំក្នុងនេះរយៈពេលសាងសង់៤ឆ្នាំ
និងរយៈពេលធ្វើអាជីវកម្ម៣០ឆ្នាំ ។
ជាមួយនិងការកោតសរសើរ
ចំពោះការខិតខំទាំងឡាយទាក់ទិននឹងការសាងសង់វារីអគ្គិសនី អាតៃនេះ
ជាថ្មីម្ដងទៀតសម្ដេចតេជោនាយករដ្ឋមន្ត្រី បានថ្លែងអំណរគុណ
ចំពោះរដ្ឋាភិបាលចិន ដែលបានជំរុញ
និងគាំទ្រអ្នកវិនិយោគឲ្យមកធ្វើវិនិយោគនៅកម្ពុជា ។ សម្ដេចតេជោមានប្រសាសន៍បញ្ជាក់ថា ដោយមានការគាំទ្រពីរដ្ឋាភិបាលចិន
តាមរយៈឲ្យធនាគារផ្ដល់ទុនសម្រាប់គម្រោង វិនិយោគរបស់ក្រុមហ៊ុនចិននៅកម្ពុជា
មកដល់ពេលនេះ មិនមានការ
វិនិយោគរបស់ក្រុមហ៊ុនចិនណាមួយនៅកម្ពុជាបរាជ័យនោះទេ ។
សម្ដេចតេជោមានប្រសាសន៍ថា តាមរយៈនៃគម្រោងវារីអគ្គិសនីអាតៃ ដែលស្ថិតនៅក្នុងតំបន់ជួរភ្នំក្រវ៉ាញ ជាតំបន់ធ្វើសមាហរណកម្ម នេះបង្ហាញកាន់តែច្បាស់ នូវតម្លៃនៃសន្តិភាព និងការបង្រួបបង្រួមជាតិ ។ ព្រោះថា បើគ្មានសន្តិភាព និងការបង្រួបបង្រួមជាតិ ដែលកើតចេញពីនយោបាយឈ្នះឈ្នះនោះទេ ការកសាងវារីអគ្គិសនីនៅបន់ព្រៃភ្នំបែបនេះពិតជាមិនអាចធ្វើទៅបានឡើយ ។
សម្ដេចតេជោមានប្រសាសន៍ថា តាមរយៈនៃគម្រោងវារីអគ្គិសនីអាតៃ ដែលស្ថិតនៅក្នុងតំបន់ជួរភ្នំក្រវ៉ាញ ជាតំបន់ធ្វើសមាហរណកម្ម នេះបង្ហាញកាន់តែច្បាស់ នូវតម្លៃនៃសន្តិភាព និងការបង្រួបបង្រួមជាតិ ។ ព្រោះថា បើគ្មានសន្តិភាព និងការបង្រួបបង្រួមជាតិ ដែលកើតចេញពីនយោបាយឈ្នះឈ្នះនោះទេ ការកសាងវារីអគ្គិសនីនៅបន់ព្រៃភ្នំបែបនេះពិតជាមិនអាចធ្វើទៅបានឡើយ ។
ដោយសារកំណើនប្រជាជនចេះតែកើនឡើងនៅតំបន់នេះ
និងម៉្យាងទៀត ដោយតំបន់នេះ ជាតំបន់ដែលត្រូវការពារធម្មជាតិ និងដែនជំរកសត្វព្រៃ
ដែលទទួលបានការកោតសរសើរ និងទទួលស្គាល់ក្នុងកម្រិតពិភពលោកនោះ សម្ដេចតេជោនាយករដ្ឋមន្រ្តី
បានដាក់ចេញ នូវបទបញ្ជាម៉ឺងម៉ាត់ដល់អាជ្ញាធរ និងស្ថាប័នពាក់ព័ន្ធ
ដើម្បីការពារតំបន់នេះ ។
ទី១
អាជ្ញាធរដែនដី ក្រសួងបរិស្ថាន និងស្ថាប័នពាក់ព័ន្ធ
ត្រូវធ្វើការកំណត់ដីភូមិករ ដីកំពុងបង្កបង្កើនផលបច្ចុប្បន្ន
ឲ្យបានច្បាស់លាស់ ដោយអនុវត្ត តាមច្បាប់ជាធរមាន
ដោយគ្រួសារនីមួយៗមានសិទ្ធិ កាន់កាប់ដី មិនលើសពី៥ហិកតាឡើយ ។
ទី២ ធ្វើ
មោឃភាព ចំពោះបង្កាន់ដៃ ឬលិខិតស្នាមផ្សេងៗ ដែលបានប្រើប្រាស់
និងកាន់កាប់ដីធ្លីខុសច្បាប់ ក្នុងតំបន់ការពារធម្មជាតិ ។
ទី៣
អាជ្ញាធរគ្រប់លំដាប់ថ្នាក់ អង្គភាពពាក់ព័ន្ធត្រូវបញ្ឈប់ការចេញប័ណ្ណ
ឬការបញ្ជាក់ការកាន់កាប់ដីធ្លី ការលក់ដូរ ការធ្វើ អំណោយ ការផ្ទេរ
ការជួលដីខុសច្បាប់ ក្នុងតំបន់ការពារធម្មជាតិ ។
និង ទី៤
កងកម្លាំងប្រដាប់អាវុធ អាជ្ញាធរដែនដី និងស្ថាប័ន ពាក់ព័ន្ធ
គ្រប់លំដាប់ថ្នាក់ ត្រូវសហការជាមួយក្រសួងបរិស្ថាន ក្រសួងកសិកម្ម
រុក្ខាប្រមាញ់ និងនេសាទ ត្រូវទប់ស្កាត់ និងលុបបំបាត់
ការកាប់បំផ្លាញព្រៃឈើ ការរុករានទន្រ្ទានយកដី ការបរបាញ់សត្វព្រៃ
ដោយធានាដល់ការ ការពារអភិរក្សព្រៃឈើ និងធនធានធម្មជាតិក្នុង
តំបន់ការពារ ។
ដោយយោងតាមរបាយការណ៍របស់ក្រសួងធនធានទឹក
និង ឧតុនិយមឲ្យដឹងថា អាកាសធាតុនៅ តាមតំបន់ខ្លះនៅក្នុងប្រទេសកម្ពុជា
ដូចជានៅតំបន់ភ្នំដងរែកសីតណ្ហភាពបានចុះដល់ ១២ អង្សា និង
នៅតំបន់ជួរភ្នំក្រវាញសីតុណ្ហភាពចុះដល់ពី ១៤ ឬ ១៥ អង្សា សម្តេចតេជោនាយករដ្ឋមន្ត្រីមានប្រសាសន៍ថា
សីតុណ្ហភាពដែលកំពុងធ្លាក់ចុះបែបនេះបើសិនជាមិនប្រុងប្រយ័ត្នចំពោះមនុស្សចាស់ទេគឺ
គ្រោះថ្នាក់ខ្លាំងណាស់។ សម្តេចតេជោ
មានប្រសាសន៍ថា ខ្ញុំសូមអំពាវនាវចេញពីទីនេះទៅគ្រប់ទី កន្លែងទាំងអស់
សូមបង្កើនការយកចិត្តទុកដាក់ជាមួយនឹងមនុស្សចាស់ ព្រោះជាធម្មតាទោះជាបុរសឬ
ស្ត្រីក្តីគឺចាញ់រងារខ្លាំងណាស់។
សម្តេចតេជោនាយករដ្ឋមន្ត្រីមានប្រសាសន៍ថា
យើងមិនគប្បីឲ្យមានបញ្ហា
ដែលមនុស្សចាស់ឬក្មេងស្លាប់ដោយសារតែធាតុអាកាសត្រជាក់ទេ។ កន្លងទៅ
មានគ្រោះទឹកជំនន់ យើងមិនបណ្តែតបណ្តោយឲ្យប្រជាពលរដ្ឋណាម្នាក់ស្លាប់ដោយដាច់បាយទេ
ឥឡូវនេះយើងក៏មិនត្រូវឲ្យប្រជាជនយើងណាម្នាក់ស្លាប់ដោយសារការរងារនេះដែរ។
សូមបញ្ជាក់ថា ស្ថានីយ៍វារីអគ្គិសនីអាតៃ
ដែលកំពុងសាងសង់ស្ថិតនៅកណ្ដាលទ្រូងព្រៃនៃជួរភ្នំក្រវ៉ាញនាមាត់ស្ទឹងអាតៃតំបន់ត្រីកោណ
រវាងខេត្តពោធិសាត់ កោះកុង និងកំពង់ស្ពឺ ។ បន្ទាប់ពីសាងសង់រួចវារីអគ្គិសនីអាតៃ
ដែលមានអានុភាព១២០មេហ្កាវ៉ាត់នេះ នឹងបញ្ជូនទៅចែកចាយប្រើប្រាស់នៅខេត្ត
ពោធិសាត់ ដែលមានចម្ងាយ១៧៥គីឡូម៉ែត្រពីទីតាំងវារីអគ្គិសនី ហើយសល់ពីនេះនឹងបញ្ជូនបន្តទៅទីក្រុងភ្នំពេញ
និងខេត្តបាត់ដំបង ៕