ព្រះរាជាណាចក្រកម្ពុជា
ជាតិ សាសនា ព្រះមហាក្សត្រ
សេចក្តីថ្លែងការណ៍រួម
---------
សិទ្ធិស្របច្បាប់របស់សមាជិកក្រុមប្រឹក្សាឃុំ
សង្កាត់ ត្រូវបានគំរាមដកហូតដោយលោក សម រង្ស៊ី
បណ្តាញប្រជាជនកម្ពុជាដើម្បីសន្តិភាព(CPNP) ដែលមានសមាជិកអង្គការមិនមែនរដ្ឋាភិបាល សមាគម និងសហជីពនៅកម្ពុជាចំនួន
១៤៩ សូមទាញការចាប់អារម្មណ៏ពីសាធារណជន ជាតិ និងអន្តរជាតិ
ឱ្យបានជ្រាបថា
សមាជិកក្រុមប្រឹក្សាឃុំ សង្កាត់ របស់គណបក្សសម
រង្ស៊ី អាចនឹងត្រូវបានគំរាមទាំងបង្ខំឱ្យស្បថថា ត្រូវតែបោះឆ្នោតឱ្យគណបក្សសម
រង្ស៊ី ហើយសិទ្ធិសេរីភាពក្នុងការបញ្ចេញមតិរបស់ពលរដ្ឋត្រូវទទួលរងនូវការបំភិតបំភ័យតាមរយៈការព្រមានដកហូតទូរស័ព្ទដៃពីសមាជិករបស់ខ្លួនទាំងអស់នៅថ្ងៃទី
២៨ ខែមករា ឆ្នាំ ២០១២ខាងមុខ
មួយថ្ងៃមុនពេលបោះឆ្នោតជ្រើសតាំងសមាជិកព្រឹទ្ធសភានឹងមកដល់។
តាមប្រភពព័ត៌មានក្រៅផ្លូវការដែលគួរឱ្យជឿទុកចិត្តបានផ្តល់ដោយសមាជិករបស់គណបក្សសម
រង្ស៊ី បានបង្ហើបឱ្យដឹងថា នាពេលថ្មីៗកន្លងទៅនេះ លោក សម រង្ស៊ី
ប្រធានគណបក្សប្រឆាំងបានបញ្ជាយ៉ាងដាច់អហង្កាតាមទូរស័ព្ទពីក្រៅប្រទេសមក ដោយតម្រូវឱ្យសមាជិកក្រុមប្រឹក្សា ឃុំ សង្កាត់ របស់ខ្លួនទាំងអស់ស្បថថា « ត្រូវតែបោះឆ្នោតឱ្យគណបក្សសម
រង្ស៊ី ហើយទូរស័ព្ទដៃនឹងត្រូវតែដកហូតទាំងអស់ នៅថ្ងៃទី២៨ ខែ មករា
ឆ្នាំ២០១២ ខាងមុខនេះ មួយថ្ងៃមុនការបោះឆ្នោតជ្រើសតាំងសមាជិកព្រឹទ្ធសភា
ដើម្បីបញ្ជាក់ពីភាពស្មោះត្រង់ចំពោះបក្ស»។
ទង្វើរំលោភបំពានច្បាប់ទាំងកំរោលរបស់លោកសម
រង្ស៊ី ទៅលើសមាជិកក្រុមប្រឹក្សាឃុំ សង្កាត់របស់ខ្លួនបែបនេះ បណ្តាញប្រជាជនកម្ពុជាដើម្បីសន្តិភាព(CPNP)យល់ឃើញថា៖
១‑ការបង្ខំឱ្យស្បថ
ចាត់ទុកថា ជាអំពើផ្តាច់ការរបស់មេបក្សប្រឆាំង លោក សម រង្ស៊ី និងជាការរំលោភសិទ្ធិមនុស្ស ពីព្រោះការសម្រេចចិត្តគាំទ្រ
ឬមិនគាំទ្រទៅលើបុគ្គល ឬគណបក្សណាមួយជាសិទ្ធិរបស់ប្រជាពលរដ្ឋ ហើយសិទ្ធិនេះ ត្រូវបានធានាដោយរដ្ឋធម្មនុញ្ញមាត្រា៣៨
ដែលចែងថា ច្បាប់ការពារអាយុជីវិត កិត្តិយស
និងសេចក្តីថ្លៃថ្នូររបស់ប្រជាពលរដ្ឋ។ ការបង្ខិតបង្ខំ
ត្រូវបានហាមឃាត់ជាដាច់ខាត។
២‑ជាទង្វើផ្ទុយពីគោលការណ៍លទ្ធិប្រជាធិបតេយ្យ
ពីព្រោះអំណាចទាំងអស់ជារបស់ប្រជាពលរដ្ឋ ដោយប្រជាពលរដ្ឋ
និងដើម្បីប្រជាពលរដ្ឋ មិនមែនជារបស់បុគ្គល
ឬក៏ត្រូវបានបង្ខំទាំងបំពានដោយបុគ្គល ឬក្រុមណាមួយឡើយ។
៣‑ការដកហូតទូរស័ព្ទដៃពីសមាជិករបស់ខ្លួន
គឺជាការដកសិទ្ធិក្នុងការបញ្ចេញមតិ
និងមិនទុកចិត្ត ដោយ ភាពស័ង្សយ
ទៅលើសមាជិករបស់ខ្លួន។
អំពើបែបនេះ
នឹងអាចនាំឱ្យសមាជិកទាំងនោះមានការព្រួយបារម្ភ
ដោយសិទ្ធិនៃការទំនាក់ទំនងគ្នាត្រូវបានកាត់ផ្តាច់ដូចរបបប៉ុលពត។
បណ្តាញប្រជាជនកម្ពុជាដើម្បីសន្តិភាព
(CPNP) យល់ឃើញថា ការគំរាមកំហែងដោយបង្ខិតបង្ខំ
និងការព្រមានរបស់លោកសម រង្ស៊ី ទៅលើសមាជិកក្រុមប្រឹក្សាឃុំ សង្កាត់របស់ខ្លួន
ដោយពុំឈរលើមូលដ្ឋានប្រជាធិបតេយ្យ និងការគោរពសិទ្ធិមនុស្ស គឺជាអំពើក្បត់នឹងឆន្ទៈរបស់ប្រជាពលរដ្ឋដែលជាម្ចាស់ឆ្នោត។
